* CoPTAM makaih in Chief Association tuamtuam in Joint Meeting nei in Hill Area ah Municipal Election om ding deihlou.
* Bible Society of India Churachandpur Branch in Annual Conference nei.
* Rev.Khen P Tombing Chief Co-ordinator PCI(R) in Vacational Childrens Development School khak.
* Lamka a masapen ding in IB Road ah Jerusalem Digital X-Ray and Diagnostic Centre honkhiak hita.
* DLCC Review Meeting neih hunding kisuan.
* SDO leh DC Office a Certificate tuamtuam la te'n pilvang poimoh ding.
Tanchin Kimzaw:
Committee on Protection of Tribal Areas Manipur COPTAM makaih in Khaw hausa leh District sung a student organisation tuamtuam in tuni sun dak 12:00 in Headquater veng a KKL Complex ah Joint meeting nei uhi.Hiai hun ah Municipal election, Police boundary, Land records, District boundary, Finance leh thu poimawh tuamtuam genkhawm uhi. Member paikhawm te'n Autonomous District Council ADC election omna Hill areas ah Municipal Election neihlouh ding in thupuk ua, Land Records, Police Boundary leh District Boundary issue tawh kisai leh thil poimoh dangdang a, CoPTAM kiphinna hausa te'n full-support ding in lemsa ua, huaiban ah finance lam tawh kisai inleng Chief Association te'n CoPTAM kithuahpih ding in thupuk uhi. Hiai Meeting ah Zomi Chief Association, United Chief Committee, Thangting Area Chief Association, Samulamlan Block Chief Association, Henglep Area Chief Association, TRABDA, Siamsinpawlpi General Headquater, Leimatak Area Chief Association leh
District sung a makai hunkhop tel uhi.
Bible society of India, BSI Churachandpur Branch in tuni zinglam dak 11 apan Rengkai ICI Biakinn ah Annual conference 2012 nei uhi. Tuni'n business Session nei ua, huai ah BSI Churachandpur Branch a Officer Bearer te allowance ding tungtang, Office Bearer leh area Collector te sih hun a kigalna ding zah leh BSI fund lakh 5 Headquater a piak ding thu tel in thu poimawh tuamtuam genkhawm uhi. BSI Churachandpur Branch in June 19, 2011 apan June 16, 2012 sung in Sum lakh 11 sing 9, sang 3 leh za leh 78 mukhia ua, huai sung mah in Lakh 4 sing 7 sang 9 leh za leh 36 zang bei in tulel in Lakh 7, sing 1, sang 4 leh 42 neilel uhi. Huaiban ah BSI Churachandpur Branch in kumlui 2011 in BSI Dimapur Auxialiary nuai ah lakh 4 thon in topper hihna la uhi. Zingchiang sunnung dak 1:00 in Worship Service omding a, huai ah Rev Lalrosiem Songate, ECCI in Pathian thu gending a, Award leh kipahman tuamtuam leng hawmkhe ding uhi.
Gospel for India(GFI) saina in June 18,2012 akipan Rayburn College ah Vacation Children’s Development School(VCDS)a neih uh lawhching tak in paitou zel a, tuni sunnung dak 12:30 in VCDS hunkhakna program om hi. Hiai hun ah Major General Binoy Poonnen,VSM,GOC-57 Mountain Division in Chief Guest hihna tawh uap ding chih himahleh amah hong hohthei lou in amah tang in Major SL Haokip, 46-Assam Rilfes chief guest in pang hi. Major SL Haokip in agenna ah India President lui Dr APJ Abdul Kalam genbang in student te tunung a nation piller hiding ahihdan gen a, student ten leng tupna sangtak nei a, Pathian phawk kawm a kalsuan touding in hasuan hi.VCDS program hun ah community tuamtuam, Nepali leh Vaite tel in mi 680 vel tel ua, Rev Khen P.Tombing, Chief Co-ordinator, PCI (R) thumna tawh hunkhak hi.
