* Youth Culture tawh kisai in One Day Panel Discussion neih in om.
* TC Motor Wash Centre in kum khat chinna lawm.
* Hill District a Chief Association te'n Kuki Inn ah Meeting nei.
* VLK Tawna College ah Crusade zohsiang hita.
Indigenous Forum saina in tuni sunma dak 10 in PCI(R) Conference Hall New-Lamka ah One Day panel Discussion on "Youth Culture in the Post-Modern World: Socio-Moral Aspects" kichi neih in om hi. Hiai hun ah, nidang lai leh tulai a khangthak te tawndan leh tulai society dinmun ban ah, khovel khang hattak in khangthak te a sukkhak dan leh khawtang siatna tawh kisai kikupkhawmna om a, huaiban ah tulai khovel a, Nu-le-Pa, Civil Society, Saptuam leh Educational Institution te mohpuakna tawh kisai leng kikupkhawmna om ding hi. Huai hun ah Saptuam heutu, Student leader, Philantrophic Organisation Leader, women leader, Journalist, Online Media group leh Intellectual circle te tel in houlimna nei uhi.
D Phailian a TC Motor Wash Centre kumkhat chin lopna in tuni'n gari 2/3/4 wheeler te 50 percent discount in sawpsak uhi. Langkhanpau Guite Chairman ADCC in TC Motor Wash Centre kumkhat chin lopna a honna nei hi.
Kuki Innpi Manipur leh Kuki Student Organisation Manipur saina in tuni sunma dak 11 in Kuki Inn Imphal ah Chief Right thutawh kisai in Meeting poimoh tak nei uhi. Hiai hun ah Hill District teng a Chief Association makai teng tel in, Manipur Govt. in Singtanggam a Chief Right teng hihbei ding a thupuang a bawl tungtang genkhawm uhi.
Red Cross road a VK Tawna College huangsung a february 14, 2013 akipan "Crusade on the Power and freedom of Jesus Christ" chih minvuah a Crusade a neih uh tunitak in zousiang uhi. Crusade sung in James Khuma Hauzel Missionary to China in thugen a, Khamchin Music Promoter EBC in Praise and Worship hun makaih hi.
A hongtung ding february 20, 2013 nitak dak 6 in Bungmual Forest Beat Office nung ah Zomi Namni lopna om ding hi. Huai hun ah, Chief Guest in Helien Kipgen Social Worker pang ding a, Guest of Honour in L Sanga Hmar Social Worker pang ding a, Functional President in Calvin Social Worker pang ding a, Chief Host in H Thuamkhanmang Chief of Bungmual pang ding hi. Huai hun ah Rev. Dr. Luaichinthang in Zomi te ading in thumsak ding a, S Chingnu, Benny Khongsai, Dove Trio, Zakim, B Muan Ngaihte, Vungkhanching, LCL Thuoma leh lasiam tuamtuam in hiai hun uap ding uhi.
GAMDANG THU
Tulel a India solkal in a vaikhawm phakna Kashmir state sung ah curfew nipikal khat bang koih in om ta hi. Kum 2001 in Indian Parliament huangsung a mitamthei pen kaplum dia thupetu Mohammed Afzal Guru khailup in a om ziak a Srinagar khawpi ah kiphinna tuni’n om hi. Parliament buluh lai in security guard 7 leh helpawl 5 in sihna tuak uhi.
Tusuun nung in Iraq gam mallam Mosul khawpi kiang ah suicide bomb hattak puak zak hi. Iraq solkal sunga senior intelligence officer khat tel in bodyguard te’n hiai bomb puak ah sihlawh uhi’n thusuak in gen hi.
Los Angeles police te’n mi 3 thattu hidia muanmawh US sepaih lui Christopher Dorner kichi a kibukna mun ah amah leh amah kikaplum ahih dan thei chian uhi. Christopher Dorner ahihleh California gamsung ah galvan tawi in mitam tak lauthawng sak in a om nung, police in naktak a zong mah leh muzou pahlou ua, hun bangtan hiam nungin, gamlaka akibukna hidia gintakna mun cabin sungah mei in a kat siluang khat suichetna a neih nungun Dorner luang ahihna tuni’n thei suah uhi.
