* Assam Rifle Ex-Servicemen Association of Churachandpur in 32nd Annual Assembly-Cum-Bara Khana nei.
* EBC Lamka North Division BCD in Sunday School Teachers Orientation nei.
* Chin Baptist Women Society, Golden Jubilee lopna kipan.
* JNV Entrance Test Exam ding in District sung ah Candidate 1002 om ding.
* Indigenous Forum makaih in Youth Culture tawh kisai in One Day Panel Discussion om ding hi.
* Rayburn High NCC Awards-Cum-"A" Certificate piakkhiakna om ding.
Assam Rifle Ex-Servicemen Association of Churachandpur in tuni sunnung dak 12:30 in Appolo Veng a Ex-servicemen Office ah 32nd Annual Assembly-Cum-Bara Khana nei uhi. Hiai hun Brigadier Advitya Madan Commander 27 Sector Assam Rifle leh a Zi in Chief Guest hihna tawh uhi. Brigadier Advitya Madan in a thugenna ah, Ex-Servicemen leh Widow te panpih theihna lam chikim a panpih dia mansa gige ahihdan gen a, Ex-Servicemen te'n Office ding bawlsak dia ngetna abawl uh neulua ahihdan gen in huaisang a thil thupizaw ngen ding in theisak a, Office building ding ahihleh kibawlzou pahding chi hi. 27 Sector Assam Rifle ah ATM ngak a om Ex-Servicemen te ading in Singpi leh Coffee a thon in dawntheih gige ding chi a, huaiban ah 27 Sector Assam Rifle in Programme leh Function aneih chiang in Ex-Servicemen leh Widow te manghilhlou in kichial gige ding chi hi. Damlouhna hiam ahihkei leh damdawi poimoh te'n 46 Assam Rifle ah laktheih ding chi a, Ex-Servicemen te'n na haksatna uh kisuanglah hetlou in hon gen un ka hon panpih theihna ding in chi a, maban ah Ex-Servicemen Mela kibawl ding a huai ah Medical Camp leh Pension Cell om ding a chih ban ah, Ex-Servicemen Rally leng thupitak in neih hiding chi hi. Hiai hun ah Brigadier pa Zi in Widow 31 te kithuahpihna pia hi.
EBC Lamka North Division Baptist Children Department in tuni zinglam dak 7:30 akipan Headquater Veng a Immanuel EBC Biakinn ah One Day Sunday School Teachers' Orientation nei uhi. Rev. Paukhanmang Guite Divisional Superintendent Lamka North Division in Orientation hong a, Orientation sung in Rev. Dr. Luaichinthang PDI Translator in PDI sinlaibu tawh kisai sinsak a, Lianding guite Child Co-ordinator EBC in Lasakkhawmna, Sinna leh Rapport Session makaih hi. Rev. K Kamchinkhup Director of Ministries EBC in Sunday School a Naupang te tawh hunzat dan tawh kisai sinsak a, Lamka North Division sung a Sunday School Heutu tamtak tel uhi.
New-Lamka a CBA Central Church ah zan nitak in Chin Baptist Women Society Golden Jubilee lopna kipan hi. Hiai hun ah Lucy Dimnu in " Na neihsa naa kiptakin len in" chih thupi pansan in thugen a, Chingsuanvung, Nemngaihlian leh Lalsanhim in fellowship hun makaih uhi. Zingchiang sunma dak 10 in Golden Jubilee sung honna om ding a, Rev (Retired) Dr. Hs Hatzaw in Jubilee sung hong in Pathian kiang ah lan ding a, teltuam saptuam heutu te'n Jubilee dak tumding uhi.
JNV Tuinom a Class-VI simding lakna ding in zingchiang sunma dak 11:30 in Rayburn High School New-Lamka ah Entrance Test Exam om ding hi. Entrance Test neihna ding tawh kisai a Invigilator ding te'n tuni'n rehearsal nei ua, tutung in Candidate sang le nih pha uhi.
Indigenous Forum saina in february 16, 2013 sunma dak 10 in PCI(R) Conference Hall New-Lamka ah One Day panel Discussion on "Youth Culture in the Post-Modern World: Socio-Moral Aspects" kichi om ding hi. Huai hun ah, nidang lai leh tulai a khangthak te tawndan leh tulai society dinmun ban ah, khovel khang hattak in khangthak te a sukkhak dan leh khawtang siatna tawh kisai kikupkhawmna om ding a, huaiban ah tulai khovel a, Nu-le-Pa, Civil Society, Saptuam leh Educational Institution te mohpuakna tawh kisai leng kikupkhawmna om ding hi. Huai hun ah Saptuam heutu, Student leader, Philantrophic Organisation Leader, women leader, Journalist, Online Media group leh Intellectual circle te tel in houlimna neiding uhi.
