* Rural Aid Service saina in Customary Law leh Land Rights tawh kisai in Consultation Meeting neih in om.
* BRTF te'n Tipaimukh Road a Culvert bawlna ding ah Tui tawpkhe theilou.
* Dr.Ajay Kumar Joint Secretary DeitY Govt. of India in Lamka hongpha ding.
* Mannuamching Incharge DC/Ccpur in Singngat Sub-Division sung a DLO teng in Sub-Divisional Headquater mun a Office hong chiat ding in theisak.
* CDSU in Vungzagen Higher Secondary School a Lecturer leh Lab. Assistant lakna ding tawh kisai in Press Release bawl.
* LM Khaute IPS Additional DGP in Lamka hongpha.
* District Health Society Churachandpur nuai a Post tuamtuam a Contract Basis a semding lakna dia Interview Result suak.
* Gospel for India in Vacation Children Development School, CD hong ding.
* ZYA Central Cabinet Committee Member leh Constituent Unit a President leh Secretary teng in Meeting neiding.
* Mercy Home Care Centre, Kamdou Veng ah Six months Training om ding.
Tanchin Kimzaw:
Rural Aid Service (RAS) saina in Kuki Innpi Churachandpur KIC Office Conference Hall, Tuibuong ah tuni sunma dak 11:30 in "Consultation meeting with Clan Leaders and Village Authority on Customary Laws and Land Rights' kichi nei uhi. Hiai hun ah Dr D.Letkhojam Haokip, Assistant Professor, Guwahati University in " Customary Law" tawh kisai gen a, Seiboi Haokip, Joint Secretary, COPTAM in " Land Rights " tawh kisai gen hi. Haoneo Haokip, Chief Functionary , JARDA leh Ngamlen Touthang, Ex-Vice-President, KSO General Headquater in houlimna hun makaih uhi.
Tipaimukh Road leh IB road kisuktuahna Churachandpur Govt. College kong a culvert aneuluat ziak in vuahtui luan hun in lampi lai ah hawktui luang in lampi segawp a lampi apai leh gari ataituah te ading in nawngkai mahmah hi. Hiai thu tawh kisai in BRTF pawl in culvert bawlthak sawm in June 2012 kha in hihsia ua, tunitan huai culvert kibawl thak nailou hi. Tuni'n BRTF makai te leh local asem Poineer te'n tui pump zang in culvert bawlna munding a tui vung te topkhiak sawm mahleh uh machine deihbang a zangtheilou in tui omte topkang zoutuanlou in khawlsan nawn uhi.
Dr.Ajay Kumar Joint secretary DeitY Govt. of India in July 14-15,2012 sung in Manipur hongpha ding hi. July 14,2012 sun dak 11:50 in Churachandpur District hongpha ding a, Tuibuang a Fishery Office leh headquater veng a DIET Centre ban ah Koite khua phading hi.Dr.Ajay Kumar Joint Secretary DeitY Govt. of India ahihleh N Deben On Special Duty (OSD) Information Technology department of Information Technology, Manipur, Buddhachandra Singh Director National Institute of Electronics and Information Technology (NIELIT), Imphal leh Subhash of NEILIT Imphal in honzui ding uhi.
Mannuamching Incharge Deputy Commissioner Churachandpur in thusuah a bawlna ah Singngat Sub-division sung ah law and order dinmun in hoihlam manawh in Central Bank of India Singngat Branch inleng Cash transaction panta ahihdan Singngat Sub-Division sung a District Level Officer te theisak hi. Huchih dungzui in Singngat Sub-Division sung District Level Officer omkha te'n akintheilam a Sub-Divisional Headquater mun a Office hong chiat ding in thupia a, theihsakna ngei-ngaihlou department te khauhtak a etzui hiding in thusuah hi.
Churachandpur District Students Union CDSU in tuni'a Press Release a bawlna uah, Vungzagen Higher Secondary School Mata a, Lecturer leh Lab. Assistant lakna ding tawh kisai a, Advertisement a zekai ziak in Interview hunding a kha (month) a zekai sak ding in Director of Education (S) ah ngetna bawl uhi. Huchibang a Education department in a sepsuah keileh nekgukna leh golhgukna sangpen bang a pom hiding chi ua, huaiban ah Singtangmite adiak in Churachandpur District mipi muhsitna bang a ngaih hiding chi uhi. Press release in aban a genzelna ah State sung a hiai bang a dikloutak a kibawlna kuamah kimanghilhsak mailou a ngaihdan dik-le-tang nei thei peuhmah pankhawm ding ahi chi'n thusuahna ah taklang uhi.
