* Direct Observe Treatment (DOT) Provider te'n Training nei.
* State Surveillance Unit saina in Medical Officer te'n IDSP tawh kisai in Training nei.
* Dr. Robi Eye Specialist in Cataract Case nei mi 6 te mit Operation bawlsak.
* The 2nd Integrity Leaders Football Tournament Final Match ah KNO leh UPF kimawl ding.
* L Mangkhogin Haokip IPS, SP in YPA Diamond Jubilee Flag Off ding.
* District Health Society in tukha sung in khua 7 ah Mobile Medical Camp neih sawm.
* Eternal Life Ministry saina in Zomi Namni "Nampi Thumna" om ding.
* Rayburn College Academic Dean in Student te theih dia poimoh thusuah bawl.

Catholic Bishop Conference of India (CBCI) Coalition for AIDS and Related Disease te saina in tuni sunma dak 10:30 in Synod Hall IB road ah TB damdawi tawh kisai a Direct Observe Treatment (DOT) provider te'n Training nei uhi. Hiai hun ah Father Jose Punnathaniyil Parish Priest in candle de-in training programme hong a, Dr. HL Liensang Chief Medical Officer leh Dr. T Pumzathang District TB Officer in TB natna neite'n DOT provider te muhngei a damdawi a nek uh a poimoh dan gen uhi. Technical Session hun ah Resource Person Dr. Sadhana Epidemiologist, Dr. Pankaj Thomas WHO, RNTCP Consultant leh Dr. Girish Chandra Singh RTPC in sinsak ua, teltuam ASHA, teacher, student leh inn nupi 30 tel in nitaklam in Dr. RK Laksana State TB Officer in participation certificate pekhia hi.

State Surveillance Unit, MEDL, DTE, Manipur saina in tuni sunma dak 10:30 in Chief Medical Office Conference hall ah, IDSP tawh kisai in Medical Officer te'n One Day Training nei uhi. Hiai hun ah Resource Person Dr. A Ritindra Mohan Singh Additional Director State Surveillance Unit, Dr. A Probin Singh District Surveillance Officer Imphal West leh Dr. Somorjit Singh District Surveillance Officer Imphal East in sinsak ua, Medical Officer 17 tel uhi.
District Blindness Control Society in zan a District Hospital Eye OPD a Mega Free Cataract Eye Camp a neihna ah, mitlai mu-ngou (Cataract) nei a Operation bawl ngai ding mi 8 mukhia ua, huailak ah tuni'n mi 6 te mit Dr. Robi Eye Specialist in Operation bawlsak hi. Midang 2 te'n zunkhum a neih ziak un Operation bawl nailou uhi.

Churachandpur District Sports Association (CDSA) saina in Lamka Public Ground ah The 2nd Integrity Leaders Football Tournament 2013 pailel a, tuni'n first semi final ah KNO leh KKL kimawl in, hun beitan in goal 2 tuak in kisukim ua, KNO in penalty in vualzawhna ngah uhi. second semi final ah UPF leh VSAC kimawl nawn ua, huai ah, UPF in VSAC 5-3 in zou uhi. Tuni'a semi final kimawlna hun Mangcha President Manipur Group YMA in Chief Guest hihna tawh uap hi.Zingchiang sun dak 12 in Closing Ceremony leh final match om ding a, huai ah Chief Guest in MC Mary Kom Olympic Bronze Medalist pang ding hi. Guest of Honour in Benjamin @ Benny Special Contractor and Kuki Sporting Club Manager leh CT Lian Chief Co-ordinator Lamka Traders and Self Employed Association pang ding ua, functional President in Tongjahao Kipgen President District Sports Association Sadar Hills and Vice-President All Manipur Football Association (AMFA) pang ding hi. Co-Host in Helen Kipgen Social Worker leh Sanga Hmar Social Worker pang ding ua, Special Guest in Langkhanpau Guite Chairman ADC Churachandpur leh Haokholal Hangshing Chairman ADC Sadar Hills pang ding uhi. Final Match kipatma in Exhibition Match om ding a, huai ah, ADC Sadar Hills leh ADC Churachandpur kimawl ding ua, huaizawh in final match ah KNO leh UPF kimawl ding uhi.

Young Paite Association (YPA) Diamond Jubilee saina in february 14, 2013 zinglam dak 6 in numei leh pasal ading in Marathon race om ding hi. Lamka public ground ah, zinglam dak 6 a tungkim in Peace ground Tuibuang ah kinawnzuk in huai akipan Marathon race kipan ding hi. Peace ground ah L Mangkhogin Haokip IPS, SP Churachandpur, ah Marathon taiding te flag off ding a, huai apan pasal te'n Tedim road tawn in lanva, gangpimual, mualkawi, pearsonmun, bungmual, tipaimukh road tawn in lamka pubilc ground lutding uhi. Numei te'n Peace ground a kipan tedim road tawn in New-Lamka Dorcas road tawn in Bungmual akipan Tiapimukh road tawn in Lamka public ground lutding uhi. Football final match ahihleh february 15, 2013 sunnung dak 1:30 in Lamka public ground ah om ding a, huai ah Phungzathang Tonsing Health and Family Welfare Minister, GAD and CADA Minister, Chief guest in pang ding a,Guest of Honour in Chaltonlien Amo Chairman Hill Area Committee pang ding a, Functional President in V Vungzathang Chairman Central Executive Committee YPA General Heaquaters pang ding a, Chief Host in G Thangkhosuanmung Chief of Hiangtam lamka pang ding hi.

