* Lamka Church of Christ Biakinn ah Young Christian Seminar kipan.
* Don Bosco Higher Secondary School ah 2 Days Education Awareness Programme kipan.
* YPA Diamond Jubilee Celebration Launching Programme neih in om.
* Justict AK Goel Chief Justice of Guwahati High Court makaih in Justice 1 leh Judge 2 in Lamka hongpha.
* Natna Hii leng a tam ziak in Chief Medical Officer in Medical Department nuai a sem te mahni Posting na mun a om ding in theisak.
* Child Trafficking tawh kisai a Govt. School teng in Awareness Programme neiding in Zonal Education Officer in theisak.
* CMO makaih in Male Health Superviser leh Male Health Worker te'n Meeting neiding.
Lamka Church of Christ saina in tuni apan in June 14,2012 tan daih ding in Young Christian Seminar 2012 neih in om hi. Hiai hun ah " Christian and Contemporary Concerns" chih thupi a zang in Haulianlal Guite, IAS, in sinsak a, seminar sung in topic tuam tuam, setanic worship, UID, 666, Substance Abuse leh a dang dang apan kiveng dingdan sinsakna leng nei ngal hi.Huaiban ah Thangkhankham, Langkhochin leh Thangkhogin in Pathian thu sermon uhi.
TL Kom Education Consultant Imphal saina in tuni'n Donbosco Higher Secondary School ah 2-days education awareness programme neih in om hi. Hiai hun ah, Lab Technician, Enginerring, BSc nursing, GNM, MBBS, BDS, Dental, B. Tech leh Engineering ban ah line tuamtuam a lunglutna nei Class XII passed leh Class XII sin lel mi bangzah hiam tel in, Proffessor Talla Venkata Reddy leh Hyderabad apan institution tuam tuam 7 a director te'n sinsak uhi. A saitute gendan in, hiai programme ahihleh zingchiang, tan ding chih himahleh, June 14, 2012 tan ading in behlap uhi.
Young Paite Association Diamond Jubilee Celebration Committee saina in tuni sunnung dak 12:30 in YPA Hall Hiangtam Lamka ah YPA Diamond Jubilee Celebration Launching Programme neih in om hi. Programme sung in S Chinngaihpau President YPA general headquater in Diamond Jubilee Celebration Launching bawl a, Rev.G Haukhomang Chief Adviser YPA General Headquater in Diamond Jubilee Celebration nuai a department tuamtuam a heutu te thumsak hi. H Mangchinkhup Chairman YPA Diamond Jubilee Celebration Commitee in Diamond Jubilee lop dingdan tangpi taklang hi. S Chinngaihpau President YPA General Headquater in a thugenna ah, heutu masa te'n March 3,1953 in YPA ana phutkhia ua, heutu masa te sulnung zui in tuni tan kipaitou in Daimond Jubilee lawm thei ding dinmun in ki-om ta chi a, hiai tan honpi pathian phat in om hen chi hi. Aban a genzelna ah, YPA kichi Paite nam pumpi adia kahiang poimoh petmah khat ahihman in YPA te gul bang a pil a, vakhu bang a nunnem ding
leh kuhkal tak a masawn ding in YPA heutu te kiang ah ngen hi. YPA Diamond Jubilee lopna ahihleh March 2-3,2013 in neih hiding a, march 3,2012 pen Pathianni ahihkhak ziak in Pathian kiang a kipah thugenna in hun kizang ding a, Paite nam sung a saptuam pawl tuamtuam om teng in hiai ni a Biakna Programme tuam bawllou ding in ngen hi.
Justice AK Goel, Chief Justice of Guwahati High Court, Justice S.Tolapatra, Justice of Guwahati High Court, N.Katisware, Judge of Guwahati High Court Imphal Bench leh Nanda Kumar Singh, Judge of Guwahati High Court Imphal Bench in tuni sunnung dak 4 in Lamka hongpha uhi. Amau tunai zek a Justice T.Vaiphei tapa' sihna tawh kisai a singal ding a hong kuan uh hidan in kigen a, tunitak Justic T.Vaiphei tenna inn ah giak ding ua, zingchiang in kiknawn ding uhi.
Tulai khawlum hun ahihziak in mun tuamtuam leh khua tamtak apan khawsik leh sungkhoh natna hii leng ahihdan Chief Medical Office ah report om nawn hi. Hiai thu tawh kisai in Medical Department nuai a semte mahni posting na mun a om chiat a, apoimawh bangbang a damlou te panpih ding in Chief Medical Officer Dr.HL Liensang in theihsak hi.
Naupang mang leh Child Trafficking tawh kisai in Joseph Lalrothang, Zonal Education Officer in Churachandpur District sung a govt school teng in mahni school a student leh nu-le-pa te samkhawm a Child Trafficking tawh kisai a kiveng dingdan awareness campaign neiding in theisak hi. Huaiban ah school teng in student te identity card bawlsak ding inleng theisak hi.
Dr H.L Liensang, Chief Medical Officer makaih in CMO office Conference Hall ah June 20, 2012 sunma dak 11:00 in Male Health Supervisor leh Male Health Worker te'n meeting neiding uhi. Huai hun ah Chief Medical Officer in mahni sepna munchiat a om ding leh damlou te panpih dingdan genpih ding hi.