* 60-Singngat A/C MLA Pu, Ginsuanhau in zan sunnung dak 1:00 in atenna inn Lailam Veng ah Press/Media te’ kimuhpih na nei.
* khawpi tuamtuam pha ding in 60-Singngat MLA Pu, Ginsuanhau zinkhia.
* Guta mi 2 in athilguk uh langva nusia ki hem mang.
* Mun tuamtuam ah Good Friday zat in om
* Von dei Saulim te’ kiang ah 116 Bn BSF te’n panpihna tuamtuam tamtak piak na nei.
* Pu, Kamsuanlun, EM/ADC, Chengkon khawmi te ading in toilet vanzat Kumut leh langva pek BPL family te ading in hawmkhia
* service verification tamzaw tham zoh louh in om lai
* District AIDS Prevention and Control Committee, DAPCC 4th Quarterly meeting om ding
* L.Phaijang khua ah Green Hills High School, huihpin mut sia
* DC office chamber ah, Guite road toh kisai compensation piak ding thu meeting om ding
* Paite Literature Society (PLS) 2012-2015 tan vaipaw thak ding telna nei.
* ALTOS in Nitai tat Chuthek Governor Gate bul parmanent parking place ding in nget na nei.
60-Singngat A/C MLA Ginsuanhau @ GS Haupu in zan (April 6, 2012) sunnung dak 1:00 in atenna inn Lailam Veng ah Press/Media te’ kimuhpih a, April 4, 2012 nitaklam a huihpi leh vuah kituah in Singngat A/C sung a khua tamtak ah tenna inn amutsiat tawh kisai panpihna piakding thu taklang hi. April 5,2012 in SDO/ Singngat leh Chief Agent makaih a khua tuamtuam ah spot inquiry bawl a om hi’n taklang hi. GS Haopu in agenzelna ah inn sia te’ panpihnang tulel in govt pan bangmah omkei mahleh inn leh lou beia kuamah omtheih louh ziak in amah mimal a panpihna langva bandle 100 piak hiding in gen , Sunday ahihkei leh Monday a khua chih a piak hiding in gen hi. Singngat A/C sung ah development fund hongpai ding te ahibangtak a sep hiding in gen a, nasemlou kuamah sum piak hilou ding leh development works te quality etkai hiding in taklang hi. Education tawh kisai kum nawn apan ahihtheitana govt school te function theihnang apanlak hiding in gen a, Sangaikot area a Agape high school leng tulel in student 600 val om a, high school piching tak ahihnang a panlak hiding in gen hi. Govt apan fund hongpai masa pen Rs 12.5 lakh te I n Zou Bethel khua ah Community Hall bawlnang in Rs 10 lakh leh Sialsih khua ah water supply ading in Rs 2.5 lakh te a development work pat masak hiding in gen hi. April 13, 2012 in Singngat A/C sung a hausa te’ tawh development thu genkhawm hiding leh April 14, 2012 in PDS tawh kisai MLA nominee leh agent teng tawh meeting neih a, mipi te’n angah ding bangtak PDS item te angah nang ua kikhum khawm ding uh hi’n GS Haupu in gen hi. Huih leh vuah kituah in Singngat A/C sung ah thil ahihsiat tunitan a kitheihdan G S Haupu in ataklat te ahihleh Lungthul T khua ah inn 10, C.Tuivelzang & Mongken khua ah inn 3, Maukot khua ah inn 4, Siakbu khua ah school building, Lungthul D khua ah inn 5, LUngthul L khua ah inn 1 leh Community Hall kibawl lel; Tuima khua ah inn 3, Community Hall leh EBC school building, T.Khuangkhai khua ah inn 4, Bongbal khua ah inn 3, Panglian khua ah community Hall leh Belbing khua ah school building hi’n taklang ah, Singngat khua leh Lungchin khua ah inn sia te’ photo submit ngai hi’n taklang hi.
60-Singngat MLA Ginsuanhau zan sunnung in Lamka apan Imphal zuan a, Imphal apan Delhi, Kolkota, Chenai ban ah khawpi tuamtuam pha ding in zinkhia a, kalkhat vel zinkhe ding hi’n kigen hi.
Hun bangtan hiam sung khawpi leh asehvel ah guta a zia omdeuh bangmah leh tulai in kisan thak nawn mahmah uh a, veng tuamtuam ah guta lang a kuapeuh pilvan ngai mahmah hi. Zan (April 6) zing baihtak dak 1:00 vel in New Lamka Vengnuam ah mi 1 in lampi ah guta mi 2 in langva apuaklai ngalmuh in mi 2 te khawlding in theisak mahleh amau a khawllouh tak un delhzui ngal a, thomging zakin akim leh kiang naite’n kidelh huan mahleh uh guta mi 2 te’n athilguk uh langva nusia in tai uh a, mipi’n manzou nawnlou uhi. Guta mi 2 in athil guk uh langva kihenlawm 1 ah pek 6, khat pen ah pek 7 mukhia uhi. Tuabangkal ah, zan nitaklam dak 3:00 vel in District Hospital a MSF in niin haalna (Incinerator) a bawl uh, guta pawl khat in a van te va guk sek ua, zan in Chinminlun, 20, S/o Liantungnung, of Headquarter veng, in hiai incinerator siin, gu a, mipin man khia uhi. Chinminlun ahihleh, thudotna tuam tuam neih a hihnung in a teenna inn ah va kha in, a van guuk pen, tunitak, 7th April nitak a koih kiik ding in thu pia uhi.
