* Churachandpur District Body Building and Fitness Organisation in District Hospital ading Sisan pia.
* Henglep Block sung a ASHA leh ASHA Fecilitator te kiang ah Uniform, ASHA Pass Book leh Phone pekhia.
* STEP Delhi te saina in Lalpuithluaii Foundation School Teacher te'n 2 Days Orientation-Cum-Workshop nei.
* Pastor K Tualkhothang in Thanglianpau President ZRO tenna inn ding hong.
* Tuithaphai Presbytery in 5th Mission Convention nei.
* DC in MGNREGS thu tawh kisai in Media te kimuhpih.
* SSA Residential School a semding lakna ding a personal interview result suak.
* Sub-Deputy Collector 4 Probation in hongpai.

Churachandpur District Body Building and Fitness Organisation in tuni sunma dak 11 in amau Head Office D'hang Out Gym ah Voluntary Blood Donation Camp nei uhi. Hiai hun ah Dr. Paulunmang Blood Bank Incharge District Hospital in sisan piak a hoihdan leh a lauhhuailouh dan ban ah, midang te panpihna hoihtak ahihdan gen hi. Hiai hun ah Churachandpur District Body Building and Fitness Organisation member 10 in sisan pia in, District Hospital Blood Bank a, a poimoh peuhmah te zatding in pekhia uhi.

National Rural Health Mission (NRHM) nuai ah Henglep Block sung a ASHA leh ASHA Fecilitator ban ah ANM (NRHM Contract) te kiang ah Unifrom, ASHA Pass Book leh BSNL Sim Card tawh kithuahsa Mobile Phone khat chiat pia uhi. Hiai hun ah Dr. LH Liensang Chief Medical Officer leh Dr. VC Pau Tonsing District Family Welfare Officer in ASHA te nasep ding leh Phone zat dingdan sinsak in Henglep Block sung a ASHA 125 te kiang ah Uniform, ASHA Pass Book leh Mobile Phone pia ua, ASHA Fecilitator 6 te kiang ah Mobile Phone leh Unifrom pia in, ANM (NRHM Contract) 13 te kiang ah Mobile Phone pia uhi.

Standing Together to Enable Peace (STEP) Delhi in zan akipan in Lalpuithluaii Foundation School Teacher te 2 Days Orientation-Cum-Workshop hong neihpih uhi. Hiai hun ah resource Person Shreya Jani Founder Director STEP Delhi leh Samuel Poumai in teacher te sinsak in tuni'n zousiang uhi. Tunung sawtlou in Lalpuithluaii Foundation School Student te tawh 4 Months Orientation neinawn ding uhi.

Thanglianpau President ZRO tenna inn ding a kibawl Dorcas Veng New-lamka ah zawhsiang ahihtawh kiton tuni sunma dak 11:30 in a honna nei uhi. Hiai hun ah Pastor K Tualkhothang Local pastor EBCC Dorcas veng in inn thak hong in Pathian kiang ah lan hi. Thanglianpau Guite President ZRO in a thugenna ah, inn bawlna sum seng khalou ahihdan gen a, mi phatuamngai Contractor, MDC leh MLA te ziak a inn hoihtak nei thei ahihdan gen in inn bawlsak te tung ah kipah thugen hi. Right Rev. Ginkhanmung Zou Bishop MELC in Thanglianpau leh a innkuan te ading in vualzawlna ngetsak hi. Hiai hun Phungzathang Tonsing Health and Family welfare, GAD and CADA Minister, Ginsuanhau MLA Singngat Assembly Constituency, Langkhanpau Guite Chairman ADCC leh Executive member ban ah MDC teng leh Philantrophic Organisation tuamtuam a makai tamtak leh KNO Home Secretary Thangpao haokip leh TS Haokip Defence Secretary, ban ah Saptuam heutu leh mipi tamtak in uap uhi. Hiai hun ah Bawng 6, Sial 6, Vok 15, Kel 13 leh Belam 1 kigou in mipi'n inn thak lopna in annekhawm uhi.

Tuithaphai Presbytery in zan nitak a kipan Lamka Chhim Presbyterian Biakinn Lailam Veng ah The 5th Mission Convention 2013 nei uhi. Hiai hun ah, Rev lalthantluanga, Rev. G Sharma, Rev. NG Jugindro, Rev. Lallarmawia, Rev. R Lalnunmawia leh Rev. JF Lalropuia in Pathian thugen ua, zingchiang nitak in zouding uhi.

