Hornbill News 30th March, 2013
* Phungzathang Tonsing Health and Family Welfare Minister in PTC Court Room, Constitution leh Customary Law and Practice bu hong.
* Ginsuanhau MLA in Chinkhomang Munluo Memorial Team Buallian te Trophy lopna Chief Guest hihna tawh uap
* YPA General Headquaters vaipaw dia telching thak a omte Charge kipekhe ding.
* Vungzagin Valte Parliamentary Secretary Horticulture, Soil Conservation and CADA in Delhi ah Award tuamtuam sang ding.
Paite Tribe Council PTC General Headquaters saina in tuni sunma dak 10 in PTC Head Office tung a Court room dia kibawl thak honna leh PTC Constitution XI Amendment ban ah Paite Customary law and Practice 2nd Amendment honna leh Pathian kiang a latna neih in om hi. Hiai hun Phungzathang Tonsing Health and Family welfare, GAD and CADA Minister in khuallian hihna tawh uap in hong a, Rev. S Vungminthang General Secretary EBC in Pathian kiang ah lan hi. Minister Pu in athugenna ah, a hoihzawkna ding ahihnak leh Constitution leh Customary Law and Practice te khekzel ding mah ahihdan gen hi.
Singngat Area Sports Association (SASA) saina a The 64th Zomi Namni Football Tournament a winner Team Chinkhomang Munluo Memorial Team Buallian in tuni sunnung dak 3 in Buallian khua ah, Trophy lopna nei uhi. Hiai hun ah Ginsuanhau MLA 60-Singngat Assembly Constituency chief guest in pang a, aman a thugenna ah, Buallian khaw dang te sang a neuzaw tuanlou ahihdan gen a, khosung kituah ziak a, lohchinna hongtung ahi, chi a, tamtak omkhawm a kituahlouh sang a tawmchik kituaktak a omkhawm hoihzaw ahi chi a, khentuam omlou a pangkham ding ahihdan leng gen hi. kimawlna uang bawl a, khamtheih guihtheih a kibuallou a, district level state level tanpha tungzou dia thathak lading in hasuan hi. Functional President in S Minboi vaiphei MDC pang a, Guest of Honour in Khattong Baite President vaiphei People Council General Headquater pang a, special Guest in Khuplianmang Chief of Lingsiphai leh SASA te pang uhi. Hiai hun ah khaw sung mipi tamtak paikhawm in Trophy lopna in annkhawm uhi.
Young Paite Association YPA General Headquater vaipaw dia mi 15 telching thak a omte'n April 3, 2013 in Office Bearer ding kiguang ding ua, hiai ni mah in incharge leng kipekhe ngal ding uhi.
The President and Member of Friendship Forum of India saina in April 7, 2013 sunnung dak 3 in CD Deshmukh Memorial Auditorium ah New-Delhi ah Seminar on Economic Growth and National Unity om ding hi. Hiai hun ah Vungzagin Valte Parliamentary Secrtetary Horticulture, Soil conservation and CADA in Chief Guest hihna tawh uap in Award tuamtuam sang ding hi.
Mercy Home Care Centre and Vocational Training Kamdou Veng ah, School kai nawnlou numei kum 14 leh 35 kikal, ban ah HIV/AIDS Infected and Affected Widow kum 35 nuailam te ading in Course tuamtuam Training theih ding om hi. Kha 6 sung Cutting and Tailoring training theih ding a,Course fee 1200 hiding a, kha 4 sung Embroidary and Flower Making theih ding a, course fee 1000 hiding a, kha 3 sung Food Processing training theih ding a, Course fee 1000 hiding a, training sung in vanzat poimoh teng a thon in peding uhi. Course khat ah seat 15 zel awng a, admission bawl masa te seat tangkha himai ding a, April 1, 2013 tan in Admission bawl theih ding a, April 2, 2013 in Training Class kipan ding hi.
GAMDANG THU
Syria khopi poimawh mahmah DAEL kichi sepaihte thuneihna apan helpawl ten laksuh ta uhi. Hiai khopi ahih leh Jordan gam tawh kinaichik a om ahih banah Damascus tawh leng kilometer tamlou kihal zek hi’n kigen hi. Tuni tan in Syria gamsung khantouhna dia khopi poimawh mahmah Aleppo, AL Raqqa, Deir Az Zor leh Dael te helpawlte khutsung tungta hi.
