Book Section

CHAPTER 2:

HOIHNU KA MUH MASAKPEN NI

A kum 2004 hi in ka thei. Imphal tun chiil lai ahih toh pau-le-ham bel kisiam ngellou; ann nekna ding khop leh dawr a van lei chiang a adeekna ding khop lel khawng kithei pan hi. Alehlam ah, Lamka khawng a khangkhete'n bel thei lou chi lengle mahni zatkhop pau tuamtuam kithei kimvek sim mah ahihchi'a kipau mokmok theisam in, i gennop pentak bang azuul kigenkhakha thei nimnem sam hi. Kuamah a siamsa a piang om lou hiven chi in ka kihehnem zel hi.
Tring...tring...tring...

"Hello!"
"Hello! Pau na hi hia?," numei aw khat in hon chi a, nungak ahihleh melhoih mahmah ding eive ka chi lungsim hi.
"Himah ing ei... Bangthu ahiale?," ka chi a, number theih louh in hon call la ngei khollou hinapi bangziak a diam ah ka na lapah kha mawk hi.

"Oi, ka kipak lawtel! Aircel hia na zat? Line a muh haksa
ngei e..."

"Himah e, bang na chisim a ahia?," ka chi a, mi service zat tantan va gen ka chisim hi. Ke'n zaw Aircel mah ka zang den ding; amah a leng bang hoihpen tuan ke'nte chi kawm in ka lungsim in ka na dawng ekek hi.
"Denzek apan Manipur pumpi general strike omphut chih ka za ua adik mah hia? Kou tua Guwahati Airport a omlel ung a, Imphal hong tung hile ung Lamka ah a kipaisuak thei diam?," chi in patauhna aw toh hon dong hi.

"Om eimahve... Hong kibuai khanglang ua aka. Lamka chuh gari hire thoh in a pai theih maithei diam maw."
"Nu, ka dah lua...! Pai theih kei mawkleh chu... Kou lah tua Indigo Flight a lut dekta zomah ung a kik theih lah hi lou a... Abuaihuai ka sa lua... Gari n'on na ngaihtuahsak thei diamleh, hehpihtak in, mai in? Beidong ka hita!"
Kua leng amaizen de-aw maw ka chisim a, ama'n hon theilua khat ade-aw hon hichi maingal ka chisim hi. A aw lah ka zakngei banglou ka sa zel hi. Kisuanlahhuai mahleh dot himhim ka sawm mai hi.

"Ahihleh, hon ngaisiam inla, nang kha kua e? K'on thei ngei diam?"

"Eh, ngei oh! Ka patauh luatna lam in k'ong kigenkha kei zezen a... Kei maw nu Nem hon chi leteh poilou ding ahi. Shillong apan Lamka a hong zin zual dek ka hi uh."
Tazomahlai! Nungak beek hileh zaw thanophuai deuh ding
hiven. Nu Nem... Hmnn... Nupila beek hinte a aw anemdan ka chi veve hi. Amah chauh bang lou in 'uh' chih a gensek a a pasal toh hi ngei ding eive maw chi in ka ngaihtuah a, Imphal a sawl theih ding a tanaute uh om beek lou adiam ka chisim hi.

"Hello! Na za lai hia ka gente?," hon chi a, ka ngaihtuahna ana paisau lawman ahi ngei ding a amah dawn kik ding lam ka na phawk kei hi.
"Oh! Za mah ing ei, gen zel in, nu Nem."
"Kou zaw na hon thei ngei kei ding, Manipur ka pawtsanna uh leng a sawt lawta a."
Nupi, ka theih ngeilouh hi nalaiset! General Strike hibang a khauh omlai a a paina ding uh zonsak ding chih hizomah lai...
"Shillong mah a om Nu Nem kichi khat chuh thei ing a, lah huai pen hihchi lou zel chin a hon thei lou keimah voi."
"Kou leng Lamka lamte ka dot uleh tangval feltak khat om ahi chi ua, na min toh na mobile number hon pia ua k'on contact pah mai ahi. Lamdang leng na sakha maithei, himahleh eimi khat hihna toh na hon panpih hon ngen mah ka hi."
"Nu Nem, poilou lua, hichibang ka sai mun lua. I mi-le-sate a ding a neuchik i pantheihna omleh poilou lawtel ahi," ka chi hi. Kei leh kei bang akhonung lam in kamsiam ka kisa thak sim a, ka kizumpih sim thak phiing hi.
'Tangval fel' a chih pen bel bil in za thei mahmah in, lungphu bang hong kinoh hial in taikhiat pah a gari saisak pah mai bang ka ut hi. Adiktak in, midang i panpih khak chiang in kuamah theihpihlouh in kipahgukna kinei veve ahi chih kei hinkhua mahmah ah tamveipi ka na tuak khinta a, huaiziak in hiailam thu toh kisai midang hon hilh a ngai kei hi.

