• * LT Puii MCS,SDO Churachandpur in SSPP Residential School ah Library leh Laboratory room ding hong in Free Text Book pekhia.
• * Ginsuanhau President UZO General Headquater in 64th Zomi Namni lopna a Video Disc hong.
• * STC/BSF ah Training zouthak Jawan 340 in Passing Out Parade nei.
• * Demmang Haokip Vice-Chairman ADCC in Dailen Buk van ding hawm.
• * Churachandpur District CPI in Press Conference nei.
• * Vote simna mun ding District Training Centre a Duty ding Security Arrangement bawlfel hita.
• * Vote simna a Counting Assistant leh Counting Supervisor ding te'n Training nei.
• * Repoll neihna mun ding Lungthul (L) leh Vote simna mun a duty ding Medical Team te CMO in guang fel ta.

LT Puii, MCS SDO/CCpur in tuni zing dak 10:00 in Ngathal a SSPP Residential School ah Library leh Laboratory room ding kibawl thak hongkhia a, Elder H.Mangchinkhup, Chairman SSPP Residential School Managing Committee in Pathian kiang ah thumna in lan hi. Huai zawh in L.T Puii in student te lak ah free textbook hawmkhia hi. Free textbook te ahihleh Ministry of Home Affairs, govt of India panpihna nuai a kilei hi’n kigen a, Ministry of Home Affairs in class I to VIII kikal student 500 sponsored hi’n kigen hi. L.T Puii in agenna ah student te’n laihoihtak a simding in hasuan a, mark percentage sangpi muhsang in laisim te hoihtak a theihchet poimawh zaw hi’n gen a, competative world ah khosuah nang in student te’n kuhkal, chitak leh Pathian laukawm a laisiam ding in hasuan hi.

The 64th State Level Zomi Nam Ni lopna zoh ahihnung in, video coverage kibawl editing zohsiang ahihtoh kiton in tuni sunma dak 12 in Zogam Hall, Zoveng ah honkhiakna om hi. Hiai hun ah Ginsuanhau @ GS Haupu, President, UZO general headquater in chief guest hihna toh uap in video hong a, Pastor V. Chinpau, Local Pastor, EBCC, Zenhang Lamka in Pathian kiang ah lan hi. Hiai hun ah GS Haupu in a thugenna ah, Zomi Nam Ni lop zoh ahihtoh kiton in Zomi sung ah ki-itna, kituahna leh lemna omta hen chi hi. Hiai zomi namni lopna video disc ahihleh March 6, 2012 in mipi lak ah kizuakkhe panding hi.

STC/BSF Mualkoi ah tuni zing dak 8:00 in batch No.193 leh 194 training zouthak jawan 340 te’n Passing Out Parade nei  uhi. Hiai hun ah P. Mallana Goud, IPS, Additional DGP (Home Guard), Manipur khuallian a pang in training zouthak-te a pan salute la hi. Aman a thugenna ah India gamsung vengbit ding a tuni’a kichiamna nei jawan te’n chihtakna suah a, hun haksa ah vualzawna ding in mipi tawh kituaktak a pankhawm poimoh ahihdan gen hi. Huaiban ah jawan te kimuangngam a, midang te sang a kiniamzaw lou ahi chi a, gamdang akipan India gamsung hihsiat sawm te hangsantak a douding in hasuan hi. Jawan training zouthak te galvan zatdan, drill, border security and surveillance, tactics, field craft, map reading, border management, field engineer, counter insurgency operation leh human right tawh kisai sinsak in om uhi. STC/BSF Churachandpur ah tunitan in batch 194 tan in state police constable ding in jawan 33950 in training zouta uhi. Tuni’a passing out parade hun ah chief guest P Mallana Goud zi Manju Goud in programme uap a tel Rayburn high school leh Covenant School Student  te kipahman pia hi.

Demmang Haokip Vice-Chairman ADC Churachandpur in tuni zinglam dak 10 akipan in amah tenna in DM Veng ah dailen buk vanzat kumut leh langva Leimatak area ading toilet material 90 pekhia hi. Zingchiang in thangting area ading 55 pekhe ding a,seppatni in Loktak area ading 50 pekhe nawn ding hi.

Churachandpur District CPI in tuni sunnung dak 3 in amau office sim veng ah Press conference nei in election vaitawh kisai a repoll ding a complain kibawl te repoll dia om khaklouh tungtang a lungkimlouh thugen uhi.

March 6, 2012 a Dist Training Centre ah vote simding tawh kisai in Security arrangement kimtak Police te’n bawlzou uhi. Vote simna sung (corridor) ah S.K Sinha, Assistant Comnandent, 32 Battalion CRPF D company in security mohpaw ding a, Vote simna campus sung ban ah akim leh kiang teng M.Rajen Singh, Additional SP/CCpur in mohpaw ding hi. Huaiban ah vote sim na mun Dist Training Centre luttheihna lampi teng Security te’n khaktan vek ding uhi. Vote sim hunsung a buaina omkhakding venna in security te’n mun tuamtuam ah Frisking and checking neiding uhi. Frisking and checking bawlna munding te ahihleh Vote simnang main gate; K.Salbung-Forest Gate; Forest gate-Old Bazar; Old Baza –Rengkai community Hall hiding  hi. Old Bazar-Nehru marg(New Bazar area); Nehrumarg-IB Road and Red Cross Road; CCpur Police station-Chiengkongpang; Chieckonpang-Bungmual; New Bazar–Lanva Bridge hiding hi. Buaina om hunhun a delh theiding in Anti Riot team te M.Songgel Bazar; Jail Junction ban ah SP office ah mansa in omding uhi.

10th MLA election neihna toh kisai in March 6, 2012 in vote sim kipan ding a, huai a Counting assistant ding in mi 32 guan in om ua, Counting supervisor ding a mi 34 leh Counting Peon ding in mi 10 guan in om uhi.tuni zinglam dak 11:00 in DC office a BRGF Resource Centre ah Counting Assitant leh Counting Supervisor te’n training nei uhi.

March 4, 2012 a Lungthul(L) khua ah re-poll om hun a Medical team duty ding in L.Douzakham, Pharmacist, K.Khenthang, Male Health Worker leh Anita Devi, ANM te CMO/CCpur in guang hi. Huai ban ah re-poll hun a duty ding in Leimatak Project a om 32 CRPF te company 1 kuan ding ua, March 3, 2012 in Tuibuong Peace Ground apan in Polling Personel leh Security teng tawh kuankhe ding uh hi’n kigen  hi.

DC office khangzek a Dist Training Centre ah March 6, 2012 zing dak 8:00 apan in Vote Counting kipan ding a, huai hun ah Dr Jamkhopum Baite, Medical Officer makaih in Medical team  Sumzamang, Pharmacist; Mrs Khamkhovung, Nurse; Lalrochang Grade-IV leh Ambulance gari driver Samuel te’ apoimawh bangbang a damlou omleh panpihding in Ambulance gari tawh duty ding in CMO/CCpur in order bawl hi.

March 4, 2012 a Singngat assembly constituency sung Lungthul (L) khua a re poll neihna ding tawh kisai in Lungthul khua a vote nei Lamka khawzang a om teng vote khe dia kuan ding in khaw sung hausa pu in theihsakna bawl a, Lungthul (L) khua a vote nei peuhmah te tuanna ding in zingchiang sunma dak 10 in New-Lamka hebron veng a Khamzavung innkong ah gari om ding hi.

Post ; David R.Tonsing
{linkr:related;keywords:hornbill+news;limit:5;title:Related+Contents}