- Ex-Servicemen Welfare Association New-Lamka in Raising Day leh Silver Jubilee lawm.
- Siamsinpawlpi General Headquater Executive Committee in Meeting nei.
- Lamka ah Hindu sahkhua zui tamtak in Doljatra Festival zang.
- YPA Lamka Block kum 2012 akipan 2015 sung vaipaw dia telching thak a omte'n kichiamna nei.
- NYK Churachandpur saina in National Youth Corps (peace initiative) Training om ding.
Ex-Servicemen Welfare Association, New Lamka in tuni sunma dak 10 in New Lamka YPA Hall ah Raising Day cum Silver Jubilee lopna nei uhi. 1st Session zinglam dak 10 in kipan a, huai hun ah audit report leh secretary report a om banah kum 2012 akipan 2015 sung vaipaw ding kitelna nei uhi. Term masa sung a Ex-Servicemen Welfare Association member ana sisate suunna hun zatna leng om hi. Second session hun ahihleh Silver Jubilee lopna hun in kizang a, sunnung dak 1 in program pat in om a, Rev. S. Vungminthang Director of Missions EBC in Silver Jubilee honkhiakna leh Pathian kiang a latna nei hi. Hiai hun ah member paikhawmte apan thugenna ngaihkhiak in om hi.
Siamsinpawlpi General Headquarters a Executive Committee in tuni sunma dak 11 in SSPP Complex Bungmual ah meeting nei uhi. Hiai hun ah 80G a registration bawl dingdan a genkhawm in kum 2012 leh 2013 a budget ding guanna leh year plan tawh kisai leng genkhawm ua, SSPP Joint Headquarter Advisory Board leng guang ngal uhi.
Tuni Doljatra (colour Festival) ahihziak in Lamka khopi sung ah Hindu sahkhua zui tamtak inleng Doljatra Festival zang in rong chi tuamtuam kinuh in khopi sung ah lasa a lam kawm in hunnuam zang uhi. Hiai Doljatra Festival hun chiang in Hindu sahkhua zuite kia kilawplou in Christian sahkhaw zuite mah leng a kilawp pen in kipangsek hi. Doljatra Festival ziak in khopi sung ah Vaite sumbuk tamzaw kikhak in gari tai leng tawmtuan mahmah hi.
Young Paite Association YPA Lamka Block kum 2012 akipan 2015 sung vaipaw ding a apaisa Febuary 29, 2012 a nominate a omte'n Office bearer ding guang fel in tuni sunnung dak 2 in YPA general Headquater Office Hiangtam Lamka ah YPA general headquater makaih in oath taking leh charge kipiakkhiakna nei uhi. YPA Lamka Block kum 2012 akipan 2015 sung vaipaw ding a telching a omte ahihleh President T Khamchinthang, Vice-President K Thonzakam, Secretary Paukhanmawi Guite, Assistant Secretary Singnunsiam Ngaihte, Finance Secretary M Kamsuanmung leh Treasurer V Chinkhenmung te hi uhi. Amaute tuni'n V Vungzathang Central Executive committee Chairman in kichiamsak a, Pastor Jamkhanthang local pastor EBCC Hiangtam Lamka in vualzawlna ngetsak hi. Tuni'a YPA Lamka block enkai ding a kichiamna nei te'n tunung in departmental secretary ding guang nawn ding uhi. YPA lamka block sung ah Unit 17 om lel hi.
National Foundation for Communal Harmony tungtawn a CCpur District ah panpihna ngah naupangte’ enkoltu (guardian) te’n March 12, 2012 tan in document poimawh tuamtuam DC office ah submit ngaiding hi. Document submit ding te ahihleh Income Certificate, Current reading certificate (2012) leh Progress Report 2011 hiding hi’n S.Khaikhopau Ngaihte, Branch Officer Headquater, DC office apan kiza hi.
Nehru Yuva Kendra NYK Churachandpur saina in March 13 akipan 15, 2012 sung in ECA Compound K. Salbung ah National Youth Corps (Peace Initiative) Training om ding hi. Huai hun ah Churachandpur district sung a block 10 apan leh Kangpokpi apan volunteer 40 vel telding uhi.
Humanitarian Organisation for Progress and Empowerment (HOPE) in March 7, 2012 a General Body Meeting leh Election a neihna ua, kum 2012 akipan 2013 sung vaipaw dia telching thak a omte ahihleh President C Biaklian Vice-President G Pauminthang, General Secretary C Lian Langel, Assistant Secretary Timothy Hmar leh Finance Secretary T Thangkhansuan te hi uhi.
Post: David R.Tonsing.