L.M Khaute IPS, Additional DGP in tuni sunma dak 11:30 in Lamka hongpha a, SP office chamber ah L.Mangkhogin Haokip, IPS SP/CCpur leh Y.Ashok Kumar, MPS Additional SP/CCpur tawh law and order tawh kisai genkhawm in, nitaklam in Imphal ah kiknawn hi.
District Health Society Churachandpur nuai a post tuamtuam a semding lakna ding in kumlui in interview neih in om a, tukum July 10, in result suak hi. Lohchinna ngah teng in February 28, 2013 tan contract basis in semding uhi. Post tuamtuam a semding te ahihleh District Community Mobilizer asemding in Hual Sian Vung; Block HMIS Assitant asemding in Mangtinlal Haokip, T.Ngaihnem leh Samte Albert Aimol hi uhi. Office Assistant ding in Manaseh Tlanghmingthang; Block tuamtuam a ASHA Fecilitator dingte -Thanlon Block ah Manbiakching, Rita Vungthianmoi leh Khawlngaihkim hi uhi. Behiang PHC ading in Ninglunkim, Singngat PHC ading in Chin Suan Ching, Lucy Niangnuamching leh Christina Chingdeihkim, Tipaimukh block ading in Angelika Lalremkim, Lalnithar, Julie Lalsangmawi hi uhi. Henglep block ading in Themhat Haokip, Kimmy, Thaneihlhing S.Gangte, Lamneikim Baite, Kim Irine leh K.Esther hi uhi. Sagang PHC (Samulamlan block) ading in T.Elizabeth Kom, Leivon Solami Kom leh Hoipilhing hi uhi. Saikot PHC ading in S.Manngaihniang,Joyce Lalmawizuol, Lhingneichong Haokip, S.Chinglian, Niangngailian Vaiphei, S.Lamneikim Haokip, Lhingneithem, G.Chingngaihlun, Neihsial Hoineijoy Vaiphei leh Lhingneilam Haokip hi uhi. Town area block ASHA Fecilitator ding in Chingngaihvung, Lalrozami leh Chingmuankim hi uhi. AYUSH Pharmacist ding in Thangngaihzual, Arubam Sanjita Chanu leh Maibam Sangita Devi te hi uhi. Amauteng in CMO/CCpur kiang ah contract agreement form ah suai kaih ngai ding hi. A tung a lohchinna ngah teng list kimtak CMO Office notice boad ah ettheih ding in kitakkhia hi. CCpur District a State Health Mission Society nuai a GNM post 1, Block Data Manager 1, Lab Technician 1, Block Program Manager 1 leh District Accountant Manager post 1 lakna ding a interview result ahihleh tunitan in suak nailou hi.
Gospel for India in naupang te Summer Vacation sung a Vacation Childrens Development School a neihna a Video Coverage te CD in bawlkhia ua, July 15,2012 sunma dak 11:30 in Rayburn College ah ahonna neihsawm uhi. Hiai hun Major General Binoy Poonen VSM,GOC 57 Mountain Division in chief guest hihna tawh uap in CD hong ding a, Rev.Dr S Lalpi Vaiphei OMCR in pathian kiang ah lan ding hi.
Zomi Youth Association ZYA General Headquater Emergency Cabinet Committee Meeting thupukna dungzui in zingchiang sunnung dak 2 in SYO Hall Simveng ah ZYA Central Cabinet Committee member leh ZYA Constituent Unit a President leh Secretary teng in kimuhkhawmna nei in ZYA Constitution tungtang genkhawm ding ua, ZYA Consultant ding leng guang ngal in annekhawm ding uhi.
Mercy Home Care Centre Kamdou Veng ah July 16,2012 in Six months Training on Cutting, Tailoring and Embroidery kipan ding hi. Lunglutna neite'n Mercy Home Care Centre Kamdou Veng ah Application form laktheih ding hi.
Nidang lai a film star leh kibuanhat a minthang Dara Singh apaisa kiginni in Cardiac arrest natna ziak in damdawi inn ah puaklut in om a, tuni zinglam dak 7:30 in damzoulou in si hi. Film Star leh Film maker tamtak in Dara Singh suun thupuang uhi. Tulai a Film maker minthang Farah Khan in a gendan in neuchik ahihlai akipan Dara Singh ngaisang mahmah ahihdan gen a, ka pa tawh Dara Singh in film 25 a bawlkhia uh chi hi. Dara Singh ahihleh Kum 84 in upa hi.
.