* Thanlon leh Tipaimukh Block sung ading SSA free text book piakkhiak in om.
* Rev. Paukhanmang Guite Divisional Superintendent in Lamka North Division sung a Mission Worker Pensioner te Fellowship neihpih.
* Dr. Kimboi Tonsing in District Hospital a zatding in Diathermy/Cauterization Machine a thon in pia.
* Langkhanpau Guite Chairman ADCC makaih in MDC leh DRDA Top Official teng in DRDA tawh kisai genkhawm.
* JSY leh JSSK fund hong pailouh ziak in RKS fund zat in om.
* Bungmual ah (Late) Thangtual Hauzel and (Late) Darsiam Memorial Open Volleyball Tournament Closing Ceremony om ding.
* CDSA in Churachandpur Under-16 Team, kithuahpihte tung ah kipahthu puang.
Tukum Academic Session a Govt. School te zatding SSA free text book hawmna Vimala Raina High School Headquater veng ah pailel hi. Tuni'n Thanlon Block leh Tipaimukh Block sung a Govt. School te ading in akisaipih Deputy Inspector of School te'n Headmaster te khut ah pekhia uhi. Thanlon Block sung ah ADCC nuai ah school 22 om a, ZEO nuai ah School 22 om a, hiai School 44 a class-I to VIII student te zatding in free text book 935 kihawmkhia hi. Tipaimukh Block sung ah ADCC nuai ah school 5 leh ZEO nuai ah School 40 om a, hiai School 45 a Class-I to VIII te zatding in free text book 1917 piakkhiak in om hi. Zingchiang in Churachandpur leh Singngat Block sung ading hawm nawn ding uhi.
EBC Lamka North Division sung a Mission worker pensioner damlai te leh Rev. Paukhanmang Guite Divisional Superintendent Lamka North Division in tuni sunma dak 11 in Division Office IB road ah fellowship leh ki-thumsak tuahna nei uhi. Hiai hun ah Rev. Paukhanmang Guite Divisional Superintendent in pensioner te thumsak a, pensioner te'n leng Divisional Superintendent thumsak in, kithuahkhawmna nei in singpi dawnkhawm ua, pensioner 19 tel uhi. Zingchiang sunma dak 10:30 in Rev. Paukhanmang Guite Divisional Superintendent in Lamka North Division sung a Pastor te Fellwship neihpih nawn ding hi. Hiai hun ah Pastor te'n Ministeial report tawi chiat ngai ding hi.
District Hospital a Operation Theatre a zatding vanzat poimoh mahmah Diathermy/Cauterization Machine kichi Dr. Kimboi Tonsing Gyneocologist in District Hospital a zatding in a thon in pia a, tuni sun dak 12 in Dr. N Paulginthang Medical Superintendent khut ah pekhia hi. Dr. Kimboi Tonsing in agendan in Delhi apan amah Clinic a zatding in honpaw mahleh District Hospital a poimoh zaw chih ziak a, a piak hidan in gen a, Pathian in lem a sakleh a dang ka lei nawn ding chi hi. Aban a genna ah, District Hospital in Diathermy Machine a neihlouh ziak in Major Operation kibawl ngamlou a, tun bel kibawl ngamt ding chi hi. Hiai Machine in Operation bawl hun a, sisan tamtak pawt ding khawmkhawl geihgeih ding chi a, Machine a sikzum kithuah zang in sigui apan sisan pawtna mun te hukbing hiding chi hi. Hiai Machine Manipur a leiding hileh Lakh val manding a, himahleh tun bel Delhi ah sing 2 leh sang 5 in kilei thei chi hi. Dr. Kimboi Tonsing kipiakzawhna tung ah Dr. Paulginthang Medical Superintendent in kipahthu gen hi.
Langkhanpau Guite Chairman ADCC makaih in tuni sunma dak 11 in amah Office Chamber ah District Council member teng leh SDO Churachandpur, Chief Executive Officer ADCC ban ah DRDA top official te'n joint meeting nei uhi. Hiai hun ah DRDA nuai a development scheme tuamtuam MGNREGS, IAY leh adangdang te sepsuahna tawh kisai in Jacintha Lazarus IAS Executive Director DRDA in progress report pia a, maban a nasep paiding dan genkhawm uhi. Hiai meeting neihzawh in district Council member teng leh Chief Executive Office in meeting neinawn in MGNREGS tawh kisai genkhawm uhi.
Dr. N Paulginthang Medical Superintendent District Hospital in tuni'a Media te kiang a gendan in, District Hospital a naunei panpihna JSY leh JSSK Scheme sepsuah ahih akipan district pawlam apan Churachandpur District Hospital a naunei naktak in kibehlap a, JSY nuai a BPL innkuan apan nupi, ta nihna tan neite panpihna ding leh JSSY nuai a Hospital a naunei peuhmah panpihna leh Hospital zawtna a paiman peuhmah piakna ding in Lakh 11 hongpai a, huai teng hawmbei ahihnung inleng fund hongpai tuanlou a, back log a om ding kideihlou in Hospital puahna dia hongpai RKS fund Lakh 1, sing 9, sang 1 leh 55 kizang kha ta chi a, hiai dan a paitouh zel leh sawt kipe zoulou ding chi hi. Aban agenzelna ah, JSSK nuai ah, khopi sung apan damdawi inn zuan te paiman in za 3 kipia a, khopi pawlam a te za 5 kipe zel chi'n leng genbeh hi.
