INTERVIEW WITH PU ROSANGLIANA (ZOROCK) ON 20.10.2012 AT SHILLONG

Program bawlsa a ombang in nisim 20.10.2012 (Kiginni) nitaklam dak 2:00 in Zomite lak a la/music siam leh laphuah siam a minthang, atamzaw in Zorock chi a i theih uh, Pu Rosangliana Langel, a tenna Umpling, Shillong ah Zogam.com in houlimpihna (Interview) va kinei hi. Amah khah vangsiathuaitak in aneulai a ana tagah khak ziak in unau Mizote lak ah anu toh ana khanglian a, eimi(Paite) la satam kei mahleh Mizote lak a lar mahmah a, Award tampi leng ana lata hi. Huai ban ah, mi polhnuam leh phatuamngaihna hau mahmah leng ahi hi. A bio-data tamlou leh Interview details anuai abang in i taklang di (limlak le tel in).

BIO-DATA:
Min        : Rosangliana Langel @ Zorock
Pa’ Min        : Lalngheng Langel
Pian ni        : 10.08.1956
Pianna Khua    : Khawkawn, Mizoram
Sepna        : Music Band Guitarist (Head Constable rank), BSF IG HQ, Umpling, Shillong
Zi’ Min        : Chingzahawih Langel
Tate        : Numei li (4) leh Pasal khat (1)

 
INTERVIEW DETAILS:
ZC = ZOGAM.COM, ZR = ZOROCK

ZC. I kihousa bang in Zogam.com apan ka hi ua, kihoulim kawm la hidi’n, Interview i panpah mai uh aw, Pu Sang?
ZR. Hitham e, panpah leng la.

ZC. Bangchidan a BSF a ana lutkha na hia?
ZR. Amasa in Assam Rifles (AR) a Jazz Band ah kum li (1976-1980) kava pang hi. Ka lutkhak dan ahihleh Sinzawl a ka omlai ahia, sepaih suty hongpai khat in AR a jazz band a vacancy om ahi chih hongen a, huchi in ka pa’n Leimakhong ah interview ding in honva hohpih hi. Huailai in Pu Gouzagin Manipur a Agriculture Minister ahihlai ahia, ka pa toh kithei mahmah ahihman un a commandant-pa kia’h honna gensak a, va kiching ka himai hi. AR a kasep lai 1980 in BSfte’n Guitarist di ladek uh ahi chihthu kaza kha a, huchi in Satakha, Nagaland a Interview dia kava kuanleh honna lapah uhi. Nagaland a kum 11 ka sepnung in 1991 in Shillong ah ka kisuan hi. October 2014 in ka pension ding,  onch in Head Constable rank honpia uh.

ZC. Bang ziaka nickname ZOROCK nana zat hiam?
ZR. Rangoon a Zorock Vol. I (March 1991) kabawl lai in amin di kabuai mahmah a, ka ngaihtuahtuah hi. Atomdeuh litlet lah ka deih a, huchi in nikhat sung mahmah ka ngaihtuah nung in ‘ZOROCK’ kichileh chih ka lungsim a hongkilang a, huailai in Vulmawite guitarist Pu Hmingliana toh le ka hi ua, ama kia ka genleh amah le hoih honsak mahmah a, ‘na lasakte lah rock, na hihna la Zo (Mizo)’,  honchi hi. Huai apan ZOROCK hongpiang ahi.

ZC. La na phuahte a tune leh a music analh thei mahmah a, hiai te nang idea ngen hia?
ZR. Kei idea ngen hivek mah e. Ahuchihziak a kigimpih mahmah a, asun-azan a kibuaipih ahi. Huchi kawmkal lak ah mi’ khenkhatte’n i la tune/music apan hoih asak teng uh select a, milak a siamtak a vasak chiang ua zaw siamtawk le u leng ngaithupi khawllou ka hi.

ZC. Album bangzah na bawlta a? A la-te lak ah nalh na sak bik leh a ziak hongen ve mo.
ZR. Album 11(eleven) ka bawlta a, huaite lak ah Zorock Vol. I alohching pen. Ka la deihpen ahihleh kazi adia kaphuah “Ka Thai” ahi. Himahleh tunaichin apan in kala phuah thak “Chunnu” (ka nu adia ka phuah) in honzou mahmah hi in ka thei. (A hollow guitar honla khia in, ala leng honsa ngal hi, athu ahoih in asiam mahmah ve).

ZC. Tu’n Album bawllel/bawldek na nei hialeh?
ZR. Tu’n Album nih (2) “Ka zinna”  leh “Chunnu”  chih ka bawllellel a, a producer dile omsa ahita.

