India gam pumpi ah Independence Day lopna om ding, Imphal ah Chief Minister khuallian hiding
Imphal, August-14:India gam pumpi ah Aug 15,2013(Nilaini) in ‘ 67th Independence Day’ lopna om ding ziakin gamsung pumpi ah Security hihkhauh in om a, New Delhi khawpi ah state police leh para-military force tamtak Airport, Railway station, bazaar/market, Inter-State Bus Terminal leh Metro station ah duty uhi. Red Fort(Lal Qila) mun a Prime Minister Dr Manmohan Singh in National Flag kaipalh a salute a lakna mun ding ah zan khawvak in security personnel sang tamtak duty uhi. Imphal a 1st Bn Manipur Rifles Parade Ground ah zinglam dak 8.00 in state level a Independence Day lopna ding a, huai ah Chief Minister O. Ibobi in India flag kaipalh in March Past apai contingent-te akipan salute la ding hi. Lamka Public Ground ah Ms Jacintha Lazarus,IAS, DC/CCpur in National flag kaipalh ding a, March Past atel contingent-te akipan salute la ding hi.
Manipur ah helpawl tuamtuam 6- KCP, KYKL,Prepak(Pro),RPF/PLA, UNLF leh UPPK kigawm ‘Cor Com’ pawl telin North-east a helpawl 11 in Independent Day lopna a boycott ban uah Aug 15, 2013 zingsang dak 1.00 akipan nitaklam dak 5.30 tan General strike a puan ziakun Imphal khawpi leh a kimlak ah security khauh mahmah a, Police-te patrolling kisan mahmah uh a,mun tuamtuam ah frisking leh search operation bawl uhi.
1st Bn Manipur Rifles Parade Ground a Independence Day lopna ding ah Parade Commander Lunsieh Kipgen,IPS, Commandant, 4th IRB hiding a, March Past ah contingent 34, cultural troupe 2 leh Band party platoon 9 tel ding uhi. Chief Minister in National flag a kaihpalh banah March Past apai contingent-te akipan salute a lakzawh in thgen ding a, huchi’n medal leh prize/ward hawmkhiakna in zui ding hi. Independence Day lopna tawh kiton in Ministry of Home Affairs in Police Medal chi tuamtuam ngahding a puankhiakte lakah Manipur akipan leng bangzah hiam telkha uhi.
Police Medal for Gallantry ngah dingte
1. Jemadar Jamkhongam Touthang
2. Havilder Leimapokpam Amarjit Singh
Police Medal for Distinguished Service ngah dingte
1.P. Mallana Goud, Addl. DGP(AP/TRG)
2.Maibam Rameswar Singh, Dy. SP(Ops), Bishnupur
Police Medal for Meritorious Service ngah dingte
1.Th Radheshyam Singh, SP- Bishnupur
2.L. Sanajaoba Singh, Dy. Commander, 3rd IRB,
3. Thaimei Gaipuiril Kabui, Asst. Commandant, PHQ-IMP,
4. Swellinghope Chiru, Asst. Commandant (MPS G-II) 7th IRB,
5. Chhatra Bahadur Bhattarai, Havildar, 4th IRB
6. Konsam Sharat Singh, Constable, IW District, Manipur.
The District Administration
Churachandpur District
solicits your kind presence at
the
Independence Day Celebration
on the 15th August, 2013
at Hiangtam Lamka Public Ground
Ms Jacintha Lazarus,IAS
Deputy Commissioner,CCpur
will hoist the National Flag and take the salute
Programme:
09:00 am : Assembly of Contingent
09:30 am : Arrival of the Chief Guest
09:32 am : Inspection of Parade
09:38 am : Hoisting of National Flag
09:45 am : March Past
10:05 am : Address by the Chief Guest
10:10 am : Cultural Programme
i)CCpur College ii)Lamka College
10:20 am : Performance by JNV
10:25 am : Cultural Dance
10:35 am : Presentation by Traffic Police & DTO
10:40 am : Presentation by i)A/R ii) STC BSF
10:50 am : Inspection of Stalls
11:00 am : Presentation of Prizes & Awards
Catchment Area ah singnou suanna(plantation) om
Lamka, Aug-14: District Admistration saina in tuni zing dak 8:20 in Lalpuithluaii Foundation School’s a basket playground ah Langkhanpau Guite,Chairman ADC/CCpur in Lanva Catchment Area a singnou suanna(plantation) kipatna dingin hong hi. Huai ah DC/CCpur makaihna District Level Officer-te, Public leader-te, NGO leh student tamtak tel uhi.
