* ZEO Churachandpur in Lalpuithluaii Foundation School ah One Month Spoken English Training Course khak.(Include Vdo Clip)
* United Chief Committee in General Assmbly nei in Land Survey bawl ding naktak in doudal sawm.(Include Vdo Clip)
* Dr.Ajay Kumar Joint Secrtary DeitY Govt. of India in Lamka a NIELIT koihna munding hong enkhia.(Include Vdo Clip)
* YPA General Headquater in LT Ngaihte IFS Indian Ambassador to Afghanistan vaidawnna nei.(Include Vdo Clip)
* STC/BSF in Thau-le-Bomb kapna sunzom ding.
* Major General Binoy Poonen, VSM, GOC, 57 Mountain Division in VCDS, CD hong ding.
TUN TANCHIN KIMZAW IN :
Lalpuithluaii Foundation School ah tuni sunma dak 10 in One Month Spoken English Training Course, Closing Ceremony zang uhi. Hiai hun ah Joseph Lalrothang Zonal Education Officer in Chief Guest hihna tawh uap in Training Course a tel teacher leh trainer te kipahman pekhia hi. Aman sappau zatsiam apoimoh dan gen in teacher te pau bangbang a student te pau ding ahihziak in teacher te mohpuakna poimoh petmah chi hi. One Month Spoken English Course sung in Khuma Thangjom in sinsak a, teacher 40 vel tel uhi. Hiai One Month Spoken English Training Course ahihleh Lalpuithluaii Foundation School neitu Vunglallian te nupa in a sponsor uh ahi hi.
Churachandpur District sung a United Chief Committee(UCC) in tuni sunma dak 11 in Sielmat Community Hall First General Assembly nei uhi. Hiai hun ah Pastor Vanlalringa in thumna in Assembly hong a, Lalboi Lhungdim President United Chief Committee in vaidawnna thugen hi. Lalmalsawm Chief of Muolbem in UCC Block level a makai te introduction bawl a, Area tuamtuam a khaw hausa leh UCC Block level a makai te'n thugenna nei in Manipur Govt. in Singtangmite gam laksak sawm a, hausa hihbei dingdan ngaihtuah a, Singtanggam a Land Survey bawl ding chi a thupukna a bawl uh doudal ding in thupukna bawl ua, huaiban ah Govt. in Village Authority election sai a sawm leng doudal ding in lemsa ua, Chief Association teng United Chief Committee a Affiliate ding inleng thupukna bawl uhi. Hiai hun ah Khaw Hausa 100 val paikhawm uhi. Singtanggam a Land Survey ahihleh Forest Department in bawl ding hidan inleng kigen hi.
Dr.Ajay Kumar Joint Secretary DeitY Govt. of India in tuni sunnung dak 1 in Lamka hongpha a, Churachandpur District sung a National Institute of Electronics and Infromation Technology koihna munding ngaihtuah in Koite leh Thingkangphai ban ah Headquater veng a DIET Centre hong enkhia hi. Dr.Ajay Kumar Joint Secretary DeitY Govt. of India ahihleh N Deben On Special Duty (OSD) Information Technology department of Information Technology, Manipur, Buddhachandra Singh Director National Institute of Electronics and Information Technology (NIELIT), Imphal leh Subhash of NEILIT Imphal in honzui ua, Lamka ah Mannuamching Chief Executive Officer ADCC, LT Puii SDO Churachandpur leh Maniram Sharma IAS Assistant Commissioner Churachandpur in kithuahpih uhi. Dr.Ajay Kumar Joint Secretary DeitY in agendan in NIELIT dinkhiakna ding in Govt. in fund hon peta a, land transfer zawh ahihchiang in nasep kipan ding chi a, tulel in Headquater Veng a DIET Centre building
puahthak hiding a, huai ah temporary in NIELIT hon hiphot ding in kigen hi. Dr.Ajay Kumar Joint Secretary DEITY leh a nungzui te'n DC Resident kiang a Guest House ah sun anne in nitaklam in Imphal ah kiksuk uhi.
