Traffic stand in khawpi cheimawi
Lamka, Aug-17:‘Environment Friends’ pawlin Lamka Police station kong Tipaimukh Road- Tedim Road junction ah Traffic stand thak a bawl ua vanzat ding Mumbai apan hongtung in nasep zousiang phial uhi. Tuni’n sticker belh in rong nuh uh a, traffic stand thak etlawm in Lamka khawpi cheimawi mahmah hi. Ni 2/3 nungin official a hontheih hiding in kigen a, a tunglam a sticker te ah ‘Environment Friends’ kichi hoihtak in kibelh a, anuailam ah ‘CCpur Traffic Stand’ chih kigelh hi.
Mahajon Kampu Gangte Road
Lamka, Aug-17: Compound Veng, D.Phailian leh Chengkawnpang kikawmtuahna ding lampi tuni zinglam dak 8:00 in Pastor T.C Goupi, GBA in hongkhia in Pathian kiang ah thumna in lan hi. Aman agenna ah Mahajon Kampu Gangte Road kihongthak in azawng, ahau, genthei leh liangvaite adia damna leh hausakna atut deihthu gen uhi.Khupthang, Social Worker in a genna ah kikawmtuahna lampi poimawh mahmah ding Mahajon Kampu Gangte’ innkuante’n mipi adia athawh uh kipahthu gen a, mipi in huai lamlian kembit chiat ding in ngen hi.
Children Ward tunglam plaster-na chimkhia
Lamka,Aug-18:District Hospital building bawltu contractor in quality leh standard bangmah maintain lou a a bawlziak ahi ngei ding a, bangzah veihiam atung lam plaster-na kichimkhia ward sung leh lupna tung khong kiakkhum ngeita a,himahleh vangphat huaitakin mihing kiak khum nailou tadih hi. Hibang kalah zan nitak dak 8.00 velin Children’s Ward a varendah (corridor) tung a plaster-na feet 3 asau leh feet 2 vela lian kichimkhia a,Ward sunga tazoulou naupang damlou ahunkhop corridor a lumte deng khelou zenzen hi. Thiltung deihhuailou a tunma ngeiin akisaipihte’n pan alak uh poimawh hi’n kilang hi.
One Day Political Awareness Program
Lamka, Aug-17: Hill Peoples’ Forum-Manipur (HPF-M) makaite’n tuni sunnung in Nehru Marg a Zomi Council Office ah Press-te kimuhpih in Hill Peoples’ Forum –Manipur phuhkhiat dan, tup leh ngim taklang kawm in Aug 19, 2013 in Rengkai Community Hall a ‘One Day Political Awareness Program’ om hun ah mipi tamtheipen telding in chial uhi. Dr R.Sanga, Chairman , HPF-M in agenna ah singtangmite tawndan, gam leh leitang, leitang hausakna ban ah singtangmite khualna ziakin July 13, 2013 in Sadar Hills a Haipi Village ah Hill Peoples’ Forum- Manipur kichi kiphutkhia hi’n gen hi. HPF-M ah Chairman in Dr R.Sanga; Vice Chairman in V.L Mawia leh Jammang Baite; Secy ah Thiensei Haokip; Joint Secy ah Letmang Haokip leh Roland Haokip; Finance-cum-Treasurer ah K.G Tungnung leh Secy Inf ah Lalthralien hi’n gen hi. Rengkai Community Hall ah Aug 19, 2013 zinglam dak 11:00 in “One Day Political Awareness Programme” omding a, resource person in Dr John Pulamte leh K.Guite in pang ding uh a, thupi tuamtuak pansan in sinsak ding uhi.
Lunminsiam Guite theihgigena ‘Album’
Lamka, Aug-17: Zenhang Lamka a VK Montessori School campus ah tuni in ‘SQUAWK BOYS’ Teenage Love kichi (late) Lunminsiam Guite theihgigena dinga Video Album kibawl honna om hi. Huai ah Chief Guest apang Holthang Mate, Principal, Ideal School in Album hongkhia a, Minsiam Guite in thil hoihlou doudal in gam-le-nam adia hinna taan(lost) hi a genkawm in Album copy khat Rs. 5,000 in leisak hi. Huai hunah Guest of Honour in V. Khaikhanmung, MDC pang a, Hang Shyan Thang, Secy, GAD/ZRO leh mi poimawh tuamtuam banah alawm-le-vualte leh mipi tamtak in uap uhi. Lunminsiam Guite bel June 30, 2013 nitakin Khuga Dam video clip tawh kisai a Police Station a buaina ah kapliam nungin Shija Hospital ah July 6, 2013 in si hi.