Rayburn High School New-Lamka ah february 11, 2013 zinglam dak 7 in Rayburn High NCC Awards-Cum-"A" Certificate piakkhiakna om ding. Huai hun ah Chief Guest in Rev. Khen P Tombing Principal pang ding a, Chief Host in Pauzamuan Vice-Principal pang ding hi.
Hornbill Cable Network in Kum 25 mel a muhtawh kiton in Digital in pekheta a, electric meivak paidan kibatlouh ziak a haksatna om nawnlouhna ding in Solar Energy ki-fit lel a zawhpah hiding hi. Pearsonmun, Bungmual, Dorcas Veng, Gangpimual, Tangnuam, Thingkangphai, Ngathal leh Mata area a Sub-Operator te ginatlouh ziak a Signal mu nawnlou Hornbill Subscriber te khualna in Sub-Operator thak kikoih ding hi. Akigenna area teng a Sub-Operator ding a lunglutna neite'n March 2013 mangei in Mangpu Tonsing Proprietor Hornbill Cable Network kimuhpih theih ding a, kihoulemna dungzui in, Sub-Operator te Control room tan tung ding in fibre kizansak ding hi.
GAMDANG THU
FINDUS kichi French company in Britain tel in Europe gamte ah sakol sa pen bawngsa bangin zuak uhi’n theichet in om hi. Bawngsa sangin mantawm zaw sakolsa helguk ziakin Environmental Secretary Owen Paterson in hiai tungtang ah England gamsunga sazuak leh supply teng kimuhpihna nei hi.
America gsmsung ah Vuuk huaisetak in a zuk ziakin state 6tak ah emergency puan in om hi. Lenna tel in Train leh gari tamtak taangthei lou in om ua, tenna inn siing 2 bang electric meivak kisiatlawh a, thautui zatding kiching zou nawnlou in, school leh college tamtak kikhak hi. Solkal thupuangtu in hun tamzaw inn chiat ah om ding hi’n leng gen hi.
South Pacific ocean a om Solomon Island ah zinling hattak in Tsunami alawh ziakin mihing sang6 val belhding neilou in om ua, hiai thiltung ah vangsiat huaitak in mi 13 in sihlawh uhi. Mun bitzaw beel a khawsa lellel te nekding ann kitasam mahmah uhi’n thusuak in taklang hi.
Brazil in Carnival nopbawlna tuni’n Rio de Janerio khawpi ah neipanta uhi. Nitam lou paita a Brazil gamsung Santa Maria Nightclub tuahsiatna ah mi 230 valte sih ziakin kum dang bangtak in hiai nopbawlna thupi zoulou dingin gintakna om mahleh, mihing 6val bang telpha dingin kigen hi. Hiai Brazil carnival ahih leh mipi zalenna etsakna in, lampi ah ut leh dah a kichei a laamna hun in zang uhi.
Venezuala solkal in gamsung currency BOLIVAR value tuni’n sukiam hi. Venezuala sumdinmun leh khantouhna suk hat semna ding in US dollar tawh tehin percent 33 niamzaw in bawl thak ua, aleh lamah hiai thu ziakin van man punsak in a om khak ding leng lauh thawngna leng om ngal hi.
China gamsunga Buddhist sahkhua zuite adia kumkhat lopna thupi theipen a neihsawm in kisakna pai lellel hi. Tutung a Lunar newyear ahih leh, astronomer te deihna bangin hausakna leh vangphatna om theihna dia gold leh red colour kia zangin inn chei chiat ding uhi’n kigen hi.
Kum 2001 a Indian Parliament attack thu ah mastermind hi a mat in om Mohammad Afzal Guru tuni’n Tihar Jail ah khailup leh vui in omta hi. India apan Kashmir gam zallena dia helpawl mi 5 zanga Delhi khawpi a om Indian Parliament buluh dia sawltu Afzal Guru in ahih leh President of India kiangah khelh ngaihdamna leh zahngaihna a nget pen nawlkhin sak ahih nungin capital punishment piak in om hi’n thusuak in gen hi. Hiai thu ziakin tuni’n Jammu and Kashmir sung pumpi ah curfew koih in om a, huai bangah cable TV service tengteng leng sukmit vek in om hi.