Tuni in mun tuamtuam ah 67th Indian Independence Day lopna om
Lamka, Aug-15: India gamsung pumpi ah tuni’n India Independence Day kum 67 chinna lopna om a, Imphal a 1st M/R Parade Ground ah state level a lopna ah Chief Minister O. Ibobi in India flag a kaihpalh zawh in March Past apai contigent-te akipan salute la hi. Chief Minister in a thugenna ah Manipur kichi independent gam a state khat hi a, huaiziakin Manipur gam sehkhen theih hilou ding chi’n gen hi. Kuki-te’n Manipur gam akipan state tuam bawlkhiak ding leh Naga mite’n alternative arrangement a nget uleng thil hitheilou hi’n gen hi. Helpawl(UG group) khenkhat in helna nusia in hong potkhia uh a, govt tawh peace talk nei panta uh a,helpawl dangte’n leng galvan koihkhia a govt tawh kihouna nei dingin CM in chial hi.

Chief Minister in SoO atel militant khenkhat in dan kalh in sum muhna dia mi kidnap leh phutluih a sumnget a chin ualeh a SoO a Ground Rules a bawsiat dungzui un akituahpih bang action khauhtak lakkhum hiding chi’n gen hi. Manipur ah masawnna leh khantouhna nasep a nawngkaina ziak thildang hilou in law & order ginatlouh ziak leh helpawl khenkhat in a hihbuai ziak uh hisek chi’n leng CM in gen hi. Chief Minister in Police Medel for Gallantry, President Police Medal for Distinguished Services leh Police Medal for Meritorious Services akigawm in Manipur personnel 10 kiang ah pekhia hi.

Lamka Public Ground a Independence Day lopna ah Ms Jacintha Lazarus,IAS , DC/CCpur khuallian apang in India flag kaipalh a, March Past apai contingent tuamtuamte akipan salute la hi.Huaizawh in DC in thugen a(DC thugen page 2na ah) huchi’n deptt tuamtuam in Stall 17 a bawlte uleh Photo Gallery enkhia hi. Huaizawh in JNV student-te leh STC BSF te akipan cultural programme, 1/11-Gorkha Rifles-te akipan Kukri Dance lahna om a, CCpur Govt College student-te leh tribe tuamtuam akipan in moral nei dramatic cultural lahna om hi. Huaizawh in kipahman leh Award tuamtuam hawmkhiakna in zui hi.

March Past ah Group ‘A’ NCC ah 1st in Rayburn H/S NCC Jr. Wing; 2nd ah Rayburn College NCC Sr. Divn. leh 3rd ah CCpur Govt H/S NCC Jr Divn. pang uhi. Group ‘B’ Sr Boys ah 1st in Don Bosco Hr Sec School Sr. Boys; 2nd ah Ebenezar Academy Sr. Boys leh 3rd ah SSPP Residential School pang uhi. Gourp ‘B’ Sr. Girls ah 1st in Mount Carmel H/S; 2nd ah Phungkhothang Govt H/S leh 3 rd ah Cambridge H/S pang uhi. Group ‘C’ Jr. Boys ah 1st in Saviours Public School; 2nd ah JNV/Tuinom leh 3rd ah Dawn School pang uh a, Group ‘C’ Jr. Girls ah 1st in Saikawt Govt H/S; 2nd in Misao Lhahvom JB School leh 3rd in Bijang Loubuk Jr H/S pang uhi. Kipahman hawm hun ah 1st in Rs 1500; 2nd in Rs 1300 leh 3rd in Rs 1000 chiat ngah uh a, March Past atelteng kiang ah consolation prize Rs 700 chiat piak hi uhi.

Stall kidemna ah 1st in NYK; 2nd ah Agriculture deptt leh 3rd ah Forest Deptt pang uh a, kipahman Rs 1500, Rs 1300 leh Rs 1000 ngah uhi. Gate bawl kidemna ah main gate bawl DRDA te’n 1na la uh a, kipahman Rs 1500 piak hi uhi.
Tutung Independence Day lopna ah KSDC pawlin General Strike a puan utawh a kituah ziakin kumdang tawh teh in mi tawmzaw a, Public Ground kim vel ah niliap (umbrella) khu kawm a program atawp tan en mipi tamtak om veve hi.

