* C Hangshing Executive Director DRDA inn Gate ah "Warning KNLF and MPLA" chih kigelhna Hand Granade kikoih.
* Major General Binoy Poonen, VSM, GOC 57 Mountain Division in Vacation Children Development School CD hong.
* Rev.N Thawndoulian Divisional Superintendent Lamka South Division EBC in V Munhoih EBCC Sunday School Building hong.
* New-Lamka Ex-servicemen Welfare Association in Major General Binoy Poonen kiang ah Office Building lamsak ding in ngen.
* Lamka Public Ground ki-umna Sikdai hihse pawl om.
* CDSU in C Hangshing Executive Director DRDA tung a hiamgamtak a gamtang te mohpaih.
* Siamsinpawlpi General Headquaters in C Hangshing Executive Director DRDA tung a hiamgamtak a gamtang te sangtak in mohpaih.
* CoPTAM in Hill Area a MLR and LR Act kizat ding leh Land Survey bawl ding theihtawp suah in dal sawm.
* Zingchiang in CDSU Election om ding.
TUN TANCHIN KIMZAW IN :
Chapellane Hiangtam Lamka a C Hangshing Executive Director DRDA Churachandpur tenna inn gate bul ah zan zingkal baihtak in Chinese Hand Granade khat muhkhiak in on a, granade ah "Warning KNLF and MPLA" chih kigelh hi. Akigen dan in KNLF/MPLA te thil hiding in kigen a, KNLF in C Hangshing Executive Director DRDA tung ah Lakh 40 demand bawl uhi. Hiai thil tung Police te'n a theihphet un, delhzui ngal ua, hand granade puaklou in lakhia uhi. Hiai thil tung tawh kisai in DRDA staff te'ng in nasemlou in tuni'n DRDA Office kong ah mohpaih thupuang kawm in sit-in-protest nei ua, hiai thil tung ziak mah in tuni sunnung dak 1 in Langkhanpau Guite Chairman ADCC makaih in Executive Member teng in meeting nei in, Executive Director DRDA tung a sum demand bawl a, vauna tanpha bawl te mohsa in grass root level a development om theihna dia nasem DRDA Official te tung a hiai bang a gamtang lou a kithuahpih zaw ding in ngetna bawl uhi. Executive Director DRDA tung ah vauna om ziak in SP Churachandpur in security pengal hi.
Gospel for India in naupang te Summer Vacation sung a Vacation Childrens Development School a neihna a Video Coverage te CD in bawlkhia ua, zan sunma dak 11:30 in Rayburn College ah ahonna nei uhi. Hiai hun Major General Binoy Poonen VSM,GOC 57 Mountain Division in chief guest hihna tawh uap in CD hong a, Rev.Dr S Lalpi Vaiphei OMCR in pathian kiang ah lan hi. Hiai hun L Mangkhogin Haokip SP Churachandpur leh mipoimoh tamtak in uap uhi.
Evangelical Baptist Convention Church EBCC V Munhoih New-Lamka in Sunday School building ding a bawl uh zawhsiang ahihtawh kiton in zan sunnung dak 1 in a honna nei uhi. Hiai hun ah Rev.N Thawndoulian Divisioner Superintendent Lamka South Division EBC in Sunday School Building thak hong in Pathian kiang ah lan hi. Hiai Sunday School building tung khuhna ding in bialtu MDC M Gouzamang Guite Executive Member ADCC in tuma deuh in Langva bundel 10 pia hi. Hiai V Munhoih khua ah inn 80 val om a, EBCC, V Munhoih biakinn ahihleh May 21,2011 in Rev.L Khamkholun General Secretary EBC in hongkhia hi.
New-Lamka Ex-servicmen Welfare Association in zan sunnung dak 1 in Rayburn College ah Major General Binoy Poonen VSM,GOC 57 Mountain Division kimuhpih in, Ex-servicemen te haksatna tuamtuam te genpih in Association Office lamsak ding in ngen uhi. Major General Binoy Poonen in memorandum pelut ding in theisak a, a poimoh bang a kithuahpih ding ahihdan gen hi. New-Lamka Ex-servicemen Welfare Association in Office munding nei mahleh uh, a building lam nang sum neilou uhi.