I gamsung leh mipi a ding in vanzat hoih leh lungtun huai mahmah Lamka a masapen ding in IB road ah Jerusalem Digital X Ray and Dianostic Centre honkhiak hita. Hiai Digital X-Ray machine ah X-Ray lak ahihchiang in Cancer piangsak theihna 90 percent in kiamzou hi. Mihing ading in muanhuai mahmah a, X-Ray lakzawh nung in tui in develop ngai nawnlou hi. Digital X-Ray lanuam peuhmah in Zinglam dak 6 akipan nitaklam dak 6 in kilak theih gige ding hi.
DC Office BRGF Resource Centre ah June 5, 2012 a DLCC meeting hun ah June 25, 2012 in DLCC review meeting Leimatak ah SDO/Henglep inntekna a neih ding in thupuk mahleh uh lemtanlouhna khenkhat omziak in DLCC review meeting khanawn aneih ding in postponed uhi.
SDO office leh DC office ah certificate tuamtuam, Income, Tribe leh character Certificate lateng pilvang ngai mahmah ding hi'n kigen hi. Certificate lak hun ah register a gelhlut ding leh certificate ah number gelh teitei poimawh hi'n kigen hi. State khenkhat apan sepna ngah adiak in ST/Tribe Certificate verification ding in Lamka hongtung kik pawl om a, huai certificate te ah number omlou in office file ah leng a kigelhlut louh ziak in sepna muthak mi khenkhat buai thei hi'n kigen hi.
Guwahati, GS Road, Khanapara a State Institute of Health and Family Welfare ah June 25 akipan 30,2012 sung in "6 Days Capacity building Workshop' omding hi. Huai hun ah Manipur a district tuamtuam a Health Society apan District Program Manager 9 tel ding uhi. Churachandpur District apan D.Khuala Vaiphei. District Program Manager, district health Society Churachandpur telding hi. Huai hun ah District Health Action Plan 2012-13 leh HMIS Data 2011-12 tawi ngai ding hi'n kigen hi.
Paite Tribe Council PTC kiphuhkhiat nung kum 63 chin lopna leh 2nd paite nam khawmpi a DVD honna June 27, 2012 zinglam dak 11:00 in Tangnuam khua ah omding hi. Huai hun ah L.Tualkhanhau. President PTC General headquater in PTC flag kaipalh ding a, Langkhanpau Guite, Chairman PTC Raising Day Celebration Committee in vaidawnna leh keynote address gending hi. K.Chinkhansuan, General Secretary PTC General Headquater makaih in PTC makai sisa te suunna omding a, Rev K.Kamchinkhup, Director of (Ministries) EBC makaih in Nam Maitam dohna omding hi. L.Tualkhanhau, President apan Presidential address om ding . Huai ban ah Executive director Paite Cultural Society, President Paite Leterature Society, President SSPP General headquater, President YPA General Headquater apan thugen tom leh report ngaihkhiak na omding hi. G.Vungsuanthang, Chairman CWC, PTC General headquater in 2nd Paite Nam Khawmpi aDVD hong ding hi. Huaizawh in T.Phungzathang Tonsing, Minister
Health, Family Welfare, GAD and CADA) leh Vungzagin Valte, MLA (Thanlon A/C) apan thugen ngaihkhiakna omding hi.K.Ginkhozam, Secretary (Custom and Culture) PTC General Headquater apan Paite Customary Law pulakna omding a, H.Pauzalal, Secretary (External) PTC General Headquater makaih in Paite Customary Law luite zatding leh athak a khek ding thu a kiselna debate omding hi.Huai Program hun ah Paite Nam sung a om Heutu tuamtuam leh Heutu masa teng telding uhi.
C Hangshing Executive Director DRDA in thusuah a bawlna ah Integrated Watershed Management Programme IWMP nuai a technical expert(A) contract basis a semding lakna personal interview June 28,2012 sunma dak 11 in Executive Director DRDA Office Chamber ah om ding hi. Candidate te'n interview hun ah original certificate,marksheet, tribe certificate, age proof certificate, domicile leh experience certificate tawi ngai ding hi.
.