**Koite ah Gari Kiphutuah; Mi Nih Si
Lamka Police Station akipan kilometre thum leh a kim vel a gamla Koite hanmual kiang ah tuni zinglam ak 10:40 vel in i-20 car no. AS 01AU-6574 leh Yamaha bike MN02-2317 kiphutuah in amun ah bike a tuang mi 2 lak ah 1 si in khat naktak in liam a, kintaka district hospital puak in om a, hospital puaktung himahleh a khonung sawtlou in si hi. i-20 car a tuang mi te 2 leng liam zek ua, district hospital puak tung hi ua, admit in om uhi. Sihna tuak mi 2 te ahihleh Thongkhankhup (54) h/o Niangmanching of Gouchinkhup Veng New Lamka leh Upa D. Chinkhanthang (62) h/o Thongniang of Dorcas Veng New Lamka te hi uhi. Sihna tuak mi 2 te ahihleh Saikul khua ah misi gal dia kuanlam hiaibang tuahsiatna tuak hi uhi. Mit a mute'n a gendan un i-20 car ahihleh Lamka lam zuan in hattak atai ahihbanah side diklou a tai ahih ziak hiai bang tuah siatna piang hidan in gen ua, bike leh car a kiphut tuah phet in bike a tuang tegel tuahsiatna mun apan feet 15 vel a gam kidenna ua, Thongkhankhup ahihleh amun ah si ngal a, Chinkhanthang pen singkung ah kibatkha hidan in gen uhi. Police in accident om chih theihphet in kintak in amun delh ngal ua, thiltung toh kisai in FIR No. 80(9)2013 CCP-PS U/S 279/427/338/304-A, IPC chiamteh uhi.

Bike ahih leh nasatak in kisia a, police in bike la in station ah kem lel uhi. Tuahsiatna kim laka nasemte khat in a gendan in car accident dan in koih ua, himahleh a kiang naichik ah bike kisia a muh phet un bike toh kiphu kha hiding in muangmoh ua, huaiphet in a kim leh kiang a zong ua, sihna tuak mi 2 te mukhia pan uh hidan in gen a, car ahihleh bike toh kiphut khak phet in lamkhou boh in kilep hi'n leng gen hi. Car ahihleh naksiat lawkei mahleh mipi thangpai hon in a glass teng satsiat sak vek uhi. Tua banah car a tuang mi 2 te ahihleh driver Suyalata (20) d/o Jamani Kanta of Langthabal Phura Makhong Imphal West, Sarachandra (25) s/o Guneshwor of Yumnam huidrom, Imphal West te hi ua, alawmte uh mu dinga Lamka hongpha hidan in gen uhi. Misi luang 2 te ahihleh doctor tuni mah in postmortem bawl ngal ua, lusuunna tuakte leh car neite sungkuante kihouna neilel ua, hiai new gelh ahihtan in misi sungkuan te'n siluang la nailou uhi.

**Christian Tahsa Bukimlou ho Ngaihlut Camp 2013 Kipan
Chin-Kuki-Mizo khentuam omlou in taksa bukimloute a ding in zan apan September 15, 2013 tan daih ding B. Vengnuom Community Hall ah Christian tahsa bukimlou ho ngaihlut camp 2013 neih in om hi. Hiai camp ahihleh zan sunnung dak 2:00 in Dr.T. Lunkim in honkhiakna nei a, camp hun sung teng in Pastor Thenkhojang thugenpi in pang ding hi. Camp makaite'n a gendan un Demjang of Molnom in hiai camp a organise hi a, amah ahihleh bomb thang a sikkhak ziak in a khe langnih a tan khiaksak in ana omta a, tua ban ah sum muhna bangmah omlou ahihziak in hiai camp a tel te'n mahni nek ding chiat aki puak uh hidan in gen hi. Hiai camp ah mi 34 tel ua, amaute a sung kuante mi khat zel in om pih uhi.

