* National Bamboo Mission tawh kisai in District Level Workshop neih in om.
* Hotel Venus ah Jewellery Mela kipan.
* PWD Lamlian bawl ginatlouh ziak in mipi phun.
* District Social Welfare Office ah Anna-purna Anntang kihawm ding.
* Student te Uniform Size diktak submit lou Headmaster leh Headmistress te Paybill hentangsak hiding.
* Girls Education nuai ah Govt.School leh Aided School a kai numei naupang te'n panpihna ngah ding.
* Ginsuanhau MLA 60th Singngat Assembly Constituency in Zobethel khua kum 25 chin Silver Jubilee lopna Chief Guest hihna toh uap ding.
* Sibapurikhal khua ah 2 Days District Level Health Mela om ding.

Southern Forest division churachandpur saina in Tuibuang a Southern Forest Division office ah tuni'n one day district level workshop cum training on national bamboo mission nei uhi.Hiai hun ah N. Kipgen IFS State Mission Director (National Bamboo Mission) in keynote address gen ding kichi himahleh hihtheihlouh na aneih ziak in, L. Muhindro Singh Conservator of Forests,Southern Circle in key note address gen hi. L.Muhindro Singh in a thugenna ah, Gua kichi, I pu I pa khang apan kizang himahleh huai hunlai sang in tulai in kizang manpha zaw chi in gen hi. Huaiban ah tulai a sing kizang te sangmah a leng phatuam zaw in a zatna ding diktak ah kizang theita chi inleng gen hi. L.Muhindro Singh in aban agenzelna ah Gua in oxygen tamtak pekhia a, sing in a piakkhiak sang in 30 percent in tamzaw a chih ban ah Economic leh Global tanpha ading inleng sing sang a Gua in poimohna neilian zaw ahihdan gen hi. Huaiban ah, Gua kichi, khovel a milip seh-li suah seh-khat ki-ngakna ahi chi a, khovel a gam khangtou mahmah a kigen,China leh Japan inleng Gua zang a niteng vanzat ding bawl khia uh ahihdan gen a,Gua a poimoh dan hiai gam khangtou 2 te apan inleng kilang mahmah chi'n leng genbeh hi. Technical session hun ah N Somorendro Singh WPSO leh Ch.Bira Singh Divisional forest officer chandel in manipur gamsung a gua chiin dingdan sinsak ua,sukumar Haobam in gamdang a gua zuakkhiak dingdan sinsak a,Thambou Kamei MFS Retired in gua apan thil tuamtuam bawl khiak dingdan leh a kepbit dingdan sinsak a,gua tawh kisai a lunglutna nei mi hunkhop tel uhi.

Haryana apan jewellery zuak a minthang Mubin Manager saina in tuni'a kipan Hotel Venus Gouchinkhup veng New-Lamka ah Jewellery Mela nei uhi. Hiai mela ah, numei te kicheina van tuam tuam gold-coated kiman taktak in kizuak a, mela a van kizuak te ahihleh Haryana a kibawl ngen hi a, ei lam bazaar rate sang in niam zaw hi. Mela ahihleh zinglam dak 8 apan nitak dak 7 sung  kihong zel ding a, March 30 in khak ding uhi.

Apaisa March 25, 2012 in PWD in Tedim Road Traffic point apan a khangzek tan lamlian ginalou chik a bawl ziak un, a kiangnai a om te naktak in phun uhi. Lampi kiang a om dawr bawl ten agendan un,government department khat in machine zang zen a lampi a bawl uh, ni 2 leng painailou a zat theihlouh ding khop hial a om pen, lamdang sak thugen ua vanzat poimoh leh a kihelkhawm ding teng kihel kimlou hileh kilawm in, suanghum te lengkhia in gari neu a taite leh a khe a paite ading in lauhhuai thei ding in kilang hi.

District social welfare officer Jachong Sinate in tuni'a thusuah a bawlna ah Churachandpur District sung a Anna-Purna card neite ading in Novembr 2011 akipan march 2012 tan a Anna-purna anntang ding khakhat a sel 10 zel in zingchiang zinglam dak 10:30 akipan District social Welfare Office ah kihawm ding hi.zingchiang in churachandpur block ading kihawm ding a, March 29 leh 30, 2012 in Singngat, Henglep, Thanlon, Tipaimukh leh Samulamlan block ading kihawm ding hi.

Govt.school leh Aided school a student-te uniform ding tawh kisai a size diktak headmaster leh headmistress te'n ni 10 sung a mahni Deputy Insepctor of schools-te kiang a submit ding chih himahleh school tamzaw tham in submit lou uhi. Churachandpur Block nuai ah school 100 omlak ah school 5 in submit pan ua,student te uniform size diktak submit lou Headmaster leh Headmistress te paybill hentangsak hiding in thusuak kingah hi.

Girls Education tungtawn in SC/ST student Kum 2011 a class VIII passed, tukum a class IX simlel ban ah March 2012 tan a kum 16 a upa govt school leh Aided school akai numei naupangte ading in Girls Education tawh kisai in panpihna(incentive) ngahtheih ding ua, huai ding in tunitan in school 10 in Kaikhanlian Guite, Deputy Inspector of Schools kiang ah min list submit uhi. Deputy Inspector of school, Churachandpur in application om teng March 29, 2012 in Imphal ah submit ding hi’n kigen hi.

Sangaikot TD Block sung a Zobethel khua kum 25 chin silver jubilee lopna march ni,29,2012 sunma dak 10 in Zobethel khua ah om ding hi.Hiai hun ah Ginsuanhau President UZO general headquaters leh MLA 60th Singngat Assembly Constituency chief guest in pang ding a, Guest of honour in T Gouzadou Ex-Minister pang ding a, Functional President in Khamzadong Samte manager District Industries Centre churachandpur pang ding a,Special guest in Tongkai baite MDC sangaikot leh Chief host in Pumkhanmang General Secretary SPO pang ding hi.

District health society Churachandpur saina in March 28 leh 29, 2012 in Vangai range a Sibapurikhal khua ah 2 days district health mela om ding hi. Zingchiang in bialtu MLA Dr. Chaltonlien Amo in Health mela hong ding a, hiai hun Jacintha Lazarus IAS DC Lamka leh Lalhosan Executive member ADCC, Dr.HL Liensang Chief medical Officer Churachandpur leh Joseph Lalrothang zonal education officer inleng uap ding uhi. Hiai Health Mela ah Surgeon, Physician, Gynaecologist, Opthalmologist, ENT surgeon, Dermotologist, Dental leh Psychiatrist tel in doctor 15 in damlouhna tuamtuam neite a thon a en in damdawi leng a manbei in peding ua, family welfare, AIDS, Tuberculosis, Ayush leh Malaria Department in stall hong ding uhi.

Post : David R.Tonsing