Young Paite Association YPA General Headquater in tuni sunnung dak 3 in YPA General Headquater Office Hiangtam lamka ah LT Ngaihte IFS Indian Ambassador to Afghanistan vaidawnna nei in, Patron Member ding in lalut uhi. Hiai hun ah LT Ngaihte IFS Indian Ambassador te Afghanistan in a nasepna leh Afghanistan gam omdan tangpi report pia hi. Rev.G Haukhomang Chief Adviser YPA General Headquater in LT Ngaihte IFS leh a Zi tung ah khut nga in vualzawlna ngetsak hi. Programme zawh in LT Ngaihte IFS te nupa in annkuang lui in YPA General Headquater makai te annekpih uhi.
Subsidairy Training Centre STC/BSF in Mission Compound suahlam leh Pearsonmun, Mualkawi leh Gangpimual simtum kikal ah zingchiang akipan July 31,2012 sung zinglam dak 5 akipan zannung tanpha in thau lh bomb kapna sunzom ding uhi. Kim-le-kiang a om te pilvang a ganvulh te khahzanlou ding in theihsakna bawl uhi.
Gospel for India in naupang te Summer Vacation sung a Vacation Childrens Development School a neihna a Video Coverage te CD in bawlkhia ua, zingchiang sunma dak 11:30 in Rayburn College ah ahonna neihsawm uhi. Hiai hun Major General Binoy Poonen VSM,GOC 57 Mountain Division in chief guest hihna tawh uap in CD hong ding a, Rev.Dr S Lalpi Vaiphei OMCR in pathian kiang ah lan ding hi.
Assam khopi Guwahati khawlai a ni 5 paisa a nungak khat a lawm te birthday lawm a hoh nitak dak 10:30 vel a innlam zuan a lampi a pailai khawlai a pasal hon 50 vel in ut-le-dah in kikhoih huan a, hiai thil tung Local Channel Camaramen in lakha in suahkhia a, huainung dakkal 48 in Police te'n thil omdan theikhe pan in, suizui ua, nungak nu pawngkhoihna tel mi 6 mankhia in, a tamzaw matlouh neilai uhi. Hiai thil tung in Assam State sung kia phawnglou in India gamsung pumpi dengsuak pah a, Women Commission hi'n Organisation tuamtuam in thiltung naktak a mohpaih ua, nungak nu tung a khutkha peuhmah suakta mailou a, gawtna sangpen piak ding deih thugen uhi. Nungaknu ut-le-dah a khoih, matkhia a om te court ah dinsak hiding ua, court ah evidence ding in video clip kia om ding a, mit a mu a om poimoh mahmah ding in kigen hi. Hiai bang thil a tunglai in khopi sung vak mahmah a, pasal hon in kikhoih huan mahle uh, lampi a paikha kuamah in nungaknu panpih sawmlou
uh hidan inleng kigen hi. Guwahati ah kum 10 paisa in helpawl te hat ziak in night club teng khaksak in om a, tuma deuh in gamsung dinmun in hoihlam nawt chih ziak in night club te nitak dak 11 tan honding phalsak hi a, zu leng nitak dak 11 tan zuak theih ding in Govt. in phalsak hi. Govt. in night club honding a phalsak ngal lel Police te gari tawh a duty gige uh poimoh ahihdan kigen hi. Hiai thil tung tawh kisai a, khutkha pipen a kigen tutan in Police te'n a omna theilou uhi.
Rajasthan ah Women Empowerment tungtang naktak a kigen lai in Naungk deihlouh paihna case 2 om nawn hi. Jagatpura train station ah railway police te'n naungak khat mukhia ua, kintak in damdawi inn pawtung mahleh uh damzoulou hi. Police te gendan in naungek pen train sung a dailen buk a paihkhiak ahihleh train khawlai a railway track a nawtsiat hiding in gen uhi. Huailou n Pali District ah leng hiai bang thil tung om a, naungek khat khawlai ah nutsiat hi a, naungek hampha mahmah in, a kiang nai a om te'n a kah ging za in damdawi inn ah pawtung ua, a dinmun in hoihlam nawt in a nu-le-pa theihsawm in Police te'n panla lel uhi.
.