* Synod Hall IB Road ah The 2nd Lamka Book Fair kipan.

* District Council niinpaw Gari in Routine leh Route zuilou.

* Dr.N Paulginthang Medical Superintendent District Hospital in Media te kimuhpih.

* Kuki Innpi Churachandpur in UNPFII New York a vatel te leh Kuki Innpi Manipur Member,Delhi a vazin te ban ah Award Winner te vaidawnna nei.

* All Lamka Taxi Owners Society a Member Romeo Gari (Winger) Mei in kihal.

* DC Churachandpur in Vacation Children Development School hong ding.

* District Social Welfare Office leh IRCA in Essay Competition saisawm.

* BYF New-Lane Bungmual in SA Road ah One Day Market bawl ding.

 

Hmar Students Association, HSA, Kuki Students Organisation, KSO leh Bookline Kolkata, Penguin Publication, Delhi leh Viva Book Private Limited Delhi te saina in tuni'n Synod Hall, IB Road ah, the 2nd Lamka Book Fair kipan hi. Tuni zinglam dak 10:00 in educationist leh Lalpuithluaii Foundation School phutkhetu T.Vunglallian in book fair hong a, book fair honna hun ah mi poimoh tuamtuam kihel uhi. The 2nd Lamka Book Fiar ah Bookline, Penguin Publication leh Viva Book Private Limited te'n a laibu bawlte uh mipi ettheih ding in koihkhiak ua,10 Percent discount in zuak ua, Lamka ah June 23,2012 tan nei in June 24 in Imphal ah neinawn ding uhi.

Apaisa June 8, 2012 ni a Mannuamching, Chief Executive Officer, ADCC in thusuah bawl a, khopi sung siangthou ding deihna a niin paw gari te, hunbi neitak a tai ding a chih dungzui in, ni paw gari te leng tai ua, khopi sung mun tuamtuam a dustbin te leng hihsiat in om hi. A diak in New Bazar Bus Parking kiang a niin bawm ah niin tamthei mah mah in, a kiim le kiang a nek-le tak zong te ading in damtheih huai lou hi. Himahleh District Council lam te panlakna ziak in niin muh ding vang mahmah ta hi. Hiai toh kisai a New Bazar a bazar nupi te gendan in, New Bazar a niin paihna laak khiak ahihtoh kiton in, amau ading inleng nuam tuam mahmah a, thil namsia diik ding leng om nawnlou phial in gen uhi. Hiai bang a council lam in panla a, hunbi neitak a niin te a puak khiak pen uh hoih mahmah mahleh, ni khat a 2vei zel niin paw gari taikual ding a chih lai un khat vei kia tai a, huaiziak in deihbang in khopi sung siangthou zou nailou ahi chi'n gen a, routine abawl bang ua, azuih uh a deihthu gen uhi. New Bazar area bang in khopi sung mun tuamtuam ah leng niin paw gari taiding in route bawl mahle uh, khopi sung mundang ah ni khat kia tai a, huainung niin paw gari muhding in om nawnlou chi'n tedim road zul a dawr bawl te'n gen uhi.

Tuni sunnung dak 12:30 in Dr. N.Paulginthang, Medical Superintendent, District Hospital in khopi sung a om Press/Media te kimuhpih in, damdawi inn toh kisai in thu tuamtuam genpih hi. Medical Superintendent in a gendan in, District Hospital pen hun sawttak kizangta mahleh tuni tan a pucca patta nei nailou ahihdan gen in, pucca patta neihna ding in pan kila lel chi a, DC Churachandpur kithuahpihna tawhmuh pah a lam-et thu leng gen hi. Huaiban ah, damdawi inn sung siangthou semna ding toh kisai in, damdawi inn a semtu staff te kia in kem siangzoulou ding ahihna uah, mipi lam in leng a hithei tan a kithuahpih a, mahni a bang a ngai a siangthou thei pen a kep a deih thu leng gen ngal hi. Huaiban ah, damdawi inn sung a niin omte chi 3 in kikhen a, huaite lak ah general waste in, mun hih niin pen ahihdan gen a, hiai general waste te, District Council lam in a etkai ua, a buak sak uh a deih thugen hi. Huai lou in, Ward sung toh kisai in Damlou om pih kua euhmah in, ward sung siangthouna ding in ahitheitan in ward sung ah ann-ne kei le hoih ding ahihdan gen a, sisan test na ding in machine hoih tak kinei a, solar thahatna zang in nipi kaalnih nung a zattheih ding in pan kila chi hi. Damdawi inn a damlou om te buaihuai keimah le uh, a damlou te sang in amau veh tu te buaihuai thei zaw chi a, damlou veh kuapeuh mah omdan kilawm tak a om ding a deih thugen hi. Huaiban ah Hosptial huangsung a Parking fee lak thu tawh kisai a genna ah RKS meeting thupukna ahihdung zui in RKS meeting resolution review thak hileh hoih ding ahihdan gen in mipi nasem a kihihman in mipi deihna bang in naa kisem ding a, mipi'n a deih kei mahmah leh a lakkhiak bel ahaksa ding hilou chi'n leng gen a, mipi'n leng hospital siangthouna ding leng doctor leh nurse te'n deih bang tak a, a mohpuakna uh a sepsuah theihna ding ua, kithuahpih a co-operation pe gige ding inleng ngen ngal hi.