Ms Jacintha Lazarus, IAS DC/CCpur in agenna ah Lanva area ah sing leh gua tamtak phuksiat ziakin khawpi sung tui nek ding supply Lanva naak buai ban hi’n gen hi.Lanva akipan khawpi sunga tui supply kiningchin louh ziakin mipi’ tuidawn ding kidaihlou a, anini in khawpi sungah mihing akibehlap ziakin tuidawn ding kiching omtheihna din catchment area ah singnou tamtheipen kum 2 paisa a kisuan tukum a sutzop nawn a om hi’n gen hi.Lanva catchment area a sing leh gua omte mipi’n kembit ding in ngen a, student te’n leng singnou suan poimawhdan midangte hilhsawn dingin ngen hi. Kumteng in khua lum deuhdeuh a, climate change apan suahtak theihna din singnou atamtheipen suan poimawh hi’n gen hi.
ADC Chairman in agenna ah gamsung ah sing leh lou kiphukmai phial a, i gam hing dipdip theihnawnna dingin singkung khat iphuk leh singnou 10 tan bek suan poimawh chi’n gen hi. Singkungte phuk a, azung tanpha meihol dingin i hal touhzel uleh kum 20 nung in i gam uh Thar Desert suak ding hi’n gen a, huai pumpelh theihna ding in mipi’n singnou tamtheipen suan dingin ngen hi. Khawpi sungah nitengin sanitary truck in niin pawkhe gige a, ni 1 lel niin a puakkhiat kei leh khawpi sung niin gawp ahihman in general strike/bandh bawltute’n sanitary truck leng khahkol zel dingin ngen hi.
Tuni a singnou suanna hun ah DC makaih in Dist Level Officer-e, Public Leader, student te leh organization tuamtuam apan makaite’ telin catchment area ah singnou tamtak suan uhi.
Dakkal 48 general strike ah buaina thupilua omlou
Lamka, Aug-14: Kuki State Demand Committee (KSDC) in Kuki state tuam pe dinga govt nawhna in zan nitak (Aug 13, 2013) zankim akipan dakkal 48 sung Manipur a Kuki mite luahna munteng ah general strike puang uhi.General strike sungin Media leh medical kia khahkol uh a, govt establishments, educational institutions, business establishments, vehicular movements leh adangte bel General strike huamsak uhi. KSDC General strike hun ah tuni in buaina thupilua zak omlou a, Tuibuong area ah general strike khauh mahmah in Sielmat leibul ah volunteer tamtak duty uh a, Tuibuong Forest gate ah volunteer te’n Tedim Road khaktan in, SP/CCpur chihlouh security gari leng taisuak saklou uh a, dawr/dukan kihong omlou hi. Hileleng Police Station kim apan Lamka khawpi sung ah ngeina bangin dukan/dawr leh bazaar ngeina bangin kihong a, gari leng a ngeina bang in taituah hi. General strike pen Aug 15, 2013 zankim tan daih ding hi’n kigen hi.
I-Day kisakkholhna zohsiang hita
Lamka, Aug-14: August 15, 2013 in Lamka Public Ground ah Independence Day lopna om ding a, Public Ground sungah govt Deptt tuamtuam 18 in stall bawl in kisakkholhna teng zawhsiang hita hi. Public Ground a I-Day lopna dinga kisakkholhna ah DC/CCpur inleng ompih a, dice tunga VIP-te tutna ding leh gate kibawlte ahoihtheihpen a cheimawi in om hi.
I-Day Eve celebration cancel in om
Lamka, Aug-14: Dist Administration saina in tuni nitaklam dak 5:00 akipan Lamka Public Ground ah Independence Day Eve Celebration om ding chih himahleh khua(weather) hoihlouh ziakin programme cancelled in om hi.
