* Torbung ah Henjoy in Khaithianmang a vuak nung in damzoulou in Si.

* DC Churachandpur in Tipaimukh road zul a Suang la om JCB 2, Shaktiman Truck 5 leh Tractor 1 man.

* NFCH nuai a panpihna Sum kihawm.

* RKS District Hospital Management Society Governing Body in Meeting nei.

* Churachandpur Govt. College kong a Culvert tutan kibawllou.

* CDSU in Director of Education (S) ah ngetna pelut.

TUN TANCHIN KIMZAW IN :

Police apan thu kiza dan in zan nitak dak 8 vel in Torbung, Kangvai ah Khaithianmang @ Khaimang (48) H/o Doilam of Torbung Kangvai, a lawmte mi 2 Kamthianlem leh Thanglemsang tawh khawlak pawtlai BT Henjoy (23) S/o BT Thanga of Torbung Kangvai tawh kisual ua, Henjoy in Khaimang, a mai ah 2 vei su in supuk a, damdawi inn puaktung ahihnung in, a nak ah sipawt in damzoulou in tuni zinglam dak 8 vel in si hi. Police leh Doctor te'n post mortem a bawlzawh un a innkuanpih khut ah pekhia uhi. Hiai thutawh kisai in khut khial lam leh lusun innkuan te'n kihouna nei in kihoulem thei uhi.

Jacintha Lazarus IAS DC Churachandpur in National Highway Tipaimukh road zul a suangla te'n tawpsan ding in theihsakna tamvei tak bawl mahleh, theihsakna zuilou a suang la teitei om ahihdan complain a zak tawh kiton in tuni zinglam in Police tawh kithuah in Tipaimukh road zul a suang lakna mun leh Lamka khaw sung mipi te tuinek kipatna lanva intake point ban ah Bungmual a PHED water reserviour va enkhia hi. Tipaimukh road zul a suang la a om JCB 2, Shaktiman Truck 5 leh Tractor 1 man a, tun Police custody ah koih lel hi. Huaiban ah Bungmual a PHED water reserviour apan phalna neilou a, tui lakna Pipe te leng Police te lakhe sak a tun Police te'n kemlel uhi. DC Churachandpur in a gendan in, Tipaimukh road sukbuailouh ding chi in thusuah tamvei tak kibawl ta a, National High way a compensation teng piakkhit hita a, National Highway lampi langnih tuak a metre 100 sung hihbuailouh ding chih ahihdan gen hi. National Highway zul a phalna neilou a suang la te'n tawpsan ding in theihsakna tamvei tak kibawl mahleh a tawpsan tuanlouh ziak in tuni'n suang lakna a kigawl kha teng kiman a, SP Churachandpur tawh kithuzak in dan tawh kituak in action lak hiding chi hi. Hiai suang lakna in lampi kia hihbuai lou in Lanva lui naktak in sukha a, mipi tuinek ding siangthousak lou ahihman in suang lakna a kigolh kha peuhmah in tawpsan ding in theisak hi. Huaiban ah Bungmual a water reserviour apan tui siangthoulou la ten leng tawpsan ding in ngen a, mihing damtheihna dia hoihlou ahihdan gen a, treated ahihnung a tuilong a kikhahkhe te kia lading in theisak hi. Hiai tawh kisai in PHED te kiang ah theihsakna bawl a, zinglam dak 6 leh dak 7 kikal a tui siangthou khahkhia a, ahihtheih leh nitaklam a leng khah nawn ding in theisak hi. Huaiban ah mipi'n leng phalna neilou a tui lalou ding in ngen a, banghiam haksatna ahihkei leh buaina omleh mipi'n theisak pah ding inleng ngetna bawl ngal hi.

