“Ahongtungding Kum Sangnih leh sawmlenih, August ni 11, Zinglam dak 11 chiang in YPA Hall, New Lamka ah video album thak ‘Nampi Mosi’ leh ‘Vanglian Jehova’ honkhiakna om di ahi” chih thu ka theihin, “Khaih! Mosi suante banga nam thupi i hihdan uh zaila’n awi dek hita ni maw! Houh, Namte Pitu Mosi in Israelte Aigupta saltanna pana a pikhiak bang a eite leng Toupa Jesu’n Setan kol apan hon hotkhiak kipahpih a, Amin siangthou phatna ahi zaw diam? Ahihkeileh, simleivai a Pathian hon huai dan; hon lamkaih zel dinga; gamlei hong pallun khong di ahihdan tangkoupih tum uh le himaithei hi…” chiin kana buaipih nilouh hi. Lakhil hon hongkhia ua, ‘Nampi Mosi’ pen, gamngaihla ngaih taktak khilkhawm hong hi petmah.
Unaunu Vungkhanching’ lasak taphot ka ngaihkhiak chiang in, kum tamkuam paitaa kei tanaute, inkuan khat Teikhang khua (Mizoram) kipana Singngat a hong pem di ka va pii lai uh phawksuah in om nakkhem hi. Vuah a chiin nilouh ziakin Teikhang nuse thei pah lou maimah. Innlum zinkhiaksanna sawtsim ta himahleh, voktal, kelpa, uipi nou kai tuttut nawn tadih lou leh akpi-aktal khawng ka ban goh ziahziah ua, innlam ngaih lungzuan huaise man lou hi. Ni nga sung vel vuah hong chiin nung in nitumkuan khat kolmong ah, meisan kilang gilgial hiven, a zingchiang’ khua hongpha ding in gintakna lianpi kinei chiat hi.
A zing in khua hong phadawm deuh nguttak a, Sinzawl khua ka ban uhi. A ni nawn in bel Khuanggin khua batsuak lunggulh napiin, numei-naupang leh gaivah khawng a helpih dia hong tel uh ahihman in, deihbang a pai hat thei lou in, Khazang leh Khuanggin kikal, Tuivai lipi tunga lei kidoh – ‘Leimawi’ omna kiang ka zan tun zou ham uhi. Inkuan thum khawng lel khosakna mun ahia, “Tuilou kaih, buhsuan hun, buhlak hun leh buhsek hun lou in zaw teng kumkhua lou ua, inn lianpi neite bel tengkip uh ahi. Pu H Chinkhenthang, IAS te hausakna: Khazang khosuak ahi uh” chi uhi. Inn lianpen ah ka kikulh ua, voksa-hou toh lengmasel huan khawm gim leh thukpang a buhbel khu litlit in ngoi thungsak diak.
Ann nekkhit in haisan-lili va hai zual nang bawn omlou a; nungak hel di bek omleh chihhuai mahmah sim. Buhhum ippi kisekhawmte tung ah kingai ngeingai in meizial zialtawm zok houh, rellu bangmai in ka tep khu luailuai uhi. Liani in, kholui leh lawmvualte ngai sim zaw hi sam di hia, “ULal, lunglen chih khawng na nei ngei tei am?” chiin hon dong khanglang. Ken, “Nei chih ningniang, hon phak vanglak chiang a pulhloh dektak sek ka hi!” chia dawng leuh. Inkongtual ah ka pusuak ua, khapi tangpha ten hi…vansin lah siang ngial ven! Lawmte leh lawmngaih’ vang ngai in ka phaphet kei. Lohtheih lah a om kei a, chingzan khuam khatvei ka su puak buk mai ve!
Hulliap a ansukna-sum sung a ekteh-tut tettut amah, Pa Tailuai tapa: Chiklaipeuh a sam hawisau gige; taksa kiphut leh sekdou melpu sim zawzen; puan-ak silh ngei ngellou; ‘Tarzan’ chia ka sap sek mai pa un, “Huai hahde kelkul le bang pakta kineih ahia hia, a huchi pawngpaw vak kelkul – moon glass a deihhuai emem vele mawle!” chi kawm in a laizial sum, dorhon chia zet leitual ah ngakhia hi. Anu’n, “Muana, na laizial tumbang hemkhia oh, naupang aki palpuk kha di uh!” chi a, ka nuizak uhi. Lampaina sagolh-thagolh toh maban saupi omlai ahihna ah lup tawldam mai kha pilhuai zaw ahihmanin insung ah khat-khit-khat in ka dianglut dialdial uhi.
Zankhua hong sawt deuhdeuh a, sokhapi lah tangpha semsem. Innbang koptah vang philphial a kiphan hiven, bangvangte ah khazung hong kikhoh lut zingzeng hi. Hinna nei chi tuamtuam – tungleng hiin nuaileng hitaleh, khavak aam sam uh ahi ngei dia, aw neih teng suah in Siamtu pahtawi chilchel uhi. Ganhingte zai oih husa leh Tuivai lui tui luangging biahbiah bengseng lou in haih bingsak het lou hi. Biltaina, thawvenna leh lungnopna gen vual louh hon tun zawsop venchin, chigolhna teng bang dam vek phial in ka thei hial hi.
Huchimah bang in, “Vungkhanching kia le hilou in, lasaksiam i neih teng uh; ‘veteran-e-ranlou-e’ te lasak ngaihkhiak chiangin, lawndan tuamtuam in sakduang hon zen chiat uh ahi aw…” Zennu in le a chi ve! Banglam peuh ah, thilbangkim, ahihna taktak a i muhsiam a, i laksiam nop chiang in ningkitelna ding tawm deuh mah hitah chih in a om. Gensiat teitei tum a, bulbal neilou phunchiakna in eimah haih bingsak zawdaih ana hi hi. Awle, Gamchiam Highway kimkhat i tun toh kiton in puanbukte kaipalh chiat phot ni. Tuanglam mong lehlam ah damtak in dawn bang kituak khawm nawn ni guai.
*****