Global Iodine Deficiency Disorders Prevention Day mang

Lamka, Oct. 27 *(Nisin Thuhiltu)* : National Health Mission - District Health Society (NHM/ DHS), Churachandpur saina ah tuni, October 27, 2017 sunma dak 11:30 in CMO Conference Hall, CMO Complex ah Global Iodine Deficiency Disorders Prevention Day matna um in zia hun chu Shyam Lal Poonia, IAS, Deputy Commissioner/ Chairman, NHM/ DHS Churachandpur in Chief Guest hina tawh a uap a, T. Paukhanlian, Executive Member, ADC, Churachandpur in Functional President, Dr. Kimngaihching Simte, CMO/ DMD, NHM/ DHS Churachandpur in Guest of Honor leh T. Kammuanlal, CEO, ADC Churachandpur in Special Guest hina tawh a uap hi. Hun matna ah Dr. Tunlalmuan, ENT Surgeon, District Hospital, Churachandpur in National Iodine Deficiency Disorder Control Program (NIDDCP) tawh kisai presentation hun a la, Huaisianvung, DCM, NHM/DHS Churachandpur in chibawm hawitak pawimaw dan lakna nei in khuallian te a pat thugenna hun a um hi. Global Iodine Deficiency Disorders Prevention Day a hileh October 21 ni a matding ti himaleh Manipur ah Government Holiday a hi ziak ah tuni mat a hi.

RKS Governing Body in Dist. Hospital entha

Lamka, Oct. 27 *(Nisin Thuhiltu)* : Rogi Kalyan Samiti (RKS) Governing Body in thupukna alak uh dungzui in Deputy Commissioner, Shyam Lal Poonia, IAS, Chairman, RKS Governing Body, District Hospital, Churachandpur mapuina’n tuni, October 27, 2017 sunma dak 10:00 in District Hospital etthâkna a nei u’i. A chiata October 25, 2017 ni’ RKS Governing Body Meeting hun ah thupukna dungzui ah District Hospital in a taksap leh siam ding um te siam phat ding tawh kisai etthâkna nei ding ti a hia, zia tawh kitawn ah District Hospital etthâkna anei hun ua Medicine Ward tilo ah ward dang cheng a ensuak u’i. Zia hun a chun, Public Water Drinking Facility, Reverse Osmosis (RO) banah Dedicated Syntax khat kawi ding in lemsakna a nei ua, District Family Welfare Officer (DFWO) Office building a lui mama tak banah quality hawilo tak ah kibawl chule PWD a pat Engineer te Safety Assessment bawlsak hi ding in Chairman, Shyam Lal Poonia in a gen hi. District Hospital etthâkna anei hun ua Dr. Kim Simte, CMO Churachandpur, Dr. VC Pau Tonsing, Medical Superintendent leh District Hospital staff hunkhawp te’n a kithuapi ua, RKS Governing Body ah NGO Representative, Pauzagin Tonsing, Holkhomang, Inderpal, Vunglallian Tonsing banah T. Paukhanlian, EM, ADC Churachandpur, T. Kammuanlal, CEO ADC Churachandpur leh Johnny Sharma, MPS, SDPO Churachandpur te’n a zui u’i.

Bus Waiting Shed -cum- YMA Lamka Branch Office phiat ah um

Lamka, Oct. 27 *(Nisin Thuhiltu)* : Autonomous District Council (ADC) Churachandpur in New Bazaar ah Women Market bawlna ding in Bus Waiting Shed -cum- YMA Lamka Branch Office chu tuni, October 27, 2017 zingkal in JCB khat mang in a phiat hi. Waiting Shed -cum- YMA Lamka Branch Office phiatna ding tawh kisai ah a chiata October 16 ni ADC Churachandpur in ni 5 sung ah su-awng ding ah Eviction Notice a sua a hita, tuni zingkal dak 7:30 in Thangboi Gangte, MCS, SDO Churachandpur in sua ah um Eviction Notice chu Waiting Shed-cum-YMA Lamka Branch Office ah tâk in, YMA Lamka Branch Office kam in a chabi T. Kammuanlal, CEO, ADC Churachandpur khut in a pedawk hi. Mawpuakna piak ahi tawh kitawn in Kammuanlal in JCB khat ko in, police venbitna nuai ah Waiting Shed -cum- YMA Lamka Branch Office suksiat in a um hi. Hiatthei khat chu, YMA Lamka Branch in Waiting Shed bawlna ding ah a chiata 1993 kum a khan ADC, Churachandpur a pat phalna a la lak a hia, Branch dawtna gual ah investment bawl ding le phal piak in Shed chung ah Office ding a la sak uh a hi. Eviction Notice sua zaw ah YMA Lamka Branch in phiatlo ding ah dawn in October 21 a pat Sit-in-Protest a la nei ua, phel ding a hi tawp a le zangna dawpna kilawm tawk piak ding ti ah phût maleh hun kipia sung ah Office nutsia hilo in zia tawh kitawn a chun SDO Churachandpur in October 27, 2017 zingkal dak 7:00 ah Eviction Order sem piting ding ah CEO, ADCC kiang ah mawpuakna a piak banah buaina a um ding venna ding ah Superintendent of Police, Churachandpur in Security kiningting pe ding in le a hiatsak hi.