ZC. Mizoram ah na lasak siamna ziak in Recognition leh Award bangbang na mu ta a?
ZR. Ka lasak siam ziak a Mizoram a Award tuamtuam ka muhte anuai a bang in aw:  
i) 1993 in Mizo Zaimi Inzawmkhawm (MZI) (All Mizo Singers Association), Aizawl apan ‘Best Male Singer’ Award.
ii) 1994 in Lelte Award apan ‘Song of the Year’ Award (“Ka Rose par” ).
iii) 2007 in Event Plus (Mizoram a Newspaper liantaktak 5 kigawm a abawl uh) apan ‘Father of Mizo Rock Music’ Award.
iv) 2008 in Lelte Award apan  ‘Song of the Year’ Award (“Zoram ngaih hla”).  
v) 2009 in Lelte Award apan ‘Lifetime Achievement’ Award.
Adang veng/pawlpi khenkhat apanle Award leh pahtawina ka ngah ahunkhop a om hi.

Pu Rosangliana Awards tuam tuam te

ZC. Mizo pau lou in Zorock volume thak na bawl nawn dek hia?
ZR. A market hoihlou ahihman in bawl ka sawm tadih kei.

ZC. "Music live leh Track asak koi hoih/nuam na sa zo a?
ZR. Music live mah hoih kasa zaw. Track pen ka ngaisang theikei mawk hi. Koihiam ah kiginkholhlouh pi’n min lasa di’n honsam le uh leng track sang in hollow guitar ka telzo ding.

ZC. Lamka ah khat (1) vei bek concert hongbawl theilou di na hia?
ZR. Oct 2014 a sepna apan pension di, huaikhit lamchiah en le’eng maw, ki free tadi hiven.

ZC. Nang kha Paite-te’n le hon kineitu sak mahmah ua, akhente'n a ki-Mizo saklua bang ahon chi ua, hiai tungtang ah bang ngaihdan na nei a?
ZR. Kei ngaihdan in Mizo/Zomi/Kuki/Chin chihte khat in ka koihvek mai. Ka neulai a tagah kahihziak in Burma a kapute apem uleh kanu’n honna pempih a, huai ah kum kua bang kava om hi. Huaiziak in kanu lam a ana paikha mah ka hi. Himahleh tu’nle ka tate’n amin uah Langel akoihvek thou uh. Mizo pen in State khat nei ahihna ah amau leng aza uap theih di lamlam agelsiam ua, pau tuamtuam a paute leng Mizo a a accept theih uh poimoh kasa. Mi atamtheipen in hontheihna uh ahihnak leh  khatpeuh (Mizo/Zomi/Kuki/Chin) kichih ka accept vek.

ZC. Music toh khamtheih ki mek belh a ci nak ua, hiai toh kisai in bang ngaihdan na nei a?
ZR. Music i chih entertainment khat ahia, khamtheih toh a kizopna mahmah a om ngut hi. Kidekzoh/kisum mahmah angai. Akidek zouloute bel drug addict leh AIDS khawng vei in a ommah uhi. Keibangbang a mi kidekzou ahih uh ngai hi in ka thei.

ZC. Tulai khangthakte music a hong lunglut bang a tamta ua, bangchi bang a train a hoih di? Nangla zirna na nei hia?
ZR. Music school/institute hoihtak mah a zir apoimoh pen. Keichuh mahni a siam ka hi, Burma gam a kum kua (1963 to 1972) bang kava om a, huai apan music a lunglut in, kei leh kei ka kitoudelh hi.

ZC. Na Album masa Zorock Vol 1 leh 2 a music khenkhat, Rock/Hard Rock hon influence mah2 sap la khenkhat toh kibang sim2 om leh guitar ging in late api deuh abanga, himahleh tunai a youtube a nala thakte music paidan tuam deuh, country lam naihdeuh abang a, musiciante kikheng ziak hia, ahihkeileh nang deih bang a kikheng?
ZR. Tulai patriotic song lamdeuh phuakdia nget a ka omziak a country lam naihdeuh mah ahi.

ZC. Manipur lam a eimi lasa te nana ngai khasek hia? Lasa te lakah kua siam deuh nasa pen a?
ZR. Ka ngai vaang mahmah a, siam sakdeuh gendi ka theichiah kei.

