* District Aids Prevention and Control Unit in Saptuam makai te HIV/AIDS tawh kisai in Training pia.
* Gangte Students Organisation Churachandpur in Felicitation Programme zang.
* Churachandpur District Council Teachers Association in Pension Cum Gratuity leh Death Cum Gratuity pekhia.
* T Manga Vaiphei MLA in Vaiphei Peoples Council General Headquater Office Building Sawngtung hong.
* JNV Tuinom a Academic Session 2012-2013 a Class VI Admission bawl thei ding a telkhiak Selection Result suak.
District AIDS Prevention and Control Unit (DAPCU) saina in tuni zinglam dak 10:00 in New Lamka Dorcas Hall a Semi-Auditorium ah Saptuam makai (church leader) te ading in People Living with HIV/AIDS tawh kisai in One-day sensitisation training programme for faith healer’ kichi nei uhi. Hiai hun ah Dr.T Nengkhanmang District Aids Control Officer in training programme hong a, Dr.HL Liensang,Chief Medical Officer in keynote address gen in Dr. VC Pau, District Family Welfare Officer leh Rev. V.Khamvum Lecturer Grace Bible College GBC, in thupi tuam tuam pansan in sinsak uhi.
Gangte Students Organisation Churachandpur District in Gangte nam sung a tutung a Class X leh Class XII examination a lohchinna ngahte kipahpihna programme tuni sun dak 12:00 in KKL Complex Headquarters Veng ah nei uhi. Hiai fecilitation Program ah Haopu Gangte in Special Guest hihna toh uap in Class X leh Class XII examination a lohchinna ngahte kipahpihna in certificate pia hi. Aman a thugenna ah, Gangte lah hingal a Gangte nam min zumpih a, Gangte min a lasiam hih utlou, Gangte min a laisiam hih utlou leh Gangte min a minthang utlou te ihihziak un Gangte nam in niamkiakna nasatak a tuak chi a, Gangte min a laisiam ut te kipahpih a thumpih ding ahihdan gen hi.
Churachandpur District Council Teachers Association (CDCTA)in tuni sunnung dak 1:30 in District Council Administrative Building ah CDCTA member pension leh sisa te suunna leh Pension Cum Gratuity leh Death Cum Gratuity Sum piakkhiakna nei uhi. Hiai hun ah Langkhanpau Guite Chairman ADCC in Pension Cum Gratuity sum sang ding mi 5 Lienkhuol T Gangte, Henkam Kipgen, Helkholam, M Naba Kumar Singh leh Siempu Gangte kiang ah Lakh 1 chiat pia a, Mannuamching Chief Executive Officer ADCC in Death Cum Gratuity Sum sang ding a phamsa mi 2 Vungthansiam leh K Achung Kom te kinaihpih pen kiang ah Lakh 2 tuak pia hi. Hiai hun a Langkhanpau Guite Chiarman ADCC in a thugenna ah, Pension manlou a si tamtak omlai a District Council nuai a full time a teacher nasem a pension tanpha damtak a muthei kichi thupi mahmah ahihdan gen in zahna pia a, teacher naasep sung a student te adia zuih ding khekhap a nutsiat uh zahtak tham ching ahihdan gen hi. Huaiban ah aphamta member 2 te suun thupuang in, teachers association leh teacher te'n teacher nasem sung a mite ziuh theih ding nutsiat sawm a panla ding in ngen hi. Mannuamching Chief Executive Officer in a thugenna ah, Teachers Association in teachers welfare nasepna ah a poimoh penpen ahihleh Teachers I hihlam kimanghilhlouh ding chih ahi chi a, teacher na hihziak ua, teachers association makai a pang thei na hi uh chi hi. Association kichi secondary ahi a, teacher pen a masa ding ahi chi'n leng genbeh a, huaiban ah teacher te'n mahni mohpuakna manghilhlou ding inleng ngen hi. Aban agenzelna ah District council nuai a school te naktak in puahphat kisawm a, july kha akipan school teng inspection kibawl ding a, teacher mahni posting na mun a omlou leh school kailou muhsuah omleh khaloh kipelou ding chi hi.
