* DC office a BRGF Resource Centre ah Ex-gratia tawh kisai Dist Level Screening –cum-Coordination Committee meeting neih hiding.

* Rising Club, Tuibuong  saina in tuni zinglam dak 7:30 apan in Tuibuong Peace Ground ah “One Day Open Volley Ball Tournament” neih in om

* Rev. Tualzachin, Moderator, ZPCS in Voice Record (New Testament in Zou) hongkhia in Pathian kiang ah latkhiakna nei

“ Stop TB in my life time” chih thupi anei in World TB Day zatna nei.

* B. Vengnom Community Hall ah Jingninou Award hawmkhiatna neih in om.

* Sangah Muon inn, Bijang ah, Military Civic Action programme tung tawn in, 116 Bn BSF in, van hawm khiak na nei

* CCPur Bus Owner Association & Worker Association (Down Service ) lam te leh All Lamka Taxi owners Society, ALTOS  te kikal CDSU in Press Communique suahkhia uhi

* Medecins Sans Frontieres makaih na in Lamka Public Ground ah TB Day zatna in football friendly Match kimawlna nei in om.

* Rayburn College a Class XI practical Exam leh HSE Practical Exam hun ding ki kheng.

 

 

National Foundation for Communal Harmony(NFCH) apan panpihna sum ngah CCpur dist a naupang enkoltu (guardian) te’n document poimawh tuamtuam-Income Certificate, Current reading certificate (2012) leh Progress Report 2011 submit lou tamtak om a, document submit lou te’ govt apat panpihna hongpai nawn lou ding hi’n kigen hi.

Ms Jacinta Lazarus, IAS DC/CCpur makaih in tuni sun dak 12:00 apan in DC office chamber ah Biometric tawh kisai in SDO/Thanlon, SDO/Henglep leh SDO/Tipaimukh te tawh meeting nei uhi. Huai ah Thanlon, Henglep leh Tipaimukh area ah March 26, 2012 apan Biometric photo lakna patding thu genkhawm uhi. Thusuak kingah dan in March 26, 2012 in Thanlon, Henglep leh Tipaimukh area ah biometric photo lading in team bangzah hiam kuankhe ding uh hi’n kigen hi.

Hong tung ding March 26, 2012 sun dak 12:00 in DC office chamber ah Ms Jacinta Lazarus, IAS DC/CCpur makaih in PMEGP Loan tawh kisai Status Report meeting omding hi. Huai ah General Manager DIC; KVIC, KVIB, Sr Branch Manager SBI; Branch Manager  tuamtuam SBI/Tuibuong; UBI leh SBI/Loktak te’ telding uhi.

Ms Jacintha Lazarus IAS DC/CCpur makaih in hong tung ding March 26, 2012 sunnung dak 1:00 in DC office a BRGF Resource Centre ah Ex-gratia tawh kisai Dist Level Screening –cum-Coordination Committee meeting omding a, huai ah SP; CMO; SDPO/CCpur leh SDO teng telding uhi. Huai hun ah Exgratia tawh kisai case 5 enkhawm ding uh hi’n kigen hi.

Rising Club, Tuibuong  saina in tuni zinglam dak 7:30 apan in Tuibuong Peace Ground ah “One Day Open Volley Ball Tournament” om a, Tuibuong area sung a veng tuamtuam apan team 6 kihel in nitaklam in final kimawlna om ngal hi. Hiai volleyball One Day Tournament final ah Nehgin Haokip chief guest a pang in prize hawmkhiatna nei a, Divid khongsai leh H. Heavant in Functional President leh Guest of Honour hihna toh uap uhi. Hiai tournament a champion team in Rs. 1000 leh certificate sang a, 2na in Rs. 500 leh Certificate a sang banah, best player, best spiker leh best setter kingah ah kipahman piak in om hi.

Zou Holy Bible Translation Committee saina in tuni sunma dak 11:00 in Presbyterian Church, Zomi Colony ah Voice record (New Testament in Zou) hongkhiat in om hi. Hiai hun ah Rev. Tualzachin, Moderator, ZPCS in hiai Voice Record (New Testament in Zou) hongkhia in Pathian kiang ah latkhiakna nei a, Rev. PA Sundrarajan, National Director, WCOI in Pathian thu genna nei in Voice record toh kisai a pulakna nei hi. Voice Record (New Testament in Zou) ahih leh World Cassette Outreach of India in a bawlsak hi a, hiai tungtawn in lai sim theilou te’n leng Holy Bible ngaikhia in Pathian thu gen thei ta ding uhi.

District TB Control Society, Project Axsha/EHA leh Local NGO tuamtuam te’n tuni March 24, 2012 in “Stop TB in my life time” chih thupi anei in World TB Day zatna om a, Lamka khopi ah Vehicle Rally leh TB campaign nei ngal uhi. District TB Centre ah tuni zinglam dak 10:00 in Dr. Singkhozam Hauzel, Dist TB Officer in Vehichle rally dingte flag-off a, khawpi sung mun tuamtuam ah TB apan kiven ding dan genna, leaflet leh pamphlet mipi-te lak ah hawmna nei in Sun dak 12:30 in District hospital khang a District TB Centre ah DTC staff-te leh NGO tuamtuam te’n kipolhkhawmna nei uhi.

