* All India Navodaya Vidayalaya Staff Association in Indefinite Strike pan
* Rayburn College in Baccalaureate zang
* UPF in The 2nd Integrity Leaders Football Tournament Trophy la
* Lamka Traders and Self Employed Association in VDF Bandh suppot lou.
* VK Tawna College ah Crusade om ding.
All India Navodaya Vidyalaya Staff Association in Charter of Demand 20 nei in sukbuchin ahihma Indefinite Strike a bawl uh, Lamka JNV Tuinom Staff te'n leng zom in tuni'a kipan School huangsung ah nasemlou in Sit-in-Protest nei uhi. All India Navodaya Vidyalaya Staff Association in Charter of Demand 20 a neih te ahihleh, CCS pension 1972 issue tunitan pending a om hihveng ding, non teaching staff te adia special allowance 10 percent behlap ding, JCM dinkhiak ding, teaching staff te adia MACPS benefits omsak ding, Headmaster leh Assistant Headmaster te allowance pungsak ding, House mother behlap ding, employee peuhmah te nasep sung ding kichiantak bawlsak ding, regular warden leh matron post omsak ding, teaching staff te old earned leave paidan etthak ding, Post graduate teacher post bawlkhiak a modern language teacher te promotion piak ding, rational transfer policy sepsuah ding, staff peuhmah a huntak a promotion piak ding leh kumteng a departmental promotion test neih ding, junior te sang a senior te khaloh khangsak ding, staff sihna tuak te tate free education piak ding, staff peuhmah health insurance piak ding, holiday ni a nasem staff peuhmah deihsakna ziak a nikhat holiday piak ding, group D staff piak beh ding, JNVST application scrutiny charge etthak ding, departmental promotion test a hiding bangtak a paisak ding leh staff khat peuh kiang a weekly off piak ding chih te ngetna bawl uhi. Ngetna bang a sepsuah ahih masiah nasemlou in om sawm ua, JNV Tuinom staff te gendan in gamdang a JNV staff te'n bel student te school apan pawtsakta uhi. Aban agenzelna uah, JNV Tuinom staff te'n tuni'a kipan in naa kisemlou ding a, class leng kila nawnlou ding a, himahleh class-X leh class-XII board exam ding te bel kihihbuailou ding chi uhi.
Tuni sunnung dak 12:15 in Rayburn College in Rayburn Chapel ah Baccalaureate/Graduation Service zang uhi. Hiai hun ah, Peter Corwin Florida USA in Graduation Speech gen a, Ted Seymour President Action Outreach Mission Florida USA in Graduating student te thumsak hi. Joshua Lalmalsawm Sanate in Graduating Student te sik-le-tang in thugen a, Khual Tonsing Co-ordinator Baccalaureate 2013 in Teaching Staff te sik-le-tang in thugen hi. Sunnung in Co-ordinator Annual Sports 2012 makaih in kipahman hawmna leh entertainment item tuamtuam nei in kithuahkhawm uhi.
