*D Phailian Khosung ah Zu leh Khamtheih Chi Himhim Khamna Kipan
*PKT Street ah Inn khat Kang; Lakh 1.5 Vel Man Ding Van Kangsia
*Manipur's Health Minister leh Commerce & Industry Minister-te'n Tour Nei Ding
*CDSA Saina in 2nd Division League Kipan Ding; Managers Meeting Sam
*ZFC leh KSC in Charity Match Nei Ding
*DLCC Meeting Hun Ding Kisuan

Tanchin Kimzaw:
***Khopi sunga zu leh khamtheih banah numei-pasal kala thangtatna uang deuhdeuh ziak in pawl tuamtuam in nasatak in doudalna nei ua, adiak in Tuibuang area lamah numei pawl in khamtheih nasatak in veng tuamtuam ah doudalna nei lel uhi. Hiai toh kituak in D. Phalian Village Authority, Phailian Welfare Committee leh Phailian Women Welfare Association pangkhawm in tuni apan Phailian khosung ah zu zuakna leh khamtheih chi tuamtuam khamna pan uhi. Phailian khosung a zudawn leh zuak phallouh ahihdungzui in huaite enkai ding in Phailian Women Welfare Association (PWWA)-te'n moh puakna la ua, amaute a ding in Rev Thangkhosiem Gangte in thumsakna nei hi. PWWA pawl in duty ding kisep in tuni apan in khosung mun tuamtuam 11 vel ah duty pan ngal uhi. PWWA heutute khat in a gendan in Phailian khosung vuak ah zuzuakna inn leh a huanna inn 50 val om a, huaite'n Bijang, Tuibuang tel in veng tuamtuam supply khe zel hidan in gen a, tua banah zu huanna leh zuak theihna hun piak aom zan, September 8, 2013 a abei toh kiton in tuni apan khauhtaka kham in om ngala, thupiak zuilou matkhiak aomleh a tung thu uh Village Authority, Phailian Welfare Committee leh Phailian Women Welfare Association in ngaihtuah ding uh chi hi.

***Tuni sunnung dak 2:30 vel in Pumkhothong (PKT) Street, Tedim Road ah inn khat mei in kang a, himahleh mi phatuamngaite ziak in meikuang phelhmit pah in om hi. Inn neitu ahihleh Nuamzavung (65) w/o (L) Luandailou of PKT Street ahi a, Tedim Road a RK Store neitu Dipusha in dawr van tuamtuam koihna dia aluah hidan in inn neitute'n gen uhi. Inn neitu in a gen behna ah meikuang ahihleh inn toh kizom aom vok-ann huanna buk apan hong kipan hidan in gen a, inn kang om chih theihphet in mi phatuamngai tamtak in a mun kidelhhuan in meikuang phelhmit ngal uhi. Meikang tawh kisai in Fire Brigade-te leh police-te theihsak in om mahle uh amaute tunma in meikuang phelhmit in omkhin hi. Meikang ziak in dawr van chi tuamtuam tamtak kangseman a, vangkangsia teng sum a tuat in lakh 1.5 vel hhu hiding in kigen hi.

***Health Minister Phungzathang Tonsing leh Govindas Konthoujam, Commerce & Industry Minister-te'n Tour neikhawm ding ua, huai hun ah Nambol PHSC, District Hospital Bishnupur, PHC Ningthoukhong, CHC Moirang leh District Hospital CCpur-te etkhiakna nei ding uhi. Hiai hun ah Director of Health Services, Manipur leh Principal Secretary Health Services Manipur-te'n hon zui ding uh hidan Dr. HL Liensang CMO/CCpur apan thutut kingah hi. Minister-te ahihleh zingchiang zingkal dak 9:30 in Imphal apan hong kipan khe ding ua, 9:40 in Nambol PHSC etkhiakna nei ding ua, huai apan District Hospital Bishenpur etkhiakna nei ding uhi. Zinglam dak 10:40 in Ningthoukhong PHC enkhe nawn ding ua, Ningthoukhong apan sunma dak 11:00 in Moirang tung nawn ding ua, Moirang CHC enkhe nawn ding uhi. Moirang apan Lamka sunma dak 11:45 in hong tung ding ua, tua ah District Hospital building leh compound sung banah District hospital function dan etkhiakna nei ding uhi. Tua banah sunnung dak 1:00 Minister team-te'n ann nne in Imphal ah kiksuk nawn ding uhi.

