* Samulamlan leh Tipaimukh Block ading Free Text-Book kihawm.
* Churachandpur Govt. College in Scholarship hawm.
* Mr.World Arambam Boby Singh in Fat James Restaurant hongpha.
* District Council in Khopi sung a Dustbin teng hihsia.
* Mualpi khua a Ginzamang in a Pu Phungzathang Tonsing Health and Family Welfare Minister Sa-goh.
* Churachandpur District sung a Pensioner teng in Bank Account Number, District Social Welfare Office ah piaklut ngai ding.
* Lamka Church of Christ Biakinn ah Young Christian Seminar om ding.
* YPA Diamond Jubilee Celebration Launching Programme om ding.
Tanchin Kimzaw:
Sarva Shiksha Abhiyan SSA tungtawn a Academic Session 2012-2013 a zatding free text book hawmkhiak zohnailouh teng tuni akipan Churachandpur govt High School ZEO leh ADC nuai a school te ading in kihawm khenawn uhi. Tuni in Samulamlan block leh Tipaimukh block ading hawm ua, Samulanlam Block ah Class I ading text book 429, Class III ading 680 Class IV ading 301, Class Vi ading 1020 leh Class VIII ading 464 hidan in kigen a, Tipaimukh Block ah Class I ading text book 560, Class III ading 598, Class IV ading 259, Class VI ading 620 leh Class VIII ading 104 hidan in kigen hi. Zingchiang in Henglep leh Thanlon block, June 13, 2012 in Singngat leh Churachandpur block hiding hi. June 14, 2012 in ADC Churachandpur leh Tipaimukh hiding a, June 15, 2012 in ADC Samulamlan leh Thanlon block hiding a June 16, 2012 in ADC Henglep leh ADC Singngat hiding hi.
Churachandpur Govt.College in tuni akipan Academic Session 2011-2012 ading Scholarship hawm uhi. Tuni zinglam dak 10:30 akipan sunnung dak 4 sung in Class XII Arts leh Science Student te ading hawm masa ua, Zingchiang in BA leh B.Sc 1st year, June 13,2012 in BA leh B.Sc 2nd year leh June 14,2012 in BA leh B.Sc 3rd year Student te ading kihawm ding a, Student te'n Identity Card Original tawi ngai ding a, huaiban ah College Library a laibu khel a pekik nailou Student te Scholarship hentangsak hiding in Vanlallawm Principal Churachandpur Govt.College apan thu kiza hi.
Mr. World title a kizom a 2vei hilhial lata Arambam Boby Singh (37) S/o (Late) Ibomcha of Lilong Chajing Imphal in tuni sunnung dak 2 in Lamka hongpha a, a lawmpa Fat James Restaurant ah sun anne hi. Hiai hun ah Media te'n kimuhpih in houlimna nei uhi. Mr.World Arambam Boby Singh in agenna ah Lamka 3 vei hongphakna hita a, Fat James a nektheih te lim a sak ziak a Lamka hongpha zel ahihdan gen hi. Mr.World Arambam Boby Singh in ta 2 nei in Indian Railway Guwahati ah 1997 akipan Clerical Staff sem hi. Aman akizom in 2010-2011 leh 2011-2012 kum in 75 kg category ah Mr World hihna la hi. May 2012 in Karnataka ah Champion of the Champion kidemna ah leng khatna la in cash prize lakh 3 leh Car khat ngah hi. Mr.India title leng 8 vei lata hi. kum 1998, 2000, 2001, 2005, 2006, 2007, 2010 leh 2012 in Mr.India hihna la hi. Tukum september 19 akipan 24,2012 sung in China, Wangxo ah Asian Championship om ding a huai ah leng tel nawn ding hi.