Jacintha Lazarus IAS DC and Executive Director DRDA in tuni sunnung dak 4 in amah Office Chamber ah Media te kimuhpih in MGNREGS nitha piakdan tawh kisai a, thuthang om vengvung te tungtang hilhchian hi. Aman a gendan in MGNREGS 2011-2012 in ni 91 ading nitha piak in om a, Centre leh state in fund a kimtak a piakkhiaklouh ziak in 2012-2013 a piakding in kikoih chi a, Centre ah ni 9 nitha piakna ding in fund kingen mahleh Centre in hon phalsaklou chi hi. Huchi kawmkal ah, 2012-2013 fund apan Material Component kisuniam in 2011-2012 a ni 9 pending a om pen tukum fund zang in kipia chi hi. 2012-2013 sung in June kha in ni 9 kipia a, August in ni 30, December in ni 15, January in ni 5 kipenawn a, ni 100 thaman a kim a kipe thei ding dinmun in ki-om a, District dang te ni 100 thaman pezou omlou chi hi. Aban agenzelna ah, 2011-2012 in job card holder sing 5 sang 5 za 6 leh 27 om in financial approval in 7555.80 lakh om a, himahleh 8402.45 lakh kimu chi hi. Huaiban ah 2012-2013 in job card holder sing 5 sang 7 za 9 leh 7 om a, revised financial approval 13200 lakh himahleh 10962.39 lakh kia kimu chi'n leng genbeh hi.

New-Lamka a SSA Residential School a Contract Basis a semding lakna ding a apaisa March 7-11 leh March 18, 2013, Interview neihna result zan in suak hi. Huai ah Science teacher ding in T Khammuanthang fo gangpimual, Maths teacher ding in T Songkhankhup of Tuithapi, english teacher ding in Douthanglal Gangte of Nehru marg, Social Science teacher ding in Roslyn Lalneihlu of Rengkai, MIL teacher ding in M Thiankhanlal Guite of Nehru Marg, Physical and Health Educator ding in Lallianmang Buhril of Rengkai, Accountant ding in Vungkhanlun of Hiangtam Lamka, Head Cook ding in Mawinu Guite of New-Lamka, Assistant Cook ding in Mecca Tingzahat of IB Veng, Zenkhanching of Pearsonmun leh T Gouzapau of New-lamka te hi ua, huaiban ah Office Assistant ding in T Khupkhothang of Chiengkonpang leh Chowkidar ding in T Chinkhanmang of Khominthang te hi uhi. Amau teng in ZEO kiang ah April 8, 2013 tan in joining report a piak uh ngai ding a, hun chiam sung a joining report bawllou te mun uh, a awng bang a ngaih hiding hi.

Churachandpur District ah Sub-Deputy Collector (SDC) 4 probation in hongpai ua, DC in Sub-Division tuamtuam a, a omna munding uh bikhiaksak hi. SDC te lak ah Alfred Jamlallun Khaute, Churachandpur ah om ding a, Lalthazam Singngat ah, Lalthanzam Fimate Thanlon ah om ding a, Solomon Lalneilien Fimate Henglep ah om ding ua, amau Churachandpur District sung ah June 15, 2013 tan om ding uhi.

GAMDANG THU

THU leh KAMPAU kia a kidouna Korea North leh South kal ah a kha asim bang chingta hi. Tua bangkal ah North Korea in gamgi suahlam pang ah medium-range missile nih fit sa in a koih zawh tawh kiton in Pyongyang khawpi a Britain leh Russia tel in Foreign embassy tuamtuam sunga nasemte a gam uah paikik vek dingin theisak hi. A lehlam ah United Nations nuaia Humanitarian worker tamtak North Korea a omlaite bitna ding lampi ngaihtuahsak ahih nailouh ziakin Secretary General Ban Ki-moon in supatau mahmah hi.

Kum 2011 Tsunami ziaka kisia Japan a Fukushima nuclear plant ah tui tawh kihel radio active tamtak leak dinga gintak hi’n kigen hi. Japan scientist te gendan in nuclear plant sukvot na dia kizang radio active tui tamtak tanky sung ah vung a, hiai apan thil lauhuai piang thei dinmun hi’n gen uhi.