VPC Kangvai Block office hawn hiding
Kangvai, Oct. 27 *(Nisin Thuhiltu)* : Vaiphei Peoples' Council (VPC) Kangvai Block in 28th October 2017 zingkal lam dak 8:00 leh Kangvai Bazar ah Block Office hawnna nei ding a hi. Zia hun chu Thangso Baite, MP (Outer Manipur) in khuallian hina tawh uap ding a hi. Chun, Khatkhotong Baite, President VPC GHQ, Genlal Khaute, Special Contractor, P Kamkholal, EM/ ADCC te'n Functiona President, Guest of Honour, Special Guest hina tawh uap ding a hiu. Zia hun matna chu K Chung, Phaltual leh Nk Ruthi te'n mapui ding a hiu a, Thangso Baite, MP (Outer Manipur) in Office hawng ding leh Rev. S Khaikholam, MPCS in Office latna nei ding a hi.
YVA Laika Mualsau Unit hawng

Kangvai, Oct. 27 *(Nisin Thuhiltu)* : Young Vaiphei Assocation (YVA) Kangvai Block President, K. Chung Vaiphei leh a cabinet member te te mapuina nuai in tuni’n YVA Laika Mualsau Unit hawnna leh 2017 - 2019 sung ah vaipaw ding têlna a um hi. Zia hun matna chu Upa HL Bana in pauchapna tawh hun hawnna a nei a, YVA Kangvai Block President, K. Chung Vaiphei in YVA tup leh nasep dan tangpi puandawna nei in, Unit President leh Secretary ding têlna a nei ui. Zia hun a chun, YVA Laika Mualsau Unit President ding ah Tv. Pauthamuan s/o Upa HL Bana teltin in a um a, Secretary ding ah Tv. Khupkhosoi s/o Zamkholam a teldawk ui. Teldaw ah um te chu YVA Kangvai Block President in kitiamna a neisak a, YVA Flag piakdawna le a nei ngal hi. Unit President leh Secretary ding ah teldaw thak ah um te’n ni 10 sung ah cabinet a form ding uh a hi.
GVI Gualnawp 2017

Guwahati, Oct. 27 *(Nisin Thuhiltu)* : Guwahati Vaiphei Inkuan (GVI) in Don Bosco Cathedral, Pan Bazaar Guwahati ah 28th October 2017, 11 am - 4;00 pm sung ah “Gualnawp 2017” bawl ding a hi. Zia hun chu GK Chin, NEC, Financial Advisor, Shillong Vaiphei Welfare Chairman and Family, Shillong Zillai President Mr Loveson te’n Special Guest hina tawh uap ding a hiu a, Rev Dr JM Pau in thilkhona thucha genna nei ding a hi. Gualnawp hun ah Vaiphei nam lam, Sang sang bok bok ti te suklat hiding, Debate, panel discussion, talent show ti te um ding, laa sa thiam chuam chuam – Nu C Hoiniang, Nu Momoi, Nu Zoneu, Nk Ngilnei, Nk Lemhoi, Tv. Boithang, Nu C Hoiniang, Nk Hoisiam leh Pastor Lempu Suantak te’n laa present bawl ding a hiu.

SSPP Residential School in van-thak hawnna leh latna nei

Lamka, Oct. 27 *(Nisin Thuhiltu)* : Ngathal a um Siamsinpawlpi (SSPP) Residential School ah School Managing Committee saina’n tuni sunnung dak 2 in School campus ah SSPP Residential School in vanthak a nei te hawnna leh latna a nei ua, SSPP Residential School kiphudaw kum, 1998 a pat tuni tiang ah school tawh kisai ah mawpuakna tukha te’n zia hun chu a uap u’i. Van thak te latna nei zaw ah K Khamminthang, Secretary, SMC SSPP-RS mapuina’n puitute’n Audio Visual Classroom cum Auditorium Hall ah kiho khawmna nei in school maban ding genkhawmna a nei u’i.

