* Bungmual a Lalpuithuai-i Foundation school in tuni zinglam dak 10:30 apan in Science Exhibition leh School programme ki thuah nei
* Huihpi in singkung mut puk in, tenna inn tung deng sia
* Ms. Jacintha Lazarus IAS DC/CCpur makaih in District Level Sub-Committee on Relief Assistance under Calamity Relief’ neih in om.
* Finance Adviser, North East Council (NEC) in District Hospital a NEC fund tung tawn a kibawl hospital building et khiak na nei.
* District Hospital CCpur a CT Scan lakna a kizang,van zat tuam tuam kigu mang.

Bungmual a Lalpuithuai-i Foundation school in tuni zinglam dak 10:30 apan in Science Exhibition leh School programme ki thuah nei uhi. Hiai hun Headmaster leh Staff te chialna bang in student nu-le-pa tamtak in hiai programme zatna uap uhi. Hiai programme zatna ah US apan Dr. Kumkum in khuallian hihna toh uap hi. Hiai hun ah student te apan in lapawl, Hip Hop power of dream, Korea dance, leh etnop tuamtuam lahna nei ua, programme zatna neih ahih lai in vuah leh huihpi ki thuah in Hall a mut siak sak ziak in programme zang zawm theih nawn lou uhi.

Tuni sun dak 12:00 vel in vuah a zuk ban ah huihpi a nun ziak in Gouchinkhup Veng a N. Thuamkhansuan MCS, SDC, DC Office tenna huang sunga sing kung pou lai huih pi'n mut puk a, a inn kiang ua, S. Nengzadam tenna inn tung dengkha hi. Hamphat huai tak Singkung puk in a dengkhak na inn a omte kua mah suk khak nei lou hi.

Zan nitaklam dak 3:00 a DC office a BRGF Resource Centre ah Calamity Relief tawh kisai ‘District Level Sub-Committee on Relief Assistance under Calamity Relief’ meeting Jacintha Lazarus IAS DC/CCpur makaih a om ding chih himah leh lemtan louhna khen khat om ziak in tuni a neih in om thak hi. Hiai meeting na ah SDO teng, District Agriculture Officer, DAO, DO(Hort& SC), District Fishery Officer, DFO, EE/PWD, EE/IFCD, EE/Electricity leh OC(Fire Brigadge) te tel ua, Calamity Relief tawh kisai case luite leh case thakte genkhawm na nei uhi.

Tuni sunma dak 11:00 in J. Lhungdim, Indian Army Service (IAS) Finance Adviser, North East Council (NEC) in Lamka hong pha in District Hospital a NEC fund tung tawn a kibawl hospital building naspna pailel hong enkhia hi. Tu lel a, nasepna pailel pen tukha sung a luah theih dia zoh siang hi ding in contractor in gen hi'n Medical Superintedent District Hospital Dr. P. Nengzadou apan thutut kingah hi.

District Hospital a Medical Superintendent Dr. P Dengzadou apan thutut kingah dan in District Hospital CCpur a CT Scan lakna a kizang, CT Scan Monitor, Dry Cell Battery 7, Key Board leh Endoscopy Monitor guta kua te hiam in ana gu mang uhi. Thutut kingah dan Dr. Mani leh Technician te'n hospital a om damloute CT Scan lak na a neih dek ua, van mang te theih khiak hi pan hi.CT Scan van guta te'n gumang mah le uh CT Scan room kalhna chabi leng kikhen sia om louh ban ah thil dang bang mah suksiat nei lou uhi. Hiai thiltung toh kisai in District Hospital Medical Superintendent in Lamka Police te kiang ah report bawl ngal hi. CT Scan van mang ziak in District Hospital ah CT Scan lak theih louh phot dinga, emergency case neite a ding Imphal zot ngai ding hi.