• * Hill Town Community Hall ah Girls Education Campaign neih in om.
• * Evangelical Free Church of India (EFCI) 39th General Assembly om lel.
• * Police te'n Thau License neite pekiknawnta.
• * Simte Literature Society makaih in Simte MIL ding tungtang genkhawm.
• * Trinity College and Seminary in Convocation zang ding.
• * SYO Hall Chawkidar Quater ding bawl in New-Lamka SYO Unit Social Work.

Sarva shiksha abhiyan SSA churachandpur Girls Education Programme nuai ah tuni sunma dak 11:30 in Hill Town Community hall ah campaign programme for education for girls neih in om te hi.Hiai hun ah Khumi Gangte Co-ordinator Girls Education SSA leh Nicky Thang member Child right to education committee in sinsak ua,philantrophic organisation leh student body banah veng tuamtuam a village authority member te tel in numei naupang te school hoihtak a kaisak dingdan kikumkhawm uhi.

Evangelical Free Church of India (EFCI) 39th General Assembly zan zinglam in EFCI biakinn Sielmat ah kipan a, zan leh tuni’n business session nei uhi.Zan nitak dak 6 in Rev Chawnga Pudaite Memorial Chalpel, Sielmat ah 39th General Assembly Worship Service honna Dr Rochunga Pudaite, Moderator, EFCI in nei a, District tuamtuam a makai te apan report ngaihkhiakna om hi.Tuni zinglam dak 10 in Worship Service kipan a,huai ah Rev. Lalbiektluong, Secretary, EFCI in “Inngaitlawmna (The Mind of Humanity) chih thupi a nei in Pathian thugen hi. Sunnung dak 1 in Seminar leh laibu honna neih in om a, huai ah “Christian Generous Giving” kichi laibu Dr. Lal Rimawi Pudaite, President, Bible for the World in hong a, Dr. Rev. J. Huoplien, President, EFCI in Pathian kiang ah lan hi.Huaiban ah, “Christian Generous Giving” chih thupi pansan in Rev. Dr. Brain Kluth, Denver, USA in seminar makaih hi.Tunitak dak 6 in Worship Service om nawn ding a, huai ah Rev. Lalchawlthang Thiek, Regional Secretary, IEM in “Rawngbawlna" chih thupi pansan in thugen a, hiai khawmpi ahihleh zingchiang nitak in zousiang ding uhi.

10th Manipur Assembly Election ziak a Churachandpur district sung a police station 5 a thau license nei koihlut a om te election process zohsiang ahihnung inleng district magistrate apan piakkik nawn nang order om naikei mahleh Police te'n tuni akipan thau license neite kiang ah pekiknawn uhi.

Sim Veng a New Testament Baptist church NTBC Sunday School ah tuni sunma dak 11 in Simte Literarure Society makaite leh teacher banah mi poimoh hunkhop in Joint Meeting nei uhi.Hiai hun ah class IX leh X a Simte MIL subject ding laibu kibawl lel tungtang tel in thu poimoh tuamtuam genkhawm uhi.

Trinity College and Seminary in March 12, 2012 sunma dak 11 in Rev.Chawnga Pudaite Memorial chapel Sielmat ah Convocation zang ding uhi.Hiai hun ah Rev.Dr.Brian Kluth Denver,USA thugenpi in pang ding a, Dr.Rochunga Pudaite President Trinity College and Seminary in Degree pekhe ding hi.Tutung in Trinity College and Seminary apan Student 45 graduate ding uhi.Diploma in Theology ah student 18,Certificate in Theology ah Student 1 leh Bachelor of Theology ah Student 16 hiding hi.

Sim Veng a SYO Hall enkoltu luah ding chawkidar quarter building inn bawlna zan in kipan a,tuni’n New Lamka SYO Unit in social work in nasem uhi.SYO Hall chawkidar quarter ding ahihleh adung feet 30 asau leh avai feet 16 a lian hiding a,kalkhat sung in mipi’n social work in bawlzawh sawm uhi. SYO Hall ahihleh adung feet 250 in sau a, availam feet 180 in lian a, compound liantak nei in function om hun inleng gari tamtak compound sung ah kinga thei in Hall poimoh taksuak hi.