SBI a security guard IRB personnel 1 kikaplumsa in kimu

Lamka, Aug-15: State Bank of India (SBI)/CCpur branch a Security guard a om Ist IRB a personnel khat tuni nitak dak 8:10 velin a omna room(barrack) sungah kikaplumsa in muhkhiakin om hi. Thusuak kingahdanin amah P. Basanta Singh(28) s/o P Kananjoy Singh of Athokpam Leikai, Thoubal hi’n kige’n ua, tangval lai ahihbanah anu-le-pate’ tapa neihsun hi’n gen uhi. SBI/CCpur Branch a sawngtungpen(top floor) ah IRB te om uh a, tunitak dak 8 vel a IRB personnel dangte’n an a neklai un a giahna room sung uah amah leh amah Self Loading Rifles (SLR) zangin kikaplum hi’n gen uhi.
Mi khenkhat te’n a gendan un, Basata in zu hahdawn mahmah a, zing leh nitak an tanpha kichiantak a nelou ahi chi uh a, phetlou in Ist IRB Bn HQ akipan SBI/CCpur branch adia suan ahih kal 4(four weeks) lel hipan a, ahihziak khatvei mahleng kisil nailou chi pawl om uhi. Amah sihna tawh kisai thuchian theih hilou a, Bank guard-te’ omna barrack sungah sisan a kithehzak banah, a khuak leh guh chi tuamtuam tuanglai ah kithehzak hi. Tuni nitak dak 10:30 pm velin police-te’ makaihin siluang lakkhiak hi a, tu in morgue ah post-mortem leh forensic test dingin omlel hi. Thiltung zakphet in David Piaklian MPS SDPO/CCpur, Elvy Tunglut OC/CCpur PS; S Kaikhanthang, Chief Manager SBI/CCpur banah Army leh official tuamtuamte’n amun delhpah uhi. Tuni 67th Indian Independence Day hi a, tua ziakin bank telin establishment tuamtuam kikhak vek hi.

Singngat ah Independence Day lopna
Lamka, Aug-15: Singngat Public Ground ah tuni zinglam dak 10.30 in Independence Day 2013 lopna om a, Lalrobul Fimate, MCS, SDO/Singngat in parade contingent 16 apan salute la hi. Sunnung lam dak 1.00 SAFA saina a I-Day football tournament final match om nawn a, huai hunah Chief Guest ding bialtu MLA Ginsuanhau in a uap theihlouh ziakin Sonmuan, MLA’ nominee(Singngat A/C) pang a, Guest of Honour in Mahajon Xavier Nengkhanlam leh Functional President in SDO/Singngat pang hi.

Bialtu MLA in Generator pia
Lamka, Aug-15: Thanlon A/C MLA banah Parliamentary Secretary Vungzagin Valte in Bungpilon EBC saptuamte’ zatdingin Generator thak khat pia a, Bungpilon EBCC member te kipak mahmah uh hi’n Local Secretary Upa S Chinkhanlian in gen hi. Thu kizadan in Bungpilon EBCC te’n hun sawttak meivak gina neilou in om uh a, bialtu MLA kiangah a haksatna uh a tutnung uh sawtlou in MLA in leisak hi’n kigen hi.

Penglam Documentary Film
Lamka, Aug-15: V.Siampu in azi (late) Sangkhawl theihgigena dia a bawl “The Great Penglam Documentary Film” kichi Aug 28, 2013 zinglam dak 11:00 in YPA Hall, New Lamka ah Health Minister Phungzathang Tonsing in hong ding a, Rev Khen P.Tombing, in Pathian kiang ah lan ding hi. Huai ah Guests of Honour in Vungzagin Valte, MLA (Thanlon A/C) &Parliamentary Secy; Ginsuanhau, MLA (Singngat A/C); T.Manga Vaiphei, MLA(Henglep A/C) & Chairman , MTDC; T.N Haokip, MLA (Saikot A/C); Ms Jacintha Lazarus, IAS, DC/CCpur leh Rev Vungminthang, Gen Secy EBC hiding uh a, special invitees in mi 15 hiding uhi.

JE dalna damdoi kap ding
Lamka, Aug-15: Dist.Immunisation office ah naupang kum 1-15 kikalte ading in Japanese Encephalities (JE) kichi khuak a khawsik lutding dalna damdoi Sepnawnni (Tuesday), Ningani (Thursday) leh Kiginni (Saturday) tengin zinglam dak 10:00 apan sunnung dak 1:00 tan in manbei in kikap theih gige a, kikap ding mi tamluat ziakin DFWO/CCpur in mun 6 ah kikapna ding bawlbeh hi. Kiginni(Saturday) tengin PHC/Saikawt ah Saikot area te kikap theih ding a, Sepnawnni (Tuesday) leh Kiginni (Saturday) tengin UFWC/Thingkangphai ah NKT area; PHSC/New Lamka ah New Lamka area; Nazaret Nursing Home (PPP), Hill Town ah Town area te; PHSC/Pearsonmun ah Pearsonmun leh asehvel akhua omte; Dist Council Health Center, Tuibuong ah Tuibuong leh akim le kiang a khuate kikap thei ding uhi. JE kikap hun ah dose 1 in naupang mi 5 kap ngai a, syringe bel mi 1 ading 1 kizang in kikop sak hilou uh a, 2012 a JE kikap sate kikap ngailou ding a, 1vei kikap in damsung daih hi’n Dr DFWO in gen hi.

