Zodawn kho pamtuul bang a ngaih khua a kipan, hiai phaitual a vannuai mun minthang amun a va mu a va khoihkha diing a kinepna leh lametna neilou himahleng Toupa hoihna leh honpina ka tantuan ziak in hamphatna tang in February 15, 2011 in kei leh ka inkuante’n ka va pha thei uhi.
Feb 14 nitak dak 8:40 a Khrishna Taxi-te te kiang a zingdak 6:00 a ka omna mun uh hongtung dia ka thukhah nung in gari khamlouhna damdawi lei in pharmacy ah ka va hoh uhi. Huai nung tuh ihmut nuamtak a tawldam in, zingdak 5:00 in ka tanu neupen bang mi phawngtu in hong kizen mahmah hi. Naupang himahleh ama ni bangzah hiam paita apan lampi om a, lemtanlouhna omke’h va phak diing thu na kikamteh kha ahihman in ama nitak a thuchiang om a kipan kilawpna leh phurna in na tuamkhin thamta hidan ahi. Huchia kisa in, zingdak 6:54 in innmun nusia in Outer ring road zui in ka hong taikhia uhi.
Khatvei mahleng va phakha nailou hihna toh lungsim guk a kilawpna tak neikawm akihih ziak a diam gari bang awltai sak luatsim hun a tam thei mawk hi. A kallak a naupangte zunsuak thithe ziak mah in deihbang in a kimatelh lawmlawm kei chihdiing ahi. Huchikawm in lam tawntung a vuahzu nilhnilh den ahihna a ni sa leh kholum ek-ok sang in tuh tawl a dam zawtham chihdiing a suak hi. Sarita Vihar a Apollo Hospital a kipelh a kipan khodak in leh lampi lehlam-lehlam ka melhtuah zualzual a, etnop leh theihnop mah ka hau suk ei..
Lam sau thamtak taita, kipat tuunglai sang a tuh Taj Mahal tunna diing naizaw ta chihlak in gil kial, sung hawm ging gulgul hong kipan nawnta. Driver kiang a singpi dawnna diing a kigen leh Hotel thawveng mahmah khat ah hong khawlpih a, huai ah kihahsiang in, singpi dawn a tawldam zoh in tangzang leh navak tak in mailam ka nawtzom zel uhi.
Naupangte bang gari tuan hong chimzak gawp mansim uh chih diing in Taj Mahal gim hong nam pian ta, tungdek ta chih kammal bang hon zanuam mahmah uhi. Huchilai vel in Taj Mahal kinak gen lua, a lau man pawl bang hong om nawn tazel..ha..ha..
Amun tungta. Taxi stand apan Tonga achi uhia? Camel Cart a tuang in a gate ah ka kum ua, ticket la in a lut diingte kivolhna ah ka va dingtei uhi. A gate bul a security duty pan zanhal masa kiginni a kipan koilamlam a hong kipan hiam mi a nak tam theihlua..a chih ka za hi. Huchia check-in zou, a huangsung a nisalum a lawmte ngak a ka dinkhawllai in,.. Itna Mualsuang laklak a mi tam in a etnop leh lunggulh – hiai Mualsuang in kei leh ka inkuan adin bang lahnop/theihsak nop hon nei ahi diam aw.. chih khawng ka na ngaihtuah nilouh hi.
A kiimvel a vakkual in, a sung a Mumtaj leh a pasal han te mialsim bekbuk pi a enzou in, innlam kin a om man zong hi in kinohpi in innlum zuan in dak 3:10 vel in Taj Mahal tuh ka hon nusia uhi. 20022012.
Laigelhpa' laigelh dang:
.