* Horticulture Department in Zawngtah chiin dingdan sinsak.
* GBA in 2nd Zuolun Camp 2013 nei
* Sugnu road a tai Gari te Overload tam.
* Rev. S Vungminthang General Secretary in EBC Central Choir Album hong.
* JAC on Khuga Dam in Canal I and II a nasepna Total Bandh Puang.
* Angel's Place in Award lopna leh Thanksgiving Programme zang.
* Good Friday ahihziak in Hornbill News hong suaklou ding.
Tanchin Kimzaw:
Horticulture Department Churachandpur leh Sub-Committee of the Gangte Socio-Economic Development Forum saina in tuni sunma dak 10 in Gangte Baptist Association Seminar Hall ah Plantation Seminar nei uhi. Hiai hun ah Rev. K Mawia in thumna in Seminar hong a, Ngulkhanthang District Officer Horticulture in vaidawnna thugen in, Plantation tawh kisai a lunglutna neite kipahpih thugen a, nidang lai tawh kibang nawnlou in Govt. in sanction peuhmah a a Sum a penawnlou in, a van in piak thoh a, haichi ching nuam te leng a haichi tang in piak thohta chi hi. Seminar hun ah Francis Zou DO Headquater in zawngtah ching dingdan sinsak a, Henglep Sub-Division sung a khaw tuamtuam apan zangtah ching dia kisa mi 50 val tel uhi.
Chiengkonpang Baptist Church in GBA Baptist Children Sunday School Hall ah March 26, 2013 akipan 2nd Zuolun Camp 2013 nei uhi. Pastor Lamkhai in Camp hong a, Camp neih sung in Evangelist Lienthuom in "Na Pienna Gaman Vaikit Ta'n" chih pansan in Pathian thugen hi. Camper 51 vel lut in March 30, 2013 in zouding uhi.
Lamka akipan Sugnu zuan a tai Gari peuhmah Rengkai road ah kinga a, Bus kia hilou in, pick-up truck inleng a khenval in passenger pua ua, Lamka leh Sugnu road hoihlouh ziak in tuahsiatna om thei ding in kilang hi. Tuktui luan nung ahileh bel lauhthawng mahmah ding in kilang hi.
EBC Central Choir Music Video Album Volume-5na "Kumpite Kumpi" kichi tuni sunnung dak 3:30 in Dorcas Hall Guest House ah ahonna nei uhi. Hiai hun ah Rev. S Vungminthang General Secretary EBC in Album hong in Pathian kiang ah lan hi, huaiban ah, K Kamchinkhup Director of Ministries EBC in central Choir a tel te pahtawina pia in, amau nu-le-pa ban ah mi poimoh hunkhop in uap uhi.
Joint Action Committee on Khuga Dam Project in thusuah a bawlna uah, Akisaipih Department in AIBP fund a hiding bangtak a paisaklou a, deihsak leh khentuam a, piakkhiak mohpaih thupuang uhi. Hiai thu tawh kisai in JAC in tuni'a kipan Canal I and II division nasepna pailel pen total bandh puang in nasepna khawlsak uhi. Bandh zahlou a banghiam thil deih tuakkha omleh total bandh bohsetu in a moh akipuak ding chi uhi.
Angels Place in March 30, 2013 sunma dak 11 in Home huangsung ah, Celebration of Award-Cum-Thanksgiving Programme zang ding uhi. Huai hun ah, USA apan Jan C Swensen, Jim Ice leh Leslie Swensen in thugen ding ua, huaiban ah S Chinngaihpau President YPA General Headquater leh Dr. R Sanga Co-ordinator Angels Place in thugenna hunzang ding uhi. Hiai hun ah Angels Place Drama Club leh Angels Place Trio in special item tuamtuam present ding uhi.
GAMDANG THU
Nikum a Colorado Cinema hall sunga mi 12 kaplumtu James Holmes in hih khial ahih dan gen khia hi. Court in si dia thutan khumna apan a hinna la lou a damsung jail taangsak ding deihna ziak a James Holmes in prosecutor te kiangah kipuan khiakna nei mah leh bangmah dawnkik na mu nailou lai hi.