"Ka kipak lawtel eleh aw, Pau. Ka lung a muang tuanlua. Nang Imphal a na omkhak ka kipak lawtel."

Kamsiam leh chihtaktakna toh hon gen in hon thathousak mahmah hi. Kintak a diankhiat a saipah fitfit ding in hoih hi. Ka phone lakhia in Contacts ah ka lutzat a, Gari Hire kichi ka en pah a, khat ka phone ngalleh hong lem pah vanglak hi. Huchi in sunnung dak khat a Tulihal Airport tung man di'n ka hilh ngal hi. General Strike om chiang in leng AIRPORT chih i takleh volunteer-te'n hon paisak zel sam uh chih leng driver kiang ah ka gen hi.

General Strike ziak in, chimhuai sim lehleng pawt lou in inn om ngai hi. Nitaklam chi'a hong tun uh chi'a hon call ding hiven, huai hun in gari number ka hilh di'a kei ka va pai sese kei mai ding chi in ka ngaihtuah hi.

Nitaklam dak 1:15 in ka phone ana ging a, mei ginat louh toh mei pai lailai am in common room ah charging in ka koih a, ka zapah kei hi. Ka inn kiangte uh naute'n, school a kai theihlouh man ua TV hong en uh hiven, innkong lam ah ka phone hong pia uhi. Ka etleh min kigelh lou number khat ahi a, kua leng a tazel de-aw chisim kawmpi in, tuni buaina ziak a hon poimoh om khathei hiven chi in, kua phawk ngellouh a kipoimohsak deuhmai in, ka la hi.

"Hello! Pau hing ei..."

"I maw Pau, na nu Nem ka hi. Kei a network om lou a ka tanu Hoihnu phone k'on zat zual ahi. Airport k'ong tungta ua gari paina ding chuh alemtang thei ding maw?"
"Oh, nu Nem. Lemtang mah ei, ka lawmte khat ka sam a Airport a hon na ngak khinta ahi. A gari number MN-01W-0385 ahi a, Bolero ngou ahi."

"Eh, nang hon zui lou na maw, Pau? Nang na omkei in anuam di'a hia? En Meitei pau i theihlouhpi a... Huai chi'a sum bangzah la ding a chihle kithei lou ban a dekzek leng ngai maithei hi a maw? Buaisim letehle n'ong pai mai diam?"
Eh, ngeitak! A hire man ding genfel pih kha hetlou keimahve chi kawm in, lin sim mah leng Changangei a om ka hihman in Airport bel nai mahmah a, kintak a kisa in ka Activa dum in ka kikhohkhe zat hi. Ka tailai in hon call nawn a himahleh gari heklai ka hihman in ka la kei a, tung pah lel ding hiveng ka chi hi. A hire man ding dawpsak khaloupi ka hihna ah kisuanglah selua in ka va pai ding hilh kik khalou a kuan mawk ana hidan ka hi maimah hi.
Airport gate tailut phet parking ticket hon na pepah ua, huchi in amai lam zuan in ka taisuk a, a awnna mun khat ah ka gari ka koih hi. Nisat luat ziak in huai kiim a omte'n niliapna mun naih in kituh bawl ua, ka gal gamla lou ah nisa in leng a haai ding a pammaih chih theih hial ding nungaknou etlawm mahmah ding ka mu pah hi.

Ka mi dawn ding kua hi peuhmah ding adiam maw chi kawm in ka dakvial hi. Meltheih muh ding om louhtak in den a nungaknou ka muh pen lam mah ah ka mit ana tuzel man hi. Hiai Meitei nungaknoute kha ana hoih theilua uh aka, ngou henhon ua, achii ulah mam zomah chi in ka lungsim ka pausak hi.

K'on gen zeklai mai ding...