District Health Society in tukha sung in khua 7 ah Mobile Medical Camp neih sawm uhi. Camp neih hunding bel kigen thei nailou hi. Mobile Medical Camp neihna ding te ahihleh Parbung CHC nuai a Damdei khua ah neih hiding a, Thanlon PHC nuai ah Bungpilon leh Joutung khua ah neih hiding a, Henglep PHC nuai ah Santing leh Thingkeu khua hiding a, Saikot PHC nuai ah Tuining leh Behiang PHC nuai ah Hiangtam K hiding hi. Hiai ding tawh kisai in Dr. HL Liensang Chief Medical Officer in akisaipih Medical Officer teng in Senvon Drugs House a damdawi sing 2 man chiat lakhe ding in theisak hi.
Eternal Life Ministry saina in february 20, 2013 sunma dak 10 akipan CBA Central Church New-Lamka Gouchinkhup Veng ah Zomi Namni "Nampi Thumna" om ding hi. Huai hun ah, a lunglut peuhmah telding in Lalmuan Guite Secretary Eternal Life Ministry in chialna bawl.

Rayburn College in zingchiang a Baccalaureate/Graduation Day a zatna ding tawh kisai a Rayburn College Academic Dean in Student te theih dia poimoh thusuah a bawl kimu dan in, Calss-XII leh BA/B.Com 6th Semester te sun dak 12 mangei a College tunkim ding. Class-XII student te'n Identity Card tawi chiat ding leh BA/B.Com 6th Semester te'n badge belh chiat ding in theisak a, huaiban ah, numei te tradition dress tawh kuan ding leh pasal te formal dress ahihkei leh suit tawh kuan ding in theisak hi. Zingchiang sunnung dak 12:15 in Rayburn Chapel ah Graduation Service kipan ding a, huai ah, Peter Corwin Florida USA in Graduation Speech gending a, Joshua Lalmalsawm Sanate in Graduating Student te sik-le-tang in thugen ding a, Khual Tonsing Co-ordinator Baccalaureate 2013 in Teaching Staff te sik-le-tang in thugen ding hi. Sunnung in Co-ordinator Annual Sports 2012 makaih in kipahman hawmna om ding hi.

GAMDANG THU
Roman Catholic Christian makai Benedict the 16 in taksa leh lungsim ngaihtuah gim kisa in Pope panmun apan tu khasungin kitawp sawm hi’n gen hi. Kum 85 a upa Cardinal Joseph RATZINGER kitawpna pen Vatican khangthu a kum 600 hunsung a hiai bang kitawpna amasapen ahih banah, tukum easter Sunday ma ngeingei a Pope thak ding teelna om dingin thuthang om hi. Tulel in mitamtak ten mivom nam apan ahih kei leh developing courtries apan Latin American English zeitaka pau thei khat peuh teelkhiak hidingin gintakna liantak nei uhi. Benedict the 16 in ahih leh 2005 kum a Pope tutna a luah hun in kum 78 in upa ta hi.

Syria helpawl te’n RAQQA bial sungah a 3na dingin multi purpose dam khat solkal thuneihna apan suh khe nawn uhi. Hiai tawh kiton in helpawlten Syria gamsung a nekding tui leh zatding meivak piakkhiakna mun poimawh tam zaw te luah khum ta uhi’n kigen hi.
US sepaih munpi Pentagon apan numei leh numei, pasal leh pasal kigawm a sepaih pangte ading hamphat thusuak om hi. Gay couples tel in a tate’n damdawi inn ah ki-etkolna nidang sanga thawveng zaw leh hamphatna tuamtuam mu theihna ding I.D. card tel in kidouna phual ah a nih ua kuansak phalna leng thusuak in taklang hi.

Russia gamnih kal a kituam bawlna muh theih dingin Kremlin thusuak om nawn hi. Russia gam ah zuak dingin US gam apan Bawngsa leh Voksa puaklutte mihing nekdia hoihlou chih ziakin khaktan sak in om hi. Russia gen danin America vok vulhten vok ann ah mihing adia lauhuai STIMULANT kihel chih suanlam in US apan Voksa puaklut himhim khawlsak phot ding chi’n thusuak in taklang hi. Hiai thuziak in kumtenga sameh zuakna ah US in million dollar 5 bang muhlouh lawh ding chihna suak hi.

North Korea gamsunga zinling magnitude 4.9 a hat pen zinling hilou in North Korea Nuclear test ziak hizaw ahih dan Pyongyong thusuak in hilhchian hi. South Korea news in apan kiza danin North Korea gamsung Pung Gye-ri kimvel ah nuclear test ziak in zinling bangtuk in lei kisawi hi’n gen hi. Nuclear test thumvei neihna ah United Nations in North Korea mopaih ngal a, UN Security Council in North Korea gamtatdan genkhopna neih ding sawm ngal uhi.

Tulai in Europe gamte ah Bawngsa banga Sakolsa zuakna thuthang ziakin gamkhat leh khat kikal ah ngawhtuahna pailel hi. Tuni’n Neitherlands solkal in amau gamsung ah hiai banga sumdawng a omleh a kin thei pen a mat khiakna ding suikhiatna bawl ding in thupuanna nei uhi. Hiai bang kalah France in Romania solkal leng kigolh hi a ngawhna abawl pen Romania apan naktaka nialna om hi.

Syrian leh Turkey gamgi ah bomb puak in mi 13 si uhi. Thu kizadanin, Syria gamgi a helpawlte luahna BAB AL HAWA khua ah Bus neu sunga bomb puakzak in mi 13 that a, midang tamtak in liamna tuak uh ahih dan Syria solkal thupuangtu in gen hi.