* CDSA in Lamka Public Ground Sikdai in Umsuak sawm.
* Tipaimukh Road zul a phalna neilou suang la te CJM in Sum liausak in Suang la nawnlou ding in kichiamsak.
* ZEO leh District Council nuai a School te ading in Mid-Day Meal Anntang kihawm.
* Churachandpur DC in hihding poimoh a neihziak in Tamil Nadu zuan.
* NFCH apan panpihna ngah ding Student te Verified nopna ding in School min piaklut ngai ding.
* 1/11 Gorkha Rifle te mat UPPK Cadre CJM in Jail tang ding in thutanna bawl.
* SYO General Headquater makai thak ding te'n Charge la.
* PCI(R) in Pastor 4 laksawm.
TUN TANCHIN KIMZAW IN :
CCpur District Sports Association (CDSA) in DRDA 2012-13 fund zang in Lamka Public Ground a football kimawlte leh a en mipite kal ah sikdai zan suak sawm in zan apan in nasep pan uhi. Sikdai zanna ding in sik khuam 150 vel feet 6 leh feet 8 a kihal in kiphut a, feet 4.8 a sang a bawl hiding hi'n kigen hi. Hiai nasepna ahihleh July 21, 2012 a First Division District League kipatma ngei a zohsiang hiding in leng kigen hi.
National Highway 150 Tipaimukh road zual a phalna neilou a suang lak ziak a DC Churachandpur makaih a Police te'n zan a Shaktiman 5, JCB 2 leh tractor 1, a matnung un, Gari neitute tuni'n Chief Judicial magistrate mai ah dinsak hi ua, Chief Judicial Magistrate in Gari neite 2500 chiat liausak a, maban ah Tipaimukh road zul a suangla nawnlou ding in Chief Judicial Magistrate mai ah kichiam uh hi'n kigen hi.
ZEO Churachandpur leh District Council nuai a Midday Meal tangkha school te a ding in tuni apan Mid Day Meal anntang hawmkhiakna kipan hi. Thutut kingah dan in, tuni sunma dak 11:00 in DI of School/CCpur Block makaih in CCpur Block nuai a District Council leh ZEO nuai a school te a ding Mid Day Meal anntang hawmkhiak in om a, sunnung lam in Henglep Block a ding Mid Day Meal anntang hawmkhiak in om nawn hi. Tuni a Mid Day Meal anntang kihawmkhe te ahihleh April, May leh June quota hi a, CCpur Block ah School 105 leh Henglep Block ah School 67 ading hawmkhiak in om hi. Zingchiang in leng Mid Day Meal anntang hawmna sutzop hinawn ding a, huai hun ah Henglep block leh Samulamlan block a ding hawmkhiak hiding in kigen hi.
DC/CCpur Jacintha Lazarus, IAS in hihding poimoh aneih ziak in suty la a, tuni'n Imphal ah Chief secretary tawh Meeting a neih zawh in a khaw lam uh Tamil Nadu zuan in zinkhia hi. DC Churachandpur ahihleh July 22,2012 vel a Lamka hongtung kikding hidan in kigen hi. DC zinkhiak sung in Mannuamching MCS Chief Executive Officer ADCC in DC Churachandpur mohpuakna tawh lenkhawm ding in zan in DC Churachandpur in incharge pia hi.
National Foundation for Communal Harmony NFCH nuai ah Churachandpur District sung a Student panpihna ngah ding mi 87 list hongpai a, huailak ah Student 27 te hihna diktak theihchet ahihnung in zan in DC lamka Office ah Sum a cheque in pekhia uhi. Sum kihawm mahleh Student tawh kitawnlou nu-le-pa/guardian te sum piak hilou a, huaiziak in mi 10 vel in sum lapan ua, Sum lanailou nu-le-pa leh guarian te'n Student tawnpih in Office hour sung in Branch Officer Headquater DC Office ah laktheih ding hi. Huaiban ah Student 60 verified ding in samlai a, verified nopna ding in student te'n School min DC office ah pelut ding in S Khaikhopau Ngaihte Branch Officer Hq. DC Office in theisak hi.
1/11 Gorkha Rifles, Khengjang Post a omte'n apaisa July 6, 2012 zanlai dak 12:30 in K. Gamnom khua apan UPPK cadre Mr Shamjai @ Abung (23) s/o (late) Neijanglung of Thangmeiband a mat uh, tuni'n CJM mai ah dinsak in om a, CJM in jail a khum ding in thutan khum hi'n Police apan thutut kingah hi. Shamjai @ Abung ahihleh UPPK Army No. 803 tulel a Myanmar a omlel hi'n kigen a, K. Gamnom khua a a zi kiang hong pha 1/11 Gorkha Rifles te'n ana mat uh ahi. Shamjai apan Chinese made 9 mm pistol 1 leh magazine mukhia uhi.
Tuni nitaklam dak 4:00 in SYO hall Sim veng ah SYO General headquater 2012-2015 sung makai ding a telching thak a om te'n makai lui apan mohpuakna la uhi. Hiai hun ah SYO General Headquater cabinet leng keklian ngal ua, Pastor P.Jampi, NTBC/Sim Veng in SYO General Headquater makai thak te Pathian kiang ah thumsak hi.
Presbyterian church in India (reformed) in Pastor nasem ding mi 4 laksawm a, Under graduate/ guaduate ban ah M.Div degree nei, mi piangthak leh saptuam te enkol dia pathian sapna kichiantak tang leh thil bangkim a mahni kithunun a, lunglutna nei te'n August 31,2012 tan in Rev. Lian C Tombing Coordinator Ministries PCI(R) kiang ah mahni khut gelh kingetna leh bio-data kimtak ban ah a kul-le-poimoh document teng tawh piaklut theih ding hi. Khaloh tawh kisai ahihleh PCI(R) recruitment rules nuai a pay scale piak hiding hi.
.