Mitbulh vom liansim khat bun a, jeans khekol vom kigak hunsim litlet khat teeng in puanak ngou siangsitset silh a, amah a ngou toh kilawm mahmah hi. Phai huihkhi nungte'n a sam nalhtak hon mutleeng chiang in a khut nou ngikngek, mam hinhen in a samte huikhe zel a, mundang teng sang in huai kiim a omte mit amah lam ah om vek sim hi. Naupang chik hihmel hi a, a let chiang in bel luck peuhmah inte ka chi lungsim hi. A nu ngei leng a se hetkei a, a tanu om lou hileh bel a nu leng etchim louh ding khat ana hi veve sam hi.

Avangkim a amau lam ka et gaugau kawm in ka mi dawnte leng ka zon bawl zel hi. Eimi mel deuh mai papi khat in a gal apan a khut vaan a, kei lam hon et louh man in kua ahi de-aw ka chi a, ka mi zonte mah ka zon bawl lai hi.

Papi pen in a trolley in a vante vumzen in hon tawl zel a, a hong naih deuh simtak in, "Na mi sawlpa hong tung nailou hia?" chi in eipau chiangtak in hong paukhe kuau a, a mitbulh vom ziak in kua pentak en kawm a houpih hiam chih a theih haksa sim hi. Kei zaw hi kei ning chih bawl in pau lou in ka om hi.

"Khawl oh k'on call thak ding," chi in nupi melhoih hong paukhe phut a, "Eheu! Meiteite kisa a" ka lungsim in ka chi hi. Phone Call a bawl toh kei phone hong gin kituak gaih ahihman i ka sakhau apan ka lakhia hi.
"Hello!"
"Hello, Pau!," hon chihleh ka gal gamlalou a om nupi melhoih pen a hihlam ka theikhe phut hi.
"Eh! Kinai houpihna hang e maw!," ka chi phei a, amau omna ka va zuat phei kawm in gari hekpa ka sam ngal hi.
"Nu Nem maw nang?"
"Ka himah ei... Nang chuh Pau himah maw?"
"Himah..."
"Amah kha Pa Lian chi in sam leteh... Huaichiah hiai pen Hoihnu ahi," chi kawm in chibai ka kibuk sauhsauh uhi.
Anuam leiluai chiah kei. Amau hichi ding sa leng bel kihahsiang masa zek ding hi'ng a ka lungsim in ka chi hi. Kei lah trop deuhmai a kichei hilai; khekol tom leh T-Shirt luisim toh himai. Bangteng hileh kikhotualsak i hih chiang a zum hetlou mai.

Ka kichibai lai un Hoihnu khut letdet ut lawtel hinapi kintak in ka khahkha zezen a, hiai minu chuh ka khahsuah kei ding ka lungsim in ka chi thouthou hi. Zosuan hibang a etlawm om thei ding mah hiam ka chi hial hi.

Pa Lian in a kipahna lahna di'n Airport huangsung a dawr khat ah bangbanghiam hon nekpih a, sawtpi ana houlimpih mawk dan om lou ahihna ah nek leh dawnte ziak a kipahthu gen kawm in mangpha ka kikhak pah mai uhi. A gari hire man ding teng leng ka omkhawm sung un kipefel vek pahmai uhi.
Inn lam ka kik a, Hoihnu bangchi kimuhpih thei ding ka hia chih ka lungsim ah omden mawk hi. Pau tamlou, nuihmai leh neelhuai tuak mi khat hi in ka thei a, tanu neihsun hihtuak ahihna ah bang achi de-aw peuh ka chisim zel hi. Meihol zuak ding hiam ahihke'h niteng nektawm zong di'a zi di'a kineihpih ding in bel pammaih ka sa lua a, lai naktak a sim a huai toh kiton a beihtouh charchar ding himai ka chi hi. Tamtakte'n melhoih tui kidawn lou china unchin lah amau leng melhoih mah munuam in deih veve uh chih peuh ka ngaihtuah thethup hi.

Bangchi contact theihta ding??? Kilawp selua ka lungsim ah a lampi ding ka theikhe zou kei dek mawk hi. A lampi khat zaw om ding hiveh aw ka chi zel a lah ka thei tuankei hi. Huchih laitak in ka phone hong ging a, atawpkik thut nawn hi. Ka etleh 1 Missed Call chih ana kigelh hi. Hmnnn! Idea!
Ka call log ka en a, tuni 1:15 pm vel a call received number chuh 'MELHOIHNU Shillong' chi in ka save maive!

Hoihnu –Zalmang Lianu

Gelh leh suahkhetu: V. Ginkhenpau
©V. Ginkhenpau, 2015.

