Disaster Management adia tukum a zat ding Rs. 40 lakh lel bikhiah, Education, Power leh Health Sector a minpu lel suak
Imphal, August-16: Chief Minister O. Ibobi in public function tuamtuam ah a govt in Education sector, Power sector leh Health sector lam ngaih poimawh hiding chi’n gensek mahleh tu financial year adia Budget etin a minpu lel suak a, huai deptt te adin sum tamlou chikchik bikhiah a om hi’n kigen hi.Tu financial year adia Budget Rs. 3650 crores bikhiah ahihna lakah Education sector adingin Budget pumpi lak apan 2% bikhiah hi a,Power sector adin 2% mah bikhiah ahihbanah Health sector ading in 5% lel bikhiah hi a, MAHUD ading in bel Budget pumpi lak apan 9% bikhiah in om chih ahi hi.Zinling mulkimhuai leh hattak om theihna ding hi a kigen Manipur ah a kisaipih Relief & Disaster Management deptt ading in Rs. 40 lakhs kia Budget ah bikhiah a om hi’n kigen hi.Tukum a Manipur in a sum zat ding Budget lak ah MAHUD ading in Rs. 319.28 crore bikhiah hi a,Manipur Development Society(MDS) ading in Rs. 35 crore bikhiah in om hi.

Huai dan in Budget pumpi laka 9% vel MAHUD in tangkha ding a, MDS a bel 1% lel hipha hi. Huailou in Non-Lapsable Central Pool of Resources(NLCPR) leh North Eastern Council(NEC) fund Rs. 141.45 crores leng deptt piakkhiak omlou in Planning deptt khut a om hi’n kigen hi. Manipur ah natural disaster tamtak tuakthei ding in Seismic Zone a om himahleh Manipur budget ah Relief and Disaster Management ading in Rs. 40 lakh lel bikhiah in om phing chih ahi hi.

Manipur in tukum sunga zat dingin Planning Commission akipan Plan Outlay a ngah Rs. 3650 crore tuma zeka sectoral allocation bikhiah thaknawn dungzui in Centre in 100% a sen RKVY scheme adin Rs. 100.45 crore bikhiah in om hi. Forest and Wild Life adin Rs. 103.87 crore(3%), Major and Medium Irrigation adin Rs. 643.10 crore(18%), Roads and Bridges adingin Rs.141.86 crore(4%), Special Development Fund ading Rs.222.50 crore(6%), Special Central Assistance adin Rs.300 crore(8%) tel hi. Forest and Wild Life ading a sum bikhiahzah lak ah Central Sponsored scheme a State matching component dan in Rs 39 crore telsak in om hi.

District Council(Hills) ading Rs. 132.75 crore, Public Works Department ah Rs.102 crore, Flood Control adingin Rs.155 crore, Planning deptt ah Rs.83.89 crore, Sericulture ah Rs.68.50 crore, Minor Irrigation adin Rs.78.80 crore, BRGF ah Rs. 56.54 crore, MGNREGS adingin Rs. 50 crore, MLA Local Area Development Fund ading in Rs. 37.50 crore, Youth Affairs and Sports ah Rs. 33.18 crore, Command Area Development adingin Rs.33 crore, Ecology and Environment adingin Rs. 11 crore tel hi. MLA Local Area Development fund lak ah kum 2011-12 a back-log omlai Rs.7.50 crore leng tel hi. MGNREGS sum lakah Rs. 20 crore leng backlog omlai state share hi a, Rs. 30 crore bel tukum adia matching hi’n kigen hi. 

Tukum Budget lakah Education sector nuaia School Education adingin Rs. 58.87 crore bikhiah hi a, Higher Education sector adin Rs. 14.50 crore kia bikhiah in om hi. School Education sector adia Rs. 58.87 crores laka Rs. 40.87 crore chih bel SSA adin Rs 32 crore, RMSA adin Rs 5.17 crore, Mid-day meal adingin Rs 2.59 crore leh ICT adin Rs. 1.11 crore zel state matching share dinga koih a om hi’n kigen hi. 

Medical and Public Health Rs. 178.61 crore(6%), Welfare of Schedule Tribe, Schedule caste leh OBC ading in Rs.50.67 crore bikhiah hi a, Social Security and Social Welfare a dingin Rs.54.02 crore, Arts and Culture adin Rs. 19.07 crore, Tourism adin Rs.3.50 crore, Technical Education adingin Rs. 2.50 crore tel hi. CAF & PD adin Rs. 86.80 lakha, Adult Education adin Rs. 60 lakh leh Relief and Disaster Management adin Rs. 40 lakh lel bikhiah in om chih ahi hi.

