* District Hospital ah Naunei panpihna JSY Sum kihawm.
* Thianniang Finance Officer Manipur State Aids Control Society in Lamka Damdawi inn a Blood Bank hong nekhia.
* PHED nuai a Community and Capacity Development Unit saina in Village Level Functionaries te'n Training nei.
* Thangso Baite MP Outer Manipur in Bethel Veng a Vaiphei Peoples Council Community Hall bawlna munding enkhia.
* District Council Sanitary Truck in Khopi sung ah nin nawnkhawm ding.
* EBC Baptist Childrens Department Lamka North Division in EBCC Hiangtam Lamka ah Naupang Khawmpi neiding.
* Chin Baptist Youth Fellowship in Gospel Meet zang ding.
* Churachandpur Govt. College in Scholarship hawm ding.
* Jairam Ramesh Union Minister Rural Development and Panchayati Raj in Lamka hongpha ding.
* International School of Western Music in Student te ading in One Month Basic Music Course saiding.
District Hospital a November 1,2010 akipan January 31,2012 sung a numei ta 2na tan nei te adia panpihna Janani Suraksha Yojana (JSY) sum piakkhiakna Camp 3 veina tuni sunma dak 10:30 akipan District Hospital Building thak ground floor ah nei uhi. Tuni'a panpihna sum lakhalou te'n tutung a bangmah genthei nawnlou ding hidan in Dr. HL Liensang Chief Medical Officer apan thu kiza hi.
Thianniang Finance Officer Manipur State Aids Control Society in tuni sunnung dak 12:30 in Lamka Damdawi inn hongpha a,damdawi inn building thak a Blood bank hong enkhia a, Blood bank a vanzat poimoh tuamtuam akisam te chiamteh in Imphal ah kiknawn hi. Thianniang Finance Officer Manipur State Aids Control Society ahihleh Dr.T Nengkhanmang District Aids Control Officer Churachadpur leh a Staff te'n kithuahpih uhi. Dr. N Paulginthang Medical Superintendent District Hospital Order dungzui in zingchiang in Blood Bank omna kisuan ding a, Building thak sung mah a, room dang ah Blood Bank koih hiding hi.
Public Health Engineerng Department Manipur nuai a Community and Capacity Development Unit Lamphelpat saina in tuni sunma dak 10 in Synod Hall IB Road ah Training for Trainers of National Rural Drinking Water Quality Monitor and Surveillance Programme for Village Level Functionaries for Churachandpur District neih in om hi. Hiai hun ah Resource Person Prema Consultant Community and Capacity Development Unit, Someo Consultant Community and Capacity Development Unit leh Vasken Consultant Community and Capacity Development Unit in tui siangthou leh sianglou theihtheih dingdan formula tuamtuam zang in sinsak uhi.
New-Lamka Bethel Veng a Vaiphei Peoples Council VPC Community Centre ah VPC Community Hall bawl sawm in tuni'n ground levelling kipan hi. Thangso Baite MP Outer Manipur in VPC Community Hall bawlna munding enkhia hi. Thangso Baite MP in a gendan in nasep kipan photphot leh sum-le-pai muhna ding lampi ngaihtuah hiding chi hi. Ground levelling zawh chiang in Community hall lamna nasep kipan ngal ding hi. Community hall ahihleh adunglam feet 90 leh a vailam feet 60 in lian ding hi. Vaiphei Community Centre mun letdan ahihleh a dunglam feet 200 leh a vailam feet 100 hidan in kigen hi.