New-Lamka Bethel Veng a Vaiphei Peoples Council (VPC) General Headquater Office building sawng tung ahihtawh kiton in tuni sunnung dak 2 in ahonna tawh kithuah in T Manga Vaiphei MLA kipahpihna nei uhi. Hiai hun ah T Manga Vaiphei MLA in Office Building sawng tung hong a, Rev.(Retired) Laltingen MPCS in Office Building Pathian kiang ah lan in VPC makai te leh Office Building lamsaktu T Manga Vaiphei MLA a ding in vualzawlna ngetsak hi. Khatkhotong Baite President Vaiphei Peoples Council General Headquater in kipahpihna in T Manga Vaiphei MLA leh a zi puan silhsak a, hiai hun vaiphei Tribe sung a makai hunkhop in uap uhi.
Jawahar Navodaya Vidyalaya JNV Tuinom a Academic Session 2012-2013 a Class VI Admission bawl thei ding a telkhiak selection result suak hi. Urban Open seat ah student 6, Urban Scheduled Caste Quota ah 1, Urban Schedule Tribe Quota ah 3, Rural Open seat ah 14, Rural Scheduled Caste Quota ah 5 leh Rural Schedule Tribe Quota ah student 11 in selection ngah uhi. Result kimtak a ennuam te'n Zonal Education Office Notice Board ah ettheih ding hi.
Krishi Vigyan Kendra KVK Churachandpur nuai a Scientific Advisory Committee leh akisaipih District Level Officer te'n July 2,2012 sunma dak 10:30 in KVK Pearsonmun ah Meeting a 6veina neiding uhi. Hiai hun ah Dr. N Prakash Joint Director ICAR Research Complex for NEH Region Manipur Centre and Chairman Scientific Advisory Committee KVK Churachandpur in Meeting makaih in Chairman address gending a, Dr.Wr. Singh Programme Co-ordinator KVK Churachandpur in Progress report pia in kumnawn a action plan tawh kisai taklang ding a, committee member te'n kihoulimna hunzang ding uhi.
Karnataka a Chief Minister Sadananda Gowda makaih BJP sokar sung buaizak in cabinet member 9 in Chief Minister kiang ah kitawpna lai pelut uhi. Kitawpna pelut cabinet member te ahihleh chief minister lui Yeddurappa lam a pang pawl te hidan in kigen a, Chief Minister in Central BJP makai te tawh hiai thugen khawm hiding chi a, buaina kintak in hihveng ahiding chi a, Central BJP thusuak in a gendan in cabinet member 9 te kitawpna pomsak hilou ding chi uhi. Karnataka solkar sung a kituahlouhna om ziak in file ginatak a paisuak omlou in hunsawttak omta a, minister 13 omna lak a, 9 in kitawpna apiak ziak un, minister chihtham om nawnlou a, Chief Minister Sadananda Gowda in portfolio 21 tak len a, Chief Minister lak a portfolio lentam penpawl hiding in kigen a, huaiban ah hiai thuziak mah a solkar sung buaizak hiding in gen uhi.
Assam state ah tuilian ziak in tutan in mi 28 si in menchim in mi 14 delhlumta hi. Mipi te'n kum 12 paisa nung a hiai bang a tuilian a muhpatna uh hidan gen ua, tuilian ziak in mihing lakh 10 val tenna ding neilou in om uhi. Tuilian in District 22 sukha in, relief camp 200 dinkhiak hita hi. Tenna inn a lakh a sim tui in tummang a, loubawlna mun liantak leng kisia in kikawmtuahna naktak in buai a, Govt. in panpihna pia chimahleh a tamzaw in panpihna ngahlou ua, tenna inn kisia te leng tunding nawnna ding inleng relief package bangmah om nailou hi.