Regional Director, NERC/SAI in Lamka pha
Lamka, Aug-16: Dr Subhash Basumatary, Regional Director, NERC/Sports Authority of India (SAI) in tuni in Lamka hongpha a, New Lamka a TP Sports complex enkhia hi.Imphal akipan in Kh.Lokendro Singh, Volleyball Coach/SAI; K.Jadumani Singh, Co-ordinator/SAI leh Th. Ibotombi Singh, Centre inchage, Centre of Exellence, NERC/SAI te’n hong zui uh a, New Lamka Y/C makaite’n ana vaidawn uhi. 

Dr Subhash Basumatary in agenna ah G.D Thomson, General Director, SAI in New Lamka PT Sports complex tawh kisai thil omdan report kimtak kaikhawm ding a mawhpuakna a piakziak in hong enkhia hi’n gen hi. NLYC in Sports complex adia proposal tuamtuam a piakte tukha tawp in Governing Body meeting hun ah agenda 1 hidin gen a, PT Sports complex in facility tuamtuam a neih dungzui in project hongpai ding hi’n gen hi. Program banga a paitheih leh tu financial year sung PT Sports complex ading project bangzah hiam SAI in patsawm hi’n gen hi. Manipur singtanggam a tuailai talent hoih taktak neite displine tuamtuam a training theihna ding uh SAI in ngai poimawh hi’n gen hi.Dr Basumatary in Sports complex a football playground, Youth Hostel ban ah Boxing Erena building enkhia hi.

SP in Tourny leh Exhibition hong ding
Lamka, Aug-16: CDSA saina in Lamka Public Ground ah Aug 17, 2013 sunnung in L.Mangkhogin Haokip, IPS, SP/CCpur in khuallian apang in ‘(late) Khaikhanlian Dist 1st Divn League 2013’ leh Dist Sports Assn./CCpur v/s Dist Sports Assn.Tamenglong te friendly football match kimawl ding hongkhe ding hi. Huai hun ah Guest of Honour in T.Sumlianthang, MDC & President, Veteran Sports Assn./CCpur pang ding a, Functional President in Thangkhosuanmung Guite, Chief of Hiangtam Lamka pang ding a,Chief Host in Seithang Haokip, Social worker pang ding hi. Ist Divn League opening match ah MSYC leh RACC kimawl ding uhi.

DLCC meeting om ding
Lamka, Aug-16: Ms Jacintha Lazarus, IAS, DC/CCpur makaihna in Aug 21, 2013 zinglam dak 11:00 in DC’s office a BRGF Resource Centre ah Dist Level Co-ordination Committee(DLCC) meeting om ding a, huai ah deptt tuamtuam in a nasepkhiakte uh genkhawmna leh development lam nasepna tawh kisai thu poimawh tuamtuam omte genkhawm ding uh hi’n kigen hi. DLCC meeting ah Dist Level Officer(DLO) teng telchiat ding in BO, HQ/DC’s office in theisak hi.

Meltheihlouhte’n sum leh gari gumang
Lamka, Aug-16: Police apan kizadan in Aug 14, 2013 nitak dak 7:00 velin meltheihlouhte’n Tangnuam khua a NG Thang Ngaihte s/o Rilsutrang tenna inn amau omlouh laitakin kongkhak hihsia in luh uh a, inn sungah Brief case a kikoih sum Rs 2,70,000/- a gukmang ban uah in Pulser bike 150- DTSI (No. MN-02A/4167) ‘black colour’ Engine No.DHGBUC60207, Chessis No. MD2DHDHZZUCC78863 leng gumang uhi. Inn neitu in Police ah report bawl a, Police te’n FIR No. 71(8) 2013 CCP-PS U/S 380/34 IPC registered in gutate matkhiak sawmin panla uhi.

Thanlon ah Independence Day lawhching

Lamka, Aug-16: Thanlon sub-divn mipite’n zan in Thanlon Public Ground ah Independence Day 2013 lopna nei uh a, Chief Guest in S. Thienlaljoy Gangte, MCS, SDO/SDM, Thanlon pang a, aman National Flag kaipalh in St. Xavier School leh Thanlon Govt. High School apan parade contingent 7te apan salute la hi. Huaizawh in student te’n National Anthem sa uh a, St. Xavier School te’n Choerography leh Bamboo dance lahna nei uhi. Huailou in Khuongjang, Tongkham, Thanlon V/A Secy, MO/PHC Thanlon, OC/Thanlon PS kiangah red blanket piak hi uh a, parade atel contingent-te leh ZYA Thanlon kiangah sports item piak hi uhi. SDO/SDM sponsored-na tawh ZYA Thanlon in I-Day Football Tournament a sai uah team 4 kimawl uhi.

