* EBC Lamka North leh South Division in Fellowship nei.
* District AIDS Prevention and Control Unit (DAPCU) in Annual Review Meeting nei.
* The 1st (Late) Thangtual Hauzel and (Late) Darsiam Memorial Open Volleyball Tournament, zawhsiang hita.
* Churachandpur District Body Building and Fitness Organisation in Voluntary Blood Donation Camp neiding.
* Moreh a Innkang thuak te panpihna ding in KKL General Headquater in Anntang Bag 50 pia.
* ZYA, S Zezaw Block nuai ah March khasung in ZYA Unit thak 4 honkhiak in om.
* Tuilaphai khua ah 3 Days Childrens Programme with Educational Exhibition om ding.
* Immunization Week leh Immunization Routine Improvement ding tawh kisai in Meeting om ding.
* PTC Central Working Committee Member hukdim hiding.

Tanchin Kimzaw

Rev. Paukhanmang Guite Divisional Superintendent in tuni sunma dak 11 in Divisional Office IB road ah Lamka North Division sung a Pastor te fellowship neihpih hi. Hiai hun ah Pastor te'n Saptuam sung a nasep dan Ministerial report pia in kithuahkhawmna leh thumkhawmna nei uhi. Hiai hun ah EBC Lamka North Division sung a Biakinn 20 a nasem Pastor 9 tel uhi. Huailou in EBC Lamka South Division inleng Divisional Office Dorcas Veng ah tuni sunma dak 11 in fellowship nei uhi. Hiai hun ah Pastor T Vungkhansuan EBCC Hebron in "Counselling" chih pansan in Seminar makaih a Lamka South Division sung a Pastor leh Evangelist Teacher te tel in thumkhawmna leng nei uhi. EBC Lamka South Division sung ah, Biakinn 24 ah Pastor 12 in nasem ua, School 6 om in regular teacher 11 in nasem uhi.

District AIDS Prevention and Control Unit (DAPCU) in tuni sunma dak 11 in CMO Training Hall ah, Annual Review Meeting nei uhi. Hiai hun ah, Primary Health Centre tuamtuam a Integrated Counselling and Testing Centre (ICTC) 9 leh HIV/AIDS tawh kisai a District sung a nasem NGO 6 in kumkhat sung a sepsuah te report pia in tulel a, amau Organisation dinmun leng taklang uhi.

Bungmual Youth Club saina in tuni sunnung dak 2 in Bungmual Playground ah The 1st (Late) Thangtual Hauzel and (Late) Darsiam Memorial Open Volleyball Tournament, Closing Ceremony leh Final Match neih in om hi. Hiai hun ah, M Gouzamang Executive member ADCC, Chief Guest in pang a, aman a thugenna ah, Bungmual Youth Club in hiai bang tournament a sai kipahpih thugen in, district sung a om ngei nailou SSA Residential School khat tunung sawtlou a New-Lamka a function ding ahihdan gen a, Residential School ah numei 50 leh pasal 50 om ding chih himahleh gintak sang in student tamzaw a, tun student 150 bang valta chi hi. Hiai te bangloh a hoih ding hiam chih kingaihtuah lel chi'n leng genbeh a, Health and Family welfare Minister Phungzathang Tonsing panlakna tawh hiai bang Residential School hong piang thei ahihman in Minister Pu tung ah kipahthu gen hi. Functional President in Thanglalmuan Proprietor Saulim Restaurant pang a, aman a thugenna ah, district sung ah Sport akichih chiang in football hiding in ngaih dan khat a om a, football kia hilou a discipline tuam Volleyball tournament hon sai Bungmual Youth Club te tung ah kipahthu gen in, Sport kichi nekzonna ding kia hilou a hausak theihna ahihman in kuapeuh mah in pibawl ding ahihdan gen hi. Huaiban ah Youth club te'n leng tua sang a zauzaw en a, Club sung a leng football department, Volleyball department leh adangdang a kikhen a, Meitei te demzou dia panla thak ding in hasuan hi. Final match numei ah, Rising Club leh Friends United kimawl ua, pasal ah Rising Club leh The Galaxy kimawl uhi. winner team in cash prize sang 5 leh runner up team sang 3 ngah uhi.

Churachandpur District Body Building and Fitness Organisation in April 6, 2013 in D'hang Out Gym ah Voluntary Blood Donation Camp neih sawm uhi. Hiai hun ah District Hospital a damlou sisan poimoh te zatding in Organisation member te'n sisan peding uhi.

Kuki Khanglai Lawmpi (KKL) General Headquater in Apaisa february 16, 2013 a Moreh a tenna inn 19 kangtum te panpihna ding in Town area, Koite Lui area leh Thangting area ah anntang dongkhawm in bag 50 ngah uhi. Hiai anntang te tuni zinglam dak 6:30 in KKL Complex ah Limkholet Haokip President KKL General Headquater in khakhia hi. KKL General Headquater Executive member Paojamang, secretary, Mangneo secretary Organisation, kamthang Information secretary, Holmang Ex-member te'n anntang pua in Moreh a Hill Tribe Council (HTC) te khut ah pekhia ua, HTC in kangmei patau thuakte khut ah pekhe nawn ding uhi.

Zomi Youth Association (ZYA) General Headquater a General Secretary H Khamsuanlun in tuni'a thusuah a bawlna ah, ZYA, S Zezaw Block makaihna in March 2013 sung in S Zezaw Block nuai ah ZYA Unit thak 4 honkhiak in om hi. Unit thak te ahihleh S Zezaw Unit, S Geltui Unit, S Belbing Unit leh T Khajang Unit hidan in thusuak in gen hi.