I-Day Badmintion Match zawhsiang hita
Lamka, Aug-14: Hiangtam Lamka a Community Hall ah zan nitaklam dak 6.00 akipan in Public Leader-te leh Dist Level Officer te’n Independence Day Badminton Match kimawlna pan uhi. Huai ah Men’s double team 14 om a, huaite DLO team 7 leh Public Leader’s team 7 hi uhi. Mix double ah team 4 om a, huaite DLO lam apan DC & partner leh LT Puii & partner tel uh a, Public Leader lam ah Lulun & partner leh Grace & partner telin zan nitak in kimawlna om a, tuni sunnung in sunzom uhi. I-Day Baminton match ah DLO team apan J.Lhungdim leh A/R officer v/s SP/CCpur & SDPO/CCpur te final match kimawl uh a, J.Lhungdim & partner in champion hihna la uhi. Mix double ah Public Leaders apan Lulun & partner in champion hihna la in zawhsiang hita hi.
Drawing/Painting kidemna result
Lamka, Aug-14:National Green Corps/Eco Club, Dist Implementation & Monitoring Committee/CCpur saina in “Environment” chi thupi zanga Independence Day Drawing/Painting Competition om result suak hi. Painting a Sub Junior (class I-IV) ah 1st in Damlaljem of Hermon English school pang a, 2nd in Thangtinsei of HM English school leh Issac Thangnunsiam of Dawn school pang uhi. Junior (class VI-VII) 1st in Dikreingam of Cambride school leh 2nd in Lallianmawi of Dawn school pang hi. Senior (class VIII-X) ah 1st in Paukholen of Cambridge school leh Seikholal Haokip of Sunshine English school pang uh a Drawing/Arts competition ah 1st in P.Thuamkhopau of Lamka Arts leh 2nd in Kelvin in pang uhi.
Mi 2 asepna ua pan kaisang
Lamka, Aug-14: K. Ginkhanthang tulelin Ministry of Law & Justice, Deptt. of Legal Affairs a Under Secretary sem tunai chin in Deputy Secretary/ DOPT len ding in kaisang a, huailou in Apostolic Indian Mission(AIM) pankhetu leh Ministry of Tribal Affairs a Under Secretary len RH Hminglien leng Deputy Secretary dingin kaisang chihthu om hi.
BSF te’n thaukap hun ding behlap
Lamka, Aug-14: STC BSF CCpur a training te’n Aug 0l, 2013 akipan zingsang dak 5.00 apan nitak zansawt tanpha Mission compound suahlam, Pearsonmun,Mualkoi leh Gangpimual apan simtum(south-west) lam a firing range ah long/short/grenade leh 51-mm mortar a kap(firing ) uh Aug 15, 2013 tan ding himahleh Aug 16,2013 akipan Aug 31, 2013 tan hiding in ahun behlap uhi. Huai hunsung in a kimnai a khua omte apan mihing kuamah huai area a lutlou ding leh ganvulh leng huaimun a lut dia kuama’n khahzanlou ding in DIG, STC/BSF in thupuan bawl hi.
SUUNNA
Mrs. Zamman(51) w/o Thuangzathang of Vengnuam, New Lamka tuni zingsang in Dist Hospital ah khawsik in si a, tuni’n YPA Hanmual, New Lamka ah kivui hi.
IMPHAL NEWS
Manipur Governor akipan message
Imphal, Aug-14:Manipur Governor Dr. Ashwani Kumar in Independence Day tawh kisai in Manipur mipite deihsakna message khak hi. Aman a puankhiakdan in Independence Day 57veina tawh kiton in kum 66 sungin India lam tuamtuam ah khangtou in masawn a, maban ah taksap tampi omlai chi hi.India in zalenna a ngahna dinga panla leh hinna pia freedom fighter-te zahna pekawm in maban kalsuan zelna ding ah mipite kithutuak a pankhawm touhzel alou theilou a poimawh hi’n leng Governor in gen hi.
