*PWWA in Zu Tamtak Mankhia
*DYASO in Under-14 Football Boys Selection Trial Nei
*Minsterial Team in District Hospital Enkhia
*Mela -cum- Banquet Neih Ding Uh
*YPA GHQ in School Tuamtuam Vehna Sunzom Ding
*KCP Ki-Surrendered-te'n VDF Personnel Nih Vua

TANCHIN TOMKIM

***D. Phailian khosunga khamtheih zu leh damdawi zuakna, huanna leh puaklutna zan apan phal nawnlouh ahihtoh kiton in Phailian Women Welfare Association (DWWA) pawl in zan apan mun 11 ah duty nei ngal uhi. Phailian Women Welfare Association (DWWA) pawl duty-te'n zan nitak in dendrite hip bangzah hiam mankhia ua, tuzingkal in Tipaimukh Road tawna singtanglam lut ding pick-up gari khat muanmohna aneih ziak un Phailian kholai ah check bawl ua, gari apan zu Bagpiper bottle 2, Old Monk bottle 12 leh grape wine bottle 25 mukhia uhi. Phailian Women Welfare Association (DWWA) pawl in a zu matte uh tuni zingkal dak 8:30 in mipi muh ding in khensia uhi.

***Directorate of Youth Affairs & Sports, Government of Manipur saina in tunung sawtlou in discipline tuamtuam a ding in State Level Inter-School Football Tournament hong tung ding September 13-16, 2013 kikal sung in Khuman Lampak a om ding toh kisai in CCpur District apan U-14 football boys-te a ding in tuni zingkal dak 7:00 in Lamka Public Ground a buannoi lak ah trial-cum-selection nei uhi. DYASO lam apan thutut kingah dan in CCpur District apan U-14 ah 16 select khiak hiding ua, amaute Vanlalkham in Coach leh team Manager hikawm in enkai ding hi.

***Phungzathang Tonsing Minister Health, CADA & GAD, Govindas Konthoujam Minister Commerce & Industry, Sericulture, Vety & Animal Husbandary te'n tuni in join tour programme nei khawm uhi. Minister 2 te ahihleh Imphal apan Vungzagin Valte Parliamentary Secretary leh Prithviraj Chauhan Parliamentary Secretary-te'n hon zui ua, tua banah A. Bijoy Singh Director Manipur Health Services, O. Ibomcha Director Health & Family Welfare, State Mission Director, Suhel Aktal Principal Secretary, Ningthem Chief Engeneer, MDS, Dr. Pratab Officer on Special Duty leh Daneshwar EE, MDS te'n hon zui uhi. Minister team ten Imphal apan in Nambol PHSC, District Hospital Bishnupur, PHC Ningthoukhong leh CHC Moirang te etkhiakna aneih ban uah District Hospital CCpur leng etkhiakna hong nei uhi. Minister team te District Hospital CCpur hong tung un District Hospital compound sunga building kibawl thak te etkhiakna nei ua, tua ban ah surgical ward, medicine ward, Childrens' ward leh Maternity ward leh Opertaion Theatre (OT) munte etkhiakna nei ua, tua ban ah District Hospital OPD konga, Operation theatre ding leh surgical ward kibawl lel te et khiakna nei uhi. Hiai hun a Health Minister Phungzathang Tonsing in a thugenna ah Manipur ah Medical College khat JNIMS kia om a, Manipur Hill District te ah leng a om poimoh ahih dan gen kawm in Commerce & Industry Minister Govindas Konthoujam toh pang khawm a CCpur a Hill District Medical College khat koih hiding in gen hi. Minister in a gen zelna ah Childrens Ward a naupang damlou tamtak lupna tangzou lou in varanda ah lum ua, huai te lupna ding akin thei pe'n a koih hiding hi'n gen a, District Hospital a power supply tu dinga kikoih Solar battery 3 guta te guk khiak leng, adang koih ding in MANIREDA te kiang ah a kin thei bang pe'n thu pe ding chi hi. Aban a gen zelna ah damdawi inn bang zah hiam ka etna ah baby warmer poimoh dan kia a gen ua, District Hospital in leng a poimoh leh 2 tan piak beh theih ding in gen a, tua ban ah hospital building leng puah phat (renovate) hiding chi hi. Minister in a ban a gen behna ah District Hospital Compound sunga building kibawl te zoh siang pah lam-et huai mahmah ahihman in tunung sawtlou in Manipur Chief Minister O. Ibobi Singh in building kibawl thak 2te hon khiakna hong nei ding ahih dan leng gen hi. Minister Joint Tour team te'n hospital etkhiakna a neih zoh un DC/CCpur Quarter ah ann ne ua, sunnung dak 4:00 in Imphal zuan in kik nawn ngal uhi.