UKB’n Away match ah HUSO zo kit

Lamka, Oct. 27 *(Nisin Thuhiltu)* : All Manipur Football Association (AMFA) saina’ a chiatha zing Birchandra Maipakpi Memorial 22nd Winners Cup 2017 ah tuni, October 27, 2017 nitaklam dak 1:00 in Chuarchandpur District ah champion United Khawzim Brothers (UKB) leh Senapati District ah Champion Hills United Sports Union (HUSO) in T. Khullen, Senapati District (HUSO home ground) in match a nei ua, UKB in 2-1 in gualzawna a chang hi. UKB in gualzawna a chan zawm tawh kitawn in Aggregate 3-1 ah HUSO zo a suak hi. Zia kihelna a chun, half masang in UKB player Lalcha’n goal 1 khum in kihelna amapui ua, half nung ah HUSO lam in goal 1 khum in goal 1-1 ah kihelna a chiathak zing lai in hun bei ding kuan lam in UKB striker Paulemsiam in goal 1 a khum a, zia chu UKB ding ah gualzawna’ goal in a pang hi. UKB goal khum khat chu off-side ah refree’n a mat ziak in goal ah simlo in a um hi. UKB in Home leh Away ah HUSO zaw tawh kitawn in Winners Cup 2017, Semi - Final lutta a suak a, semi-final match ah YUFC, Ukhrul / KSPC, Kakching /RAU, Imphal East khat penpen 5th November 2017 leh 1st Leg (Away match) ah maitua ding, 8th November 2017 (Home - Leisang Ground) ah 2nd Leg ah maitua kit ding a hi.

Firecrackers kihal puak ziak ah mitamtak imut chawk buai
Lamka, Oct. 27 *(Nisin Thuhiltu)* : Khuga Tampak leh Neihsel Veng kikal ah 27th October zingkal lam dak 4:00 tuam ah Kol te’n "LAIKATPA" tidan ah Boombala (firecrackers) a hal puak ziak un, mitamtak ding ah imutmawna a suak hi. Hun banghem chan Boombala (firecrackers) halpuak ah a um nung in, Churachandpur Police QRT (Quick Response/Reaction Team) khat in a mun del in boombala (firecrackers) halpuakna chu a haisak ui. Zia ah boombala (firecrackers) kihal puak chu mitamtak in meithal git sa’n kikaptuana ahiloleh buaina thil tung hiding ah a muangmaw pawl a um ua, khenkhat in sepai te firing bawl hiding ah muangmaw kawm ah lungthim-thek tak in a um ui. Zia gual thil mipi te supatau thei ding thil te hiatsak lawkna bei ah tunung tuban ah a um kitlo ding pawimaw in a kilang hi.
Headmaster/ Headmistress te’n One Day training nei
Lamka, Oct. 27 *(Nisin Thuhiltu)* : Synod hall, IB Road ah tuni’n District Project Officer (DPO), SSA/ RTE Churachandpur saina ah One Days training program for headmasters/headmistress on Collection of DCF UIDISE & SDMIS 2017-2018 kiti nei ah um in zia hun chu Samulamlan Block, Henglep Block, Singngat Block leh Churachandpur Block sung a ADC leh ZEO nuai ah school tin a pat headmasters/ headmistress te a pang ua, training hun ah RK Krishnakumari Devi, System Analyst, Kaikhanlian Guite, DI Of School, Churachandpur Block, Salam Parsuram Singh, System Analyst leh Yambem Tiken Singh, Data Entry Operator te’n resource person hina tawh uap in ziltilna a piau hi.

