* SP Churachandpur thupiak dungzui in Police te'n Drive panta.
* District Officer Horticulture and Soil Conservation saina in NMMI tawh kisai in training om ding.
* ZEO nuai a Primary Teacher leh Under Graduate Teacher te'n Seniority List bawl sawm.
* Lam-etna mun Bungmual ah Mega Life Camp kipan.
* ZEO nuai a Under Matriculate, Matriculate, Primary Teacher leh Under Graduate Teacher te'n ZEO Office ah Document submit ngai ding.
* Covenant Children's Home in lohchinna ngahte kipahpihna Programme zang ding.
TUN TANCHIN KIMZAW IN :
L.Mangkhogin IPS SP Churachandpur in Lamka khopi sung a, gari a tinted black filmed glass kithuah te leh kum chinglou a gari hekte ban ah gari document kimlou te check ding a thusuah a bawl dungzui in Police, VDF leh District transport Office staff te kithuah in khopi sung ah Gari check panta uhi. Hiai thu tawh kisai a L Mangkhogin IPS SP Churachandpur in tuni'a media te kiang a, a gendan in, tulai a sual gamtatna a kiam deuh a, gari accident a tawm deuh khak leh chih ziak a police in pan kila ahihdan gen a, mipi'n a kithuahpih leh bangtan hiam ah phatuam mahmah ding chi hi. Huaiban ah Gari document kimlou leh tinted black filmed glass kithuah gari te challan cut in za 1 ki-liausak zel a, sum liau sa te matnawn ahih ua leh za 3 liau sak hiding chi hi. Aban a genzelna ah Churachandpur District ah Police Sanction strength 890 hi a, huailak ah tulel in 474 kia om chi a, Pasal Police ah, Inspector 1, Sub-Inspector 25, Assistant Sub-Inspector 24, Head
Constable 60 leh Police constable 253 in kisam chi hi. Huaiban ah, numei ah, Assistant Sub-Inspector 2, Head Constable 1 leh Police Constable 49 in kisam chi'n leng genbeh hi.
District Officer Horticulture and Soil Conservation saina in zingchiang zinglam dak 10:00 in PTC Head Office Conference Hall, Hiangtam Lamka ah National Mission on Micro Irrigation (NMMI) 2011-12 training program om ding hi. Hiai hun ah Jacintha Lazarus, IAS DC Churachandpur chief guest in pang ding hi. Hiai training program ah Hoihnu Neihsial, Horticulture Development Officer Churachandpur leh S. Shyamjai Singh, Horticulture Development Officer, resource person a pang in topic tuamtuam pansan in sinsak ding uhi. Huaiban ah, Jain Irrigation System Limited Jalgaon, Maharastra apan W. Jadumani Singh in leng hiai hun uap in Installation and Maintenance of Drip Irrigation and Sprinkler Irrigation System toh kisai sinsak ding hi.
T Goukhomang Drawing and Disbursing Officer ZEO Office, Churachandpur apan thu kiza dan in Zonal Education Office nuai a sem Primary Teacher leh Under Graduate Teacher te lak ah seniority list bawl hiding a hiai ding toh kisai in akisaipih Primary Teacher, Under Graduate Techer te'n ZEO office a head clerk kiang ah form la in submit theih ding hi.
Evangelical Baptist Convention, EBC, General Headquarter, LRRC leh Grace Bible College GBC Home Base Care saina in zan nitak in Lam-etna mun Bungmual ah Mega Life Camp kipan hi. zan nitak dak 6:30 in Rev. K.Mangte, Principal GBC in Camp honna nei hi. Hiai Camp ahihleh Batch 2 in kikhen ding a, Batch khatna in June 12 akipan 20,2012 sung in Camp neiding ua, huai ah Imphal Division leh Lamka North Division te tel in tuni akipan June 14,2012 tan daih ding in Orientation leh Motivation Programme zang ua, Langzachin Project Co-Ordinator LRRC in makaih hi. Chialpina ahihleh June 15 akipan 19,2012 sung in om ding a, Rev.Ginmalsawm Divisional Superintendent Singngat leh Suankhanhau in thugen ding uhi. Batch 2na June 22 akipan 30,2012 sung in neih hiding a, Lamka South Division leh Singngat Division te telding ua, Pastor S Langzakham in thugen ding hi. Hiai Mega Life Camp ah camper 50 zel om ding uhi.
ZEO churachandpur office nuai a sem under-matriculate, Matriculate, Primary teacher leh Under Graduate teacher teng in zingchiang in ZEO office ah service book, Appoinment order leh Education qualification submit ngai ding a, ZEO office in June 15, 2012 in Imphal a Directorate of Education(s) ah submit nawn ding hi.
Covenant Childrens Home Mualkawi in tutung Class XII Examination a lohchinna ngah student 7 khakkhiakna leh Class X Examination a lohchinna ngah te pahtawina June 19,2012 sunma dak 11 in New-Lamka YPA Hall ah neih sawm uhi. Hiai hun ah Rev.Khen P Tombing Chief Co-ordinator PCI-R leh Upa H Mangchinkhup in thugenna hunzang ding ua, Pastor G Suanzalam in lohchinna ngah te thumsak ding hi.
LIC Jeevan Madhur Plan number 182 a specified person khenkhat in amau nuai a policy holder te premium ginatak a sunglouh ziak un, Policy holder te'n mahni policy status Agent Office, Covenant Childrens Home Mualkawi ah Office hour sung in June 22,2012 tan in etchet ngai ding a, huchi ahihkei leh July 3 akipan 14,2012 sung a enchian ding in Manager LIC Jeevan Madhur in theisak hi.