Churachandpur District Sports Association (CDSA) saina in tuni sun dak 12 in Lamka public ground ah The 2nd Integrity Leaders Football Tournament 2013 Closing Ceremony neih in om hi. Hiai hun ah MC Mary Kom Olympic Bronze Medalist pasal Onler Kom, Chief Guest in pang a, Guest of Honour in Benjamin @ Benny Special Contractor and Kuki Sporting Club Manager leh CT Lian Chief Co-ordinator Lamka Traders and Self Employed Association pang ua, functional President in Tongjahao Kipgen President District Sports Association Sadar Hills and Vice-President All Manipur Football Association (AMFA) pang hi. Co-Host in Helen Kipgen Social Worker pang a, Special Guest in Langkhanpau Guite Chairman ADC Churachandpur leh Haokholal Hangshing Chairman ADC Sadar Hills pang uhi. Langkhanpau Guite Chairman ADC Churachandpur in a thugenna ah, kituahna ding a hiai bang tournament sai CDSA tung ah kipah thugen in tutung a ADC Sadar Hills te kimawl dia hongkuan bang uh, ADC Churachandpur te leng khatvei Sadar Hills ah kimawl ding in kikuan ding chi hi. Haokholal Hangshing Chairman ADC Sadar Hills in a thugenna ah, kipumkhatna ding in lungsim tawng a kituahna poimoh ahihdan gen in kamkia a gen in kipumkhatna hontunlou ding chi hi. Benjamin @ Benny Special Contractor and Manager Kuki Sporting Club in a thugenna ah, State level a eimi te Club omsun Kuki Sporting Club ahihman in theihtawp suah a phungvuh poimoh chi a, maban ah heutu muanhuai te kiang a panpihna hong kinget leh kithuahpih chiat ding in ngen hi. CT Lian Chief Co-ordinator Lamka Traders and Self Employed Association inleng tournament saite tung ah kipah thugen in, integrity taktak om theihna dia lawmta hih masak poimoh ahihdan gen in Lamka public ground a kimawlna om hun a substitute te tutna ding bench bawlsak ding in chiam hi. Final Match kipatma in Exhibition Match ah ADC Sadar Hills leh ADC Churachandpur kimawl ua, ADC Churachandpur in 4-0 in zou uhi. Huaizawh in final match ah KNO leh UPF kimawl ua, UPF in KNO 3-1 a zou in kipahman sing 1 sang uhi.
Lamka Traders and Self Employed Association in tuni'a thusuah a bawlna uah, Village defence Force (VDF) pawl in february 13. 2013 zankim akipan hun chiam omlou a, bandh a bawl sawm thu tawh kisai a DC kiang a ngetna a bawlna uah, Lamka Traders and Self Employed Association in security personnel kiningching zaw peding leh VDF in bandh support lou ahihdan taklang uhi. Huaiban ah, VDFte Bandh ding mimal thubuai ahihman in Lamka Traders and Self Employed Association in Emergency Meeting a support louh dia thupukna a bawlsa hidan in thusuak in taklang a, mipi'n thupukna kithuahpih ding in ngen uhi.
VK Tawna College huangsung Red Cross road ah zingchiang akipan "Crusade on the Power and freedom of Jesus Christ" chih minvuah in Crusade om ding hi. Crusade sung in James Khuma Hauzel Missionary to China in thugen ding a, Khamchin Music Promoter EBC in Praise and Worship hun makaih ding hi. Hiai Crusade ah alunglut peuhmah tel a, adiak a tuailai te a tam theilam telding in chialna bawl uhi. Nikhat in kikhopna nihvei om ding a, sunma dak 11 leh nitak dak 5 in om ding a, february 16, 2013 nitak in Crusade khakna om ding hi.
GAMDANG THU.
United States annual union tutkhawmna hun ah President Obama in America economy kiakniamna apan tha-thak laknawn dingdan gen hi. Hiai hun ah a seppihte Congress party tel in Republican party tawh pankhop poimoh mahmah ahih dan agen banah, kum 2014 sung in Afghanistan gambuaina sukbeina dingin US sepaih omlai siing 3 leh sang 4 te samkik vek ding hi’n leng genkhia hi. Tua bang kal ah US senate in US defence secretary ding namkipna nei uhi. Obama in Pentagon a sem dia a deih Republican Senator lenlui Chuck Hagel in US senate thukimna bangin Defence Secretary thak hihna lenta ding hi.
North Atlantic Treaty Organistion(NATO) sepaihte Afghanistan ah lenna zangin helpawlte om na dia gintaakna munte ah bomb khe nawn uhi. Tutung in KUNAR bial a bomb khiakna ah Taliban helpawl mi 4 asih banah minautang 9 in leng sihlawh nawn uhi’n thusuak in gen hi.
North Korea gam in South Korea tawh ki-elna in Nuclear test abawl ziakun South Korea solkal apan dawn thukna om hi. A poimoh hunhun a zat theih ding South Korea in Ballastic Missile nei gige a, gamsung ah melma te missile khatpeuh hong lenglut a om leh kapkhe ding in mansa gige ahih dan South Korea dawnthukna thusuak in taklang hi.