***CCpur District Sport Association (CDSA) saina in hong tung ding September 14, 2013 in Lamka Public Ground ah (L) Thonsonliam Memorial District 2nd Division League 2013 kipan ding hi. Hiai ding toh kisai in 2nd Division League a club/team omkhate laka Team Manager teng toh CDSA makaite'n zingchiang zingkal dak 8:00 in CDSA Office, Hiangtam Lamka ah Managers Meeting nei ding uhi.

***Bijang Women Welfare Association-te saina in kha nawn October 7-12, 2013 kikal sung in ECA Biak Inn Bijang Khopi ah Saptuam khentuam omlou in, a ut peuhmahte a ding in Revival Crusade neih sawm uh ahihdan Bijang Women Welfare Association makaite apan thutut kingah hi. Hiai hun sung in " Na lungsim, Pumpi teng uh toh hong kinunghei un" Joel 2:12 chih thupi in nei ding ua, Rev. Lamkhosiem, Rev. Khaigin, Upa Soikam, Pastor Letthang leh Head Deacon Thangzalal-te thugenpi in pang ding uhi.

***S. Kotlian apan CCpur Police Station kikal sunga lampi kekletna (road widenning) ding toh kisai in, lampi keklet hun ah tenna inn suksiat khak aom dingte'n mahni innmun patta' lai xerox copy bawl a, xerox copy pen September 12, 2013 ma ngei a SDO/CCpur office ah submit chiat ding in Laltanpuii Vanchhong MCS SDO/CCpur apan theihsakna kingah hi.

***Hong tung ding September 11, 2013 sunnung dak 1:30 in Kuki Sporting Club (KSC) leh Zomi Football Club (ZFC)-te'n Lamka Public Ground ah Charity Match kimawlna nei ding uhi. Hiai kimawlna kuapeuh in va uap chiat ding inZFC heutute'n mipite kiang ah chialna bawl uhi.

***Jacintha Lazarus IAS DC/CCpur makaihna a September 11, 2013 a Henglep Sub-Division sunga Leimatak ah District Level Co-ordination Committee (DLCC) meeting neih ding ding chih himahleh DC hong tunkik nailouh ziak in September 21, 2013 a ding in meeting hun suan gamlat in om hi.

Gamdang Tanchin:
***Philippines suahlam pansan Islamic helpawl Moro National Liberation Front-te Zamboanga ah long-neu zang a lut ua, Naval Force-te tawh nasataka kikaptuah uh hi'n kigen a, atawmpen in mi guk kaplup a om uh hi'n report khenkhat in taklang a, helpawlte'n civilian mi 220 vel hentang uh hi'n kigen a, hentang aom minautangte dinmun tutan bangmah theihzui omlou hi. MNLF-te bel Philippines gamsunga helpawl upapen leh hatpen hi'n kigen a, Philippines suahlam teng huama Muslim-te a dinga Islamic independent state ngen a kalsuan ahi uh.

***Buaina, demna, mohsakna leh minsiatna tamtak kawmkal ah Paskitani President Asif Ali Zardari in kum sawm sung Pakistani President dinmun a letnung in, a term a bei tawh kiton in a dinmun apan ki-awngsutta a, amah mun awng luahtu ding in, Pakistani politics ah a min leh hihna zak tamlouh Mamnoon Hussain in kichiamna la ding a, amah bel Pakistani President 12-na hiding hi. Amah bel India a piang ahi a, textile industry ah businessman lohching mahmah ahi a, Pakistani Prime Minister thak Nawaz Sharif a dinga mi muanhuai mahmah khat hi'n kigen hi. Mamnoon Hussain bel Pakistan Muslim League Party apan ahi a, July 30 election ah Asif Ali Zardari dinmun khekkhetu dinga telching ana hita hi.