**U-17 National Football Championship 49th Dr. BC Roy Trophy 2013-14 Om Manipur Team ah CCpur apan Mi Nih Tel Ding
All India Football Federation saina in hong tung ding September 20-29, 2013 kikal sung in Ranchi (Jharkhand) ah U-17 National Football Championship 49th Dr. BC Roy Trophy 2013-14 om ding ah Manipur State U-17 players te leng te uhi. Manipur State ai-oh a U-17 players te ahihleh Lalvullien President CCpur District Sport Association (CDSA) in manager moh puakna len dinga, Erangbam Ratan Coach in pang ding hi. Manipur teamte ahihleh team Manager Lalvullien makaih in kalnawn thohtanni in Manipur nusia in Ranchi zuan ding ua, September 18, 2013 in ranchi tung ding uhi. U-17 National Football Championship 49th Dr. BC Roy Trophy 2013-14 ahih leh September 20, 2013 in kipan dinga, hiai ni in Manipur team te leh Madhya Pradesh team te kimawl tuah kha ding ua, September 22, 2013 in Uttar Pradesh te toh kimawl nawn ding ua, September 24, 2013 in West Bengal te toh kimawl ding uhi. Manipur Team players te lak ah CCpur District apan mi 2 telkha ua, amaute ahih leh Sumthianthang s/o Lhunkholal of Molnom leh Buanthanglur s/o Thangvung of Hebron Veng New Lamka te hi uhi.

** Exchange Mela of Maruti 800 leh Maruti Fari free Check-up Om Ding
United Motors (Maruti Authorised Service Station) Tedim Road Hebron Veng New Lamka ah Exchange Mela of Maruti 800 leh Maruti gari free check-up zingchiang sunma dak 10:00 apan sunnung dak 4:30 kikal nei ding uhi. Hiai hun Maruti gari nei te'n a thawn in United Motors Tedim Road Hebron Veng New Lamka ah check up va bawl sak theih ding hi.

**CDSA in Press Meet Sam
CCpur District Sports Association (CDSA) in tuni sunnung dak 4:00 CDSA Office Hiangtam Lamka ah press media te kimuhpihna nei uhi. Hiai hun ah Lalvullien President CDSA in a genna ah (L) Thonsonlian Guite Memorial District 2nd Division League 2013 opening ceremony zingchiang sunnung dak 1:30 in Lamka Public Ground mun ah neih a, tua ah ah K. Ngulkhanthang District Horti & Soil Conservation Officer leh Kammuanlal MCS Adviser, DSA Hill District, Manipur te'n chief guest chief host hihna toh uap ding ua, Langkhanpau Guite Chairman ADC/CCpur leh RS Hiilii Henry Chairman ADC/Senapati te'n special guest hihna toh uap ding uhi. Aban a genna ah opening ceremony neihna hun ah Exhibition Football Match om dinga, tua ah Hill District DSA Official te leh CDSA Official te'n kimawlna nei ding ua, tua zoh in HQ Veng Sporting Club leh Koite Youth Union te'n kimawlna nei ding uhi. CDSA President a gen behna ah Manipur in football lam toh kisai in nasa tak in khantouhna ngah mah leh Hill District te ah khan touhna taktak om lou a, tua ziak a District Sports Association lam in Hill District te ah sport lam a khan touhna a neih theihna dinga, naktak a panla uh ahi chi hi.

***Rev. Suanzalam Coordinator (Institution) PCI (R) apan lai hong pai kimu in a taklat dan in hong tung ding September 23, 2013 chiang in Rayburn Presbyterian Biak Inn ah Pastor Ron Tobias leh Elder John Slavic te makaih in Gospel Boot Camp on How to share the Gospel (Tanchinhoih bangchi hilh ding) kichi zatna om ding hi. Hiai hun zatna ah Indian Evangelical Mission (IEM) Missionary-te, Here I am Miniatries (HIM), Maharastra Village Ministries (MVM) leh Meitei Mission Field-te apan palai-te telding ua, tua ban ah local apan in pastor leh azi, Local Session Member, Board of Deacon Memeber teng, Mission Committee member teng, PWF committee member teng leh lunglutna nei kua peuh tel theih ding hi. Hiai telding te khempeuh in Registration form a min gelh lut in September ni 16, 2013 tan in Rev. Suanmzalam Coordinator (institution) PCI (R) kiang ah piaklut ngai ding hi.

***Manipur State League 2013 hong tung ding September 15, 2013 in Polo Ground Imphal ah kipan ding hi. Manipur State League 2013 opening Match ah Singjamei Southern Union (SSU) leh Manipur Police Sports Club (MPSC) te kimawl ding ua, tua ban ah hiai state league Manipur non Naga Tribal lak ah Kuki Sporting Club leh Zomi Footbal Club (ZFC) te leng kihel uhi.