***Saikot EFCI numei pawl in thumna mun (prayer centre) lamna ding in hong tung ding September 14, 2013 zingkal dak 7:00 apan nitaklam dak 5:00 kikal sung in Sielmat Christian Higher Secondary School campus ah Mela -cum- Banquet neih sawm uhi. Hiai hun ah van tuamtuam zuakna nei ding ua, vanzuak dingte lak ah inn cheina, pak chi tuamtuam, hot & cold beverages, designers wear chih zuak hiding ban ah live music leh a dang tamtak leng om ding hidan in thutut kingah hi.

***Young Paite Association GHQ in school tuamtuam a student numeite nik singlua leh pasalte khekol kawng tuallua banah khekol gong tight lua chihte enkai dinga hun apiak uh August 31 ahun beita a, tua toh kiton in YPA GHQ makai te'n September 1, 2013 apan in school tuamtuam a school authority te panlak dan etkhiakna a neih uh hun bang tan hiam a khawl nung un zingchiang in school khenkhat etkhiakna pan nawn ding ua, zinghal in zousiangta ding uh hi. YPA GHQ makaite apan thutut kingah dung zui in zinghal tan in school tuamtuamte etkhiakna zoh hiding a, huai zoh apan in YPA GHQ te kholak ah duty ding kisep in student te kichei dan uh khengval lua om hiam chih etkhiakna nei lai ding uhi hidan thutut kingah hi.

***Health Minister in tuni a District hospital hong visit lai in district hospital vengtu a om Police leh VDF personel 2, 46 Assam Rifles pawl in KCP helpawl surenderee bangzah hiam a kepte un va vua uhi. Police apan thutut kingah dan in minister in damdawi etkhiakna neilai ahihman in damdawi innsung ah damloute chihlouh lut phal hilou a, himahleh KCP helpawl ki surrender te lak a mi 2 in zukham in lut zel pawt zel ua a om ziak un amau leng man ua, police station a piakkhiak ding in a barack ua, akoih ua leh mi 2 te'n a lawmte uh phone tung tawn in sam ua, huai phet in KCP ki surrender 10 vel bolero vom MN 04/6963 zang in va kuan in VDF personel te ki vuak huan ua, meitei pau ngen azat ban uah na SP uh leng na ut leh sam un chi ki koukhum lai uhi.

***Shongkip-Hanghal Phungpi Organization pawl in hong tung ding October 16, 2013 in General Assembly leh Election kithuah neih sawm uhi. Hiai ding toh kisai in Pearson, Bungmual leh Phailian khua te a ding in H. Thangzadou inn Bungmual ah hong tung ding September 14, 2013 zing dak 7:00 in kikhopna om dinga, Mualkoi Tangnuam, Lanva New Lamka te a ding H. Pauzamuan inn september 17, 2013 zingkal dak 7 in kikhopna om dinga, Zenhang Lamka leh Lamka khopi sung teng a ding in H. Jamlianmang inn ah september 21, 2013 in kikhopna om nawn ding a, Tuibuang leh a kim lak a tengte ading in H. Haongam inn ah September 29 zing dak 7:0 in om nawn ding hi. Hiai hunte ah Innsunga nu hiam pa hiam khat zawk zawk tel ngai dinga, Phungpi sunga Hausa om kha te'n 1000 leh adviser leh executive member te'n 500 leh inn chih in 200 chiat athoh khawm uih ngai ding hi.

GAMDANG THUTHANG

***Kum 8 sunga amasapen ding in Norway in leader thak neita hi. Seppatni in Norway ah kitelna neih in om a, Conservative Party in a makaih Party li omna Centre-Right Wing Coalition in Prime Minister Jen Stoltenberg makaih Centre-Left Coalition-te tung ah vualzawhna thupitak laisuah in Seats 169 om lak ah seats 96 ngah in solkal thak bawlzou ding in hatna neita uhi. Norway in Prime Minister thak ding in numei dinga, kum 25 sunga Conservative Party in Norway ah solkal a bawl masaknapen uh hiding in Conservative Leader Erna Solberg in Norwegian solkal thak makaih ding hi. Norway Prime Minister Jen Stoltenberg makaih Labour Party in seats 70 ngah zou in, kum giat sung a vaihawmna a beina hita ding hi.

