* The 64th Republic Day thupitak in kizang.
* Ginsuanhau MLA in Khuga Dam right side Canal kibawl thakna enkhia.
* STC/BSF in Passing Out Parade nei.
* MELC Headquater Church ah, Seminar on "Basic Building Block of Lutheran Theology" kipan.
* Upper Lamka leh Mualveng Angawadi Centre a naupang te'n annekhawm.
* DAPCU 3rd Quarterly Meeting hunding hunchiam omlou in kisuan.
* Tabitha Orphanage Home neitu Zoram Tonsing in DC tung ah kipah thugen.
* District Hospital Eye OPD ah Mega Free Cataract Eye Camp neih in om.

District Administration Churachandpur saina in January 26, 2012 zinglam dak 9:30 in Lamka public ground ah 64th Republic Day zat in om hi. Hiai hun ah Chief Guest in Jacintha Lazarus IAS DC pang a, amah guard of honour inspection a bawlzawh in India flag kaipalh in march past contingent 34 te apan salute la hi. Huaizawh in Govt. department tuamtuam in a bawl tableau display om a, huaizawh in stall leh photo gallery enkhia uhi. Assam rifle pawl in uisa siam in puakthei thil a zongkhiak dan lak in redyme of churachandpur, Kabui cultural troupe, Meitei Society leh Don Bosco Higher Secondary School in nam lam leh BSF te apan lam chi nih lahna om hi. Huaiban ah JNV student te'n India gamsung a mi thupi tuamtuam te lem lahna nei uhi. Kipahman leh Award tuamtuam piakkhiakna leng om hi. Republic Day lop ni in Kuki State Demand Committee in Public Curfew puang mahle uh Republic Day lopna bel buaina omlou in zousiang uhi.

 

IFCD minister Ngamthang Haokip in Singngat Assembly Constituency MLA Ginsuanhau mohpuakna a piak dungzui in Ginsuanhau MLA in January 26, 2013 sunnung dak 2 in Khuga Dam right side canal a nasepna enkhia hi. Khuga Dam right side canal ahihleh hunbangtan hiam akipan puahphat in om a, kilometre 20 tan beh ah tui luangsak sawm in akisaipih IFCD department in panla a, canal, baang a muanhuailouhna mun te bawl thak in om a, a tuang leh a baang lining bawl uhi. Canal puahthakna mun tuamtuam himahleh metre sang 4 vel hiding in kigen a, portion tuamtuam akikhen in contractor tuamtuam in bawl ua, Ginsuanhau MLA in quality maintain lou contractor te kiang ah, quality hoihtak a maintain ding in theisak a, January 29, 2013 a enkhe nawn ding ahihdan theisak hi.

 

Subsidiary Training Centre STC/BSF in tuni sunma dak 10 in Passing Out Parade nei uhi. Hiai hun Banshidhar Sharma Additional DG and Special DG East in chief guest hihna tawh uap in training zouthak jawan 338 te inspection bawl in salute la hi. STC/BSF ah tunitan in batch 204 in training zouta ua, milip a sim in state police constable ding in mi sing 3 sang 7, za 6 leh 90 in training zouta uhi.

 

Manipur Evangelical Lutheran Church (MELC) Headquater Zomi Colony ah tuni sunma dak 10:30 in Seminar on "Basic Building Blocks of Lutheran Theology" kipan hi. Seminar sung in Rev. Dr. Philip Baker Ph.D in sinsak a, saptuam makaite tel in zingchiang sunnung sak 3 in zouding uhi.

 

Hiangtam Lamka huapsung a Upper Lamka leh Mualveng Anganwadi Centre in naupang te tawh passed lopna leh Kumthak lopna ban ah Republic Day lopna tawh kithuah in annekhawm uhi.

 

Jacintha Lazarus IAS DC makaih a zingchiang sunma dak 11 a DC Office BRGF resource centre a District AIDS Prevention and Control Unit tawh kisai a 3rd quarterly meeting om ding kichi pen hunchiam omlou in kisuan hi.