Bungmual Youth Club saina in zingchiang sunnung dak 1 in Bungmual Playground ah The 1st (Late) Thangtual Hauzel and (Late) Darsiam Memorial Open Volleyball Tournament, Closing Ceremony leh Final Match om ding hi. Huai hun ah, M Gouzamang Executive member ADCC, Chief Guest in pang ding a, Functional President in Thanglalmuan Proprietor Saulim Restaurant pang ding hi. Final match numei ah, Rising Club leh Friends United kimawl ding ua, pasal ah Rising Club leh The Galaxy kimawl ding uhi.
All Manipur Football Association in Polo ground Imphal a 2nd Inter District Kangleipak Football Tournament 2013 a saina in Churachandpur Under-16 team in runner-up hihna vala uhi. Churachandpur Under-16 team te hiaitan dinmun a tung theihna dia sum-le-pai a kithuahpih leh gari zangsak te tung ah, Churachandpur District Sports Association (CDSA) in kipahthu puang uhi. Kithuahpihna pete ahihleh PS Haokip President KNO. Jacintha Lazarus IAS DC, Rev. Khen P Tombing Principal Rayburn College, Rev. DK Mang, Manimohan Singh Co 1st IRB, Kakam, Seikholen, T Lalboi, Ngainei, Thangkhohen SO/DRDA, leh Lemlal Coach CDSA te hi uhi.
Zion Street, Central Lamka a Manipur Express Office Building 2nd floor ah Multi-Cruisine Restaurant "Salt N Pepper" kichi kihong thak hi. Hiai Restaurant thak ah Pizza tel in nektheih chi tuamtuam kimantak in muhtheih ding hi.
GAMDANG THU
India Supreme court in cancer damdawi bawl phalna Patent Right nawlkhin hi. India gamsung ah cancer damdawi zuaksawm Switzerland apan NORVATIS AG company ten Supreme court ah amau kia cancer damdawi zuak phalna ngen mah leh Indian Law tawh kituak a cancer damdawi GLIVIC kichi tungah patent right piak theih hilou chi’n Supreme court in dawnna pia hi. Hiai thu ziak in India gamsung a national pharmaceutical te a dingin cancer damdawi bawltheih nading hunhoih kihong thak ahih tawh kiton in cancer damdawi man kiam tuam mahmah ding hi.
Mali gamsung Timbaktu ah helpawl leh sepaih kikaptuahna om zom zel lai hi. Kiginni zan in Al-Queda tawh kizom helpawlten Timbaktu khawpi buluh nawn ua, aleh lam ah Mali sepaihte French fighter tawh pangkhawm a naktak a kikaptuahna nei uhi. Tulel in sepaihten Kidal khawpi ah venbitna khuahtak omsak ua, French sepaihte hunchiam beinung in Mali pawtsan mah le uh, Africa gam tuamtuam apan sepaih tamkhop lut beh zel hi’n kigen hi.
Iraq ah suicide bomber khat tawh oil tanker khat puakzak khawm uhi. Tikrit khawpi sunga Police headquarter ah tuni’n suicide bomber khat in oil tanker khat tawh kisupuak khawm hi. Hiai bomb puahna mun ah mi 9 si in midang 11 naktak a liam ua, si leh liam tamzaw Police te hi’n kigen hi.
America in bomber lenna South Korea a tut nung in South in North tungah vauna bawlkhum hi. North in South tungah a bawl bangbang thuak maimai nawn lou in thuk kik teitei ding hi’n South Korean President in genkhia hi. Huai banah, gam nihte kikal a thubuai khat peuh politician ten thu hilou in sepaihte thu thu hizaw ding ahih dan South Korean President in gen beh lap hi.
China in a luahkhum Tibet gamsung a menchipna mun a hutkhiak nasepna lawhsam ding bangta hi. Tunitan in siluang 21 muhsuah in om ta a, muhzawh lou in siluang 60 val omlai mah leh muhzawh ngap nawn lou a beidong gawp hita un kigen hi. Hiai tuahsiatna ahih leh apaita sintawpni in nasemte zan ihmut lai a agiahna mun uh menchim in a vukkha hi.
Myanmar gamsunga Buddhist leh Muslim kikal a buaina ziak in inn tamtak halsiat a omte apan Human Rights bawhsiatna leng telpha ban hi’n kigen hi. Buaina mun Miektila khawpi sunga minority hihna nei Muslimte omna building 800 val mei a halsiat dimdem ahih ban ah simmawhna leh muhsitna tawpkhawk piak ahih ziak un hiai banga kibawlna tung ah Myanmar government in action khauhtak la dingin Human Rights group apan ngetna bawl in om hi. Thu neuchik ahong kipan khia hiai nipi kal nih sung daih buaina ah mi 40 val in sihlawh uhi.
Mauritius ah vuahpi leh huihpi kithuah in naktak in a gamteng a nuai gawp na lam ah mi 10 in sihna tuak uhi. A kigen dan in tuahsiatna tuak a tamzaw te, tui in a tuanna gari uh tuum hi’n kigen hi. Kiginni apan khawl lou a vuahpi a zuk ziak in Mauritius gamsung ah tunitan tui khang gawp hi.