General Strike sungin buaina thupilua omlou
Lamka, Aug 15: KSDC in Kuki state tuam pe dia govt nawhna in Aug 13, 2013 zankim akipan dakkal 48 sung Manipur a Kuki mite luahna munteng ah general strike puang uhi.General strike sungin Media leh medical kia khahkol uh a, General strike sungin buaina thupilua omlou in bei hi. Tuni’n Tuibuong area ah general strike khauh mahmah a, Sielmat leibul ah volunteer tamtak duty uh a, Tuibuong Forest gate ah volunteer te’n Tedim Road khaktan uhi. Sielmat leibul a duty pawlin gari himhim taisak lou in khe a paite’ tanpha dal in lampi khaktan uh a, hileleng nitaklam dak 5:50 vel apan lampi khaktan lakhia in khe a paituahte dal nawnlou uhi.

Dorcas Division Khawmpi
Lamka, Aug-15: EBC Baptist Dorcas Fellowship Lamka North Division Khawmpi 5 veina August 23-25, 2013 sung EBC Bethel Baptist Church, Lailam Veng ah om ding hi. August 23, 2013 nitak in Upa V. Ginchinpau, Chairman DWC in Khawmpi hong ding a, Rev Paukhanmang Guite, DS Lamka North Divn in Pathian thu gending hi. Khawmpi sung in Pastor Dr Thangminlun Mangte in Seminar hun ah sinsak ding a, khua/veng 16 apan Pathian phatna lapawl om hi.

SUUNNA
T.Ginsuanpau (55) s/o Sutkham of Khominthang, New Lamka, tuni zinglam dak 10.00 in si a, tuni mah in kivui hi.

IMPHAL NEWS
Khawpi sung mun 2 ah bomb puak
Imphal, Aug-15: Imphal a Independence Day lopna kipatma deuh in bomb hattak puakzak a,
hileleng asi leh liam kuamah omlou hi. Police apan kizadan in 1ndependence Day lopna mun ding 1st M/R parade ground akipan metre 400 vela gamla Moirangkhom a petrol pump kiang ah tuni zinglam dak 8.20 velin helpawl in a phumguk uh hidia gintak bomb khat puakzak hi.Police te’n buai bomb puahzakna mun lamlian jul hi’n gen uhi.
Huailou in tuni nitaklam dak 4.10 velin Imphal East district sung Porompat area ah bomb khat mah puakzak nawn a,police te’n huai remote control zanga puahzaksak hiding in
Gen uhi. Bomb puahna mun bel Porompat Police station akipan metre 100 vela gamla hi’n kigen hi. Bomb puahzakna munte Police te’n kintakin delh pah mahle uh matkhiak neilou uh a,Independence Day boycott puang helpawl 6 kigawm Cor-com te thilhih hidia ginthu leng Police te’n gen uhi.

Airport road ah accident in si
Imphal,Aug-15:Tuni in Airport road kiang Tedim road ah Activa (Black colour) atuang pasal khat accident a, RIMS zotpih pah himahleh Hospital tunpih ma in si hi. Thutut kingahdanin misi bel feet 5.9 vela sang hi a, kuahiam chih theihtheihna ding a taksa tunga kigelh a omlouh ziakin RIMS a morgue ah koih in om hi.Aman T-Shirt ngou a silh banah Reebok khedap bun hi’n kigen hi.

General strike ziakin nawngkai
Imphal, Aug-15: Manipur helpawl tuamtuam 6- KCP, KYKL,Prepak(Pro),RPF/PLA, UNLF leh UPPK kigawm ‘Cor Com’ pawlin Independence Day boycott puang in tuni zingsang baihtak dak 1.00 akipan nitaklam dak 5.30 tan General Strike a puan ziakun nawngkaina lianpi om a, huailou in Kuki State Demand Committee( KSDC) pawlin Kuki State ngetna in dakkal 48 sung Kuki mite luahna bial ah General Strike a puan ziakun singtanggam mun tamtak ah nawngkaina lianpi tun hi. KSDC General Strike bel tuni(Aug 15,2013) zankim in beita hi.