 

The 64th Republic Day lopna hun ah Tabitha Orphanage Home in Appreciation Certificate a ngahna tung ah Tabitha Orphanage Home neitu Zoram Tonsing in Jacintha Lazarus IAS Deputy Commisioner tung ah kipah thugen hi.

 

District Blindness Control Society Churachandpur in, mitlai mu-ngou (Cataract) neite muhsuahna ding leh a thon a Operation bawl theihna ding in tuni'n District Hospital Eye OPD ah Mega Free Cataract Eye Camp nei uhi. Febuary 4, 2013 in Sagang Primary Health Centre ah om nawn ding a, Febuary 11, 2013 sunma dak 10 in District Hospital Eye OPD mah ah Camp om nawn ding hi.

 

GAMDANG THU.

MOZAMBIQUE gam ah dakkal tamtak vuahpi zu in kikawmtuahna lampi poimawh teng tel in huangvulh gante leh tenna inn tawzaw tui in a tup ziak in sungkuan tamtak mun bitzaw belh ding dan thei tuan lou in taang chip uhi. Motor boat zangin panpihna petute a tai velvel bang uah hiai tuikhang in niteng nek ding neilou in mitamtak lungkham sak mahmah hi’n kigen hi.

Iran gam a company nasem tuamtuam in tuni’n Tehrah khawpi a South Korean Embassy kong ah kiphinna nei uhi. A kigen dan in, Iran gam a company nasem te’n, South Korea capital Seoul apan van tamtak zuaksawn ding thukhak mah le uh, Dollar 70 million man tak van a thukhah uh tunitan hong tung nailou chih ziak un nasemte buai gawp ta uhi’n kigen hi.

NOVEL laibu gelh minthang JANE AUSTIN in PRIDE and PREJUDICE kichi novel 1813 kum in a bawl tukum in kum 200 pha ta mah leh tul thei nai lou lai lai hi. Sense and Sensibility Author in a gelh copy 20 million val zuakkhiak a om hiai Pride and Prejudice novel ahih leh language tuamtuam in kiteisawn a movie tan pha in le kishoot hi.

France sepaihte panpihna in Mali sepaihte galdouna in tunitan in mallam nawt in khawpi tamtak lakik zou ta uhi. Tuni’n TIMBUKTU AIRPORT aluhna uah bomb tamtak AIR TRAFFIC CONTROL TOWER ah mukhia ua, hiai bang a gamlak kikna ah Mali sepaihte pai masa sak zel ua, a zom in French sepaihte’n gamdang sepaih ahihna tawh kituak in zui uhi.

Egypt President deihlouhna a kiphinna hong om thak pen ni4 ching nawn ta hi. Cairo khawpi kia hilou in Suez leh PortSaid khawpite apehsawn ziak in State of Emergency leh nitak curfew puankhum in om ngal hi. President Morsi in amah deihlou pawlte tawh tutkhawm a kihouna nei di’n chialna bawl hi’n kigen hi.

Ethiopia capital ADDIS ABABA khawpi a African Union khawmpi member pai khawmte’n Democratic Republic of Congo gamsung buaina ah panlak ding dan genkhawm mah leh uh hiai tungtaang South Africa in a nang ziak in thupuukna la thei lou in suaikaihsa teng thaimang kik uhi.

Khawvel khangthu adia tuahsiatna nasatak zanin Brazil gam a SANTA MARIA khawpi ah tung hi. NIGHT CLUB neihna innpi sunga MUSIC tumsiam khat in stage tunga mei a chih kuang apan hong kipan meikuang in TUAILAI 230 val that hi. Thusuak in agendan in atamzaw meikhu diik ziak in si ua, huai lou in kongkhak ah pawt khe masa nuam kituhna ah mi bangzah hiam khe a siiklup khak in om uhi’n kigen hi. Police gen dan in hiai nightclub building fire safety license leng expired ta a, siluang tamtak kongkhak bul a awk ziak in kongkhak honkhiak pah zawh lou in om hi’n gen uhi.

Australia gam Queensland state ah tuikhang lian in lamlian a tupmang ziak helicopter zang in naungek tan pha AIR LIFT in om uhi. Nitam lou paita in hiai mun ah piingpei hattak in mihing 3 hinna ana lata hi.