KUGAA 1st Gospel Icon 2013 kipan
Lamka, Aug-17: Kuki Gospel Artist Assn(KUGAA) ‘1st Gospel Icon 2013’ kichi tuni’n B.Vengnuom Community Hall, Moreh; Letan leh Kangpokpi ah kipan hi. B.Vengnuom Community Hall ah Sugnu area-te leng tel uh a, Rev Nguljathang Khongsai in 1st Gospel Icon 2013 hongkhia in Pathian kiang ah thumna in lan hi. Tuni program hun ah KUGAA member 40 val tel uhi.
Tuitha-lui in inn 10 val hihbuai
Lamka, Aug-17: Tulai a vuahzuk sek ziak banah leh Khuga Dam canal apan tui khahkhiak ahih ziakin zan zinglam dak 8:00 vel apan Tuitha-lui khang a, Zomunnuam khua ah innkuan 10 val hihbuai hi. Huai khawsung mite gendan in Tuitha-lui let in a khawsung uah tui vungdim mai a, Tuithalui dung a inn om 10 val hihbuai a, feet 200 kimkawt vel sungah feet 2 vel tan tui vungdim in inn pua a pawtkhiat hun ah tui pal ngai hi’n gen uhi.
Pherzawl ah Independent Day lopna
Lamka, Aug-17:Pherzawl ADC HQ ah in Aug 15, 2013 in Independence Day lopna om hi. Huai ah Chief Guest in Soiminlian Lengen, MCS, A/C to DC CCpur pang a, Lalhmangpui Infimate, MDC/ Parbung inleng huai hun uap hi. I-Day zatna ah HYA ten Cultural dance show uh a, school tuamtuam apan parade contingent hunkhop March past ah pai uhi. Pherzawl ah Freedom Fighter-te theihgigena in football tournament leng om hi.
Festival of Peotry Reading om
Lamka, Aug-17: Sahitya Akademy, New Delhi leh Meitei Society/CCpur in tuni in IB Road a Synod Hall ah “One Day Festival of Peotry Reading” nei uh a, Prof H.Behari Singh, Convenor, Manipuri Advisory Board, Sahitya Akademy, New Delhi khuallian apang in hong a, Functional President in H.Kula Meitei, President Meitei Society/CCpur pang hi. Huai ah Prof LS Gangte leh Prof L.S Pangamte, Secy Hmar Literature Soceity te’ makaihna in Tribe tuamtuam te’n peotry reading nei uhi.
ZSP Freshers’ Meet-cum-Election
Lamka, Aug-17: Zou Sangnaupang Pawlpi(ZSP) Rayburn Unit te’n tuni in Zo Veng a Zogal Memorial Hall complex ah Freshers’ Meet-cum- Election 2013 nei uhi. Huai hun ah Khamthang, Contractor khuallian in pang a, Chief Host in Sianpiahthang pang hi. Lianzagou Zou in student-te hanthawnna thu gen a, Rev Awnkhankhup, Moderator, ZPCS in Freshers 32 te thumsak hi.
Pastoral Ministry training pailel
Lamka, Aug-17:Presbyterian Church of India(Reformed) saptuam sunga Pastor-te adingin tuni apan Aug 21, 2013 tan daih ding ‘Training on Pastoral Ministry & Homelitics’ kipan hi. New Lamka a PCI(R) Head Office a huai training hunah Rev. Will Hesterberg, ITEM, USA, in saptuam makaite sinsak a, training hunsungin saptuam a Pastor-te leh a zite uh 60 vel tel uhi. Tuni in Rev Khen P Tombing, Chief Co-ordinator, Rev G Suanzalam, Co-ordinator banah makai poimawh tuamtuam leng tel uhi.
‘One Day Community Workshop’
Lamka, Aug-17: Hill Town Community Hall, Thangzam Road ah August 20, 2013 zinglam dak 10.00 akipan Kontribute & DNP+ ( Delhi) saina in ‘One Day Community Workshop on HCV’ om ding a, Resource person in Dr. Zamlienmang leh Loon Gangte, Regional Co-ordination ITPC pang ding uhi.
IMPHAL NEWS
Highway Restaurant ah bomb puak
Imphal, Aug-17: Imphal East district sung Heingang P/S biala om Mantripukhri a National Highway lampi gei a Restaurant lun deuh “Rout 39” kichihna mun ah tuni nitak dak 6:48 vel in bomb puak a, huai Restaurant as security guard Md. Farib of Lilong Turel Ahanbi liamzek mahleh a dinmun lauthong huailou hi’n kigen hi. Akigendan in meltheihlouh pasal 2 in ‘Route 39’ restaurant a reception counter gei ah packet(van) khat nusia in two-wheeler in taikhia uh a, restaurant kim leh kiangah CCTV camera koih in om mahleh thiltun hun laitak in CCTV camera function louh ziakin pasal 2 te’ kuate hi uhiam chih theih hilou hi’n gen uhi.
