* M Okendro Singh Education Minister in Churachandpur District Topper Award pekhia.

* ZSP Foundation Trust in Meritorious Award tuamtuam pekhia.

* Lamka Sports Club in The 1st K Ngul-Chin-Lian District Open Football Tournament ah Champion hihna ngah.

* Kuki Students Organisation in General Strike ding Call-Off.

* Major General Binoy Poonnen VSM, GOC 57 Mountain Division in Vacational Childrens Development School Closing Ceremony, Chief Guest hihna tawh uap ding.

Churachandpur District Private School Association in tuni sunma dak 10 in Sielmat a Rev.Chawnga Memorial Hall ah tutung BSEM leh CBSE nuai a District sung a topper te Award piakkhiakna nei uhi. Hiai hun M Okendro Singh Education, CAF and PD Minister in khuallian hihna tawh uap in Award pekhia hi. Aman a thugenna ah Manipur a student te mundang a om te sang a niam zawlou ahi chi a, tuni'a hiai bang programme thupitak sai a, student te hanthawnna dia panla Private school association te tung ah kipah thugen hi. Hiai hun Langkhanpau Guite chairman ADCC leh TN Haokip MLA in guest of honour hihna tawh uap ua,chief host in Jacintha Lazarus IAS DC Churachandpur pang a, H Mangchinkhup Executive member ADCC leh Khaipau Haokip MDC in Special Guest hihna tawh uap uhi. Hmingroupui S/o L Lawmlien Sungte of Sielmat Christian Higher secondary School in BSEM nuai ah 84.6 percent mu in first topper award sang a, Lathavel Khawbung S/o Vanlallien of AG School in BSEM nuai ah 84.8 percent mu in second topper la hi. Thengujam Chingkheinganba Singh S/o Thengujam Ibomcha Singh of Young Learners school in BSEM nuai ah 84 percent mu in third topper award la hi. CBSE nuai ah A Gautam singh S/o A Ranjeet Singh of St. Paul Institute in Grade: A1,CVPA:10 mu in first topper award la hi. Huaiban ah St.Paul Institute student ngen mi 4 in Grade:A1, CVPA:9.6 amuh ziak in second topper award la uhi. Amau te Eddie Hnunrousiam Valte S/o Roulianjam Valte, Ginthiansiam Khuptong S/o Ginzahau Khuptong, samuel Paumuanlal S/o J Songoukham leh Thanglunniang D/o Pauzachin Hatzaw te hi ua, huaiban ah St.Paul Insitute Student mah Vungsonching D/o T Suanzagin in Grade:A1, CVPA:9.4 mu in third topper award la hi. First topper te cash award sing 1 leh certificate pia ua, second topper te sang 8 leh certificate ban ah third topper te sang 6 leh certificate pia uhi.