Thailand gam simlam nawl a om Muslim helpawl 50 vel galvan hoihtak tawh kithuam in Thailand sepaih munpi khat luh uhi. Hiai kikaptuahna ah Muslim helpawl 19 bang kaplum hi ua, Thailand sepaih lam apan bel kua mah silou hi’n kigen hi. Tuni’n hiai kikaptuahna mun ah curfew puan in om a, Thailand solkal in hun sawt paita apan hiai muslim helte sukbeina ding sepaih siing 6 val leh sum tamtak bei in douna ana panta hi.
China apan Tibet gam zalenna din Buddhist monk khat Nepal gamkhawpi Kathmandu ah amah leh amah mei in kihal lum hi. Kum 2009 a kipan tunitan in Tibet zalenna deih ziaka kihallum mi 100 chingta hi.
Los Angeles Police Department a semlui tual that a kigolh dia muanmawh Christopher Dorner naktak a kibukna zonkhiak ahih nung in, Police in amah hiding gintak khat mukhia uhi. Police in gamlak a cabin meikatna mun ah thauging azak phet uh delh ngal ua, cabin sungah mihing taksa naktak a meikuang in a katsiat khat mukhia uhi. Police in Christopher omna theizou in sawtsim a omnung un sum tanpha zangin a kibukna hilh theite kiang million dollar 1 piak ding chiamna leng zanlam in bawlta uhi.
Catholic Pope Benedict the 16 in ASH MASS a hun nunung pen dingin sai hi. Vatican thusuak in a gen dan in, Pope kitawpna ziak pen lungtang damlouhna leh huai tawh kisai a lungphu panpihtu dia battery leng thuahsak a chih banah, Vatican city in taksa hatlouh ziak a Pope panmun tawpsan dingin thuzawh hetlou ahih dan gen hi. Pope in ahih leh Catholic saptuam hoih zawksem na ding ngaihtuahna hi’n Mass neihna hun ah gen khia hi.
Assam state sungah mun khat ah Election om ding deihlou a kiphin pawlte sepaihte’n thau in kap uhi. Hiai sepaihte thaukhah ziak in mi 9 kaplup khak in om uhi’n kigen hi.
European Union Agriculture ministers te’n Sakolsa zuakna ziaka thubuai gen khawmna Brussels ah neih sawm uhi. Britain gam apan bawngsa kizuakna bawm sunga sakolsa kihel dia gintakna thuthang a om nung Europe gam tuamtuam pehsawn a, tuni tan in gam 16 ah hiai thubuai suikhiakna paitou lellel hi.
Tagah naupang khoi a nasem France mi 2 jail ah kum 2 sung taang ding thutan khum in om uhi. A kigen danin hiai nasem 2te’n Tumlam gamte kiangah a tagah khoite uh gukzuak in sumdawnna a zang uhi’n kigen hi.
US solkal ukna nuai a Pacific tuikulh a om Guam khua ah tem a kidawtlupna huaisetak piang hi. Temhiam zuaka sumdawng khat in a tem zuakte zangin Japan mi 2 dawtlum in midang 11 dawt liam hi’n solkal thuneite’n gen uhi.
Europe gampumpi damtheihna lam suite apan ‘Lung Cancer’ ziaka misi punbeh mahmah hi’n kigen hi. A diak a numei laka breast cancer sangin Lung Cancer natna vei a sihlawh tamzaw ta hi’n expert te apan thusuak in gen hi.
Nitam lou paita Bulgaria gamsung BURGAS khua a bomb puahna thu ah Bulgaria solkal suizuina nasep European Police(Europol) khut ah pesawn ta hi. Hiai bomb puakna thua kigolh dia muannawh mi 2 minte leng Europol khut ah pengal ua, Burgas bomb puak ah ahih leh Israeli tourists mi 5 tel in gari driver khat in sihna tuak uhi.
Spain solkal in Bullfighting tawpsan dingdan awlmawhna nei uhi. Kum teng ah hehpihna bei a bawng tamtak Bullfighting kimawlna ziakin silawh gige ngaihtuahna in Spain MP tengin Spanish cultural status zuih dia hoihlou bullfighting tawndan ngeina sukbei dingdan genkhawmna nei dingin lemsa ta uhi.