* Eternal Life Ministry in Gospel Film "End of Spear" kichi Paite Pau in bawlkhia.
* Thanglalmuan in Pune University nuai ah MA (Economics) First Class in zou.
* Khengjang Post a om 1/11 Gorkha Rifle te'n K Gamnom khua ah UPPK Cadre Shamjai @ Abung galvan tawh mankhia.
* ZEO leh District Council nuai a School te ading in Mid-Day Meal Anntang kihawm ding.
* National Foundation for Communal Harmony nuai a Financial Assistance ngah Verified Student 27 te ading panpihna Sum kihawm ding.
* ZYA Central Executive Committee in Meeting neiding.
* ZEO Churachandpur nuai a Teacher te'n Education Information System a hihfel masiah uh Khaloh la theilou ding.
* AMFA in Lamka ah Refree te Physical Test leh Theoritical Exam hong neisak.
* ECA Gospel Icon Top 10 kidemna om ding.
TUN TANCHIN KIMZAW IN :
Eternal Life Ministry in Paite pau a, abawlkhiak Gospel film muhnophuai mahmah " End of Spear" kichi a honna zan sunnung dak 1:30 in Nehru Marg a Eternal Life Ministry Office Upa Ricky L Guite tenna inn ah nei uhi. Upa K Dongzalam in Film hong a, Rev.Dr Luaichinthang in Pathian kiang ah lan hi. Eternal Life Ministry in Pathian thutawh kituak Film te Paite Pau a letkhia in mipi lak ah zuakkhia ua, mi tamtak in phattuampih mahmah hi. Tuma inleng Fire Proof kichi Paite Pau in bawlkhia ua, huai film leng mi tamtak in phatuampih uhi.
Nipi kal masa a Pune University nuai a MA result suak ah, Churachandpur mi lohchinna ngah tunitan a kitheidan in Thanglalmuan s/o Lalthalien Varte of SA Road, Lamka in MA (Economics) 1st Class a zou hi.
1/11 Gorkha Rifles, Khengjang Post a omte'n July 6, 2012 zanlai dak 12:30 in K.Gamnom khua apan UPPK cadre Mr Shamjai @ Abung (23) s/o (late) Neijanglung of Thangmeiband mankhia in amah apan Chinese made 9 mm pistol 1 leh magazine mukhia uhi. Police thusuak kingahdan in Shanjai ahihleh UPPK Army No.803 tulel a Myanmar a omlel hi a, K.Gamnom khua a, azi kiang hongpha lai Army te'n amatkhiak uh hi'n kigen hi. Army te'n Imphal Police te khut ah pekhia in, Imphal Police te'n Churachandpur Police te khut ah pekhia in FIR No. 68(7) 2012 CCP-PS U/S 20 UA(P) A. Act & 25 (1-C) A. Act registered uhi.
ZEO Churachndpur leh District Council nuai a Mid-day Meal tangkha school te ading in July 11 akipan 16, 2012 sung in Mid Day Meal antang April, May leh June 2012 quota ni 50 ading kihawmkhe ding hi. July 11, 2012 in CCpur block leh Henglep block hiding a, July 12, 2012 in Henglep block leh Samulamlan block, July 13, 2012 in Singngat block leh July 16, 2012 in Thanlon block leh Tipaimukh block te ading kihawmkhe ding hi.
National Foundation for Communal Harmomy (NFCH) tungtawn a financial assistance ngah verified student 27 te ading sum a cheque in July 10, 2012 sun dak 12:00 in DC office ah kihawmkhe ding hi.Student dangte leng tungnung a verified zawh hun in hawmkhiak hiding in kigen hi.
Zomi Youth Association ZYA a Central Executive Committee in July 13,2012 sunnung dak 2 in SYO hall Simveng ah meeting neiding uhi. Huai hun ah ZYA Constitution thugen khawm in ZYA consultant ding leng guang ngal ding uhi.
Education Department sung thu tawh kisai in Churachandpur District a ZEO nuai a staff te CPIS apaisa July 8, 2012 in Imphal ah bawlzou ta ua, document kimlouh khenkhat om ziak in mi 20 vel a zousiang theilou uhi. Document kimlouh ziak a CPIS zawhlouh a om teng in document kisam te ZEO office ah kan ngai ding a, mimal in Imphal ah CPIS a hihfel uh ngai ding hi'n kigen a, huai hih fellou te tunung in CPIS ah omkha nawnlou ding uh hi'n leng kigen hi.
ZEO Churachandpur nuai a teacher te'n June khaloh laknang in Education Information System EIS form ah signature bawlvek ngai a, EIS form leng mansa a om hi'n kigen hi. Teacher te'n EIS hihfelma in June 2012 khaloh latheilou ding uhi.
All Manipur Football Association (AMFA) saina in tuni zinglam dak 8:00 apan in Lamka Public Ground ah Referee-te a ding in Physical test leh Theoritical Exam hong sai uhi. Hiai hun ah Churachandpur district apan referee 5 leh Bishenpur District apan referee 8 tel ua, Physical Test Lamka Public Ground ah a neih zoh un, Theoritical Exam Community Hall, Hiangtam Lamka ah nei uhi. AMFA apan official hong paite ahihleh K. Yaima Singh, Vice President, AMFA in hon makaih a, Ch. Ibotombi Singh, Assistant Secretary, AMFA, L. Ranjit Roy, General Secretary, AMFA leh Kh. Modhuchandra Singh in honzui ua, Kh. Modhuchandra Singh, Referee Instructor leh Ph. Lanthoiba, National referee in Physical Test leh Theoritical Exam neisak uhi.
Hongtung ding July 21, 2012 zinglam dak 10:00 in ECA Biakinn, M. songgel ah ECA Gospel Icon Top 10 kidemna kipan nawn ding hi. ECA Gospel Icon Top 10 neihna ah Icon of the Day telkhiak hiding in thutut kingah hi.
India Presidential Candidate ding tungtang a gen-le-sak a tam mahmah lai in Vice-President Candidate ding tungtang ah leng gen-le-sa tam mahmah nawn ding in kilang hi. Vice-President Candidate ding thu tawh kisai in Dr Manmohan Singh Prime Minister in CPM general secretary Prakash Karat ngaihdan dong in houpih hi. Tulel dinmun et in tua Vice-President hihna len lel Hamid Ansari hatpen ding in kilang a, himahleh Congress party in Party tuamtuam te ngaihdan kaikhawm lel uhi. Home Minister Pranab Mukherjee leng Kolkata ah om lel in MP leh Left front makai te kimuhpih hi.
RSS Leader Sanjay Joshi in Home Minister kiang ah laikhak in meltheihlou khenkhat in a hinna tung a vauna uh ahihdan theisak a, telephone call tanpha a leng vauna tuak ahihdan gen a, Rashul Khan kichi apan leng vauna lai mu ahihdan theisak hi. RSS Leader Sanjay Joshi in ahihleh tunai zek a BJP Leader Narendra Modi tawh a kisiat ziak un BJP pawtsan a, huainung in vauna tuaktou den hi.
Post : David R.Tonsing
.