Zou Sang Naupang Pawlpi General Headquaters Foundation Trust in tuni sunma dak 11 in Zoveng a Zogal Memorial Hall Complex ah Felicitation Cum Award Distribution Function zang uhi. Hiai hun ah Chief Guest in Ginsuanhau MLA pang a, Functional President in P Sianzadong Chairman Finance Committee ADCC leh Grace Zamnu MDC pang ua, Guest of Honour in L Mangkhogin Haokip IPS SP Churachandpur pang a, Chief Host in Manglianthang Zou Acting President UZO General Headquater pang a, Award tuamtuam pekhe uhi. Ginsuanhau MLA in a thugenna ah, award sang thei ding tanu leh tapa nei nu-le-pa te hampha ahihdan gen a, nu-le-pa te kipah bang a, amah leng kipak ahihdan gen hi. Award sang student te'n niamkiak sawm lou a, a sang zawlam manoh ding in hasuan hi. Siamsinna lam uangtak in bawl kisawm a, Zogal memorial high school leng naktak in puahphat kisawm chi a, society sung ah lungsim sianthoutak a kithuah poimoh mahmah a, student te ading in kuhkalna leh gin-om na poimoh petmah chi hi. Aban agenzelna ah student te'n pathian a masa a koih a, leitung a muhtheih pathian nu-le-pa te thumang ding in deihsak thugen in ZSP Foundation Trust kithuahpihna in sum sing 2 pia hi. ZSP sung ah BSEM Over all topper award ahihleh H Khamliansang of grace Academy in la a, amah (Late) Thangkhanlal Meritorious Award sum sang 3 leh certificate piak in om hi. Gema Niangdeihoi of Grace Academy leh Chingnuammang of grace Academy in MIL Zou Topper award la ua, amau te (Late) Rev.Doupu Meritorious Award sum sang 3 tuak piak in om uhi. H Khamliansang of grace Academy leh H Thonglianmuan of Young learners school in Math topper award la in, amau te (Late) M Tongzapau Meritorious Award sung sang 3 tuak piak in om uhi. T Khuplianjohn of Don bosco high school in science topper award a, amah (Late) Upa Dr. T Tongkhokai Meritorious Award sung sang 3 piak in om hi. M Ancy Nianglamlun Zou of St.Joseph School in English topper award la a, amah (Late) Dr. Michael H Taithul Memorial Award sum sang 3 piak in om hi. Haumuanlian Joseph of St. Joseph School in COHSEM over all topper award la a, amah (Late) Suahzahau Meritorious Award sum sang 3 piak in om hi. Huaiban ah Haumuanlian mah in Manipur pumpi ah 14th Position a lak ziak in (Late) Thangzalang Memorial Award sung sing 1 piak beh in om hi. Bethsy Suantah of Holychild Auxilium school New-Delhi in senior school certificate examination ah over all topper award la in amah (Late) Chiinniang Meritorious Award sum sang 3 piak in om a, Thangsomlal of Rayburn College in Class XII Zou MIL ah topper award la in, (Late) Kapu saipu Memorial Award piak in om hi. Award sang te Right Rev.Dr. Ginkhanmung Zou in thumsak hi. Hiai hun nu-le-pa ban ah mi poimoh tamtak in uap uhi.

Churachandpur District Sports Association CDSA saina in tuni sunnung dak 2:30 in Lamka public ground ah The 1st K Ngul-Chin-Lian District Open Football Tournament Closing Ceremony nei uhi. Hiai hun ah chief guest dia chial a om Phungzathang Tonsing Health and Family Welfare minister in Chief Minister tawh meeting poimohtak a neih ziak in tel theilou a, amah sik-le-tang in guest of honour apang Langkhanpau Guite Chairman ADCC in Chief Guest hihna tawh lenkhawm hi. Aman a thugenna ah CDSA in Public ground sung a kimawl mite leh a ente kikal a sik daikaih ding chi a, ngetna a bawl uh sepsuah sawm a panla ding ahihdan a, tournament sopnsor bawl tu K Ngulkhanthang leh a innkuan te ban ah CDSA te tung ah kipah thugen in kithuahpihna pia hi. Hiai hun C Hangshing Executive Director DRDA in Functional President hih na tawh uap hi. Final match ah lamka spots club leh zomi football club kimawl ua, Lamka Sports Club in Zomi Football Club te 2-0 a zou in The 1st K Ngul-Chin-Lian District Open Football Tournament Winner Trophy la ua, Cash Award Sing 5 leng ngah uhi. Runner Up Zomi Football Club in Cash Award sang 2 leh sang 5 ngah uhi.

Kuki Students Organisation in zingchiang a General Strike neih ding in thupuan bawl mahle uh call-off ahihdan Paokai Haokip President KSO Churachandpur apan thu kiza hi.

Gospel for India saina in Rayburn College New-Lamka ah Vacational Childrens development School neih in omlel a, June 23,2012 sunnung dak 12:30 in Closing Ceremony om ding hi. Hiai hun Major General Binoy Poonnen VSM,GOC 57 Mountain Division in Chief Guest hihna tawh uap ding hi.

District Social Welfare Office Churachandpur leh IRCA in International day Against Drug Abuse and illicit Trafficking tawh kizawi tawn in zingchiang sunma dak 11 in Vimala Raina High school ah " Think Health-Not Drug" chih pansan in Student class V to VII leh class IX to XII student te ading in Sappau in Essay competition neiding uhi.