* K Phaicham ah Christian Revival Church Building thak honna neih in om.
* Police te'n Gari gu a kipei mi 3 mankhia in Custody ah koih.
* Langkhanpau Guite Chairman ADCC in MBBS One Month Crash Course 2013 enkhia.
* ZEO Bishenpur ding in Khaikhosoi DI of School in Joint nuamlou in Voluntary Pension la.
* Loktak Power Station, NHPC Limited in L Khengjang PHSC a zatding vanzat tamtak pia.
Tanchin Kimzaw
Tuni sunma dak 11:30 in K Phaicham ah Christian Revival Church Building thak honna leh Pathian kiang a latna neih in om hi. Hiai hun ah Rev. Haopu President Gambih No. 1 in Biakinn thak Pathian kiang ah lan in puanlap khaisang a, huaizawh in Saptuam heutu te'n Biakinn kim-vel uhi. Doupu President Christian Revival Church in Biakinn kongkhak hong a, mipi'n Biakinn sung ah Biakinn thak honna programme zang in Doupu President Christian Revival Church in Pathian thugen hi. Hiai hun ah Saptuam mipi kia hilou in Saptuam pawl tuamtuam apan mi hunkhop kihel in nitaklam in annekhawm uhi. Hiai Christian Revival Church ahihleh Manipur ah 1975 in kipankhia a, Upa Douthang in Saptuam enkai hi. Tuni'n Biakinn Building kihong thak pen ahihleh Headquater Church hi a, Saptuam member 77 pha in inn 17 pha uhi. Inn 17 bawlkhiak ding in Biakinn thupi petmah a, Biakinn bawlna 2007 in kipan a, zawhsiang ahihtan in Lakh 25 phial seng uhi.
Police te'n Gari mang tawh kisai a suizuina uah, Gari tuamtuam gu a kipei mi 3 Md. Sana (30) S/o Md. Ibotombi of Kwakta, Md. Siraj Uddin (18) S/o Md. Sahab of Kwakta Ward No. 5 leh Paolaljom Gangte (24) S/o L Gangte of B Vengnuom tulel a Chiengkonpang a om mankhia in Police Custody ah koih uhi. Police te gendan in Apaisa April 1, 2013 nitak dak 8:30 vel in Phalian Welfare Committee in muanmohna ziak in Paolaljom Gangte man in Police te khut ah pekhia ua, Police te thudotna apan Md. Sana matkhiak in om nawn a, amau te gel thudotna neih ahihnung in, a Gari guk uh Yamaha R-15 leh Bajaj Pulsar 220, Kwakta ah muhkhiak in om a, huaiban ah Terakhongsangbi ah Activa khat leng muhkhiak behlap in om hi. Md. Sana ahihleh Tuibuang a SP Office kiang a Puankhuina Dawr bawl hidan in kigen hi. Police te'n thil omdan suizui sawmlai in midang bangzahhiam leng kigolh laiding in gen ua, matkhiak a om mi 3 te tung ah FIR No. 30(4) 13 U/S 379 IPC chiamteh uhi.
Dr. Liangoumuan Samte leh Paukhenkhup Guite saina in St.Paul Institute ah March 26, 2013 in NEET-MBBS/BDS One Month Crash Course 2013 kipan hi. Tuni'n Mock Test nei ua, hiai hun Langkhanpau Guite Chairman ADCC inleng uap in, hasotna thugen hi. Hiai Crash Course sung in Dr. Chinkhenlun Guite Doctorate in Physics Indian Institute of Science leh Miss Siampi Master Degree in Biology in MBBS entrance test a paisuak dingdan sinsak ua, St. Paul Institute, Ebenezer Academy, Don Bosco Higher Secondary School, Rayburn College, JNV Tuinom, leh VK Tawna College apan student 67 tel uhi.
Khaikhosoi Vaiphei Deputy Inspector of School ZEO Churachandpur Office tunaizek in ZEO Bishenpur hihna lending in kaisang mahleh aman Joint nuamlou in Voluntary Pension la hi.