GAMDANG THUTHANG
***Philippines simlam khopi Zamboanga ah Philippine Army-te leh Moro National Liberation Front-te kal a kibeihna ni nga chingta a, kibeihna paizom zelllai hi'n kigen hi. Army thusuak in a gendan in sepaihte'n Zamboanga City umkualta ua, huchihlai in MNLF-te'n Zamboanga kiang aom khopi dang khoih nawn ua, tuaziak in kikaptuahna dang piang behlaplai hi'n kigen hi. Philippine Army thupuangtu gendan in, Filipinos sepaih 2 leh police 3 leh mi nautang 2 kaplup in omta uhi. Islamic helpawl, Philippines apan zalen ngen a galvan tawi a helna nei MNLF-te'n tu'n mi nautang 180 a hentangte uh khahkhia nailou ua, amau kivenna leh phaw, human shield in zang ua, tuaziak in sepaihte'n helpawlte a pansan munte umkual mahle uh mi nautang a hentangte uh ziak in deihbang in gamtang theilou uhi.

***Afghanistan tumlam khopi Herat aom US Consulate helpawlte'n a beihna u'ah mi 7 in sihna tuak uhi. Tuni zingsang baihtak phalvak in, Taliban helpawlte'n sihchilh bomber khat US Consulate lutna, gate ah puakzak masa in, tua nunga Consulate compound ah helpawlte lut in hun sawtkhop kikaptuahna om hi'n thusuak in gen hi. Afghanistan tumlam aom Herat khopi bel helpawlte gamtatna leh hiamgamna, thagum suahna a piangkhiak tam khollouhna khopi ahi a, khopi muangchangtak ana hiden hi. Himahleh, tuni zingsang dak 6.00 vel in Taliban-te'n US Consulate nasatak in bei uhi. Helpawlte truck khat in US Consulate bei dinga kuan uh hi'n kigen hi. US Consulate a semte lak ah sihna leh liamna tuak kuamah omlou hi'n US thupuangtu'n gen hi. Afghan police 2, Consulate guard 1 leh helpawlte mi 4 kaplup a aom banuah midang 17 in liamna tuak uh hi'n Afghan police thusuak in gen hi.

***Syria buaina tawh kisai in US Secreatry of State John Kerry leh Russian Foreign Minister Sergei Lavrov in tuni'n Geneva ah a ni nihna ding in kihouna sunzom nawn uhi. Sergei Lavrov in a genna ah, hiai meeting ah resolution a kibawl theih leh Syria ah gamdangte sepaih leh galvan tawh a va kigolh uh a kul kei ding a, US in leng Syria chemical galvan zatna ziaka buaina pen peaceful-taka hihveng leh genveng theihna ding a Russia panlakna ah pan a lakpih ngei lam-en ahihdan gen hi. Russia etkaina nuai ah Syria in chemical galvan a neihte international control nuai a koihna ding a proposal leh panlakna kibawl pen US Secretary of State John Kerry in a genna ah, ataktak ahihding, Syria in chemical galvan a neihteng khua vannuai thuneihna leh etkaina nuai ah a piakkhiak vek a, piakkhiakna leh hihsiatna pen chetna bawltheih ahihding, gintak leh muantak ahihding leh hun bikhiah zui a Syria in chemical galvan a neihte hihsiat ahihkeileh, a piakkhiak ding ahi chi'n gen hi. Tuabang a Russia etkaina nuai a Syria a gamtat keileh US in military strike nei thei veve ahihdan gen hi. Syrian President Bashar al-Assad in Russian Television network khat tawh a houlimna ah, Syria in chemical galvan a neihte United Nations khut ah piakkhiak ding lemsa ahihdan gen a, tua ding tawh kisai in United Nations Convention on Chemical Weapons kichi ah suaikai gam khat hih ut ahihdan gen a, himahleh UN Convention on Chemical Weapons a zop nunga chemical galvan a neihte hihsiat leh piakkhiakna ding in Syria in chemical galvan a neihzah data bukimtak kaihkhawmna ding in standard ni 30 hun piaklai ding in deih a, himahleh John Kerry in tangtak in nawlkhin ngal a, Syria in chemical galvan zangkha khinta ahihman in standard situation piak theih hinawnlou ding in gen hi. Syria's chemical galvan thubuai tawh kisai a kihouna ni nihna ah UN leh Arab League Special Envoy to Syria Lakhdar Brahimi leng tel hi.

