* C Hangshing Executive Director DRDA tung a KNLF/MPLA te gamtat dan mohpaihna in Hiangtam Lamka mipi'n Sit-in-Protest nei.
* CDSU President ding in Lalkhohao Chongloi telching in om nawn.
* H Mangchinkhup Executive Member ADCC in The Malsawm Initiative kithuahpihna in Langva Bundle 4 pia.
* Khua lum a Vuahtui tawm mahmah ziak in Chief Medical Officer in damtheihna kembit chiat ding in ngetna bawl.
* Govt. Teacher with Disabilities te'n mahni kisaipih DI of School kiang ah Document tuamtuam piaklut ngai ding.
* Malaria Department in Malaria Damdawi neilou.
* Malaria Department in Ni 15 sung in Malaria Positive 4 mukhia.
TANCHIN KIMZAW:
Apaisa July 15, 2012 Pathianni zingkal baihtak a KNLF/MPLA pawl in C Hangshing Executive Director DRDA tenna inn Chapellane Hiangtam lamka a Chinese Hand granade ava koih uh mohpaihna in tuni zinglam dak 10:00 apan in Hiangtam Lamka Village Authority makaih in Hiangtam Lamka mipi'n Community Hall kong ah sit-in-protest nei uhi. Hiangtam Lamka Hausa Thangkhosuanmung Guite in a gendan in, Hiangtam Lamka huapsung a meltheihlouh migilou pawlte maingal tak a hong gamtatna uh mohpaih mahmah ahihdan gen in sorkar leh mipi pangkhawm a hichibang hinna lathei leh mipi lungphawng thei thil a tun nawnlouhna dia panla khawm ding in ngetna bawl hi.
Churachandpur District Students Union CDSU kum 2012-2014 sung vaipaw ding kiteelna tuni sunma dak 10:30 in Churachandpur Govt. College ah nei uhi. Hiai hun ah CDSU Constituent Body 9 apan palai 3 zel in Vote khia ua, President ding in Lalkhohao Chongloi (TKSU) a nihveina ding in telching in om nawn hi. Vice-President ding in Kaithianjoy (Zillai) tuhtu omlou in ching suak a General Secretary ding in Ginzawmsang (MZP) telching in om hi. CDSU 2012-2014 sung vaipaw dia telching thak a om te'n election Commission te apan in oath-taking leng neingal ua, hun lemtang masapen ah Cabinet keklian ding uhi. Hiai hun ah Goukhomang Father of CDSU leh Ex-President K Doukhum in thugenna hunzang uhi. Tutung a telching thak a om te'n a kizom a term 2 a puak nang uh hita hi.
H Mangchinkhup Executive Member ADCC in amah mimal sum zang in Langva Bundle 4 leikhia a, tuni sunnung dak 12:30 in khanvualphalou te school kaina The Malsawm Initiative building tung khuhna ding in pekhia hi. H Mangchinkhup Executive Member ADCC in The Malsawm Initiative kithuahpihna in tuma inleng Plastic Chair 20 pekhinta hi.
Tukpi vuahzuk hun himahleh tulai in Churachandpur District sung ah vuahtui tawm mahmah in khaw lum uang deuhdeuh hi. Lamka leh a sehvel ban ah Zodawn lam ah khaw lum ziak in sungkhoh leh santen natna ziak in mitamtak damlou in om uhi. Hiai tawh kisai in kuapeuh in mahni damtheihna kembit a, tui suansousa/tuiminsa kia dawn a, lampi gei a nektheih kizuak te mawk neklou ding in Dr H.L Liensang in mipite kiang ah ngetna nei hi.
Ministry of Human Resource Development, Govt of India in tunai zek in National Monitoring Committee for Education of SCs, STs and persons with Disabilities kichi phutkhia hi. Huai dungzui in Churachandpur District sung a Govt. teacher vualphaklouhna neikha te'n mahni kisaipih Deputy Inspector of school te kiang ah document poimawh tuamtuam submit ngai ding hi. Document poimoh te ahihleh Teacher's min leh Disable chetna lai, Address ban ah Phone no. vualphaklouh dan (Type of Disability) leh tulel a sepna mun school/institution/ Department min ban ah regular ahihkei leh contract post chetna document submit ngai ding hi'n kigen hi.
Churachandpur District a Malaria department te' zatding Malaria damdoi (Chloroquine, Premaquine, Sulphadoxine + leh Paymamethanine) te kha bangzah hiam apan Govt. supply hong pailou hi'n kigen hi. Koi khua hiam ah Malaria ziak a damlouhna om hizenzen leh Malaria Department in damlou te ading Malaria damdoi kep neilou hi'n kigen a, Govt apan supply hongtung masiah Malaria damdoi kitasam phot ding uhi.
Malaria Department in 1st Forthnite (July 1-15, 2012) sung in damlou tuamtuam 533 sisan test ua malaria positive 4 mukhia in huai lak ah malaria PF 3 hi'n kigen hi.
C Hangshing Executive Director DRDA tung a KNLF/MPLA te gamtat dan mohpaihna in Hiangtam Lamka mipi'n Sit-in-Protest nei.