Postmortem bawldi’n Imphal ah 
Lamka, Aug-16: SBI/CCpur branch a Security guard a om Ist IRB personnel ( No.1120055789) P.Basanta Singh(28) s/o P.Kananjoy Singh of Athokpam Leikai, Thoubal zan nitak dak 8:10 velin a omna room(barrack) sungah amah leh amah Self Loading Rifles (SLR) zangin kikaplum a, Police te’n zan nitak mah in siluang la in Dist Hospital morgue ah koih uhi. P.Basanta Singh’ luang Imphal a post-mortem bawlding in puakkhiat hi a, sihna tawh kisai in Police te’n Unnatural Death (UD) case No. 5/2013 CCP-PS U/S 174 Cr PC registered uhi.

District Level Workshop om ding 
Lamka, Aug-16: Forest Development Agency, Southern Forest Division/CCpur inntekna in Aug 20, 2013 zinglam dak 10.30 in Southern Forest Divn/CCpur office a FDA Conference Hall ah ‘District Level Workshop on Bamboo Utilization Prospects in Manipur’ om ding a, huai ah Lamka a om bamboo artisan/craftmen a lunglutte telthei chiat ding uh chi’n Divnl Forest Officer,Southern Divn/CCpur in theisak hi.

Jail ah 1 lut: bail in mi 2 pawt 
Lamka, Aug-16:Police apan kizadan in Aug 8, 2013 zingsang in 46-Assam Rifles te’n B.Aijalon khua ah HPC(D) President group a cadre David Demlou Hrangchal @ Paul (29) s/o LC Hmar of Leisen village tulel a Rengkai a om mankhia uh a, amah apan galvan hunkhop mukhia uhi. CJM/CCpur in nibangzah hiam sung Police custody ah omdia a phalsak nung tuni’n Judicial custody(Jail) a omdi’n thutan khum a, Police te’n Jail a koih in FIR No. 69 (8) 2013 CCP-PS U/S 400 IPC & 25(1-C) Arms Act registered uhi.

Huailou in Aug 6, 2013 nitaklam in 46-Assam Rifles pawlin New Bazar a Rajdhani Travels kiang ah sumkhonlai HNA cadre 2- Lalrinchhana Hmar (25) s/o Thangliana of Molnom village leh Lalmalsawm Hmar (21) s/o Ralthathung of Khomawi mankhia uh a, CJM/CCpur in ni bangzah hiam sung Police custody a omdin a phalsak nungin tuni’n bail in pawt sak hi’n Police thusuak in gen hi.

Ni 15 sungin positive mulou
Lamka, Aug-16: Dist Malaria deptt te’n Aug 1-15, 2013 sungin damlou mi 476 te’ sisan test uh a, hileleng malaria vei(positive) mulou uhi. Dist Malaria Office ah April 2012 apan khawsik damdoi hong tunlouh ziakin Malaria deptt te buai mahmah uh a, Malaria positive omte leng damdoi omlouh ziakin piakding nei tuanlou uh hi’n kigen hi.

IMPHAL NEWS 
Sericulture deptt website kihong
Imphal, Aug-16 : Sericulture department saina in tuni’n office chamber mun ah website thak honna om hi. Huai hun ah Sericulture Minister Govindas Konthoujam khuallian a pang in website www.serimanipur.in hongkhia hi. Hiai web site tungtawn in loubawlmite leh sericulture department te nuamtak in thu kizatuah theita ding ua, mipi’n leng theih ut a neih ua leh bangkim website ah om ding hi’n kigen hi. Huai hun ah Chief Guest in Manipur Sericulture Project Phase –II tungtawn a govt in 50 % bek lawhchin kinem hi’n gen hi. Victor Keishing, MLA Phungyar A/C, Z. Kikhonbou Newmai, MLA Tamei A/C, Kh. Devendro, MLA Sekmai A/C leh H. Ginjamang Simte, Director Sericulture leng tel uhi.