***Syria buaina ah kigolh theihna dinga US in lawm leh panpihtu ding zonga gam tuamtuam makaite kiang leh American mipite kianga case a bawlna ah President Obama in a deihbang zathuapna leh support mu ding hia, mulou ding chih genchiang haksa mahmah lai hi'n kigen hi. Syria tualgal ah Syrian solkal in chemical galvan a zatna pen khuavannuai dan palsatna hi'n US in ngawh a, tuaziak in Syrian President Bashar Al-Assad tuh thuhilh zek ut tinten hi. Tua tawh kiton in US Secretary of State John Kerry in khovel gamte zathuapna, support zong in European khomualpi ah gam tuamtuam makaite kimuhpih in, Syria tunga US in action lak atup pen zathuap leh support ding in ngetna bawl a, Syria ah US kigolh tupna pen khovel theihsiamsak tum in nasatak in panla hi. Kerry in Pathianni in Paris ah French Foreign Minister tawh houlimna a neih banah, Arab League palaite tawh leng kihouna nei a, huai apan in London zuan in Britain's Foreign Secretary William Hague tawh houlimna nei nawn a, tuni mah in Washington zuan ding a, tangtak in US House of Representative ah lutsuak dinga, thugenna leh a khualzinna tawh kisai briefing bawl ding hi. Washington ah, American lawmaker-te'n summer holiday a neih nung un US vaihawmna innpi ah lut nawnta ua, Syria tunga President Obama in military strike neih a tup pen pompih ding leh pompihlouh ding kal ah debate nei ding uhi. Tuabang kawmkal ah, American Television CBS tawh Syrian President Bashar Al-Assad a houlimna u'ah Assad in amah' mipite tung ah khuavannuai gamte'n a huat uh chemical galvan zanglou ahihdan gen thak nawn a, huchibang galvan kizat lam leng thei khalou ahi chi'n Syrian solkal tunga ngawhna omte naktak in nial a, Syrian solkal in a mipite mahmah tung ah chemical galvan zang ahi chih chetna US in a neihleh khovel theih a phoukhia ding in ngetna bawl hi.

***China' Guilin ah pei thum nei rickshaw khat primary school khat kiang ah khawl a, a khawlnung sawtlou in bomb hattak puakzak a, mi nih in sihna a tuah banu'ah school naupang 10 tel in midang 17 in liamna tuak uh hi'n police thusuak in taklang a, bang thiltup nei a, kuate pawl hichibanga gamtang uh hiam chih bangmah theihchiang om nailou hi.

***Guatemala gam khopi kiangzek a om town khat ah galvantawite'n bar khat a bukapna uah mi 11 kaplum ua, midang 15 phial in leng liamna tuak uhi. Guatemala bel galvan tawi gang-pawl hiamgam leh huham taktak omna gam ahi a, hiai kithahna ah gang-te kigolh khakna a om leh omlouh police-te'n suizui lel uhi. Himahleh, hiai town a local mite'n a gendan un police duh-gawl leh sumduh khenkhat leng kigolh ding un gingta uhi. A paisa kum guk in hiai town aom National Police-te a dukdaklouh ua, nekna ding leh hamphatna ding kia en a nna a sep ziak un tualsung mipite'n hawlkhia in, community force khat bawlkhia ua, chiangpum tawh amau-le-amau security lam ana ki-etkolta uh hi'n kigen hi.

***India mallam state Uttar Pradesh a Muzaffarnagar District ah ni nih paisa in Muslim leh Hindu-te kal ah buaina nasatak piang a, tunitan in misi 29 chingta hi. Hiai buaina tawh kisai in Samajwadi Party makaih Uttar Pradesh solkal naktaka mohsak in om hi. Zan nitaklam apan in thiltung deihhuailou bangmah report omlou tadih hi'n Police thusuak in gen a, buaina tawh kisai in mi 90 val mat in omta uhi. Muslim-Hindu buaina ziak in Muzaffarnagar a police stations 3 huamsung ah curfew khauhtak puan in om a, office tuamtuam khak in om a, siamsinna innte leng ni thum sung kikhaklai ding a, buaina omna district ah shoot-at-sight order leng puang in om hi. Uttar Pradesh Chief Minister Akhilesh Yadav in thiltung tawh kisai in demna leh mohsakna tamtak tuaka, buaina a kigolh khakna neite tung ah nemtaka gamtat hilou ding in gen hi. FIR ah BJP MLA 4 min leng genkhak in om a, tuaziak in BJP in member 3 omna Fact Finding Team khat MUzaffarnagar ah sawl ding hi.

***National Capital Delhi ah 2014 General Election ding tawh kisai in BJP-RSS in Coordination Meeting a neih uh tuni'n zou siangta uhi. Thusuak in a gendan in BJP Prime Ministerial candidate dinga Narendra Modi ah kiminvek sim uh hi'n gen a, September 28 vel a BJP Prime Ministerial Candidate' min puankhiak hiding in kigen hi.