***Russia maltum lam Novgorod bial aom lungsim lam buaina neite kepna psychiatric hospital khat mei in kang a, mi 6 in sihna tuak ua, mi 23 meikuang apan taikhia thei in mi 30 val a omna uh theihlouh in mangthang lai uhi. Meikang kipat hun in damdawi inn ah mi 60 vel om uhi. Tuni zinglam dak 3.00 mazek in sawng-khat a sang hiai damdawi inn ah meikang kipan hi'n kigen a, building lui mahmah ahihziak in sawtlou sunga meikuang in damdawi inn pehsuak zou hi'n kigen hi. Official thusuak in a gendan in, psychiatric hospital aom damlou, patient khat in a lehkhazial tep a paihna apan meikang kipan hi'n gen hi. Damdawi inn katna kim-le-kiang a gamlak leh khotate lak ah meikang apan taikhia thei khenkhat in bukna a va zong uh hiam chi'n amaute zong mahle uh kuamah muhkhiak neilou uhi. Panpihna nasep pai lel a, misi kibehlap ding in tamtak in gingta uhi.

***Boulder County, Colorado, US ah vuahpi tamtak ziak in tuilian leh leitolh nasa mahmah piang a, atawmpen in mi 3 in sih-lawh uhi. Vuah tamluat ziak in tuilian hattak piang a lampi, kikawmtuahna lei leh mun poimawh tamtak kisia hi. Tanggam a tenna munte leh Colorado mun dangte kikawmtuahna lampite leitolh ziak in khaktan in om a, hutkhiakna leh panpihna nasepna ah naktak in nawngkaisak hi. Boulder aom University of Colorado leng tuilian in tum a, tua tawh kiton in University a siamsin naupangte kihemkhia ding a theihsak ahihbanuah, class leng lalou uhi.

***Iowa state, US in mi teng phial kiang ah kivenna dinga thau neih theihna ding in phalsakna pia a, mitdelte na-ngawn in leng a kivenna ding ua thau a neih ding uh Iowa state in phalna pia hi. Iowa lawmaker-te'n state sunga Gun Law tawh kisai kum thum paisa in khekna nei ua, mimal in kivenna dinga thau puak hiam, kep hiam poimawh sakna aomleh local sheriff-te phalna la in thau leitheih, keptheih leh puaktheih himai a, tu'n Iowa lawmaker-te'n thau neih theihna dinga poimawh bulpite a nei peuhmah, kho mu theiloute na-ngawn in leng thau a neih ua, a puak theihna ding un phalna keklet behlap hi.

***2014 BJP Prime Ministerial Candidate ding tawh kisai a BJP sung ah kituahlouhna omlai a, LK Advani in Narendra Modi naktaka a dalna kawmkal ah dalzou tuanlou in BJP in Prime Ministerial Candidate ding in Narendra Modi puangkhia khong hi. Hiai ding tawh kisai in Gujarat Chief Minister Narendra Modi in nitaklam in New Delhi zuan a, dak 5.00 a BJP Parliamentary Board Meeting om pen abul apan uaplou in, bangtan hiam nung in huai meeting ah kihel a, huai hun in 2014 General Election ah BJP Prime Ministerial Candidate ding Gujarat Chief Minister Narendra Modi thaunilh in om hi.

***Delhi Gangrape thubuai ah ngawh aom mi gilou mi 4-te tung a gawtna piak ding tuni in Delhi court in puankhiakna neita a, khailup ding, si ding in thutanna puangkhiata hi. Laidal 230 dim a thukhenna kigelhkhia ah, thukhentute'n mi gilou mi 4-te a ding a gensaktu, defence-te'n argument a bawl teng uh nawlkhinsak in si ding in thutanna bawlkhum a, Indian Home Minister Sushil Kumar Shinde in leng hichibang thutanna kipahpih mahmah ahihdan gen hi. Special Public Prosecutor Dayan Krishnan in a genna ah, hiai mite gamtatna leh khelhna tuh huathuai leh kihhuaupen ahi a, ngawh leh mawhpaih aom mi 4-te'n kibawlhoih nawnna ding in chance a phu nawnkei uh. Society ah numeite'n lauhna leh pangpatna a nei den ua, Indian numeite humbitna leh venbitna ding a system kizang teng ah muanngamna a nei nawn kei uh, huchibang lauhna leh patauhna pen i society leh numeite lak apan lakkhiakna ding in court chauh in thil ahihthei chi hi. Thukhentu in thutanna a bawlna pen gum in, hichibanga numei tung a tatsiatna huham leh huathuaipen sang a huhamzaw dang sualna leh tatsiatna a omkei ding a, tuaziak a hichibang khelhna leh tatsiatna tung ah court in hehpihna leh zahngaihna langsak nawnlou ahihdan taklang hi. Huham leh hiamgamtaka sualluih ahihnung a si Jyoti Nirbhaya sungkuang leh tanua-lainate'n court thutanna kipahpih mahmah uh hi.