Deeper Spiritual Life Convention 2017 kipan

Lamka, Oct. 27 *(Nisin Thuhiltu)* : Evangelical Congregational Church of India (ECCI) saina’n ECCI Headquarter, Nehru Marg ah ‘Ambassador for Christ’ ti thupi ah ni 2 sung um ding, ‘Deeper Spiritual Life Convention 2017’ chu tuni’n a kipan a, Elder Er. Lalthanzam Amo, Chairman, BOT in Convention hawnna a nei hi. Tuni hun matna ah Rev. Dr. HM Songate in ‘The Marks of a Good Ambassador’, Rev Dr Dongza Thawng in ‘Freedom from Generation Iniquity’ banah Rev Dr H.M. Songate in ‘Living the Word through’ ti thupi tawh thugenna hun a mang chiat u’i. Zing, October 28 leh Rev Dr Dongza Thawng in ‘Ten Stage of Church Growth’ Rev Dr H.M. Songate in ‘Commitments to the tasks He entrusted us’ banah Rev Dr Dongza Thawng in ‘A Believer’s Personal Wor-ship’ ti thupi te tawh thugenna nei ding a hiu a, Rev Dr Jangkholam, Chairman Mission Board, ECCI in ‘Deeper Spiritual Life Convention 2017’ khakna nei ding a hi.

National Football Tournament a pang ding te kipandawk

Lamka, Oct. 27 *(Nisin Thuhiltu)* : 48th National Football Tournament kihel ding Kendriya Vidyalaya, Churachandpur ah Under 19 Football Team te tuni, October 27, 2017 in Lamka nusia in kipan dawk ua, Lekhraj Meena, Principal in thâkdawna a nei hi. Tournament ahileh zing, October 28, 2017 leh Orissa khawpi Bubaneswar ah kipan ding a hia, zia na’ pang ding ah Kendriya Vidyalaya, Churachandpur a pat student 13 a kuan u’i. Thudang khat ah, Kendriya Vidyalaya, Churachandpur a pat Aakriti Tiwary in a 5-veina Korea-India Friendship essay competition ah All India Junior kitetna a chun top 10 a tungphak tawh kitawn in Korean Embassy a pat Certificate of Honor a sâng hi.

Bangalore ah Manipur numei 3 hukdaw ah um
Imphal, Oct. 27 *(Nisin Thuhiltu)* : Manipur Police in Karnataka Police leh Manipur Women Helpline kithuapina tawh Manipur numei pathum human traffickers te a pat in a hukdawk hi. Hukdaw ah um numei 3 te chu Senapati 1, Churchandpur district 2 a hi. Numei 3 te chu Beauty Parlor ah beauticians sepna piak ding ah puidaw ah um a hiu a, himaleh a mun a tun tak ua zuauthep a hidan uh a hiatdaw uh a hi. Zia nung a chu
Manipur Women Helpline kiang ah thil umdan tut ah a um tawh kitawn a Manipur Police in khualna a nei a hia, Karnataka Police kithuapina hukdaw thei ah um a hiu.

State Cabinet in ni 365 sung ah sep leh bawl ding genkhawmna nei

Imphal, Oct. 27 *(Nisin Thuhiltu)* : Chief Minister N. Biren Singh chairman hina nuai ah tuni’n State Cabinet in ni 365 sung ah state government thak in a sep leh bawl ding te genkhawmna a nei hi. Zia hun a chun, State Government in ni 365 sung ah sector chuamchuam - Health & Family Welfare, Information Technology, Science & Technology, Agriculture, Horticulture, Transport, Public Works Department, Home, Art and Culture, Public Health Engineering Department, Finance Department, Power, Tourism, Rural Development & Panchayati Raj, Education, Planning, Social Welfare, MAHUD, Minorities and Backward Classes etc nuai ah developmental works /activity 161 chiapi list a siamdawk hi. Developmental works /activity 161 list siam ah um chu ni 365 sung ah seppitin vek ding, nasepna leh panlakna bangkim chu Minister leh Administrative Secretary level ah etzui ding, overall ah Planning Department leh Chief Minister’s Office in nasepna leh panlakna a etzui ding in lemsakna a nei hi.

Chief Minister in a kisaipi Minister leh Departments te chu developmental works chiapi ah um te a huntak ah zawthian a hitheina ding ah panla chiat ding in thupiak a nei a, Ministers te chu a mun tak ah thil umdan enzui leh entha zing ding in a hiatsak hi.

Langol, Imphal ah a chiata 2nd March, 2017 ni Leishiyo Keishing chenna inn ah bomb a puak ziak ah a nei leh go hun tiang a siatna chung ah compensation Rs. 1,41,690 piak ding in le Cabinet in lemsakna a nei a, Manipur Police Housing Corporation Limited nuai ah Superintending Engineer (Civil) post 2 siamdaw ding le approve a bawl hi.