Jingninou magazine in tuni zinglam dak 11:00 in B. Vengnom Community Hall ah Jingninou Award hawmkhiatna nei uhi. Hiai hun ah K. Memthoi Devi, Councellor, Moirang Chief Guest a pang in, Thangmang, MDC Khousabung leh Nehthang Mate, MDC in Functional President leh Guest of Honour in pang ua, Chief Host in Thangpao, Social Worker pang hi. Jingninou in tuni a award a hawm te uh, Thadou-Kuki sung a penpen hihna nei te kiang a paik hidan ingen uhi. A kigen dan in,Thadou-Kuki in Laa lam toh kisai in Laijon Musico Award nei ta ua, huai lou award neilou ahihna ah, amau sung a kitok thou na ding a award a hawm uh hidan in gen uhi. Huai ban ah, tutung award hawm a om pen in, a diak a Media lam toh kisai hih haat sem na ding deih na a hawm uh hidan in leng gen uhi. Tuni a Jingninou award hawm na hun ah,Thadou-kuki sung a penpen hihna nei, mimal mi 17, School & College 3, Enterprise1 leh magazine 1 kiang ah pia uhi.   

Tuni zinglam dak 11:00 in Sangah Muoninn, Bijang ah, Military Civic Action programme tung tawn in, 116 Bn BSF pawl in, van hawm khiak na nei uhi. Hiai hun ah, BPS Chauhan, Commandant, 116 Bn, BSF in chief guest hihna toh uap in, van chi tuam tuam, Computer set 1, Sewing machine (Khut khawl)6, Football 3, Volley Ball 4, Volley Ball net 2, kimawl na van tuam tuam, Ball Boot 10, jerssy 20, Track Suit 8, Sewing Machine, khe a tot thoh te 2, embroidery 1, leh laisim na lamtoh kisai, School bag 25 leh instrument box tamtak, khopi sung a Self Help group 20 val leh Sangah Muon inn a om te kiang ah pe khia uhi. Chief Guest, BPS Chauhan in a thugenna ah, tutung a MCA tungtawn a van a hawm te uh, hunpaisa a SHG tuam tuam in a nget uh kim tak a apiak thieh louh na tung uah ngaihdam ngen a, maban a, amau te a ding a kiphal tak leh ki hong tak a om gige ding uh ahihdan gen hi.

Hun sawtpi paisa apan  Imphal leh Lamka kikal a tai, Line Bus CCpurt Bus Owner Association & Worker Association (Down Service )lam te leh All Lamka Taxi owners Society, ALTOS  te kikal ah avang kim a om sek hi. Amaute gel kal ah zan hal in buaina om nawn a, huai ziak in LATOS leh Line Bus (down Service) te Impal leh Lamka kikal ah tai om lou hi. Hiai thu toh kisai in CDSU in ALTOS leh Line Bus down service te kikal a buaina om pen hiven sawm in pan la ua, zan sunnung in CDSU Administrative Building ah hiai buaina toh kisai  in pawl te kal vaiveng sak sawm in pawl 2 te gel sam mah le uh Cheiraobah ziak in bus lamte hoh theilou ua, tuni zingkal dak 8:00 a CDSU Aministrative Building ah meeting sam nawn mah le uh Bus lamte hoh theilou tuan lou uhi. Hiai thu toh kisai in tuni in CDSU in Press Communique suahkhia uhi. CDSU thusuak in a taklat dan in pawl te gel nihvei mahmah kihou dia sap ahih nung Bus lamte khat vei mah leng kilang lang lou ua, tua ziak
 in mipi tamtak in haksatna tuak uh chi hi.Tua ban ah CDSU in hiai buaina toh kisai in State Transport Department in suk vaiven sak ding ngetna nei uhi. CDSU thusak in a tak lat dan in ALTSO leh Line Bus own service te'n mipi khualna ziak a nidang bang a, a service uh pan nawn ding in ngetna bawl uhi.

Kum teng a March 24 pen khovel pumpi in World TB day, a zat sek mah bang in tuni in leng CCpur ah World TB Day zatna neih in om hi. Medecins Sans Frontieres makaihna in sunnung dak 2:00 in Lamka Public Ground ah TB Day zatna in Zomi Namni 2012 Football Tournament a champion Sport Club of Letherite toh MSF in football friendly Match kimawlna nei uhi.

Academic Dean, Rayban College a pan thu ki mu dan in Class XI practical Exam April 2, 2012 a neih ding chih himahleh 27 March, 2012 a ding in suan in om hi. Huai ban ah HSE Practical Exam 26 March 2012  a neih ding pen leng April 3, 2012 a ding in ki suan hi. Thuchian zo College a kan chet thei ding hi.

 

Post: David R.Tonsing

 

.