China ah bird-flu natna ziaka sihlawh a om nungin, Shanghai ah leng hiai natna vei thak mi bangzah hiam theih suah in om nawn hi. Vakhu apan hong kipan hiai H7N9 kichi bird-flu natna pehsawn louh ding venna ziakin China gamsung ah vasa siing nih val thupiak dungzui in thah in om ta hi. China ah tuni tan a mi 6 in sihlawhta hi’n kigen hi.

Mumbai suburb Thane a building kichip ziaka misi 72 chingta hi. Hiai tawh kiton in vukkhak a om laka nupi khat vangphat huaitak in hutkhiak in om hi. Hiai sawng 7 a saang building thak ahih leh zanhal nitak in kichim a, tunitan in Police leh nasemte’n bulldozer, hydraulic jack leh chainsaw te zanga luang zonna a neihnung un zawh bawl ta ua, tuahsiatna tung ah government inquiry om bangin top official 2 a sepna ua pan paihkhiak in om uhi.

Argentina gamsung a tuichiim thuakte tunding na dingin President in million dollar 350 bikhiah hi. Gamsung a tuikhan ziak in mi 50 in sihlawh a, mihing lakh khat leh a kim inn bei in koih hi. Bikhiahsa sumte zangin dongtuakte kiangah loan leh panpihna tuamtuam a kiningching a piak hiding in kigen hi.

Wikileaks mukhetu Julian Assange in Australia election ah ki candidate sawm hi. Aman ahih leh mipi apan official a party register bawl ding leh election ah din ding deihsakna ziak in singnature tamkhop mu hi’n gen hi. Julian bel tu in Lodon a Ecuador Embassy ah kikhum lai hi.

Boeing company in 787 dreamliner etkhiakna lawhchingtak in nei hi. Hun sawttak battery hoihlouh ziak a service ngamlouh in a om nung, Boeing company apan puahphat zawh ahih tawh kiton in gam tuamtuam a airline regulator ten etphat sawm in kisa uhi.

Bangladesh ah Internet tawn a Islam sahkhua gense te tungah sihtanpha gawtna piak ding deihna in mipi saang tamtak lamzuihna nei uhi. Hiai thu tangkouna apaita kiginni apan neih in omta hi. Bangladesh Secular Constitution pailel ah Muslim leh sahkhua bangmah zuilou pawlte’n Bangladesh social media zanga kum tamlou paita apan hiai thu ziak in kiseltuahna tamveitak piangta hi. Tua tawh kiton in February kha in leng internet apan Islam sahkhua gensia mi 1 thah in a om banah March khasung in khauh taka laigelh mi dang 4 mat in om ta uhi.

Iran khopi ah a 8 veina robot cup neih in om hi. Hiai hun ah gam tuamtuam apan robot hoih taktak te football kimawl sak in om ua, tuni tan in final round ah robot team 300 qualify uhi.

Kazakhstan captital Almaty khawpi ah world Power nei gamte leh Iran kihou zawh a ni 2 na leh a tawp ni hita hi. Zanin kihouna masa apan bangmah kikhengna a omlouh nungin, Nuclear programme genkhawmna gahsuah lou ding bangin gintakna om ta hi. Himahleh hiai tutkhopna hunah thutawp lakding sanga hundang ah kihouna sutzop nawn ding lamet hi’n kigen hi.

Egypt chiamnuih bawlsiam Bassem Youseff in President leh Islam biakna chiamnuih bawlkhum chih ziakin court ah dinsak in om hi. Himahleh Court in hiai mipa tungah ngawhna omte nawlkhinsak in TV a chiamnuih programme sem zom thei dingin license pia hi.

Kashmir ah UK numei khat thah in om ahih dan British High Commission Delhi apan thusuak om hi. Thah a om foreign numei ahih leh houseboat sungah tem a dawtlup hidia gintak in a om ban ah, muanmawh ziakin Neitherlands pasal khat tel in midang khat leng mat in om hi. Tulel in British commission leh Srinagar thuneite’n thuchian zaw kankhiak sawmin kihouna neilel uhi.