* EBCC Hiangtam Lamka ah Lamka North Division Naupang Khawmpi kipan.
* TN Haokip MLA in Hmar Students Association Saikot Unit, Meritorious Award hawmna Khuallian hihna tawh uap.
* Jairam Ramesh Union Minister Rural Development and Panchayati Raj in Lamka hongpha.
* Churachandpur Consumers Club in Press Release bawl.
* Lamka Police te'n Gari a Black Tinted Filmed Glass kithuah te Drive bawl ding.
* Churachandpur Govt.High School ah Free Text Book kihawm ding.
* District Level Football Development Programme kipan ding.
TUN TANCHIN KIMZAW IN :
Evangelical Baptist Convention EBC, Baptist Childrens Department Lamka North Division saina in tuni sunma dak 10 in EBCC Hiangtam Lamka ah Naupang Khawmpi a 4veina kipan hi. Tuni zinglam dak 10 in Rev.T Lalzagin Divisional Superintendent Lamka North Division EBC in Khawmpi hong a, Khawmpi sung in Lianding Guite Child Co-ordinator EBC in " Na manta Hiam" chih pansan in thugen a, Rev.T Lalzagin Adviser Division Baptist Children Department in Hanthawnna thugen in Challenge Hour hun zang hi. Hiai Lamka North Division Naupang Khawmpi ahihleh zingchiang in zouding uhi.
Hmar Students Association Saikot Unit in tuni sunma dak 10:30 in Saikot Youth Club Hall ah The 4th Meritorious Award piakkhiakna tawh kithuah in Felicitation Programme nei uhi. Hiai hun ah Chief Guest in TN Haokip MLA pang a, Guest of Honour in Ros Infimate Executive Secretary Reformed Presbyterian Church (North-East India) pang a, Functional President in Lal Hossan Executive Member ADC Churachandpur pang hi. Hiai hun ah Saikot khaw sung a tutung Class X leh Class XII Examination a lohchinna ngahte kipahpihna nei ua, lohchinna ngah Student te Pastor Lallungkham in thumsak hi.
Jairam Ramesh Union Minister Rural Development and Panchayati Raj in tuni sunnung dak 4 in Lamka hongpha a, Tuibuang TD block sung a ST Chullouphai khua ah Public Meeting nei hi. Aman a thugenna ah Manipur state khat vei hong phak patna hilou a, Manipur gamsung a hongtung chiang a kipahna a pumdim ahihdan gen a, a gam omdan kia hilou a, a mipi mahmah ngaina ahih thugen hi. Aban a genzelna ah Manipur a khantouhna om theihna dia hongpha ahihdan gen a, Manipur Govt. in gamsung leh mipi khantouhna dia a nget peuhmah pedia mansa ahihdan gen a, mipi t'en leng gamsung a, lemna leh muanna om theihna dia panla ding in ngen hi. Manipur a siamsin naupang te gam tuamtuam ah kithehzak in, Manipur leh Delhi kigamla mahmah mahleh Delhi te lungsim ah Manipur te om gige ahihdan gen a, Jet Airways ah tuang le uchin Air hostress te Manipur mi ngen ahi chi hi. Aban a genzelna ah Manipur a khantouhna om theihna dia tunitak lam a Chief Minister O Ibobi Singh leh District
Council Chairman te tawh meeting neiding ahihdan gen hi.Hiai hun ah Koite Area Chief Association leh Kuki students Union churachandpur in Memoraandum pia uhi. Union Minister ahihleh Manipur a MLA leh Minister hunkhop in honzui ua, ST Chullouphai akipan DC churachandpur tenna inn ah anne in Imphal ah kiknawn hi.
Churachandpur Consumers Club in tuni'a Press Release a bawlna uah, Churachandpur District sung a dawr bawl khenkhat in vanman a khengval a pungsak a, maximum retail price kigelh sa nasan nul mang a, hauhsak pah sawm in rate sangzaw bawl uh ahihdan theihsuah ahih dungzui in lamdang sak thupuang uhi. Hiaibang thil chin kilawmlou dan bohsiatna a hihziak in Dawr bawl peuhmah in hih nawnlou ding in theihsakna bawl ua, huaiban ah a kisaipih thuneitu te'n enkai ding in ngetna bawl uhi. A kisaipih thuneitu te'n a etkai zoh kei uleh Churachandpur Consumers Club in maban ah action a lak ngai ding chi'n thusuahna ah taklang uhi.
Superintendent of Police L Mangkhogin Haokip IPS thupiak dungzui in Lamka Police te'n June 11,2012 akipan Lamka khopi sung a, Gari a black tinted filmed glass kithuah te drive bawl ding uhi. Press Release in a gendan in Gari a black tinted filmed glass kithuah te mi puakmang nang in kizang tangpi a, huai in a thu suizuina ngawngkai sak tuan mahmah a, huaiban ah black tinted filmed glass a kithuah chiang in Section 103 of Motor Vehicle Act.1988 leh Rule 100(2) of the CMV Rules 1989 bohsiatna suak a, huai ziak a, drive khauhtak bawl hiding ahihdan taklang a, gari a black tinted filmed glass thuah puehmah in lakhe ding in ngen hi.
Sarva Shiksha Abhiyan SSA tungtawn a Academic Session 2012-2013 a zatding free text book hawmkhiak zohnailouh teng June 11 akipan 16, 2012 in Churachandpur govt High School ah ZEO leh ADC nuai a school te ading in kihawm khenawn ding hi.June 11, 2012 in Samulamlan block leh Tipaimukh block hiding a, June 12, 2012 in Henglep leh Thanlon block, June 13, 2012 in Singngat leh Churachandpur block hiding hi. June 14, 2012 in ADC Churachandpur leh Tipaimukh hiding a, June 15, 2012 in ADC Samulamlan leh Thanlon block hiding a June 16, 2012 in ADC Henglep leh ADC Singngat hiding hi.
S Genlemlal Guite Chief Coach CDSA, Khanthang Paite Churchill Brothers and East Bengal Football Club, Hringsolal Thomte Air India leh Kamthianminlun Field Co-ordinator Bachelor in Sport Management Kolkata in June 11 akipan ni 16,2012 sung in Lamka Public ground ah District Level Football Development Programme saisawm uhi. june 11,2012 zinglam dak 6 in Lalvullien Joute President churachandpur District Sports Association in hiai football development programme hong ding hi. S Genlemlal Guite Programme Co-ordinator District Level Football Development Programme apan thu kiza dan in June 11 akipan ni 16,2012 sung in numei leh pasal kum 9 akipan kum 12 te ading in Football kisinsak neih hiding a zinglam dak 6 leh dak 7 kikal in kisinsakna om ding a, theory class ahihleh Churachandpur Govt.College ah neih hiding chi hi. District level Football development Programme ah numei 30 leh pasal 70 kum 9 akipan kum 12 kikal te telding uhi.