Agelhtu apan gelhthoh hiam ahihkeileh kam kisang a phalna la masaloupi a teisawn leh suahkhiat khaam ahihban ah asung a thute thaangtak a zat phal ahi kei.

Hiai a thu kigelhte phuahtawm vek ahi. A sim nopzawkna ding ngimna a hiai laibu sung a zatkhak a om minte, omdante, thiltungte ban ah mun leh mual kigente toh kituak leh kibang ataktak a omkha a om zenzenleh tupmawng hi lou in ana kituakkha ahizaw ding hi.

Laibu min: Hoihnu –Zalmang Lianu

Sutkhiat zah: Bu 500

Sutkhiatna mun: Print House, Governor Road, Imphal, Manipur.

–LATKHIATNA–

Senngek pan ka tuaidawn dong naubang hon kem a hon khamuan gige, simlei zilza a a sakmin loh puanbang ka ban louh ding, kulsin tangsa ka tun ngaih
N I A N G V U N G
(1949 – Dec. 9, 2008)
siang ah ka lankhia hi.

THU PATNA

A thupi lua leh nalh lawtuam hi lou ahihman in ka itna hinkhua mite theih a gelhkhiat ding akhenchiang in zumhuai peuh ka sa hi. Ahi a, kisiamtanna hi tuanlou in, kei tanchin apan kuahiam in zilkhiat a nei thei sam khade-aw ka chih man in ka hon gelh khe mai hi.
Itna kichi kipianpih ahi diam ka chi hial hi. I neu apan i kithuahpihte toh itna khau kilenkhawm kha chitchiat khollou hivaw. Gintak luatte leh mite'n hon demdemte uh toh bang leng kingaih khak louh khawng a omzaw hileh kilawm. Huaichiang a, kuahiamte bang a omdante ua kipan hon ngailaw ding i sakte bang in leng peuh hon na ngai hi khollou uh hileh kilawm. Akhenchiang alah i gintat louh pentak bang in hon ngai ana hi thethup zel chihkhawng om mawkmawk zel. Huihah! Theih hak ka samai...
Hmnn... Bangteng hileh, ka tanchin toh nang tanchin in kibatna a neihkhak tuak hiam ana sim himhimve maw?