Chun, Manipur Building and Other Construction Workers’ Welfare Board, Manipur chu Labour Cess 1% refund bawl ding in l lemsakna a nei a, PHED nuai ah Integrated Water Supply Project for Imphal Planning Area ah restricted tender ah chiapi thei ding in le phalna a pia, zia nuai a chu Koirengei, Sangakpham, Khuman Lampak, Porompat, Canchipur, Iroisemba, Singda, Kangchup, Kangchup Extension leh Iroisemba Reservoir ah water supply project pat ding in lemsakna a nei hi.

CM mapuina’ Old Aged Pensions doorstep delivery tawh kisai genkhawm
Imphal, Oct. 27 *(Nisin Thuhiltu)* : Manipur CChief Minister N. Biren Singh in tuni’n Old Aged Pensions doorstep delivery leh banking arrangement tawh kisai in a kisaipi thuneitu te review meeting a neipi hi. Zia hun a chun Old Aged Pensioner te umna tawh bank umna 15km ah sang ah kigamla lo te ding ah bank branch in Ru-Pay cards issue a bawl ding in lemsakna a nei ua, Banks leh Social Welfare Department in Ru-Pay cards delivery tawh kisai ah mawpuakna a lak ding in lemsakna a nei ui. Pensioner te a umnau tawh kinai ah bank branch /Banking Correspondents/Common Service Centres (CSCs)/Customer Service Points (CSPs) a umlo leh amau te ding a chu Social Welfare Department in doorstep delivery a bawl ding, 15th November 2017 tiang ah Social Welfare Department in Ru-Pay cards leh delivery arrangements a zawthian ding in lemsakna a nei bawk ui. Zia review Meeting chu, Parliamentary Secretary Awangbow Newmai, Chief Secretary R.R. Rashmi, Principal Secretary (Planning) Vineet Joshi, Principal Secretary (Finance) Vivek Kumar Dewangan, Commisionner (Social Welfare) H. Deleep Singh, Director (Social Welfare) Jacintha Lazarus, Additional Director (IT) N. Debenand leh banks official te’n a uap ui.
Numei te panlakna society’n a hiatpi pawimaw: CM

Imphal, Oct. 27 *(Nisin Thuhiltu)* : State Level Committee on Beti Bachao Beti Padhao leh State Social Welfare Department organize bawlna’ tuni’n DM College Multipurpose Hall ah Beti Bachao - Beti Padhao Spot Painting Competition of Imphal West a um hi. Zia hun chu Chief Minister N. Biren Singh in khuallian hina tawh a uap hi. Ama’n a thugenna a chun, society in numei te panlakna a hiatpi ding pawimaw a hidan taklang kawm in State Government in BPL family te a ding ah welfare scheme thak khat hawnbe ding ah guanggalna nei in a gen hi. Zia scheme thak chu November 4 leh Chandel a phak hun ah hawng ding hin le a puang a, numei te’n society a ding ah contribution nei hawi mama in a gen hi. Himaleh, Manipuri society ah numei te kawi niamna tuni tiang ah bei nailo hin a gen a, government thak in meithai te a ngai khawk mama na chung ah meithai te a ding ah social security leh welfare schemes chuam chuam chiapi hin a gen hi. Zia hun matna chu Social Welfare Minister Nemcha Kipgen in functional president hina tawh a uap a, ama’n a thugenna a chun, state mipi te Child Sex Ratio siamhawina ding ah thutiam bawl ah panla chiat ding in chialna a bawl a, Manipur numei te hangsandan, skill leh active tak ah social, economic, political leh cultural activity te ah pan a lak dan uh chu khawvel pumpi hiat hin a taklang hi.
Zia hun matna chu Rajya Sabha MP Ksh. Bhabananda, Commissioner (Social Welfare, YAS & Higher Education) H. Deleep and Social Welfare Director Jacintha Lazarus ten Guests of Honour hina tawh a uap ui.