Leitung a mihing te’ khiala tangtawna siding lai Pathian in tapa tangneihsun Jesu Christ leitung ah hongsawl in mihing te’ khelhna teng pua in Kross ah kilhlup in om a, huai ni theih gige nang in khawvel pumpi ah Good Friday zat in om hi. CCpur dist ah khua teng ah Good Friday zat in om a, Saptuam tengphial in Pathian Biakna program nei uh a, sihna ziak in sun huna biakna program zangthei lou om te’n leng nitak hun in Pathian biakna program hun nei uhi.
Zomi Colony a MELC te’ etkawlna nuai a om naupangte kepna Von dei Saulim te’ kiang ah zan nitaklam in 116 Bn BSF te’n panpihna tuamtuam tamtak pia uhi. BSF te’n panpihna apiakte uh ahihleh Solar plate alian te 1, ball booth 5, stocking 5,Sinpad 5, uniform/Jersey 5 pia uhi. Hiai hun a Rajeev Kumar in a thugenna ah, buaina om veng tu ding a om ahih uh dungzui a, a nna uh sem ding uh ahihdan gen in, naupang ten leng, buaina te om mah leh, ki hih lungke lou a, laisim n amah ngai poi moh chiat ding in hasuan hi.
Kamsuanlun, EM/ADC-Hiangtam Lamka in tuzing dak 8:00 in Chiengkonpang a Dalzamang, DFO/CCpur tenna inn ah Chengkon khawmi te ading in toilet vanzat Kumut leh langva pek 2 chiat BPL family 20 te ading in hawmkhia hi.
Hun sawtpi paita a pan District Council nuai a teacher te service verification bawl in om mah leh, a tamzaw tham zoh louh in om lai hi. Hiai toh kisai a ZEO lam apan thu kiza dan in, Manipur pumpi ah teacher mi 84 te a kia zou pan ua, huai te lak ah Churachandpur apan mi 15 a tel kha chi in gen uhi. Hiai mi 15 ten, a service verification te u toh kisai, Pumshong Hangshing, Thanlon DI kiang ah kanchet theih ding hi.
A hongtung ding April 11, 2012 zinglam dak11:00 in DC office BRGF Resource centre ah, District AIDS Prevention and Control Committee, DAPCC 4th Quarterly meeting om ding hi. Huai hun ah, ms. Jacintha Lazarus, IAS, Deputy Commissioner in meeting makaih in, 2nd DAPCC resolution toh kisai et kiik na nei in, Last quarter meeting na toh kisai leng et kiik na nein gal ding uhi. Huai ban ah, 2011-2012 overall performance leh NGO te pan laak dan ban ah, RTE toh kisai leh, Free lab. Investigation leh PLHA leh PLHIV te job card ding toh kisai leh thupoimoh tuam tuam gen khawm nanei ding uhi.
Apaisa April 4, 2012 huihpi nun ziak in Khousabung ADC Constituency sung a L.Phaijang khua ah Green Hills High School, huihpin mut sia a, a tungleh a bang teng ban ah, a khuam te ki puuk vek hi. Hiai tohkisai in kin tak a tun din ahih theih nawn na ding in bialtu MDC, Thangkhomang in DC kiang ah thil om dan report bawl in maban ah, pan laak ding dan ngaihtuah hi.
A hongtung ding April 9, sun dask 12:00 in DC office chamber ah, Guite road toh kisai compensation piak ding thu meeting om ding hi. Huai hun ah, SDO Thanlon leh Singngat, CO 80 RCC BRTF, CO 84 RCC BRTF leh DFO/CCpur te tel ding uhi.
Tuni sunma dak 11:00 in Paite Literature Society (PLS) in meeting leh 2012-2015 tan vaipaw thak ding telna nei uhi. Tuni a election neihna hun mi 15 tel khiakna nei ua, tel ching thak a omte ahihleh Dr Tualchin Neihsial, M. Nguldoukhup, John K Ngaihte, Dr. Kamkhenthang, S. Vungsing, Pauzagin Tonsing, Dr. S. Ngulzadal, Chinkhokam Hangsing, Ricky Vanlallawm, R. Sanga, T. Chingzaman, K. Thangkhogin, N. Thangkhogin, T. Awnzagen, T. Hanglamthang te hi uhi. Tuni a Election a neih na uah vote 26 ki khia a, khat simtheih louh (invalid) om hi. Telching thak a om mi 15 ten a kinlam a meeting nei ding ua, huai ah board member 10 guang ding ua, Huai ni mah in kichiam na (oathtaking) nei ngal ding uhi.
CCPur Road Bus Owners and Worker Association te leh All Lamka Taxi Owners Society, CCPur (ALTOS) te ki kal a thubuai a om gige ziakin ALTOS in Chief Minister kiang ah memorandum pia a, Huai ah ALTOS te'n Nitai tat Chuthek Governor Gate bul parmanent parking place ding in nget na nei ua, Hiai a nget na uh April 12, 2012 tan a suk buching a hih kei leh Teddim Road line service band ding uh a hih dan gen uhi. Huai ban ah ALTOS a pan press comunique ki mu dan in apaisa 24 march apat 27 march, 2012 sung All Manipur Bus Owner Federation in band a bawl sung a Mr. Dhanabir bus hal a aom na tung tang a KCP (MC), Nongdrenkhomba Group in ALTOS te khutnung hi dan a agen pen uh thei siam lou ahih dan uh gen uhi. Hiai tung tang ah ALTOS in helpawl kuamah bel lou ahih ban uah KCP MC in amau khutnung ngei ahih chih chet na a neih leh hong taklang ding in leng thei sak na bawl uhi.
Post : David R.Tonsing
.