CHAPTER 1.ZALMANG LUNGLEN

"Sih pha in k'on it ding... Nang lou singdang siang loubang tul ding ka geel chiang in laidip hawm e, u aw...," hon chi a, pasal toupi himahleng ka nervous sim zou mawk hi.
Banghang a nervous ka hi ding?
Ka it taktak zoh louh ziak?
Amah ka zumpih ziak?
Ka pam zek ua tute hon zak ding ka lauh ziak?
Bang pentak ziak adiam chih ka thei kei, hinapi in ka kho-ul hong pawt mawk! A mit hah nou ngingei in hon en a, en thuk ding ka chih chiang in ka nervous lua a, ka mittang a taisia hi. Ka taklam biang a khutpek nemtak in hon zawtsak a, ka maitang amah lam ah hon hei hi. Hinapi in ka chi aliing mawk hi. Gendan dang in gen leng, kuch kuch hota hain.
Ward's Lake bel nungak tangvalte a ding in mun nuamtak ahi chih ka theisuah thakthak hi. Kou tegel chauh huai singkung liantak nuai a tukhawm ka hi zenzen kei ua, ka mailam deuh ua tute ngial houh tawlnga manlou in bench tung ah nuamsa mahmah uhi. Dil gal lam ah naupangte leh a nu-le-pate uh nuamsa in innkuan-kuan in om ua, nuikhawm laihlaih uhi. Chik chiang in tuabang in ka om ding ua aw ka chi lungsim hi.
"Na pate'n kikhen ding bang in hon gen phut mawkle uh bang na chi di'a?," ka biang a khoihna khut damtak letsak kawm in ka chi a, nuisim kawm in a maitang ka en hi.
"Ka nute hon sawl ziak a k'on ngaih lah hi lou a," hon chi pah a, "Pasalte sang a numeite ginomzaw keive ua maw?," nuikawm in hon chi hi. A serious vakkei chih ka thei hi.
A thugen adik mah ahi. Hoihnu ka beih tuung in a nu-le-pa gentaklouh amah ngei in leng hon ning mahmah a, zum-le-zah khuallou a ka hel ziak a ngah hi in ka kithei tinten a, kuhkalna mah mihingte'n kilohchinpih ahi chih ka theichian mahmah hi. Kei lam a etlawmna, hoihna, hauhna leh ngaihtuntun theihna ding hiptu om lou mah ahi chih ka haih kei hi. Tua ke'n ka pom hi.
A nute'n atawp a hon hehpih lehlam zezen ua, kei lam a hong pang hial uh ahihdan leh a tanu neihsun uh milian huntawk khat aa di'a deih lua hinapi ka kuhkal luat ziak a hon na pauhial zel uh ahihdante khawng ka phawk thak vungvung hi. Huchih hunlai a hon it theih tuan louhdan Hoihnu in a hon genkhum ekek lai khawng; khovel kilumlet hial lehleng hon it thei vual tuanlou ding ahihdan a gen vatvat lai khawng; ke'n pa Lian leh nu Nem bang ka thuzoh hi di'a a muanmoh dante khawng; tangval fel leh melhoih tamtak in laithon a khakte uh hon paihkhum laikhawngte ka kitheihmoh
bawlna a sawt simta hi.
Khua hun kihei dungzui a mihing lungsim leng kihei thei zel ahihdan deihsaktute'n a hon hilhte uh bel ka lungtang ah ka vom tinten den hi.
"U Pau, bangchi e na daai ngei?," Hoihnu in awnemtak in hon chi a, a nuihmai etlawmtak hon lak hi. Huihzang nungte leh huihkhi avangkim a hong nung hiauhiaute'n a sam tang leh siang silsel a mut leengte'n ka mai hon hetkha ua, a ha kilepdan dik mahmah dawk hilhial kikal a a lei siang-san hiuhiau in a muk nel leh limchitak mai hon nomsak muh in lungsim ah thil khat kia omsak hi.
Shillong bel vot hiauhiau ahihna ah kho omdan bel romantic mahmah hi.
'Mite'n hampha! Hampha! hon chi ding' chih ka phawk hial hi. Dawnkik ding lamlam ngaihtuah manlou a en hekhawk ka hihlam ka veilam biang hon sihsak phet in ka theikhia hi.
"Hiai mun nuamsa lou na mawleh?," hon chi thak hi.
"Nuamsa lua, phuan zezen!," chi in ka nuihsan a, ka nervous chik kal a ana mang hiam chih ka thei zou kei hi. "Nang toh pheipi kihetkha a tutkhawm chih khawng a nuam lou zenzen di'n na gingta a hia?" ka chihbeh hi.
"Oi, hiai mipa!... Na joker-lua!"
"Na ngaihhuai lua hon chi ding hon kisa a..."
"K'on chi mun lawta a n'on nin zezen ding lau kei voi..."
"Ning lou e... Bangmah gen kei lengle ka lungsim ana nuam
khinkhian aka..."
"Hmnnn! Ke'n gengen ding, nang ngaikhiakhia ding chihdan in maw?"
"Ah, a gen ka siam kei," chih toh mitsisa in a muk nou ngingei tawp phei ka thuah a, ama'n leng hon nial kei hi.
Himahleh nuam hia nuam lou ka thei kei. A vot dekduk in ka thei. Ka kiang ua dil apan tui hong kitheh in ka thei a, naupang nih in hon kimawlpih uh hi in ka thei hi. Heh lua ka hihman in, "Hei, nou tegel!" ka chikhe loiloi hi. Amau bel ka heh zohkhopleh nuamsa leh kipak in nui lualua uhi.
"U Pau, midang ngaihsak dah mai ni...," Hoihnu in kun dedu kawm in aw niamchik in chikhe hialhial hi.
Kei lah heh dedeuh mai!
Atawp in ka tutna apan ka dintouh zotleh ka thousilen ka phukha a, Hoihnu leh naupangte melmuh ding kuamah om lou uhi.
Ward's Lake ngei leng Dream Lake ana hi maimah!
Zalmang lunglen zaw kei di'n anaa e... chihleh zingthoh ka thuah maimah angai hi.
Hichibang zalmang ka mat theihna ziak om ahihman in, na zak nop peuhleh ka hon hilh ding aw.
Hun na nei hia?
Na neih keileh bel buaipipi in sim ding in ka hon chi teitei kei. Na theihnop a na lunglut lam ahihleh bel simsuk ding in ka hon deihsak mahmah hi.
Ka zalmang lianu toh ka itna simthu uh hem simthu om lou in ka hon bawkhe ding awleh?
Hiaibang ahi...