Philippines Supreme Court in hun bangtan hiam sung Reproductive Health law kichi zuih leh zat theihlouh phot hentaang tadih hi. Reproductive Health Law kichi in Philippines gamsunga school teng ah Sex Education tel in Birth Control tawh kisai a, a kisam bangbang a zat ding panpihna sum piak ding chih himah leh Catholic saptuam apan zuihding deihlouh ngaihdan om ziaka Supreme Court in thuthak om masung suspend phot hi’n kigen hi. Philippines ahih leh Catholic sahkhaw zui tamna mahmah na gam hi a, government tuk a Catholic Church in leng mipi tungah thu nei zou mahmah hi.
Thailand government in helpawl tuamtuam tawh Malaysia a Kualalumpur khawpi ah tutkhawmna nei uhi. Kihouna pailel lai in Thailand gamsung ah bomb puakzak ah Thai sepaih 3 in sihna a tuah ban uah, minautang 3 in sihlawh uhi. Thailand gamsung a helpawl leh government kikal a kitheihsiamlouhna kum 2004 apan tunitan in mi 5,000 val in sihlawh ta uhi.
Cyber attack BAZOOKA ziaka internet speed hatlouhdan thu suikhiakna om hi. Tutung a Cyber Attack in ahih leh Europe apan internet a thil hoihlou tuamtuam ana hahsiangtu online security expert SpamHaus pawlte nasepna naktak suksiat tum hi’n a kigen banah, hiai ding ziak a storage capacity GB tamtak zat a omten internet apan download speed sukiam mahmah hi. Computer siamte gen dan in tutung a Cyber attack pen Cyber Bunker kichi te khut nung hidia a gintaak bah uah, hun hong pai zel ah lau huai deuhdeuh ding hi’n kigen hi.
Damlouhna ziakin South Africa President lui Nelson Mandela hospital ah om nawn hi. Nelson Mandela in kumlui December kha a ni 20 val damdawi inn ah Lung infection ziaka admit ahih nung in zanitak a puaklut in om kik hi’n kigen hi. Nelson ahih leh kum 94 pha ta a, South Africa gam apan Apartheid Movement a lawhchin pih kia hilou in South Africa a dia Democracy tawn a President dia masapen leng hi hi.
Cyprus gam ah kaal 2 sung Commercial Bank leh ATM te khak ahih nung in tuni’n kihong kik ta hi. Nicosia khawpi ngial ah bank apan sum withdraw nuam tam petmah ua, himah leh account holder khat in ni khat a ding dollar 3,800 sang a tamzaw lakhe tuan lou uhi. Bank te hon kik ahih tawh kiton in Nicosia khawpi sungah kiphina leh buaina tuamtuam om khak ding venna in Police te kilchih ah duty uhi.
Kenya gam nawl a om Malindi kichihna muh ah mi 7 kaplup in om hi. Thiltunna mun Malindi khawpi sunga separatist group apan member 50 vel ten Casino sung a om chih thu Police ten zaak phet Police delh ua, amun ah separatist group apan mi 6 police 1 kaplup ahih dan Police ten gen uhi.
South African Paralympic medallist Pistorius in a tual thahna thubuai ah ngetna bawl hi. Pistorius in a ngaihzawngnu a kaplup ziak a court apan trail hun mateng a ut leh South Africa gamsung kantan a gamdang zintheihna ding phalna ngen hi’n kigen hi.
North leh South Korea kikal dinmun hoih kei mah leh gamgi kantan a nasem kuante subuai tuanlou hi. Tuni tan in South apan niteng a North ah nasem dia kuante a dia lampi honsak in om den hi. Tua bang kal ah Missile galvan pothei B-2 Bomber fighter jet nih US apan South Korea tan khawllou in leng tung uhi. South leh US kithuah a military drill neih ziak in North suheh mahmah hi’n kigen hi.
Tuni a kipan India gamsung kia hilou in gamteng phial ah Hindu festival HOLI zat pat in om hi. Kum khat sunga Tuuktun(spring-time) vaidawnna a nopbawlna in zang uhi. Mihing khat in a hinkhua ah nop leh haksa, kipah leh dahna a tuahte etsakna dingin rong vui leh tui colour chi tuamtuam kithehna in HOLI kichi zang ua, himahleh mun khenkhat a diak a Mumbai ah tui haksat ziak in tui tellou in Holi zang uhi’n kigen hi.