Moscow khawpi ah gam tampi kigawm G20 khawmpi ah multi-national company te’n tax tawm niamchik in a piak zel tungtang agenda in nei uhi. Hiai kikupkhawmna ah US chancellor George Osborne in UK, Gernamy leh France gam financial minister te tawh lungsim kituak in multi national company te tax piak dingdan duhthusam ngaihtuah khawm ding uhi.
Tuni’n Bangladesh gamsung Cox Bazar ah opposition party apan kiphin pawl leh police kikal ah kibeihtuahna nasatak piang hi. Cox Bazar leh a sehvel apan Jamat-e-Islami party gumtu mipi 5,000 val ten Bangladesh 1971 gambuai lai a makai hangsan mahmah khat, si dia thuthan khum in a omna thu mawhpaihna in kiphinna nei ua, police te tawh kibeih tuahna hun ah mi 4 in sihlawh uhi.
Australia senator khat Malaysia gam khawpi Kuala Lumpur ah mat in om hi. Thusuak in a gendan in, Malaysia gam hong lut phet in mat a om Australia senator ahih leh Malaysia gamsung election ah kigolh tum a hong lut chih ziak a mat hi’n kigen a, a kinthei pen in Australia gamah kiksak hinawn ding in thusuak in taklang hi.
Syria gamsung buaina paitou zel ah, solkal leh helpawl kikaptuahna Aleppo leh Damuscus khawpite ah om nawn hi. Aleppo khawsung ah kikaptuahna a pailel lai in Damuscus sehvel ah Assad makaih solkal in lenna zangin helpawlte omna dia muanmohna munte ah bomb tamveita khia hi’n kigen hi. Tulel a Assad deihlou Syrian National Coalition party in solkal tawh hiamkham bawl a kihou ding ut kei mah leh, Syria gamsunga galmuangna mun ah solkal tawh kihou ding ahih leh bel lemsapan ding uhi’n kigen hi. Tunitan in Syria gambuaina ah mi siing 7 val bangin sihlawhta uhi.
Networking site facebook apan thusuak kiza danin computer suksiat siam mahmah te’n a guk in facebook sukbuai gige sawm in siamna sangtaktak tawh beih in om mah leh, user te’ account bel bangmah subuai khak in om lou hi’n thusuak in gen hi. Hiai networking site facebook ahih leh kum 2004 in Harvard University a college kai Mark Zukerberk in University student te’ zat ding kia in abawl khiak himah leh, tuni in internet omna khawvel kilchih ah theihphak leh zat in om ta hi.
Zan in Russia gamsung Ural taangdung vanlaizawl ah kikhoh Meteor puakzak hi. Hiai shockwave hattak ziakin tenna inn tamtak window glass kitap lawh apan mihing 1000 val in liamna tuak uhi. Russia solkal in hutkhiak nasem siing 2 sawllut ngal a, sum a tuat in million dollar siing 30 bang bei zou ding kichi hi. NASA telsuina apan hiai meteor gikna ton siing 1 val ahih banah dakkal khat a kilometer siing 5 leh sang 4 a hat in kikhoh hi’n kigen hi. Tua bang kal ah, London observatory apan kizadan in mihing tenna leitung tawh kinaih mahmah in supersonic speed a suangtum hattak hong leng pen, za awng ah hiai bang suangtum lauhuai hong leng lakah leitung tawh kinaih pen hilai ding kichi hi.
Israel gam in Jerusalem khawpi Palestinian thuneihna apan suh mahleh Palestinian mitamtak in Jerusalem sung pawtsan sawmlou uhi. Tuni tan in Jerusalem suahlam ah building sangtamtak tenna inn ding in kisathak a, Israel solkal in theihpihna pekei mah leh atam zaw Palestinian ngen hi’n kigen hi.