* L Mangkhogin IPS, SP Churachandpur in Songdoh to KKL Complex kikal a Diesel Auto Service ding honna nei.
* VK Tawna College ah Crusade kipan.
* Medicin Sans Frontiers in Valentines Day ahihtawh kiton in Condom leh Pamphlet hawm.
* Chief Right tawh kisai in Hill District a Chief Association teng in Kuki Inn Imphal ah Meeting neiding.
* STC/BSF in Thau-le-Bomb kapna sunzom ding.
Songdoh Area Chief Association Welfare Committee in Songdoh area a niteng nektawm zong leh Student te khualna in Diesel Auto Service pankhia in tuni sunma dak 10:30 in Ukha Tampak ah ahonna nei uhi. Hiai hun L Mangkhogin Haokip IPS, SP Churachandpur in Chief Guest hihna tawh uap in Diesel Auto Service patna ding in ahonna nei hi. Aman a thugenna ah, Songdoh area lak Churachandpur District in huamkha mahleh Police Jurisdiction ah Moirang Police in huamkha a, banghiam haksatna leh buaina omleh Moirang Police in enkai ding ahihman in Moirang Police te kithuzakpih poimoh ding chi a, huaiban ah, kikawmtuahna a hoih keileh mun naichik leh gamla pi suak a, tun Diesel Auto Service kipan leh kikawmtuahna zangkhai mahmah ding in ka ginta chi a, nektawm zong leh Student te ading in phatuam mahmah ding chi'n leng genbeh a, huaiban ah, Sum zonna mai hilou a mipi khualna a service ding in ngen hi. Guest of Honour in Peter H Mate President KSO manipur pang a, Functional President in Paukai haokip President KSO Churachandpur pang a, hiai Diesel Auto ahihleh Songdoh leh Headquater veng a KKL Complex kikal ah Service hiding a, tulel Auto 7 omlel in District Transport Officer in leng line permit peta hi.
Red Cross road a VK Tawna College huangsung ah tuni sunma dak 11 in "Crusade on the Power and freedom of Jesus Christ" chih minvuah in Crusade kipan hi. Crusade sung in James Khuma Hauzel Missionary to China in thugen a, Khamchin Music Promoter EBC in Praise and Worship hun makaih hi. Hiai Crusade ah alunglut peuhmah teltheih a, adiak a tuailai te a tam theilam telding in chialna bawl uhi. Nikhat in kikhopna nihvei om zel ding a, sunma dak 11 leh nitak dak 5 in om ding a, february 16, 2013 nitak in Crusade khakna om ding hi.
Medicin Sans Frontiers (MSF) Churachandpur pawl in tuni Valentines Day ahihtawh kiton in Lamka khopi sung mun tuamtuam ah Condom leh pamphlet hawm in MSF Office a HIV/AIDS leh natna tuamtuam neidia kimuangmoh te thon a ki-test theih ahihdan leh ki-etkolna hoihtak om ahihdan tangkoupih uhi.
Kuki Innpi Manipur leh Kuki Student Organisation Manipur saina in february 16, 2013 sunma dak 11 in Kuki Inn Imphal ah Chief Right thutawh kisai in Meeting poimoh tak om ding hi. Huai hun ah Hill District teng a Chief Association makai teng telding ua, Manipur Govt. in Singtanggam a Chief Right teng hihbei ding a thupuang a bawl tungtang genkhawm ding uhi.
Subsidiary Training Centre STC/BSF in Mission Compound suahlam leh leh Pearsonmun, Gangpimual leh Mualkawi simtum kikal ah zingchiang akipan february 28, 2013 sung zinglam dak 5 akipan zannung tanpha in thau leh bomb kapna sunzom ding ua, kim-le-kiang a omte pilvang a ganvulh te khahzanlou ding in theihsakna bawL UHI.
GAMDANG THU
South African Paralympic star Oscar Pistorius in a ngaihzawngnu thau in kaplum chih ziakin Police ten man uhi. Kum 26 a upa kimawlsiam Pistorius in model Reeva Steenkamp kichi a kizuihpih pen a lu leh a baan ah thau in a kap nunga si hidia muanmawhna police in nei hi. Tai hat Pistorius in bel khe neikei mah leh kidemna ah khe lem ‘blade’ thuah in vualtung tuanna tamveitak muta a, a kigen danin South Africa gam ah mi kuapeuh in galvan thau a kineih phal ziak un, thau zanga kithahnathu tampi om ta hi.
France President Francios Hollande in president lenlun Nicolos Sarkozy mapatsa semzom ding leh India gamtawh sum kidawntuahna suzai sem ding deihna in ministers leh business makai tamtak tawh India gam hong zin uhi. Tutung ah hong zinna thu pen Nuclear Power bawlna leh French sepaihte’n Mali ah a zat bangbang Rafale fighter jets thak 126 tak India kiangah zuak ding tungtang hi’n kigen a, hiai banah Billion Dollar 9.3 senga megawatt 9,900 pekhe thei nuclear power plant khat Maharashtra ah sak ding kum 2010 a thukimna omsa pen genkhawmna neih sawm uhi.
Passenger pua lenna service Company lian mahmah 2, US Airways leh Australian Airlines te kigawm sawm uhi. Hiai company te a kigawm nungun, lenna neihna 1,530 chingta dia, niteng in 6,400 val vei passenger potuah in lengkhia omden ding hi’n kigen hi.
Colombia solkal leh hepawl kikaptuahna ah solkal sepaih 7 si hi. Golombia gamsung a Caqueta provice ah Revolutionary Armed Forces of Colombia(FARC)helpawl tawh solkal in peace talks neihna pailel mah leh thautawi nihte’ kikaptuahna ah solkal lam apan sepaih 7 si a, helpawl lam apan kaplum zah theihchet hikei mah leh hunkhop mahmah si dia gintakna om hi’n thusuak in gen hi.
Bahrain gamsung ah democracy solkal deih ziaka kiphinna ah pasal naupang khat in sihlawh nawn hi. Nekgukna sukbei ding kivaipuak dan deih huaizaw neih ding deih a kiphinna kum 2 chinna in Bahrain ah Shia muslim tamtak in lampi zuihna nei ua, hiai ah solkal deihlou pawl leh security te kibeihtuah om in kum 16 a upa pasal khat in sihna tuak hi’n kigen hi.
Tuni February ni 14 ahih tawh kiton in khawvel pumpi ah Valentines Day chi tuamtuam a zatna om hi. Khawvel Celebrities minthang tamtak tel in ONE BILLION RISING kichi numei tunga bawlsiatna sukbeina in online website CHANGE-dot-ORG zanga Legendary Sitar Maestro (Late) Ravi Shankar tanu makaih in campaign thupi neih in om hi. Tua bang kal ah, Jammu and Kashmir state sung Jammu khawpi ah western culture chih ziaka Valentines day pen zatlouh ding deihna in Hindustan Shiv Sena(HSS) pawl in Valentines day greeting cards tamtak mei in hal uhi. Ki-itna taktak bang ahia chih le a theilou tumlam gamte zat Valentines Day kichi Indian culture a dia thil kih huai ahih dan India tuilai ten phawk thak hunta ahi, chi’n HSS president Dimpy Kohli in gen hi.