Palace Gate kiang ah bomb puakzak
Imphal, Aug-14:Imphal east district sung Palace Gate akipan feet 50 vela gamla City Convention Centre kiang ah tuni nitak dak 6.20 velin bomb hattak puakzak a, hileleng huai ah asi leh liam bel omlou hi. Huai bomb puakzak bel IED hidan in kigen a, bomb puahzaakna mun ah feet 1 bialsung kuak a,inches 6 velin thuk hi’n kigen hi.Angam R. Kamei, SP/Imphal East in a gendan in helpawl in Gari a tuangkawm in huai bomb puakzak dinga khia a taisan uh hidia gintak thu gen a,remote control zanga puakzaksak uh hiding in leng gen hi. Huai area ah security personnel tamtak duty a om ziak in helpawl in bomb kam(plant) theihna ding hunlem neilou uh hi’n leng gen hi.
Oil Tanker 70 velin Imphal manawh
Imphal, Aug-14 : Imphal khawpi kia hilou in Manipur ah thautui taksapna lianpi om nungin tuni in All Manipur SK Oil Dealer Assn a President T. Gogo in tunung ni tamlou nungin Manipuyr ah thautui kidaih pahta ding hi’n gen hi. Aman a genna ah tu in ISBT mun ah Imphal zuan ding thautui pua Oil Tanker 70 om a, tua banah IOC ah 50% bang stock omlai hi’n gen hi. Huaiziakin Manipur ah thautui a haksa kei a, a haksatna ziak bel black market ah tam alut luatziak ahi, chi hi. Lampi gei ah thautui zuaksawn tamtak omte akipan in Manipur ah thautui om ahi chih muhtheih a, huaiziakin, petrol pump ten a zuaksonte kiangah tampipi pekhia uha, amau petrol pump kiang khawngah azuak tampi om uh chi hi. Hibang black market tawh kisai hoihtak a etkai ahihkei leh petrol pump ah thautui stock om thei taktak lou ding hidan in gen hi.
Chief Minister makaih in singnou suan uh
Imphal, Aug-14 : Imphal Pologround ah tuni in Chief Minister O. Ibobi makaihna in singnou suanna om a, huai ah singnou a hunkhop suan uhi. ‘Greener Imphal City’ chih campaign bawlna kawm in Chief Minister in amah taksa mahmah vatel in singnou suanna ah makai hi’n kigen a, , Manipur ah kuapeuh in singnou suan poimawh ngaih dingin a hanthawnna hidan inleng kigen hi.
Press sticker thu AMWJU in ngai serious
Imphal, Aug-14 :All Manipur Working Journalists’ Union (AMWJU) in meltheihlouh kuate hiam in Press sticker a zat uh ngai serious uh ahihdan taklang uhi. Press stickers bel press a semlou khenkhat in zang uh hidan in AMWJU thusuak in gen a, huai tawh kisai in Union President W. Shamjai in AMWJU nuai a members te’n registration number chiat uh August 20, 2013 tan a submit chiat dingin theisak hi.
Dikloutak a MLA kianga sum la mankhia
Imphal, Aug-14 : Keisamthong Thangjam Leirak Youth Club min a local MLA Laisom Ibomcha kianga sum Rs. 1000/- vala mi 3 tuni in Youth Club makaite’n mankhia uhi. Matkhiak a omte bel, 1) Ngangkham Boy @ Amarjit, s/o Ng. Tikendrajit of Khurai Konsam Leikai, 2)Kshetrimayum Captain, s/o Ksh. Mangi of Elangbam Leikai Leirak Macha leh 3) Emudam Donkey @ Kenedy S/o E. Dhanabir of Keisamthong Thangjam Leirak hi ua, amau huai sum a lak uh Youth Club te’n a theihphet un suizui pah in mankhia uhi. Mat a om mi 3 te drug addict hi uh a, amau laka tel Ngangkham Boy @ Amarjit bel Manipur Police a sem hi a, rifleman no. 0915365 hidan in kigen hi. Amaute AMADA volunteer-te kiangah piak khiak hi uhi.
Beragee Bomb film premiere hiding
Imphal, Aug-14 : Wol-Media te saina in MFDC ah August 31, 2013 in Red Carpet event chih minvuah in film thak ‘Beragee Bomb’ kichi premier show om ding in kigen hi. Huai film bel Wol-media apan James Mayangbam in a direct hi a, Manipur a fashion industry tawh kisai maban hoih ahihdan taklatna hidan in kigen hi.