Tulai a North leh South Korea kikal a kivau leh kichou tuahna paitouzel ah North te’n galdouna kipan ta hi’n puangkhia uhi. Zanhal a Missourie pan B-2 bomber lenna nih in Korea hong kiimvelh nungin North lamte’n leng Rocket a neih bangbangte zat dia kigingsa in koih khin uhi. Himahleh Russia leh China Foreign Minister te’n North Korea khou uhi.
Tibet menchipna in a vuklup khak nasemte luang muh zawh hinailou hi. China thuneihna nuai a om Tibet capital Lhasa apan gamlalou muna leitang cubic meter million 2 val theihkhollouh a a tolh guih ziak in a nuai lam a nasemlai gold miner 83 leikawm ah vukmang in om uhi. Tulel in police tel in fireman, medical team, army kigawm mi 2,000 val in Life Detecting Device leh sniffer dogs zanga zonkhiakna nasep nei mahleh muhsuah nei nailou uhi. Tua Bangkal ah China suahlam gam Korea tawh kinaihna JILIN kichihna mun Gas puakzak in mi tamtak in sihlawh uhi. Hiai gas mine ah thil sukkhelh ziaka tuahsiatna mi 13 vangphat huaitak in suakta thei hi’n kigen hi.
Taksa damlouhna ziak a Hospital tut in om Nelson Mandela in hoih lam nawt mahmah ta hi. South African government thusuak apan kiza dan in Nelson Mandela in Apartheid movement a sual lai in kum 27 sung jail ah om a, hiai hun sawttak sung in quarry ah a nasepna te apan Lung infection nei hidia gintakna om ahih dan kigen hi.
Central African Republic buaina ah Red Cross society in siluang tamtak phong hi. Kaal paita apan gamsung helpawlte’n Bangui khawpi a luah zawh nungun lamlian leh mun tuamtuam ah sepaih tel in kaplupsa siluang tamtak a om dandan ua nutsiat in a omnung un, Red Cross society panlakna a misi 78 bang domkhiak te morgue ah koih in omta a, gamsung thunei kikhek ziak a mi tamtak in niteng nek leh dawn ding taksapna liantak a tuah ban uah electric leng ginatak in munawn lou uhi’n kigen hi.
Cairo khawpi ah President Morsi deihlou pawl in lamzuihna nei uhi. Hiai hun ah opposition makai poimawh mi 5 mat dia Muslim Brotherhood apan thupetupa’ inn kong ah kiphinna nasatak neih in om hi.
Pope Francis in Catholic saptuam a thunei pen ahih nunga Good Friday masapen ah lemna a deihthu gen khia hi. Christian calendar sunga nipoimawhtak a kichiamteh Good Friday kichi Rome khawpi sunga Colosseum omna mun ah Pope makaih a zat in om hi. Hiai Good Friday zatna hun a paikhawm ten, a diak a tulai a Middle-East gam tuamtuamte buaina thumpih chiat uhi.
Iraq khopi Baghdad ah Shia Muslimte thah ding ngimna in Car bomb sukpuak in om nawn hi. Sintawpni a Shia Muslimte Mosque gei ah carbomb puakzak in mi 18 a sihlawh banah, Mosque apan thumna nei khin phet mi tamtak ten liamna tuak uhi.
Mexico gamsung Chihuahua khua ah thautawi mikhat in zuzuakna innsung khat ah mi 7 kaplum hi. Khawpi sunga Gang hidia gintaak mithatu in mi a ban kaplup lai in midang 2 leng kapliam kha hi’n police ten gen uhi. Hun paisa in hiaibang thiltung Mexico gamsung ah tamvei piang mun mahmah ta hi.
Chile gam ah kum 1985 a Police ten dikloutak a tuailai 2 a thahna phawk gige na in tuailai tamtak in kiphinna nei uhi. Kiphinna nei pawlte police tawh suangtum leh teargas zang a naktak in kibeituah uhi.
Brazil gamsung a kibawlzou thak World Cup Stadium ah kalnawl chiang in state championship ding ziakin ticket leinuam mipi lakah buaina piang hi. Hiai stadium lutna dia ticket kituhna ah police in teargas zanga control zawhlouh mipite hawldalh tum in panla ua, hiai hun ah mi 6 in liamna tuak uhi’n kigen hi.
Post: David R.Tonsing.