Loktak Power Station, NHPC Limited Manipur in CSR-CD scheme 2012-2013 nuai ah Henglep Sub-Division sung a L Khengjang Primary Health Sub-Centre puahphatna ding in March 30, 2013 in Hospital vanzat tuamtuam pia uhi. Vanzat te Dr. KK Singh Senior Deputy Chief Medical Officer, NHPC Limited in Dr. Zamlienmang Gangte Medical Officer Henglep khut ah pekhia hi. Vanzat te ahihleh Hospital bed, matress, pillow, pillow cover, bedsheet, mosquito net, set 2 chiat, examination table, piching leh naungek kitehna ding weighting machine, foot step (double) electric sterizer, sintex 500 litre, tube light set 4 leh ceiling fan hidan in kigen hi. Huaiban ah Loktak Power Station NHPC Limited in naupang 78 Typhoid damdawi pia in, mi piching te lak ah mitlai mu-ngou (cataract) case 7 mukhia in Shija Hospital Imphal ah a thon in Operation bawlsak ding uhi. Loktak Power Station NHPC Limited in L Khengjang area ading in development work tamtak semkhia hi. L Khengjang khua ah, Tolsei Lentol bawlsak ua, L Phaikholum ah Playground leh Tumjangphai ah Marketing Shed bawlsak uhi. Huaiban ah, khanvual phalou mi 14 te kiang ah blanket khat chiat pia in, KSO Sport Meet 2013 leng sponsor bawlsak ua, nupi 30 te tailoring leh embroidering training sak in puankhuina khawl khat chiat pelai uhi. Huailou in Silen khua ah community hall leh playground bawlsak in free medical camp nei uhi. Hiai thu te ziak in Thangkam Haokip Chief of L Khengjang Village in VK Karn Chief Engineer NHPC Limited leh a Staff te tung ah kipahthu gen hi.
GAMDANG THU
Korea North leh South gamnih kawmtuah a nesemte’n buaina tuak uhi. South Korea solkal gen dan in, gamgi apan naichik a om Kaesong industry complex a nasem dia South lam apan nitenga kuante Paju border gate ah paisuak theilou dia khaktan in om uhi. Hiai thu ziak in nasem bangzah hiam North lama koltaang khate South lam thuneite’n lunghimawh mahmah ua, gilkial a sihlawh kha thei uhi’n thusuak in gen hi. Tua bangkal ah North lam apan hiai Joint Industry pen sukbei ding thusuak om hi’n kigen hi.
Tibet a menchim in a vukkhak mi 80 valte zonna paitou zel lai hi. Zan tan in luang 21 muhkik ahihnunga tuni tawh kigawm in 59 toukhe ta uhi. Sintawpni paita a menchip ziak a nasem mangthangte zonna neih zawh tunitan in 20 val muhsuah hinailou lai hi.
Uttar Pradesh state sunga chemical factory khat mei in kaang hi. Tuhun tan in meikuang hong kipat dan theihchian hinai kei mah leh, temperature saanluat ziak a meikuang kipan khia hi dingin gintakna om hi.
Australia gamsunga kumchinglou naupangte tunga akilawmlou a gamtatna suikhe dingin Melbourne khawpi ah National Inquiry din khiakin om hi. Hiai commission in NGO nuai a om schoolte tel in tagah kepnamun leh naupang omna mun tuamtuam adiak a Catholic school te ah hun paisa apan kumchinglou naupang tunga sexual abuse om dia gintaknate suikhiakna pan ding uhi. Hun hong paitou dingah hiai suikhiakna tawn ingintaakhuai lou thiltung kilawm lou taktak hunkhop pholhsuah a om ding ahih dan Australia Prime Minister Julia Gillard in gen hi.
Khawvel gamte laka mi thau tamna gam ah pumpi gikdan tawh teh a lenna ticket rate bawl in om ta hi. Samoa Air service company ten sungkuan tamzaw a dia ticket man kilawm zaw ding gelna a KG khat ah Dollar khat zel mandia rate bawlthak mahleh aleh lam apan mi hun khop in gensia uhi.
Amazon gamlak a phalna neilou a sing lian pipi a guk a phuklouh na dia panla nupate thattu hi a mat migilou 3, court ah dinsak in omta uhi. Amazon gamsung apan sing deih dandana puakkhiak sawmte hun bangtan hiam sung ataihilh nung un, kum 2010 in hiai nupate kaplup in om ua, Police ten hiai thu a kigolh hidia muanmawh mi 3, september 2011 in mankhia uhi.
Tuni’n Al-Azhar University apan student tamtak in Cairo khawpi ah food poisoning thu ziakin kiphinna nei uhi. Nitam lou paita in amau University dormitory sunga ann kihawmte nekkhelh ziakin student 500 val buaisia in hospital tung ua, hiai thu ziakin kiphin pawlten University Director khengkhiak ding ngen uhi’n kigen hi.
Obama makaih US solkal in sum tamtak seng a mihing khuak damdeihna ding telsuina patkhiak sawm uhi. Hiai nasep pichin zawh ahih chiang in khuak damlouhna nei mi siing tamtak a dia phattuam hong suak ding hi’n Obama in genkhia hi.