PMEGP tawh kisai review meeting nei

Imphal, Oct. 27 *(Nisin Thuhiltu)* : Manipur Textile,Commerce & Industry Minister Thongam Biswajit Singh in tuni’n Pradhan Mantri Employment Generation Programme (PMEGP) tawh kisai in a kisaipi thuneitu te review meeting a neipi hi. Zia hun a chun, Minister Biswajit in applicant tamtak ten scheme guidelines a zui diklo ziak ua bank te’n a bank loan dawt uh a pawm piak nuam seklo uh chu ngaikhawk mama in a gen a, a kisaipi official te chu applicant te ding ah awareness leh training campaign bawl ding in chialna a bawl hi. Chun, applicants te chu a loan lak uh ditkitlo ah kawi thei ding ah lungggel neilo ding in chialna a bawl bawk hi. PMEGP chu MSME lawtinna ding ah thil pawimaw mama a hin a gen a, a kitup thei ding pen ah chiapi (implement) bawl ding pawimaw a hidan taklang in, entrepreneur te tawsawttu leh sepna belap tawh PMEGP a pan ding pawimaw in a gen hi. Chuleh, bank te chu a haksatnau government kiang tut ding in a hiatsak a, zia a pat chu a buainau sukven hiding in a gen hi. Principal Secretary P. Vaiphei in a genna a chun, PMEGP chu thiangtho tak ah chiapi ding pawimaw in a gen a, DC khenkhat in scheme kituptak ah a chiapi dan uh taklang kawm in DC te chu tusang ah a hawizaw panla ding in a chial hi.
Meeting chu, Principal Secretary Textile, Commerce & Industry P. Vaiphei banah Deputy Commissioners, General Managers of District Industry Centres, banks chuam chuam ah official te, Khadi Village Industry Board leh Khadi Village Industry Centre official te’n a uap ui.

Socio-Economic Advisory Committee meeting

Imphal, Oct. 27 *(Nisin Thuhiltu)* : Textiles, Commerce & Industry Minister Thongam Biswajit Singh in tuni’n a khatveina ding in Manipur State Industrial Development and Socio-Economic Advisory Committee member te ama office in meeting a neipi hi. Zia hun a chun, Advisory Committee in draft a bawl Manipur Industrial and Investment Policy ding chu etkhawmna a nei ua, state sung ah chatgana sukbeina ding ah panlak ding dan tawh kisai a genkhawm ui. Principal Secretary Textiles, Commerce and Industry P. Vaiphei in member leh expert te chu North East Industrial and Investment Policy chung ah ngaidan leh dawidan peding in chialna a bawl hi. Manipur State Industrial Development and Socio-Economic Advisory Committee ahileh Chairman ah Minister (Textiles, Commerce &Industry) pansak a hia, member 17 nei, Joint Secretary Textiles, Commerce & Industry Laltanpuii Vanchhongis chu Committee convenor a hi.

Oct. 28 ah All Political Party Meeting um ding:CM
Imphal, Oct. 27 *(Nisin Thuhiltu)* : Manipur Chief Minister N. Biren Singh in 28th October 2017, 4:00 PM leh CM’s Secretariat ah all-political party meeting um ding hin a taklang a, Manipur territorial integrity susia thei ding thil te dodal khawm ding dan genkhawm hiding in a gen hi. All-political party meeting thupukna dungzui ah all-political party delegate te’n New Delhi ah Central leaders te kiang ah thil umdan tut ding uh hin le a gen hi. Union Home Minister Rajnath Singh in Assam’s territorial boundary sukkhak hilo ding ah Assam Chief Minister Sarbanand Sonowal thutiam a bawlna tawh kisai ah dawtna a dawnhuna a chun, N. Biren in Prime Minister Narendra Modi, Home Minister Rajnath Singh leh BJP National president Amit Shah in zia gual thutiam chu Manipur le Assembly election hun ah bawl in a taklang a, tu ah Union Government leadership chu muang mama hin a gen hi. Himaleh banghem ti ah muanmaw thei thil a um leh State Government in direct ah Central Government kiang ah thil umdan tut ding hin a gen hi.

11th Indo-Myanmar Regional Border Committee Meet

Imphal, Oct. 27 *(Nisin Thuhiltu)* : India leh Myanmar Army te’n Spear Corps of Indian Army mapuina nuai ah Mantripukhri, Imphal ah ni 3 sung (25th -27th Oct. 2017) 11th Indo-Myanmar Regional Border Committee Meet a nei uh chu tuni’n a zo thiang ui. Zia meeting chu Myanmar Army leh Civil departments official member 18 ten a uap ua, border management, bi-lateral cooperation leh terrorism thil ah panlak khawm ding dan genkhawmna nei in, maban ah gam 2 in border security sukhat ding leh panlak khawm zing ding in lemsakna a nei ui. Indian delegation te chu Lietenenat General Anil Chauhan, AVSM, SM, VSM, GOC Spear Corps in amapui a, Myanmar delegation te a hiuleh Maj Gen Phone Myat, Commander, North West Command in amapui hi