Centre in development fund adin Rs. 1,206 crore hong sanction - CM
Imphal, Aug-16 : Congress makaihna a Centre a vaihawm UPA govt in Manipur a development fund dingin Rs. 1,206 crore hong sanction uh chi’n Chief Minister O. Ibobi in zan in gen hi. CM in huai development fund tamzawte singtanggam a zat hiding in gen a, huai dingin Block 27 ngaih poimawh hiding a, Bank branch leh Police Outpost bawl masak hiding chi hi. Agriculture ah Manipur economy kinga ahihna ah kum 2013-14 sungin agri adin Rs. 2,042 crore bikhiah hiding in gen hi.Asian Development Bank in Loan danin Rs. 1,899 crore vel Manipur govt piaksawm a, huai sum zangin Imphal-Moreh lamlian km 85.60 leng bawl hiding chi hi.Railway line nasepna leng paitou zel a, Tulihal Airport leng International Airport a koih hipahta ding chi’n gen hi.

Azi that chih ziakin Police in man
Imphal, Aug-16:Moirang Police te’n Kwakta Terakhong a om Md Fakaruddin @ Boipu(36) in azi that chi’n tuni nitalam in mankhia uhi. Shakila Begum w /o Md Fakaruddin 5 Boipu of Kwakta Terakhong July 31, 2013 in a pasal zukham in mei in hal chihthu om a, RIMS Hospital tut nungin Langol a Shija Hospital ah referred hi a, dam zoulou in tuni in si hi.Doctor te’n a gendan un Shakila Begum taksatung mun tamzaw kangse gawp hi.

Indo-Myanmar gamgi ah bomb puak
Imphal, Aug-16 : India leh Myanmar gamgi a om 9-Assam Rifles te’ gari tuipaw ding a kuanlai zinglam dak 8:50 velin Chandel district a T. Minou Village mun atun un bomb puakzak a, huai ah Water tanker gari kisezek hi. A kigendan in huai bomb puahna mun bel Assam Rifles-te omna mun akipan 3/4 km vel dinga gamla hidan in kigen hi.

ADC Chairman in admn building hong

Imphal, Aug-16: Tuni sunnung dak 2.00 velin Moreh a Moriah tanga GSN Centre ah Lunkhosei Zou,Chairman, Autonomous Dstrict Council/Chandel in Gospel for Shalom Nation(GSN) Administrative building hongkhia hi. Huaizawh in Thangsat Kipgen in huai Administrative building a room tuamtuam omte latna(dedication) nei a, Rev Jangkholam Doungel in Director’ quarter latna nei hi. Huai banah Rev Belkhothang in Haokip in Guest House lapna nei a, Rev Ngamhao Touthang in Open Public Prayer Hall latna nei hi. 
GSN complex ah mipi kikhopa om a, huai ah Chief Guest in Lunkhosei Zou,Chairmen ADC/Chandel pang a, Functional President in Jangmang Haokip, President Hill Tribal Council,Moreh pang a, Guest of Honour in Ms Chinneivah Haokip, President, Kuki Women Union &Human Rights pang hi. Chief Guest in a thugenna ah India govt in sum puahna ding leh khantouhna dia nasepna dinga sum hog piakte diktat tak maha zat ding ahihdan gen hi.

Meltheihlouhten mei in hal 
Imphal, Aug-16 : Chandel dstrict HQ a Maha Union Government Higher Secondary School a Administrative Block zan nitak in meltheihlouhte’n mei in hal uhi. Huai ah Computer set leh documents poimawh tuamtuam tankhop kangtum hi’n kigen hi.

Pebam Chittaranjan zahna pia uh

Imphal, Aug-16 : Anti AFSPA crusader Pebam Chittaranjan in Arm Forces deihlouh ziakin Aug 16, 2004 in kihal lum a, tuni’n Thangmeiband a THAU Ground ah amah zahna piak in om hi. Huai hun ah Pebam Chittaranjan a kihal lupna Bishnupur bazar ah leng a lawmte, students tamtak leh civil society makai tamtak in zahna in pak pia uhi. 

Takyel Leikai apan THAU Ground tan student tamtak rally pai uh a, blood donation camp leng Chittaranjan min in om hi. THAU Ground a hun zatna ah Prof. RK Hemakumar Singh, Dean of Students` Welfare Manipur University, Advocate Khaidem Mani, President All Manipur Bar Association W Samjai, President All Manipur Working Journalists Union, Dr. Y. Mani Khuman, President AMUCO leh mi poimawh tamtak tel uhi.