Kuki Inpi Churachandpur in tuni'n KIC Complex, Tuibuong ah New York a United Nations Permanent Forum Indigeneous Issues UNPFII khompi a va tel Dr. T. Lunkim leh award tuamtuam la Dr. HH Mate ban ah Chief Rights leh Suspension of Operation thu kisai a Kuki Innpi Manipur palai Delhi a zinkhete leh Kuki Martial Arts Association member medal late vaidawnna program nei uhi. Hiai hun ah, Dr. T.Lunkim in New York a UNPFII khawmpi a a telna report pia a, Dr. HH Mate in award tuamtuam a laak te report bawl a, Kuki Innpi Manipur makai te'n, Chief Rights leh Suspension of Operation thu tawh kisai a Delhi a zinna uh report pia uhi. Tuni a programme zat sung in Kuki nam sung a pawl tuamtuam a makai teng telkim vek uhi.

All Lamka Taxi Owners Society ALTOS a member Romeo of Phubala Bishnupur District in a Winger Gari a buuk sung a, a koih tuni zinglam dak 2 vel in mei in kihal tum hi. Gari buk sung ah hand granade khat leh KCP(MC) Letter head zang a vauna lehkha leng muhkhiak a om hidan in ALTOS member te apan thu kiza hi. Hiai thil tung tawh kisai in ALTOS pawl in Gari poi khoilou tung a khutkha te mohpaih thupuang ua, hiai thu ziak mah in Phubala a Meira Paibi pawl in zingchiang in Tedim Road bandh sawm uhi.

New-Lamka a Rayburn College ah June 18 akipan 23,2012 sung in Vacation Children Development School om ding hi. June 18,2012 sunma dak 11 in a honna programme om ding a, huai ah Jacintha lazarus IAS DC Churachandpur Chief Guest a pang in school hong ding a, Rev. Vungminthang Director of Institution EBC in pathian kiang ah lan ding hi. Vacation Children Development School om sung in Key Person Dr. Jamzathang, Langkhanpau Guite Chairman ADCC, David K Zote Deputy Registrar Manipur University leh Rev.Khen P Tombing Chief Co-ordinator PCI-R in thupi tuam chiat pansan in thugen ding uhi.

District Social Welfare Office Churachandpur leh IRCA in International day Against Drug Abuse and illicit Trafficking tawh kizawi tawn in June 22,2012 sunma dak 11 in Vimala Raina High school ah " Think Health-Not Drug" chih pansan in Student class V to VII leh class IX to XII student te ading in Sappau in Essay competition saisawm uhi. Hiai ding tawh kisai a lunglutna nei student te'n District Social Welfare Office, New-Life Torbung, Mangal Torbung, Samaria leh LRRC ah application format laktheih ding a, June 22,2012 sunma dak 10:30 tan in submit theih ding hi.

Baptist Youth Fellowship New-Lane Bungmual in Pathian gam naasepna a zatding in zingchiang zinglam dak 9 in SA Road ah One Day Market bawl ding ua, T-Shirt, cargo, Track Pant, Half-Pant leh Frack Pant ban ah silh-le-ten tuamtuam kiman taktak in zuak ding ua, phattuamngaihna suah a kuapeuh mah in leisak ding in ngetna bawl uhi.

Malaria department in 1st Forth-Night of June, June 1 akipan 15, 2012 sung in damlou mi 590 sisan test na nei uhi. Malaria department lam apan thu kimu dan in, hiai sung in Malaria Positive 1 leh Malaria PF 1 mukhia ua, himahleh hiai hun sung in Malaria ziak a si official record bel omlou hidan in taklang uhi.

Bible Society of India BSI Churachandpur branch in zingchiang sunnung dak 1:30 in synod hall ah meeting neiding ua, BSI annual conference, 2012 neihding toh kisai leh List of Award, audit report, annual report book leh thu poimoh tuamtuam genkhawm ding uhi.

 

                                                                                           

.