Mannuamching Chief executive Officer Autonomous district council churachandpur in tuni'a thusuah a bawlna ah June 13,2012 akipan zinglam dak 6 leh zinglam dak 9 kikal ban ah sun dak 12 akipan sunnung dak 2 sung in Lamka khopi sung ah District Council Sanitary Truck nin pawding in khopi sung ah hong taikual ding a, bazar a sumbuk bawl te leh lampi kiang a dawr kai peuhmah in mahni nin te paihthanglou a khawl tuam ding in theisak a, ninpaw gari hongtai hun a mahni nin te gari sung a baw ding in theisak hi. Hiai dan thak zuilou dawr kai te trade license cancel sak hiding chi'n thusuahna ah taklang hi. District Council ninpaw Gari khatna in Tuibuang Bazar-Tedim Road-Hmar veng,Police Station-Damkam Bazar leh Lanva tawn in nin buakna mun ah taisuak ding hi.Gari nihna in Police Station-Medical Compound-Tipaimukh Road leh Chiengkonpang tawn in nin buakna mun ah taisuak nawn ding hi. Gari thumna in Police station-Rengkai Road-Nehru Marg leh Red Cross Road tawn in
nin buakna mun ah taisuak ding a, Gari li na in Town Office-IB Road-New-Bazar leh Thangzam Road tawn in nin buakna mun ah taisuak ding hi.
Evangelical Baptist Convention EBC, Baptist Childrens Department Lamka North Division saina in zingchiang sunma dak 10 akipan EBCC Hiangtam Lamka ah Naupang Khawmpi a 4veina kipan ding hi. Zingchiag zinglam dak 10 in Rev.T lalzagin Divisional Superintendent Lamka North Division EBC in Khawmpi hong ding hi. Khawmpi sung in Lianding Guite Child Co-ordinator EBC in " Na manta Hiam" chih pansan in thugen ding a, Rev.T Lalzagin Adviser Division Baptist Children Department in Hanthawnna thugen in Challenge Hour zang ding hi. Hiai Lamka North Division Naupang Khawmpi ahihleh June 10,2012 in zouding uhi.
Chin Baptist Youth Fellowhip in June 12 akipan 14,2012 sung in Lamzang Football gr ound ah Gospel Meet neih sawm uhi. June 12,2012 sunnung dak 1 in a honna om ding a, hiai hun ah Phungzathang Tonsing Health and Family Welfare,GAD and CADA Minister chief guest apang in Gospel Meet hong ding hi. Functional president in Kamsuanlun Executive member ADCC pang ding a, guest of honour in Pauminlian MDC pang ding hi. Gospel Meet sung in Rev.S Kapzamang leh Rev.Dr. Sutkhanthang in tanchin hoih gending uhi. June 14,2012 sunnung dak 2 in a khakna om ding a, huai ah Ginsuanhau MLA Chief guest apang in kipahman te hawmkhe ding hi. Functional president in Suanchinpau MDC pang ding a, Guest of Honour in Tongkai Baite MDC pang ding hi.
Churachandpur Govt.College ah June 11,2012 akipan Academic Session 2011-2012 ading Scholarship kihawm ding hi. June 11,2012 zinglam dak 10:30 akipan sunnung dak 4 sung in Class XII Arts leh Science Student te ading kihawm masa ding a, June 12,2012 in BA leh B.Sc 1st year, June 13,2012 in BA leh B.Sc 2nd year leh June 14,2012 in BA leh B.Sc 3rd year Student te ading kihawm ding a, Student te'n Identity Card Original tawi ngai ding a, huaiban ah College Library a laibu khel a pekik nailou Student te Scholarship hentangsak hiding in Vanlallawm Principal Churachandpur Govt.College in thusuah bawl.
Jairam Ramesh Union Minister Rural Development and Panchayati Raj in zingchiang in Manipur hongpha ding hi. Zinglam dak 9 in Imphal Airport hongtung ding a, huai apan Bishnupur District zuan ding hi. Bishnupur District apan Lamka hongpha suak ding a, Churachandpur District sung a, MGNREGS leh PMGSY nasepna ban ah development scheme tuamtuam hong enkhe ding hi.
International School of Western Music in Student te ading in June 11,2012 akipan July 10,2012 sung in One month Basic Music Course, rate niam chik in saisawm uhi. Basic Music course sung in Keyboard, Guiter, Tonic Solfa, Staff Notation leh lasak dan kisinsak ding ua, lunglutna nei' student te'n Synod Super Market 1st floor, opposite SBI Churachandpur Branch ah sun dak 12 apan nitak dak 6 kikal in thuchian kantheih ding hi.