Court in bail theihlouh din order suah
Imphal,Aug-17: Lamsang Assembly Constituency sung Polling Station no.17/11 a Fair Price Shop(FPS) Agent leh S.K.Oil Sub-Dealer in Mayang Langjing Taning area a BPL Ration Card holders khenkhatte lakah Targeted Public Distribution System nuaia essential items tuamtuam a hawmkhiaklouh ziakun Judicial Magistrate First Class, Imphal in bail theihlouh ding in matna ding ‘warrant of arrest’ suah hi. Yumnam Ibochou, Takhellambam ongbi Sanatombi leh Sagolshem ongbi Leiren in Fair Price Shop Agent W Mangibabu leh S.K.Oil dealer T Bhubon tung ah complaint bawl uh a, amau DC/Imphal West in a bawl BPL ration card nei mahle uh kum 2008 akipan in FPS agent BPL atang pe utlou hi’n Court ah thu tun uhi. JMIC/Imphal court in Aug 16, 2013 in Non-bailable Warrant of Arrest suah a, OC Lamshang Police in semkhe dingin thupia
Irrigation schemes honkhiak in om
Imphal, Aug-17: K. Meghachandra, Parliamentary Secretary( Minor irrigation) in tuni’n Assembly constituency 4 ah River Lift Irrigation (RLI) schemes 6 hongkhia hi.Huaite Wabagai leh Thoubal A/C ah RLI scheme 2 tuak banah Hiyanglam leh Khangabok A/C ah 1 tuak hong hi. K. Meghachandra in a genna ah Accelerated Irrigation Benefit Programme (AIBP) tungtawn in Ministry of Water Resource, Govt of India tungtawn in na sepkhiak ding hi’n gen a, Centre in 90% leh state in 10% funding bawl ding hi’n gen hi. RLI schemes te’ enzui dingin Assembly Constituency tengah Water User Assn bawlkhiak hiding a, A/C teng a om MLA-te’ etkaina nuai ah om ding chi hi. Manipur a food grains piangte’ kia in Manipur a kitoudelh theihna ding in Green revolution patkhiak a om a tangtun theihna dingin RLI schemes 20 banah dam 1 hon hi’n gen hi. M. Shyambabu,Chief Engineer/Minor irrigation in RLI scheme kichi amah leh amah kitoudelh theihna ding in main kharif season hun ah nominal tax dan in Rs. 386 leh Rabi crop season hun ah Rs. 600 lak hiding a, hiai in hun hong pai zel dingah khantouhna tutbeh ding a, huai ziakin mipite’n a huntaka tax pechiat din leng ngen hi.
Crisis Management Plan phutkhe ding
Imphal, Aug-17 : Manipur a Cyber attacks leh Cyber terrorism tawh kisai buaipih ding in tunung sawtlou in Manipur Government in ‘Crisis Management Plan’ kichi phutkhe ding hi’n kigen hi. Huai Crisis Management Plan bel Department of Information and Technology tungtawn a phuhkhiak hiding a, tua dingin Dept. of Information Technology te’n Home deptt ah project tawh kisai a action plan om thei dingte amin uh tawh submit dingin theisak khin uhi. Hiai thu bel Chief Secretary leh Dept. of Information Technology te’ a kimuhna ua genkhawm a om hidan in kigen hi.
Lampi hoihlouh ziakin khaktan uh
Imphal, Aug-17: Ima Panthoibi Street Vendors Union pawlin tuni sun dak 12:30 akipan in Dingku Road khaktan uhi. Thusuak in a gendan in huai lampi State government adia poimawh mahmah hi a, himahleh govt in ngaihsak lou in hun sawtkuam akipan huai lampi kise nak mahmah hi. Ahihhangin govt in bawlhoih sawm tuanlou ua, tua ziakin Ima Panthoibi Street Vendors Union pawlte’n tuni apan khaktan uh a, ni 10 sunga bawlhoih dingin govt ah phut uhi. Huai lampi hoihlouh ziakin gari accident leng tam a, huaiziakin, state govt in ni 10 sunga a bawlhoih kei ualeh Oil Tankers leh Inter-State Bus-te leng taisak lou ding uh hidan in gen uhi.