* MLA ching thakte leh MDC te kipahpihna hun lemtan louhna khenkhat ziak in hunchiam om lou in suan.
* Ms. Jacintha Lazarus, DC, Churachandpur makaih in District Level Monitoring Committee, meeting om ding
* District E-Governance Society, DeGS toh kisai meeting omding
* Paupu lenlai film kichi a thak hon khiakna om ding
* Shaktiman leh Vespa Scooter kiphut tuahna ah mi 1 si.
* April, 2011 apat March, 2012 sung in naupai 3714 TT damdawi kap in om
* Zing chiang in 1st Imphal Metal Convention – 2012 kichi YAC Ground Range ah neih hi ding
* Cheiraoba ziak in Government Office teng ki khak .
* KSO thil nget sukpiching a hih kei leh NH - 2 bandh bawl ding.
* Assam ah Grenade Bomb pauk.
* Minister 2 behlap in Kerala Ministry suklet in om.
 
Zomi Council General Headquarter Secretary KG Tungnung in tuni a thusuah a bawlna ah Zomi Council Genaral Headquarter saina Zomi MLA ching thakte leh MDC te kipahna (felicitation) neih ding chih himah leh lemtan louhna khenkhat om ziak in hunchiam omlou in a hun suan uhi.
 
A hongtung ding kalnawn sepnawnni April 17, 2012 sunnung dak 2:00 in Ms. Jacintha Lazarus, IAS, Deputy Commissioner, Churachandpur makaih in DC office BRGF Resource centre ah, District Level Monitoring Committee, meeting om ding hi. Huai hun ah, State Plan nuai a nna kisem te, NEC, NLCPR, Flagship Programme, leh Centrally sponsrored scheme tungtawna nna kisem te gen khawm na nei ding uhi.

A hongtung ding April `16, 2012 zinglam dak 11:00 in District Training Centre, ah, district E-Governance Society, DeGS toh kisai meeting omding hi. Huai hun ah, DeGS a member teng ban ah, Village Level Entreprenueurs, VLEs te tel in, Common Service Centres, CSC a ki function dan leh, VLEs ten material tuamtuam a ngah te utoh kisai leh thupoimoh tuamtuam gen khawm na nei ding uhi.

Zingchiang April 14, 2012 sunnung dak 2:00 in Zogal Memorial Hall Complex, Zouveng ah Paupu lenlai film kichi a thak hon khiakna om ding hi. Huai hun ah, Ginsuanhau @ GS Haupu, MLA, Singngat Assembly Constituency in chief guest hihna toh uap in Paupu lenlai film thak hon khiakna nei ding hi.

Zan nitak dak 6:00 vel a Koite leh Salbubng khua kikal a Shaktiman leh Vespa Scooter kiphut tuahna ah 27 Sector Assam Rifle Tuibuang a sem lel Songminthang @ Thanga Singson kum 34 of Molnom amun ah si ngal hi. Thanga Singson sihna tuanna Scooter leh Shaktiman ahih Lamka Police te’n a Station uah kem lel, Shaktiman nei te leh misi lam hiai news gelh ahih tan in bang chih kihou uh hiam chih theih hi nai lou hi.

April, 2011 apat March, 2012 sung in District Immunization Office, CCPur in National Child Survival and Motherhood programme nuai a numei naupai leh naupang tamtak damdawi pia ua. District Immunization office thusuak in a gen dan in hiai hun sung in numei naupai 3714 Tetanus (TT) damdoi kap ua, naupang kum 1 nuailam pasal 2323 leh numei 2091 te BCG kap hi ua, pasal 5633 leh numei 5025 te OPV damdoi dawn sak in om uhi. Hiai ban ah Vitamin A damdoi pasal 1660 leh numei 1591 dawn sak ua, naupang kum 1 apat kha 16 ki kal pasal 4833 leh numei 4917 vitamin A damdoi dawn sak in om uhi.

The Rock Music Community of Manipur saina in zingchiang 1st Imphal Metal Convention – 2012 kichi YAC Ground Range ah neih hi ding hi. Hiai a tel theih dingte ahih leh kum 1960 apan 1990 kikal sunga Rock Band ana omte hi ding uhi. Manipur ah 1960 apan 1990 kikal sung in Rockh Band 26 ana om zou hi. Churachandpur a pan in leng The kids, the Makhons, Dark krusaders leh Brain Damage te leng tel uhi.

Tuni April 13, 2012 meitei te ni poimoh Cheiraoba (kumthak) ni ahih toh ki ton in Manipur Government in suti a apuang ziak in Churachandpur ah leng Government Office teng ki khak a School leng a tam zaw ki khak hi.

Kuki Students' Organisation (KSO), Moreh Block in Moreh town sunga Motor tai vel leh parking mun bawl hoih ding a Additional Deputy Commissioner (ADC), Moreh kiang a ngetna lehkha a piak uh April ni 15 tan a suktangtung sak ahihkei leh April 16, 2012 a pat NH-2 (Imphal-Moreh Road) ah hun chiam om lou in ban bawl ding ahihdan uh KSO Moreh Branch thusuak in gen hi.

Zan nitaklam in Upper Assam a Tinzukia District sunga Bordumsa mun a Bazar ah Grenade puak a himahleh mi a liam leh si bel om lou uhi. ULFA Anti-talk pawl in April 20, 2012 a Prime Minister Dr. Manmohan Singh in Assam a hong veh ding toh ki sai in Assam Bandh a ana vai dawnding ahih dan uh leng ana puan khum hi.

Oommen Chandy Chief Minister hihna nuai a Kerala United Democratic Front Ministry in Minister 2 behlap uhi. Minister 2 behlap om te Anoop Jacob Kerala Congress (J) leh Manjalamkuzhi Indian Union Muslim League (IUML) te hi ua. Tulel in UDF Ministry ah IUML Minister 5 phata ua Minister tahk ten Governor HR Bhardwaj ma a ki chiamna leng nei ta uhi.