Churachandpur District sung a National Foundation for Communal Harmomy (NFCH) tungtawn a financial assistance ngah verified student 27 te ading sum a cheque in tuni sunnung dak 12:30 in DC office Conference Hall ah piakkhiakna nei uhi. Hiai hun ah S Khaikhopau Ngaihte Branch Officer Headquater DC Office in a cheque in sum sing 1, sang 1 leh za 2 leh 50 pekhia a, Student te tellou a nu-le-pa sum ladia kuan te pelou in Student tawh kuan te kia pia uhi.

Tuni sun dak 12:00 in District Hospital Medical superintendent Conference hall ah Rogi Kalyan Samiti (RKS)/Hospital Management Society governing body meeting neih in om hi. Hiai meeting ahihleh RKS a Chairman DC Churachandpur Jacintha Lazarus in makaih a, Member Secretary Dr. Paulginthang, Medical Superintendent District Hospital in Hospital sum muhdan leh expenditure tawh kisai report pia hi. Hiai hun ah RKS Governing Body member thak leh PRI Representative Dr. F. Tusing, N. Ginsianlal Advocate, J. Lhungdim, IRS (Retired), Goihzachiin, Female Helath Worker Training School Principal, D. Khuala Vaiphei, District Program Manager, Seiboi Mate, District Data Manager, Baria judin Shah, District Finance Manager leh Mannuamching Chief Executive Officer ADCC, Kamsuanlun Executive member ADCC leh Member Secretary Dr. Paulunmang , Deputy Superintendent, Monitoring Committee chairman Dr. Tualkhankham, Medical Superintendent (Retired) te tel in District Hospital a ISO Consultant, Instrument Calibration, staff shortages leh waste management toh kisai genkhawm uhi.

Tipaimukh road leh IB road kisuktuahna Churachandpur Govt. college kong ah, a hoihzaw ding ngimna in BRO te'n Culvert liantak bawl thak sawm in hun bangtan hiam paisa in JCB zang in Culvert omsa lakhiak in om a, himahleh tuni'n nasep kipan lou hi. Kintak a zawh dia kilawm hizenpi, tunitan a ngei-ngei a om pen mitamtak in lamdang sa uhi. Culvert kilakkhiak ziak in Tipaimukh road kikawmtuahna khaktan in om a, mipi'n zawh siang ahihkal ngaklah mahmah uhi. Culvert lakkhiak ahihnung in tui vungdim a, generator zang a pump khiak mai dia kilawm, hihzawlou in baltin in suahkhiak thoh ua, hiai in nasep zekai sak tuan mahmah ding in gen uhi.

Churachandpur District students Union CDSU in Director of Education (S) Govt. of Manipur kiang a memorandum a piak uh kimu dan in Vungzagen Higher Secondary School Mata a, Lecturer leh Lab. Assistant lakna ding tawh kisai in June 25,2012 in Notification suak pan a, Churachandpur a daily news paper ah leng a huntak in suak manlou a, Imphal ah ISTV news in puang mahleh hiai in singtangmite omna lak cover khalou ahihdan theisak ua, hiai ziak in candidate muanhuai tamtak interview hun ah telkha lou chi uhi. Huaiban ah thil kiselgu omlouhna ding in Interview hun ding bikhiak thak ding in ngen ua, Deputy commissioner makaih in district level ah interview neih hihen a chih ban ah school hoihna ding in local candidate te deihsakna piak hihen chi'n theihsakna bawl uhi.

Directorate of Education (S) Govt.of Manipur in kum paisa a, ahihbang in tukum inleng Teachers Day chiang in State Teachers Award piaksawm nawn hi. Hiai ding tawh kisai in Joseph Lalrothang Zonal Education Officer in thusuah bawl a, Govt. School leh Aided school Headmaster te'n mahni teacher te lak a, apply thei ding te theisak a, Zonal Education Office a Prescribe form la a, apply ding in theisak hi. Prescribe form te fill-up khitnung in July 20,2012 tan in piaklut theih ding hi. Hiai State Teachers Award apply peuhmah District Level Screening Committee in selection bawl ding ua, telkhiak a om teng Directorate of Education (S) ah khak ding uhi.