Autonomous District Council Churachandpur in khopi sung siangthou ding ngai poimoh in khopi sung ah District Council Sanitary Truck hunbi neitak in Service sak sawm in panla ua, khopi sung a ninbawm te ah nin om ding deihlou in tuni'n JCB zang in khopi sung, New-bazar, Hill-Town leh Lamka Police sak a Dustbin hihsia uhi. Hiai tawh kisai a Mannuamching Chief executive Officer Autonomous district council churachandpur in thusuah abawlna ah zingchiang akipan zinglam dak 6 leh zinglam dak 9 kikal ban ah sun dak 12 akipan sunnung dak 2 sung in Lamka khopi sung ah District Council Sanitary Truck nin pawding in khopi sung ah hong taikual ding a, bazar a sumbuk bawl te leh lampi kiang a dawr kai peuhmah in mahni nin te paihthanglou a khawl tuam ding in theisak a, ninpaw gari hongtai hun a mahni nin te gari sung a baw ding in theisak hi. Hiai dan thak zuilou dawr kai te trade license cancel sak hiding chi'n thusuahna ah taklang hi. District Council ninpaw Gari
khatna in Tuibuang Bazar-Tedim Road-Hmar veng,Police Station-Damkam Bazar leh Lanva tawn in nin buakna mun ah taisuak ding hi.Gari nihna in Police Station-Medical Compound-Tipaimukh Road leh Chiengkonpang tawn in nin buakna mun ah taisuak nawn ding hi. Gari thumna in Police station-Rengkai Road-Nehru Marg leh Red Cross Road tawn in nin buakna mun ah taisuak ding a, Gari li na in Town Office-IB Road-New-Bazar leh Thangzam Road tawn in nin buakna mun ah taisuak ding hi. Khopi sung siangthouna ding tawh kisai a District council panlakna mipi'n ngai poimoh a,mahni mohpuakna ahihlam manghilhlou a, mimal chiat a panla ding in S Kamsuanlun Executive Member ADCC and Incharge Town in mipi te kiang ah ngetna bawl.
Mualpi khua a Ginzamang in tuni'n a Pu Phungzathang Tonsing Health and Family Welfare Minister, sagoh in kithuahpihna programme zang uhi. Hiai hun ah Ginzamang in a Pu Phungzathang Tonsing Health and family Welfare Minister, vok tuk 8 goh in annekpih a, tanau laina leh mi poimoh tamtak in uap uhi.
Churachandpur District sung a, Manipur Old Age Pension Scheme Black leh Green Card neite leh Indira Gandhi National Old Age Pension Scheme Red leh Blue Card neite ban ah Indira Gandhi National Widow Pension Scheme leh Indira Gandhi National Disable Pension scheme, hamphatpih teng teng in a kinlam in bank account hon ngai ding a, huaiban ah maban a pension sum muhtheihna ding in Bank Account Number, District Social Welfare Officer A Umarani Devi kiang ah piaklut ngai ding hi.
Lamka Church of Christ saina in zingchiang zinglam dak 10 akipan June 14,2012 tan daih ding in Young Christian Seminar 2012 om ding hi. Hiai hun ah " Christian and Contemporary Concerns" chih pansan in Resource Person Haulianlal Guite IAS in sinsak ding hi. Seminar sung in topic tuamtuam, Setanic worship, UID, 666, Substance Abuse leh a dang dang apan kiveng dingdan kisinsakna om ding a, a lunglut peuhmah telding in chialna bawl uhi.
Young Paite Association Diamond Jubilee Celebration Committee saina in zingchiang sun dak 12 in YPA Hall Hiangtam Lamka ah YPA Diamond Jubilee Celebration Launching Programme om ding hi. Hiai hun ah S Chinngaihpau President YPA general headquater in Diamond Jubilee Celebration Launching bawl ding a, Rev.G Haukhomang Chief Adviser YPA General Headquater in thumna in lan ding hi.
Chin Baptist Youth Fellowhip in June 12 akipan 14,2012 sung in Lamzang Football ground ah Gospel Meet neih sawm uhi. June 12,2012 sunnung dak 1 in a honna om ding a, hiai hun ah Phungzathang Tonsing Health and Family Welfare,GAD and CADA Minister chief guest apang in Gospel Meet hong ding hi. Functional president in Kamsuanlun Executive member ADCC pang ding a, guest of honour in Pauminlian MDC pang ding hi. Gospel Meet sung in Rev.S Kapzamang leh Rev.Dr. Sutkhanthang in tanchin hoih gending uhi. June 14,2012 sunnung dak 2 in a khakna om ding a, huai ah Ginsuanhau MLA Chief guest apang in kipahman te hawmkhe ding hi. Functional president in Suanchinpau MDC pang ding a, Guest of Honour in Tongkai Baite MDC pang ding hi.
Apaisa June 9,2012 nitak dak 10:45 vel a mi tamzaw et-ut Euro 2012 kimawlna suahlai in Zion Street a HOPE Office tawn a kizan Hornbill Cable Network main line HOPE Office ah kisattan a, huaiziak in Subscriber bangzah hiam in football kimawlna a ettheihlouh uh poi kisa mahmah a, subcriber te'n hon theisiam ding in kon ngen uhi. Huaiban ah hiai bang thil chin kilawmlou kuamah in tunung a hih nawnlou ding inleng kon ngen uhi.