ZC. Na la-te Gam Ngaihla leh Nute Ngaihna la bang a om a, Zawl la lam lunglut huai sa khollou nahi hia?
ZR. Lunglut huai salou sim ka hi. Tahan a nungak kava muh khat tuh Mami Varte toh kibang ahi chi in ka laphuah khat ah ka helcheuh a, huchilou tuh patriotic song/Gam Ngaihla ngen ahisim mai.

ZC. Music van (instrument) bangbang na nei a?
A. Hollow guitar chihlouh adang bangmah neilou. Electric bass guitar kaneih penle Khokawn musician khat in honngen a, kapia hi. Sepna a instrument bukimtak omvek thou.

ZC. Sepaih sung ah music band dan in na om ua, ei singtangmi music lunglut-te nou dan a sepaih sung a music band a lut ut hita le uh a criteria bangbang a? Bang hong ci lut theih di uh a?
ZR. Tuchiang in Music band lam a di atuam in Open Recruitment a omkei a, a sepaih (aniampen in GD) a lutphot ngai ahi. Qualification ahihleh Air Force ah 12th pass, BSF leh adangdang ah 10th pass hi in kathei. Ahia, na siam mahmah a, asap/athuneite kiang a na kituklut zoh hiam ahihkeileh ana semsa khat in deihsaktak a honna gensak a, siam honsak u leh alampi bel a omthou hi.

ZC. Manipur lam apan mipi'n hon nungthuap zou salou nahi hia, Zorock Vol-2 chauh Paite pau in na bawl a?  Lohching zoulou deuh hizaw hialeh?
ZR. 1994 in “Centenary Hla mawi” chih le eimi la in ka bawl a, hilele ka release kei a, Lamka lam a ka naute kiang ah ka pekkhia hi. Lamka lam a le ki omlou ahihtoh a producer di bangle poimoh a, a market di bangle et ngai ahi.

ZC. Tunai in Concert/Tour a pai nasawm hia?
ZR. Tahan leh Mizoram lam ah honzawn ommah e, himahleh khosakna bang le ngaihtuah ngai a, asum tamdeuh honpe di ahihkei uleh kapai sawm kei. Huaiban ah, pension dekta ka hia, office lam a ni 30 bang ka absent leh sing 3 val loss ka hi.

ZC. 12519S khah bangchihna ahia?
ZR. Indo-Bangladesh border a pillar no. genna ahi.

ZC. Bangchi bang in na performance min rating honbawl in nathei a?
A. Vol. I khah avek phial a hit vek ahia, ka kipak mahmah hi.

ZC. Na pension khit chiang in bang na hihsawm a? La/Music lammah ah kizat nasawm hia?
ZR. Pathian zar a zi-le-tate kep di bang kinei a, khosakna mah bangle poimoh ahihman in damliai leh la/music lam mah ah hihtheih dandan in kizat kasawm (siamna dang lah kineilou ahihman in). Huaiban ah, mi’n honchial dan inle akinga di.

ZC. Amundi chiang naikei mahleh hongtung ding March 2013 chiang in Zogam.com 10th Anniversary akizatsawm a, hon kingai mahmah ding ahihman in no’ngtel man di hia?
ZR. Den a ka genbang in pension-na dibang naita, suty saupi valak ding hitheilou di ahi. Ahia, ni 2/3 lel khawng Casual Leave (CL) lak a ahihtheihdi leh bel angaihtuahdan khat omdi’n ka gingta. Huailou in, track khawng a sak di ahihleh bel ka phur kei di.

ZC. Zogam.com site/fb nana en zelzel hia? Bangchi nasa a?
ZR. Site pen ah ka lut ngeikei a, FB ah bel ka lut zeuhzeuh. Comment di luat kathei tuankei.

ZC. Adang gendi/thukhah no’n neih a omhia leh?
ZR. Ka kipahna mahmah khat ko’n gen di. Atangpi in Lamka (CCpur) lam a eimite chitak uh kasa a, ka muanna mahmah khat a om hi. Huaiban ah, khopi a laisimte khawng ka muh apat competitive-minded deuh uh le kasa hi.

ZC. Na hun manphatak no’n zatpihna ah lungdamlua ung ei.
ZR. Keile lungdam ing.

(Zogam.com sik-le-tang in Shillong Admin Biak Phaipi, Columnist Kimbawi’ Pa leh user Son Phaipi va kikuan hi. Atanute nih(2) Rohmingthangi Langel leh Saizampuii Langel toh ana omlel laitak ahia, theitui, singpi leh nektheih limtak honneksakna uah kipah bang nak om mahmah hi.)

Zorock with daughters

Family Photo

 

VIDEOS: