* Huihpi mutsiat Kaimang Gangte tenna inn YMA Chiengkonpang Branch in tungding nawn.
* Langkhanpau Guite Chairman ADCC makaih in BADP tawh kisai in Meeting om ding.
* District Hospital a CT Scan vanzat mang tawh kisai in Police in mikhat matbeh nawn.
* New-Lamka YPA ah Free Dental Camp om ding.
* ZYA General Headquaters 14th General Assembly Cum Election om ding.
* Grace Bible College ah Gospel Musical Fellowship om ding.
* Data Entry Operator ding lakna dia Interview zohsiang hita.
* Siamsinpawlpi General Headquaters in General Body Meeting neiding.

Apaisa Pathianni April 15, 2012 nitak dak 10:30 vel a huihpi leh vuahpi kithuah in Headquarter Veng a Thangtindal Colony a teng Kaimang Gangte s/o (L) Enpau tenna inn mutsiatsak hi. Hiai toh kisai in YMA Chiengkonpang Branch in tuahsiatna tuak innkuan panpihna ding in vengsung ah sum sing 1, dongkhiak in, huai sumte pansan in Chiengkonpang Branch YMA nungak leh tangval 140 val in Kaimang Gangte tenna inn ding bawlsak in tun’in social work nei uhi. Huihpi leh vuahpi kithauh in a mutsiat Kaimang Gante tenna inn tung khuhna ding in bialtu MDC Kamsuanlun, Executive member, ADC, CCpur in langva bandle 3 a piak ban ah Chiengkonpang khawsung a sing-at zuak tuamtuam te’n sing-at KB 10 thohkham uhi.

Zingchiang sunnung dak 1:00 in Langkhanpau Guite, Chairman, ADCC makaih in a office chamber ah, BADP toh kisai in meeting om ding hi. Meeting hun ah, District Level BADP Committee member Deputy commissioner, Chief executive officer, District agriculture officer, District officer(Horticulture), Zonal education officer, Executive Engineer PWD, Chief Medical Officer leh akisaipih MLA leh MP te telding ua, MDC te special invitees in pang ding uhi. Meeting sung in, BADP toh kisai a nasep paisa te enkik in maban a BADP 2012-2013 action plan toh kisai gen khawm ding uhi.

District Hospital a vanzat poimoh CT Scan van mang toh kisai, apaisa April 16 ni in Police ten muanmoh leh thudot ding in mi 3 man ua, amaute Chief Judicial Magistrate in April 20 tan Police custody a om ding in thutanna bawl khum a,huainung in midang khat mat beh in om nawn hi. Police lam apan thu kimu dan in, CT Scan mang toh kisai a mat beh a om, Lianzamung, 47 S/o (L) Sangkhum of Medical Compound hi a, amah leng tuni mah in Chief Judicial Magistrate mai ah dinsak in om hi.

Hongtung ding April 21, 2012 zinglam dak 10:00 apan in YPA Hall, New Lamka ah Hebron Veng leh College Veng YPA unit saina in Free Dental Camp om ding hi. Hiai hun ah Imphal apan Dr. Nilachandra, MDS leh Dr. Thangginmang, BDS in haa lam toh kisai a buaina neite etna nei ding ua, damdawi leng a thawn in peding uhi.

Zomi Youth Association ZYA General Headuaters in April 28, 2012 sunma dak 10:30 in SYO hall Simveng ah14th General assembly Cum Election 2012 neih sawm uhi.First Session hun ah Business session leh election neihna hun in kizang ding a,telching thak a om te LB Sona Chairman Zomi Council in kichiamsak ding hi.Sunnung dak 2:30 in second session kipan ding a,huai ah Thangzamang secretary ZYA in secretary report peding a,LB Sona chairman Zomi Council in thugenna hunzang ding hi.

Grace Bible college GBC huangsung ah April 20, 2012 nitak dak 5:30 in Color of Praise chih pansan in Gospel Musical fellowship neiding uhi. Hiai hun ah lasiam tuamtuam leh lapawl hunkhop in pathian phatna lasa ding ua,Rev.L Khamkholun General secretary EBC in thugen ding a,hiai hun a lunglut peuhmah in uap ding in GBc faculty te sik-le-tang in Rev.Dr.Kamkhanthang Principal Grace Bible college in chialna bawl.

MANITRON in Socio Economic and Census 2011 nuai a Data Entry Operator sem ding lakna interview apaisa April 16, 2012 apan District Training Centre a hong neih uh tuni’n zousiang  uhi. Interview sung in CCpur District sung a block tuamtuam apan candidate 200 val tel ua, lohchinna ngahte April 27 in telephone tungtawn a theihsak hiding hi’n thutut kingah hi.

A hongtung ding April 22, 2012 sunnung dak 1:30 in SSPP Complex, Bungmual ah, Siamsinpawlpi, SSPP General Headquarter in general body meeting nei ding uhi. Meeting hun ah, SSPP General Headquater a department tuamtuam te telkim in, 80G toh kisai leh thu tuamtuam, Bukpi Government High School tungtang leh CDSU election ding toh kisai ban ah, Lamka Joint Headquater, Imphal Branch leh Gangpimual te ngetna toh kisai genkhawm ding uhi.