***Guatemala mal-tum lam ah bus khat lui guam ah lengkhia in mi 44 a sih banu'ah midang 46 in liamna tuak ua, Fire Department thusuak in a gendan in liamna tuakte damdawi inn tut in om khin uhi. Lampi kawina bus hektu in control zoulou in metre 200 sanga sangzaw apan lui guam ah lengkhia suk hi'n kigen hi. Hutkhiakna nasemte'n zip wire pansan in si-le-liamte lui guam apan lakhia uhi.

***Kenyan Deputy President William Ruto tunga ngawhna thubuai omte tuni apan in International Criminal Court in ngaihkhiakna panta hi. Kenyan Deputy President William Ruto leh Kenyan President Uhuru Kenyatta tung ah ngawhna tuamtuam om a, himahleh huai ngawhnate mi nihte'n nial vek uhi. Kenya ah 2007 in election om a, election neihna pen hiamgamna, kithahna leh thagum suahna in mihing 1,000 val in ana sih lawh ua, huai hiamgamna leh thagum suahna bul pantu leh tokthoutu a ngawh in om uhi. Kenyan makai mi nihte tung ah tualthahna, thagum a mite a omna uh leh tenna uh suansakna, soisakna leh crime against humanity ah ngawh in om uhi. Tuni apan in William Ruto tunga ngawhna omte ICC in ngaihkhiakna nei dinga, kha nih nung in Uruhu Kenyatta tunga ngawhna omte ICC in ngaihkhiakna nei nawn ding hi. Hiai thubuai ngaihkhiakna ding ah witness tamtak in a testimony uh zukkik khin ua, khenkhat vau leh hihlau aom uh hi'n ngawhna om hi.

***Uraguay apan kum 58 a upa pasal khat Chile leh Argentina kikal aom Andean Taang dung apan hutkhiak in om hi. Amah ahihleh, a kigendan in, Andean taang dung ah gamsa, grape keu - raisins leh chini - sugar a kivak in kha li phial omta hi. A kigendan in hiai mipa tuh vangphat thu a va muhkhiak leh hutkhiak a om ahi. Chile apan water expert khenkhat Andes mual tunga vuk omzah level teh ding a kuante'n a va muhkhiak uh hi'n kigen a, muhkhiak leh hutkhiak a a om hun in mipa tuh chau leh bah mahmah in om hi. Tu'n San Juan a Rawson Hospital ah etkol in om lel a, doctor-te'n a dinmun pen lauthawng huailua in genlou ua, himahleh a taksa nek-le-dawn hoihlouh ziak, malnutrition ziak in chau mahmah a, a taksa in tui a poimawhzah a taksap ziak in kal lam buaina leng nei a, bah mahmah hi'n gen uhi. Tu'n Gomez leh a innkuante damdawi inn ah kimu nawn ua, a tanu Paula Gomez in, tamloulou in a pau a, hong hoih mai ding in ka um, muhkhiak a om nawn ahihlam ka gingta thei naikei phial chi'n gen hi. Gomez hiai tangdung haksatak ah bang va bawl himhim ahi dia? Chile thuneitute' thusuak in a taklat dan in, kum 8 a upa pasal naupang khat zahmawh lama thangbawlna leh sawkgawpna, sexual abuse ah April kha in Gomez tung ah ngawh bulh in om a, himahleh Gomez leh a innkuante'n hiai ngawhna bulbal neilou ahi chi'n naktak in nial uhi. Sexual abuse ah ngawh a aom nung mang vengveng ahihman in, tu'n muhkhiak hinawnta a, tua tawh kiton in Chilean thuneitute'n Argentine thuneitute kiang ah Gomez pen Chile ah extradite, puaklut nawn theihna ding in ngetna bawl ngal uhi.

