* Govindas Konthoujam Induastries Minister in Lamka a Siamgatna mun te hong enkhia.
* Manipur Presbyterian Church Synod in The 36th Session 2013 neilel.
* IB road ah Singkung kipuk in hun bangtan hiam Lampi khaktan.
* Grace Zamnu MDC Muallum in Gelead Balm Care Centre veh in kithuahpihna pia.
* ZEO Office Churachandpur ah TET application form kihawm bei.
* Veteran Sports Association of Churachandpur, Executive Member teng in Meeting neiding.
Govindas Konthoujam Industries Minister in tuni sun dak 12 in Lamka hongpha a, New-Lamka College Veng a, Lydia Self Help Group etkolna nuai a om Handloom Industries hong enkhia hi. Industries Minister in Siamgatna khawl zang a siamgan te siam a sak thugen in, gamdang a zuakkhiak dingdan lampi ngaihtuah hiding chi hi. Hiai Lydia Self Hepl Group etkolna nuai ah tulel in Siamgatna khawl 16 om hi. Industries Minister in New-Lamka apan Ngathal leh Bijang a Siamgatna mun te enkhia in nitaklam in Imphal ah kiknawn hi. Govindas Konthoujam Industries Minister ahihleh Imphal apan John B Tlangtinkhuma Director Industries, V Tualthang Additional Director Industries leh Official bangzahhiam in honzui ua, Lamka apan G Hanghal General Manager District Industries Churachandpur leh a Staff te'n kithuahpih uhi.
Manipur Presbyterian Church Synod in zan nitak akipan Lamka Chhim Presbyterian Church Lailam Veng ah " Healing Our Land" chih pansan in, The 36 Synod Session 2013 nei uhi. Tusun in vaihawmna hunzang ua, Session sung in Rev. JF Lalropuia in Pathian thugen a, Rev. Thangkhosei Baite in hasotna thugen hi. February 10, 2013 in Ordination Service om ding a, huai ah mi 1 in Pastor Ordination ngah ding a, nitak in Session khakna neiding uhi.
Tuni sunnung dak 1:10 vel in Headquater veng a Red Cross Road leh IB kisuktuahna lak ah Punjab body truck in lamzul a Gulmohar singhiang batkha in singkung kipuk hi. Singkung a zung ah kilet in IB road khaktan in kikham a, Veng sung mipi'n Singkung tumtan in singkhuah ding in kilak uhi. Singkung kipuk in vangphathuai tak in kuamah hihkhalou hi.
Grace Zamnu MDC Muallum in tuni sunnung dak 1 in New-Lamka Elim Veng a Gelead Balm Care Centre veh in Inmates te kiang ah hasotna thugen in, Imates te om chiamthawina ding in Chess board, Chinese Checker leh Ludo pia a, huaiban ah dailen buk tuang leng 2 pia in nitaklam in inmates te annekpih hi.
Board of Secondary Education Manipur (BSEM) saina nuai a March 24, 2013 a District Headquater teng a Teachers Eligibility Test (TET) Exam neihna ding in Zonal Education Office Churachandpur ah zan akipan in Application form kihawm a, tuni sunma form teng hawmbei uhi. ZEO Office staff te gendan in TET application form sang 5 vel hongtung nawn ding in gen uhi.
Veteran Sports Association of Churachandpur (VSAC) in kum 2012-2013 sung vaipaw ding kitelna nei in President ding in Sumlianthang MDC telching uhi. Vice-President Administration in BSK Tungnung, Vice-President Internal in Kaisang, Vice-President External in Siaklam, Secretary in Th. Pumjakham, Assistant Secretary in Th. Thangkhanlian, Joint Secretary Information in Malsawmpek, Joint Secretary External in Thangzasong, Joint Secretary in Lalchhuanhawma, Joint Secretary Property in Kaikhawm, Treasurer in G Ginhang leh Executive Member ding mi 13 guang uhi. Veteran Sports Association of Churachandpur Executive Member teng a masa pen ding in zingchiang sunnung dak 3 in VSAC Office Lamka Community Hall Hiangtam Lamka ah Meeting nei in annekhawm ding uhi.
GAMDANG THU.
Delhi khawpi a om IGI airport a Radar kisia in passenger puaksawm lenna tamtak ahun in lenkhe theilou uhi. Airport azat radar in flight schedule chiangtak a taklang zel mah leh, tunin flight schedule screen pen a blank ziak in, manual tak a schedule ngai a, IGI airport in ahih leh hiai bang a radar failure kumteng phial in tuak gige hi’n kigen hi.
Apaita nilaini a office kai dia a kuanna lam ah meltheihlouh te’n a kaplup uh Tunisian opposition leader vuina hun tuni’n Tunis khawpi ah thupitak in om hi. Democratic National Party makai SHOKRI BELAID kaplumtu kua pawl hiam chih tuni tan in theih khiak hinailou a, tuni’n sivuina hun ah Labour Union pawl in hiai kithahna mohpaihna in gamsung ah general strike puang ua, tunitanin police leh kiphinna nei pawl kikal ah teargas tanpha zang in kibeihna sousangtak beithei nailou lai hi.
Iraq gam khawpi Baghdad sung bazaar 2 ah bomb hattak puakzak nawn hi. Hiai mun nih a thiltung ah mi 26 in sihna tuak a, liam leh bai omzah bel kigen chiang nailou hi.
Zan khawvak dek zenin a Europe gam 27 makaiten European Union khawmpi ah budget guang ding zah genkhopna nei mahle uh, ngaihdan kibat louh ziak in thupukna la thei nailou lai uhi. Khawmpi ni 2na a ching tawh kiton in kum 2014-2020 kikal sunga budget ding trillion US dollar 1.35 hi ding in European Commission in chi mah leh, sukiam zek dia ngetna a om lai ziakin ngaihtuahna pai lellel hi’n kigen hi.
Equador ah Cancer natna apan damkaang nungak leh tangvalte a ding in fashion show om hi. Hiai hun ah nungak leh tangval kigawm mi 15 telban ua, khenkhat in cancer natna ziak a khut leh khe bai lawh a artificial limb thuah leng om uhi.
Khawvel a fooball kimawl siam a minthang Argentina gammi Lionnel Messi in kum 2018 tan Barcelona Football Club min a kimawl touzel ding in suai khin nawn hi.
Zambia gamsung mun khat ah Bus khat leh Truck khat kiphukha in gari sunga tuang passenger tel in mi 53 te’n sihna tuak uhi’n thu kiza hi.
US Federal Aviation administration in Boeing 787 dreamliner test flight theihna ding phalna penawn ta hi. Dreamliner lenna ahih leh asunga Lithium battery ginatlouh ziakin Boeing company in khawvel pumpi ah 50 bang a zuak khiaksa te, tuni tan in passenger podia service ngamlouh in omlai uhi.
Mali gam a islamist helpawl douna in ven lam manawhta mah leh, helpawl hidia gintak khat in tuni’n Algeria gamgi tawh kinaihna mun a om French sepaihte emergency checkpoint khat ah suicide bomb khat puakzak in, si leh liam zah kigen chiang nailou hi.