Churachandpur District Sports Association CDSA in Langkhanpau Guite Chairman ADCC kithuahpihna nuai a, Lamka public ground sikdai a, umsuak zawhnung un, migilou khenkhat in sikdai va teptan ua, hiai thu tawh kisai in CDSA in police ah report bawl ngal uhi. CDSA President Lalvullien in a gendan in Lamka public ground kuamah a tuam hilou in, CDSA te a leng hituanlou a, mipi a ahihman in kepbit poimoh a, mipi te khualna sikdai kibawl hihse te mohsak thugen in tunung a kuamah in hiai bang thil haihuai hih nawnlou ding in ngetna bawl a, Sikdai hihse te a theitum om leh theisak ding in ngen hi.
Churachandpur District Students Union CDSU in tuni'a thusuah a bawlna uah, District sung a Officer muanhuai mahmah C Hangshing Executive Director DRDA tung a vauna bawl a, a tenna inn lutna bul a puakthei va koih te a sangtheipen in mohpaih thupuang uhi. Thusuak in a gendan in Organisation tuamtuam te'n hiamgamna tawpsan a, gamsung a lemna leh ki-it tuahna om theihna dia kihouna theihna ding lampi hong zaw ding in ngetna bawl uhi.
Siamsinpawlpi General Headquater in tuni'a thusuah a bawlna uah, Siamsinpawlpi Life member C Hangshing Executive Director DRDA tung a hiamgamtak a gamtang te mohpaihna sangpen a mohpaih thupuang in Siamsinpawlpi in Sih theihna leh lungphawng thei thil himhim deihlou ahihdan taklang ua, hiai bang a gamtang te'n hiamgamna tawpsan ding inleng ngen uhi. Huaiban ah hiai bang thil mulkimhuai, siamsinpawlpi member leh Zomi te lak a hihnawnlou ding in ngetna leng bawl ngal uhi.
Committee on Protection of Tribal Areas Manipur CoPTAM in tuni'a Press Release a bawlna uah, zan zek a kizou Manipur Assembly a Revenue Ministr Th.Debendra Singh in MLR and LR Act Manipur Hill Area ah leng zat hiding a chih naktak in mohpaih uhi. Thusuak in a gendan in India Constitution in Singtangmite gam, tawndan leh tanvou te kepbitna ding a, thupiak nei ahihlam Revenue Minister in manghilhlouh ding ahi chi ua, Revenue Minister in singtanggam a MLR and LR Act zatding achih Singtangmite gam laksak sawmna ahihziak in India Constitution kalna ahi a chih ban uah, CoPTAM in theihtawp suah a dal ding ahihdan taklang uhi. Huaiban ah State Cabinet in Hill Land Survey bawl ding a thupukna a bawl leng CoPTAM in dal ding a, singtangmite gam singtangmite a ahihban ah khaw hausa in vaihawmna len ahihdan taklang ua, Khaw chih in amau kim-le-kiang a khua te tawh gamgi kichiantak a neivek ua, Singtanggam a Survey bawl ding a kiphatmohna bangmah omlou chi in Hill Land Survey bawl ding a State Govt. in thupukna a bawl pen tangtak a singtangmite deihdan doudalna ahi chi in thusuahna ah taklang uhi.
Churachandpur District Students Union CDSU in zingchiang sunma dak 10:30 in Churachandpur Govt. College ah Election neiding uhi. Hiai hun ah CDSU President, Vice-President leh General Secretary ding kitelna om ding hi. Tutan in Candidate ding kuamah puangkhiak omlou a, Election hun ah propose system in paiding hi.
Grace Bible College Accredited by Asia Theological Association New-Lamka ah M.Div, B.Th, Diploma in Theology leh Ministerial Training Course ziltheih ding in kihong nawn hi. July 23,2012 tan in ki-ngetna piaklut theih ding a, July 24 leh 25,2012 in Personal Interview om ding hi. Thuchian kimzaw thei nuam te'n Office hour sung in Chinkhenthang Guite Registrar Grace Bible College kiang ah kanchet theih ding hi.
.