***Syria buaina ah chemical galvan kizang ahi chia ngawhna aom nung in, US makaih in tumlam gamte'n Syria tung ah military strike neihna ding in khuavannuai gamte leh American mipite' zathuapna leh support naktak a zonga a kipei nung in, Russia in Syria buaina ah US kigolh ding dal theihna teng ah dal in US hepkhiak theihna dinga lampi om thei teng a zon nung in, Syria buaina ah diplomatic solution om thei ding a offer a bawlziak in, President Obama in Syria a kigolh a tupna pen hungaihzek ta-dih phot ding hi'n gen a, Syria in chemical galvan aneih teng international community kiang ah a piakkhiak a, hihsiat vek ahihdingleh Syria buaina ah military strike tawh kigolh seselou phot ding hi'n gen hi. Himahleh, American Television Network-te tawh Obama in a houlimna a a gendan in, Syria apan chemical galvan om teng lakkhiak a, international community kianga piakkhiak dinga Russia in proposal a bawl pen gingta lawmlawmlou ahihdan gen hi. Tua tawh kiton in, Syria ah kigolh theihna dinga US Senate ah vote lakna ding leng hunchiam omlou a suan gamlat hinawn phot hi. Syria ah US kigolh ding deih senior Republican Lindsey Graham in bel, Seppatni a Russia in Syria buaina tawh kisai a US kianga thusun, proposal a bawlpen gintak pah lawlaw ding hilou ahihdan gen in US Congress ah kisakkholhna bangmah a tuailuai saklouh ding ahi chi hi. President Obama in leng Syria a kigolh a tupna pen khawlsan taktak chihna ahinai tuankei chi hi.

***December 2012 a Delhi bus ah pasal guk in nungak nou khat kipawngsual huanna leh sualluihna a kigolh mi 4 tuni'n Delhi court in ngawh a aomna teng u'ah mawhpaih hi. Hiai gangrape a kigolh kum chinglou valnou khat tung ah juvenile court in tumazek in thutanna ana bawlta a, kum thum kibawlhoihna inn ah khum ding in thutanna ana bawlkhumta a, himahleh sualluih ahihnung a si nungaknou sungkuan-lainate'n juvenile court thukhenna pen a khelhna tawh etkak a nemlua leh court zaidamlua chi'n court thukhenna ana demta uhi. Hiai thubuai a kigolhkha mi khat pen a taan inn suangkul sung ah August kha in amah-le-amah ana kikhailum in ana kithatta hi. Hiai thiltung ah migilou mi gukte gamtatna a huaisiat luat ziak in Indian Rape Law ah kikhekna piangsak hial hi. Hiai mohpaih a om mi 4-te tung ah bangchibang thutanna bawlkhum hiding hiam chih zingchiang in court ah genna om ding hi. Indian Rape Law thak dungzui in rape case ah ngawh a om peuhmah mawhpaih a aom uhleh khailup hiding uh chih ahi. Sushma Swaraj, BJP makai in gangrape a mawhpaih a om teng khailup ding deih a, Kiran Bedi in leng damsung suangkul taang di'a thutanna bawlkhum sang in khailup di'a thutanna bawlkhum a hoihzaw ding chi hi. Congress makai Ambika Soni in maban ah hichibanga huham leh hiamgamtak a numeite tung ah thiltung kihhuai leh huathuaipen a tung nawnlouhna ding in gangrape a ngawh leh mawhpaih a omte gawtna apan message khauhtak a piangkhiak deihthu gen hi.

***2014 General Election ah BJP Prime Ministerial candidate dinga Narendra Modi in RSS zathuapna leh support a ngahna dinga Modi in RSS-te Hindutva Agenda-te pompih ding ahihdan thuchiam bawl hi'n kigen a, BJP Prime Ministerial Candidate di'a guan ahihtheihna ding a RSS-te gupna leh zathuapna Modi in a muhna ding in conditions li luikhia uh hi'n kigen hi. Tua dungzui in, Ayodhya ah Ram Temple thupitak bawlkhiak ding, RSS Hindutva Agenda dungzui a minautangte'n leng uniform civil code neihna ding leh zat ahihtheihna dinga naktaka panlak ding, India Constitution a Article 370 lakkhiakna ding a naktaka panlak ding, huai Article 370 lakkhiak a aomleh Jammu and Kashmit in special status a neih pen mansuah geih ding a, condition li-na ah, bawngte vengbit leh kembit ding a naktak a panlak ding chihte ahi.

***Muzaffarnagar, UP ah Muslim leh Hindu-te kal ah buaina nasatak a piannung in misi kibehlap zel a, tuni chiang in misi 32 chingta hi'n thusuak in gen hi. Nitaklam dak 3.30 apan dak 5.30 kikal, dakkal nih sung curfew khahkol in om hi. Opposition-te'n Akhilesh Yadav makaih SP solkal naktak in mawhsa ua, Uttar Pradesh ah President's Rule koih ding in phut uhi. Buaina dang a piang behlap ding venna in sepaih tamzaw tolh lut behlap in om hi.