SSA-RTE Early Childhood Care and Education 1st Phase nuai ah April 4-6, 2013 sung in Tuilaphai khua ah 3 Days Children Programme with Educational Exhibition om ding hi. Huai hun ah, ECCE teaching material te lahna om ding a, mi nautang leh kim-le-kiang a Anganwadi worker te a tam theilam telding in P Bieklien DIC/ECCE, SSA/RTE Churachandpur in chialna bawl.

District Family Welfare Officer nuai a ANM leh Female Health Worker te ading in Immunization leh Immunization Routine bawl hoihna ding in April 5, 2013 sunma dak 11 in Female Health Worker Training School Conference Hall ah Meeting om ding hi. Huai hun ah Chief Mediacal Officer leh District Family Welfare Officer nuai a, ANM leh Nurse te telding in Dr. VC Pau Tonsing District Family Welfare Officer in chialna bawl.

Paite Tribe Council (PTC) General Headquater Central Working Committee(CWC) member hukdimna ding tawh kisai a, CWC thupukna dungzui in, PTC Constitution Article No. 25 Section 100 clause II tawh kituak a member ding a chitna nei te'n Article No. 19 bang in april 15, 2013 tan in lunglutna nei te'n application form fill-up theih ding hi.

Friendship Forum of India, New-Delhi in a telkhiak dungzui in Vungzagin Valte Parliamentary Secretary Horticulture, Soil Conservation and CADA Govt. of Manipur in National Award 3 sang ding hi. Award te ahihleh Bharat Excellence Award, North Eastern Golden Personalities Award leh Rajiv Gandhi Arch for Excellence Award leh Gold Medal 2 ban ah Certificate ngah ding hi. Vungzagin Valte Parliamentary Secretary in hiai Award leh medal te April 7, 2013 in New-delhi ah va sang ding hi.

GAMDANG THU

North Korea in kum 6 sung a sukmitsa Nuclear reactor te hing sak kik ta hi. Yongbyon Complex sunga om Nuclear nasepna patkik ding ziakin South leh US gamte diptawk sak mahmah hi. Nuclear reactor te kum 2007 apan international dis-armament deal zui a sukmit ahih nungin, electric taksapna hu dia restart kik a om hi’n North apan thusuak in gen hi. Hiai bang panlakna North Korea gumtu China tel in gam tuamtuam in leng, awi lou ahih dan gen khia uhi.

Pakistan ah numei 2 in parliament election tuh sawm uhi. Hun paisa apanTaliban helpawlten numeite kiangah pautamlou a kamchip di’n vaulau mahleh government apan pahtakna om hi. Sih ding lau lou hial a Pakistan numeite dinmun dopsang theih ding ngaihtuahna in election nomination file ahih ban uah, damtheihna leh siamsinna lamah taksapna thukpi omte sukdimna ding deih ziak a ki-candidate sawm uhi’n kigen hi. Kum paita in Pakistan gam ah khotaang puahphat ding veina leh panlak sawm numei peuh mah dou in omta uhi.

Bangladesh a kiphin pawlten Dhaka khawpi ah bomb 2 vei supuak nawn uhi. Opposition party gumtu mi 150 val jail a omte khak khiak ding deihna a Dhaka khawpi ah kiphin pawlten bomb bawltawm a sukpuakna uah poikhoihlou minautang tamtak in liamna tuak uhi’n kigen hi.

Tuni’n Brussels khawpi ah Serbia leh Kosovo gam nih kal a Northern Kosovo tungtang genkhopna pat in om hi. Hiai kihouna ah Northern Kosovo sunga Serb minamte kua in enkai ding chih ngaihtuah khawmna nei lel uhi. Hiai thubuai genveng ahih mateng European Union nuai a member hihna ngah theilou ding hi’n kigen hi. Kosovo gam ahih leh kum 2008 in Serbia apan paikhia kichi nuam mah leh tunitan in Serbia government in pom thei nailou lai hi.

Hungary solkal in gamsunga koi munpeuh a giahna kichian neilou khutdawhte lamnawl leh leilak a giakding phal sak nawn lou hi. Thukhun bawhsia a kuapeuh khawlai hi in lampi nawl ah giak a om nawn leh Police ten mat leh Jail a khum thuah ding hi’n thukhun in taklang hi.

Palestinian Hamas makai thak dingin Khaled Mikhael telching in om nawn hi. Khaled in a thak in kum 4 sung mawhpuakna len ding hi. Hiai tawh kiton in Gaza bial a school chih ah Class 4 apan student numei leh pasal kai khawm thei nawn lou ding hi’n Hamas thusuak in gen hi. Hiai thu ziak in numeite school ah pasal teacher nasan leng sepsak hinawn lou ding kichi hi. Tua bang kal ah Gaza bial sunga om Palestinian ten Hamas thukhun zui a, aneu  alian, high school apan college student tanpha in Hebrew lai leh pau naktak a sin ding chih thusuak tawh kiton in sun leh zan in Hebrew kisinsakna nei uhi.

Indian Premier League season 6na tunitak in Kolkata ah honkhiakna om ding hi. Hiai opening ceremony hun ah Shah Rukh Khan tel in Deepika Padukone leh Katrina Kaif ten perform masa ding ua, tua banah lasa minthang mahmah PITBULL in perform nawn ding hi.

Myanmar capital lui Yangon a Muslim school khat mei in kaang hi. Meikuang nasat luat ziak in naupang 13 kaanglum uhi. Hiai meikatdan ahih leh electric apan hong kipan hi’n Police thusuak in gen hi.